Yezu be mɔgɔw kalanna Alabatoso kɔnɔ Kapɛrnaum. A ko ale lo ye dumunifɛn ɲanaman ye min bɔra sankolo la. Yezu tun ye kabako kɛ ka buru ni jɛgɛ di jamaba ma Galile baji kɔrɔn fan fɛ. A tun ye min fɔ o jamaba ye, a bele tun be kumana o lo koo la.

Yezu tagara ɲɛ n’a ka kuma ye k’a fɔ ko: “Aw faaw ye maanɛ dumu kongokolon kɔnɔ, u bɛɛ ma sa wa?” O kɔ, a y’a ɲɛfɔ ko: “Dumuni ɲanaman min bɔra sankolo la, ne lo. Ni min y’o dumu, o tigi be to nii na tuma bɛɛ. Ne bena dumuni min di, o ye ne fari yɛrɛ le ye. Ne be n yɛrɛ di waasa diɲɛ ka se ka nii [ɲɛnamaya] banbali sɔrɔ.”—Zan 6:48-51.

Saan 30 Krista tile la, Yezu tun y’a fɔ Nikodɛmu ye Tɛmɛnkan Seli wagati la ko Ala ye duniɲa kanu haali fɔɔ a y’a Dencɛ di k’a kɛ Kisibaga ye. Sisan, Yezu b’a fɔ ka gwɛlɛya ko waajibi lo mɔgɔ k’ale farisogo dumu, o kɔrɔ, ka limaniya ale ka saraka koo la. O la le, mɔgɔ be se ka ɲɛnamaya banbali sɔrɔ.

Nka Yezu ye min fɔ, o ma diya mɔgɔw ye. U y’u yɛrɛ ɲininga ko: “Nin be se k’a fari di anw ma cogo di k’a dumu?” (Zan 6:52). Yezu b’a fɛ u k’a faamu ko ale be min fɔra, o ye ntalen kumaw lo ye. O kɔ, a y’a fara a kan ko:

“Ne b’a fɔ aw ye ko n’aw ma Mɔgɔ Dencɛ farisogo dumu k’a joli min, aw tena nii banbali sɔrɔ. Ni mɔgɔ min ye ne farisogo dumu ka ne joli min, o tigi bena niin banbali sɔrɔ . . . Bari ne farisogo ye dumunifɛnsɔbɛ ye, ne joli ye minnifɛnsɔbɛ ye. Ni mɔgɔ min ye ne farisogo dumu ka ne joli min, ne be to o tigi fɛ.”—Zan 6:53-56.

Yahutu minw tun be Yezu lamɛnna, miiri k’a filɛ o kuma y’u kɔnɔ gwan cogo min na! N’a sɔrɔ u y’a miiri ko Yezu b’a fɛ u ka mɔgɔ sogo dumu wala u ka Ala ka sariya tiɲɛ u kɛtɔ ka joli dumu (Zɛnɛzi 9:4; Levitiki 17:10, 11). Nka, Yezu tun t’a fɔra u ye k’u ka mɔgɔ sogo dumu ani ka joli min yɛrɛ yɛrɛ la. Yezu tun bena a farisogo dafanin di ani k’a joli bɔn k’u kɛ saraka ye. A tun b’a fɔra Yahutuw ye le ko minw b’a fɛ ka ɲɛnamaya banbali sɔrɔ, olu ka ɲi ka limaniya o saraka koo la. Yezu tun be min fɔra, a ka kalanden caaman yɛrɛ m’o faamu. U dɔw ko: “A ka kuma nunu ka gwɛlɛ dɛ! Jɔn be se ka sɔn o ma?”—Zan 6:60.

Yezu y’a ye ko a ka kalanden dɔw be ŋunuŋununa minkɛ, a y’u ɲininga ko: “O bɛ aw kunnatiɲɛ wa? Mɔgɔ Denkɛ tun bɛ yɔrɔ min na fɔlɔ, ni aw ye a yɛlɛntɔ ye ka taa yen dun? . . . Ne bɛ kuma minnu fɔ aw ye, olu ye Ni [wala hakili] ni ɲɛnamaya de ye. Nka dɔw bɛ aw cɛma minnu ma dannaya kɛ.” O kumaw kosɔn, Yezu ka kalanden caaman bɔra a kɔ ani u ma sɔn ka tugu a kɔ tugun.—Zan 6:61-64, ABM.

O kama, Yezu y’a ka ciden 12 ɲininga ko: “Aw fana b’a fɛ ka taga wa?” Piyɛri y’a jaabi ko: “An bena taga jɔn fɛ? Mɔgɔ be nii banbali sɔrɔ ele ka kuma barika la. Anw kɔni lara e la, an y’a lɔn fana ko i ye Ala ka mɔgɔɲuman ye a ye min ci.” (Zan 6:67-69). Piyɛri ye min fɔ, o ye kantigiya kuma ye dɛ! Yezu tun be kuma minw fɔra, Piyɛri ni ciden tɔɔw fana tun m’o faamu ka ɲɛ.

Piyɛri ye min fɔ, o diyara Yezu ye. Nka, a y’a fɔ ko: “Ne m’aw mɔgɔ tan ni fila woloma wa? O bɛɛ n’a ta, mɔgɔ kelen b’aw cɛma min ye Sutana ye.” (Zan 6:70). Yezu tun kaan be Zuda Isikariyɔti lo ma. Kabi o wagati, a be komi Yezu tun y’a kɔrɔsi ko Zuda Isikariyɔti y’a daminɛ ka sira jugu ta.

Siga t’a la, a diyara Yezu ye k’a lɔn ko Piyɛri ni ciden tɔɔw fari tun ma faga ani u bele tun b’a fɛ ka tugun ale kɔ. U tun b’a fɛ fana ka cidenya baara kɛ, o min be mɔgɔ kisi.