An ka kuma kanbele dɔ koo la min y’a belencɛ niin kisi. O kanbele belencɛ tun ye ciden Pol ye. An t’o kanbele tɔgɔ lɔn, nka an b’a lɔn ko a ye jagwɛlɛyako dɔ kɛ. I b’a fɛ k’a lɔn a ye min kɛ wa?—

Pol tun be kaso la Zeruzalɛmu. U tun y’a minɛ ka don kaso la sabu a tun be waajuli kɛra Yezu koo la. Pol koo tun ka gwo mɔgɔ jugu dɔw ye. O kama, u ye nanbarako dɔ labɛn a kama. U y’a fɔ ko: ‘An k’a fɔ komandan ye ko a ka sɔrɔdasiw ci u ka na ni Pol ye kititigɛso la. An bena dogo sira la, ani Pol tɛmɛtɔ, an bena a faga!’

Pol belenden ye u ka nanbarako mɛn. A tun bena mun lo kɛ do? A tagara kaso la k’o kuma fɔ Pol ye. O yɔrɔnin kelen, Pol y’a fɔ a ye ko a ka taga o nanbarako fɔ sɔrɔdasiw ka komandan ye. E ka miiri la, a tun ka nɔgɔ Pol belenden fɛ ka kuma komandan fɛ wa?— Ayi, a tun man nɔgɔ sabu o komandan tun ye mɔgɔba ye. Nka Pol belenden jaa tun ka gwɛlɛ ani a kumana komandan fɛ.

Komandan tun b’a lɔn a ka ɲi ka min kɛ jaatika! A ye sɔrɔdasi 500 bɛɛ lajɛn walisa ka Pol tanga! O suu yɛrɛ la, a ko u ka taga ni Pol ye Sezare dugu la. Yala Pol niin kisira wa?— Ɔnhɔn a niin kisira. Mɔgɔ jugu nunu ma se k’a kɛlɛ! U ka nanbarako ma ɲɛ u bolo.

O maana b’i dɛmɛ ka mun lo faamu?— E fana be se ka jagwɛlɛya kɛ i ko Pol belenden. An ka ɲi k’an jaa gwɛlɛya n’an be kumana mɔgɔw fɛ Jehova koo la. Yala i bena i jaa gwɛlɛya ka to ka kuma Jehova koo la wa?— N’i y’o kɛ, n’a sɔrɔ i bena mɔgɔ dɔ niin kisi.