An jigi b’a la ko mɔgɔ miliyɔn 12 wala 12 ni kɔ bena na Hakilijigi lajɛn na, marisikalo tile 23nan loon na. Jehova ye kunmabɔsara min di ani adamadenw bena duga minw sɔrɔ o barika la, kalankɛla bena kuma u koo la. O bena kɛ seereyaba ye an ka lonanw fɛ dɛ! (Ezayi 11:6-9; 35:5, 6; 65:21-23; Zan 3:16). Nka, kalankɛla dɔrɔn lo tɛna seereya kɛ o kooba sen fɛ. An bɛɛ be se ka lonanw bisimila ni dusudiya ye (Ɔrɔm. 15:7). Ladili dɔw filɛ:

• Kana sigi dɔrɔn ka porogramu daminɛ kɔnɔ. Nka, lonanw ani balima sumanin minw nana, u kunbɛn ni yɛlɛmisɛn ye ani u fo teriya la.

• I ye mɔgɔ minw weele ka na, i mako don u la kosɔbɛ. Nka kana dan olu dɔrɔn ma. Welelisɛbɛ dira minw ma kanpaɲi tuma na, i janto olu la fana. A ɲini mɔgɔ kuraw fɛ u ka sigi i gɛrɛfɛ. A to u ka filɛri kɛ n’i ye Bibulu kɔnɔ ani dɔnkili gafe kɔnɔ.

• Kalan bannin kɔ, n’u dɔ be ni ɲiningaliw ye, i k’a ka ɲiningaliw jaabi. N’aw ka kan ka teliya ka yɔrɔ labila kafo wɛrɛ ye, i ka labɛnw kɛ ka taga bɔ a tigi ye joona. N’a tigi ka telefɔni nimɔrɔ t’i fɛ, i be se ka fɔ ko: “Ne b’a fɛ k’a lɔn i be min miiri kalan nin koo la. An be se ka ɲɔgɔn sɔrɔ tugun cogo di?”