Dadon kumaw
“Ala y’a daa di koo min na, minw be la Ala la, ka muɲu fɔɔ k’o sɔrɔ, aw ka olu ladege.”—EBURUW 6:12.
1, 2. Mɔgɔ limaniyanin minw koo fɔra Bibulu kɔnɔ, kɔrɔsibaga tagamakɛla dɔ tun be u jati cogo di? Mun na u bena kɛ teri sɔbɛw ye i fɛ?
KERECƐN muso dɔ ye kɔrɔsibaga tagamakɛla dɔ ka kalan lamɛn, o kɔ a ko: “Mɔgɔ minw koo fɔra Bibulu kɔnɔ, a be kuma olu koo la i ko a teri kɔrɔw lo.” O kuma tun bɛnnin lo, sabu o balimacɛ tun ye cɛkɔrɔba ye ani a ye Ala ka Kuma sɛgɛsɛgɛ ani ka mɔgɔw kalan n’a ye saan tan tan caaman kɔnɔ. O y’a to mɔgɔ limaniyanin minw koo fɔra Bibulu kɔnɔ, olu kɛra i n’a fɔ a teri kɔrɔw lo.
2 O mɔgɔ minw koo fɔra Bibulu kɔnɔ, yala u caaman tɛna kɛ teri sɔbɛw ye i fɛ wa? Yala u ka koo ye tiɲɛnko yɛrɛ yɛrɛ ye i ɲɛɛ na wa? O mɔgɔ dɔw ye Nuhun, Ibrayima, Ruti, Eliya, ani Ɛsitɛri ye. Miiri k’a filɛ n’i tun be se ka tagama, ka baro kɛ n’u ye ani k’a ɲini k’u lɔn. Miiri k’a filɛ u ka jijali kumaw n’u ka ladili nafamanw be se ka nɔɔ min to i kan!—Talenw 13:20 kalan.
3. a) Cɛɛw ni muso limaniyanin minw koo fɔra Bibulu kɔnɔ, olu ka maana kalan be se k’an nafa cogo di do? b) An bena ɲiningali jumanw lo lajɛ?
3 Tiɲɛn lo ko an bena se k’o teriya nafa sɔrɔ bɛrɛbɛrɛ “mɔgɔw tilennenw” sukununi wagati la (Kɛw. 24:15). Nka, o cɛɛw n’o muso limaniyaninw ka maana kalan be se k’an nafa hali sisan yɛrɛ. Cogo di do? Ciden Pol y’a ɲɛfɔ ko: “Ala y’a daa di koo min na, minw be la Ala la, ka muɲu fɔɔ k’o sɔrɔ, aw ka olu ladege.” (Eburuw 6:12). Pol ka kumaw be na ni ɲiningali dɔw ye: Limaniya ye mun lo ye ani mun na an mako b’a la? An be se ka mɔgɔ wɛrɛw ka limaniya ladegi cogo di? An k’o ɲiningaliw lajɛ ka sɔrɔ ka kalan daminɛ cɛɛw ni muso limaniyaninw koo la.
Limaniya ye mun lo ye ani mun na an mako b’a la?
4. Mɔgɔw ka teli ka mun lo miiri limaniya koo la? Mun na u lafilinin lo?
4 Limaniya ye jogo ɲumanba ye. An bena kalan kɛ cɛɛw ni muso minw koo la gafe nin kɔnɔ, olu tun be limaniya jati fɛɛnba ye. Bi, mɔgɔ caaman tɛ limaniya kɔrɔ tigitigi lɔn. Olu fɛ, limaniya kɔrɔ ko ka la koo dɔ la hali ni dalilu tɛ yen. Nka, u lafilinin lo. N’u ko limaniya, o kɔrɔ tɛ ka la koo dɔ la i kun fɛ. Dusukunnako dama tɛ, lannako gwansan fana tɛ. Ka la koo dɔ la i kun fɛ, farati b’o la. Dusukunnako man teli ka mɛɛn mɔgɔ kɔnɔ. Ka la Ala la, o dama tɛ bɔri kɛ sabu hali “jinaw fana lanin b’o la, u be siran fɔɔ ka yɛrɛyɛrɛ.”—Zaki 2:19.
5, 6. a) An ka limaniya basiginin be fɛɛn sifa fila jumanw lo kan, an tɛ se ka minw ye? b) Limaniya sɔbɛ basiginin lo mun lo kan? A ɲɛyira.
5 Limaniya sɔbɛ kɔrɔ ka bon n’o bɛɛ ye. An k’a filɛ Bibulu be limaniya kɔrɔ ɲɛfɔ cogo min na: “Limaniya ye nin lo ye: I jigi be fɛɛn minw na, i lanin b’a la ko i bena u sɔrɔ. I ɲɛɛ tɛ fɛɛn minw na, a gwɛnin lo i ɲɛɛ na ko u ye tiɲɛnkow ye.” (Eburuw 11:1, NW ). Pol ko limaniya basiginin be fɛɛn sifa fila kan, an tɛ se ka minw ye. A fɔlɔ, a basiginin be bi tiɲɛnkow kan an “ɲɛɛ tɛ fɛɛn minw na.” An ɲɛkisɛw tɛ se ka la sankolola tiɲɛnko dɔw kan, i n’a fɔ: Jehova Ala, a Dencɛ, ani sankolola Masaya min be kuntigiya la sisan. A filanan, an “jigi be fɛɛn minw na,” limaniya basiginin be olu lo kan: o ye fɛɛnw ye minw ma dafa fɔlɔ. Ala ka Masaya bena duniɲa kura min sigi yanni dɔɔni, an tɛ se k’o ye sisan. Komi an ɲɛɛ tɛ o fɛɛnw na ani u ma dafa fɔlɔ, yala o kɔrɔ ko an ka limaniya basiginin tɛ daliluw kan wa?
6 Ayi dɛ! Pol y’a ɲɛfɔ ko limaniya sɔbɛ basiginin lo dalilu barikamanw kan. A ye kuma min sɛbɛ ko “i lanin b’a la ko i bena u sɔrɔ,” o be se ka bayɛlɛma fana ko “seereyasɛbɛ.” Miiri k’a filɛ, mɔgɔ dɔ b’a fɛ ka luu di i ma. A be se ka lusɛbɛ di i ma ani k’a fɔ ko “I ka luu kura filɛ nin ye.” A kɔni t’a fɛ k’a fɔ ko i bena la o lusɛbɛ nin lo kan dɛ! Nka, o kɔrɔ ko sariya sira fɛ, lusɛbɛ nin ye dalilu barikaman ye min b’a yira ka gwɛ ko i ye luu nin sɔrɔ ka ban. O cogo kelen na, an ka limaniya basiginin lo dalilu minw kan, u barika ka bon ani u gwɛnin lo an ɲɛɛ na fɔɔ an b’u jati tiɲɛnkow ye.
7. Limaniya sɔbɛ kɔrɔ ko di ani a b’an lasun ka mun lo kɛ?
7 O la, limaniya sɔbɛ kɔrɔ ko an jigi siginin lo kosɔbɛ Jehova Ala kan ani an tɛ sigasiga hali dɔɔni a la. Limaniya b’a to an be Jehova jati an Faa kanutigi ye ani ka la a la ko a ka layiduw bɛɛ bena dafa, siga si t’o la. Nka, limaniya sɔbɛ tɛ dan o ma. Limaniya be komi yiri i ka kan ka min ladon walisa a kana sa. An ka kan ka an ka limaniya yira an ka kɛwalew fɛ, n’o tɛ a bena sa.—Zaki 2:26.
8. Mun na limaniya kɔrɔtanin lo?
8 Mun na limaniya kɔrɔtanin lo? Pol b’o ɲiningali jaabi ka gwɛ (Eburuw 11:6 kalan). An tɛ se k’an magwɛrɛ Jehova la wala k’an koo diya a ye ni limaniya tɛ an na. O b’a yira ko danfɛn hakilimanw danna kuun jɔnjɔn min kama, an tɛ se k’o dafa ni limaniya tɛ an na: o ye k’an magwɛrɛ an sankolola Faa Jehova la ani ka nɔɔrɔ la a kan.
9. Jehova y’a yira cogo di ko a b’a lɔn ko an mako gwɛlɛ be limaniya la?
9 Jehova b’a lɔn ko an mako gwɛlɛ be limaniya la. O kama le, a ye ɲɛyiraliw di an ma walisa an k’a lɔn cogo min na an be se ka limaniya sɔrɔ ani k’a yira. A ye cɛɛ kantigimanw sigi kerecɛn kafo kɔnɔ walisa an ka tugu u ka ɲɛyirali kɔ. A ka Kuma b’a fɔ ko: “U ka dannaya ladege.” (Eburuw 13:7, ABM ). A ye fɛɛn wɛrɛ di an ma. Pol y’a sɛbɛ ko an be ni “seere caaman” ye: cɛɛw ni musow lo, u ye ɲɛyirali ɲuman di an ma limaniya koo la galen (Eburuw 12:1). Cɛɛw ni muso limaniyanin caaman wɛrɛw be yen Pol ma kuma minw koo la Eburuw sapitiri 11nan kɔnɔ. Bibulu fanin be mɔgɔ limaniyaninw ka maana na: cɛɛw, musow, denmisɛnw ani mɔgɔkɔrɔbaw. U ka koow cogoya tun tɛ kelen ye. U ka maanaw ye tiɲɛnkow ye ani u be se ka an kalan sabu mɔgɔ caaman limaniyanin tɛ bi.
An be se ka mɔgɔ wɛrɛw ka limaniya ladegi cogo di?
10. Mɔgɔ limaniyanin minw koo fɔra Bibulu kɔnɔ, an ka kelenna kalan be se k’an dɛmɛ cogo di k’u ladegi?
10 I tɛ se ka mɔgɔ ladegi n’i m’a tigi kɔrɔsi ka ɲɛ fɔlɔ. Gafe nin kalantɔ, i bena a ye ko sɛgɛsɛgɛri caaman kɛra walisa k’i dɛmɛ k’o cɛɛw n’o muso limaniyaninw lɔn ka ɲɛ. I fana be se ka sɛgɛsɛgɛri wɛrɛw kɛ. I ka kelenna kalan na, tɛmɛ gafew ni fɛɛn wɛrɛw fɛ ka Bibulu sɛgɛsɛgɛ. I ye min kalan, jatiminɛ kɛ o kan: miiri k’a filɛ o koow kɛra yɔrɔ min na ani wagati min na. A kɛ komi i ɲɛɛ be koow kɛtɔ la, i tulo be mankanw na ani i be fɛɛnw kasa mɛnna. Min yɛrɛ kɔrɔtanin lo, o ye k’a ɲini k’o mɔgɔw dusukunnataw lɔn. A ɲini k’i yɛrɛ bila o cɛɛw ni muso kantigimanw nɔɔ na. O la, i bena la u ka koow la ka tɛmɛ fɔlɔ kan, i bena u lɔn ka ɲɛ ani u dɔw yɛrɛ bena kɛ i n’a fɔ i teri kɔrɔw.
11, 12. a) Mun lo bena a to i be Ibrayima ni Sara lɔn ka ɲɛ? b) Anɛ, Eliya ani Samuyɛli ka ɲɛyiraliw be se k’i nafa cogo di?
11 N’i sera k’u lɔn ka ɲɛ, a bena diya i ye k’u ladegi. Miiri k’a filɛ, baara kura dɔ dira i ma Jehova ka ɔriganisasiyɔn kɔnɔ. U y’a ɲini i fɛ ko i ka dɔ fara i ka cidenya baara kan cogo dɔ la. N’a sɔrɔ u y’a ɲini i fɛ ko i ka taga yɔrɔ min na waajulikɛlaw man ca. Wala u y’a ɲini i fɛ ko i ka waajuli kɛcogo fɛɛrɛ dɔ degi i tɛ min lɔn ka ɲɛ wala min ka gwɛlɛ i ma. K’a to i be miirila o baara la ani ka delili kɛ o koo la, yala Ibrayima ka ɲɛyirali tɛna i dɛmɛ wa? Ale ni Sara tun lafiyanin lo Uri dugu kɔnɔ. Nka, u sɔnna ka taga k’a to yen ani Jehova y’u duga kosɔbɛ o kosɔn. I kɛtɔ k’u ladegi, siga t’a la i bena a ye ko i b’u lɔn ka ɲɛ sisan ka tɛmɛ fɔlɔ kan.
12 O cogo kelen na, n’i gɛrɛfɛmɔgɔ dɔ be juguya kɛra i la ani o be i fari faga do? N’a sɔrɔ a b’i kɔnɔ k’i seen tigɛ kafo ka lajɛnw na. Anɛ ye min kɛ walisa Penina kana a bali ka Jehova bato, n’i be miiri o la, o bena i dɛmɛ ka desizɔn ɲuman ta. Ka fara o kan, Anɛ yɛrɛ bena kɛ i ko i teri sɔbɛ. N’i fari fagara sabu i b’a miiri ko nafa tɛ i la do? Tɔɔrɔko minw ye Eliya sɔrɔ ani Jehova y’a jigi tugu cogo min na, n’i be miiri o la, n’a sɔrɔ i bena a ye ko ele n’ale ye kelen ye. Kanbelew ni sunguruw do? Olu ka lakɔli filankuruw b’u lasun tuma bɛɛ u ka kakalaya kɛ. Eli dencɛw tun be sɔnkolonya min kɛ Jehova ka fanibugu kɔnɔ, Samuyɛli y’o koo ta cogo min na, ni kanbelew ni sunguruw y’o kalan, u bena a ye ko olu n’ale ye kelen ye.
13. Mɔgɔ minw koo fɔra Bibulu kɔnɔ, n’i be olu ka limaniya ladegi, yala o kɔrɔ ko ele ka limaniya barika ka dɔgɔ le wa? A ɲɛfɔ.
13 Mɔgɔ minw koo fɔra Bibulu kɔnɔ, n’i be olu ka limaniya ladegi, yala o kɔrɔ ko ele ka limaniya barika ka dɔgɔ le wa? Ayi dɛ! Kana ɲinɛ ko Bibulu b’an jija ko an ka mɔgɔ limaniyaninw ladegi (1 Kor. 4:16; 11:1; 2 Tes. 3:7, 9). I k’a lɔn fana ko an bena mɔgɔ minw ka maana kalan gafe nin kɔnɔ, olu dɔw yɛrɛ ye mɔgɔ wɛrɛw ka limaniya ladegi. Ɲɛyirali fɛ, an bena a ye kalansen 17nan na ko Mariyamu be Anɛ ka kuma ɲɔgɔnw fɔ. O b’a yira ka gwɛ ko a tun be Anɛ jati ɲɛyirali ɲuman ye. Yala o kɔrɔ ko Mariyamu ka limaniya barika tun ka dɔgɔ wa? Ayi dɛ! Anɛ ka ɲɛyirali ye Mariyamu dɛmɛ ka limaniya barikaman sɔrɔ. O cogo la, a sera ka tɔgɔ ɲuman sɔrɔ Jehova Ala ɲɛɛ kɔrɔ.
14, 15. Gafe nin cogoya dɔw lakali. I be se ka baara ɲuman kɛ n’a ye cogo di?
14 Gafe nin labɛnna walisa k’i dɛmɛ k’i ka limaniya barika bonya. Kalansen nataw bɔra La Tour de Garde ka barokun nunu na: “Imitez leur foi” [“U ka limaniya ladegi”]. O barokunw bɔra saan 2008 ka taga se saan 2013. Nka, fɛɛn kura dɔw farala fana. Ɲiningali dɔw labɛnna walisa k’an dɛmɛ ka baro kɛ ani ka kalan sira tagama. Jaa kulɛrilaman caaman labɛnna ka ɲɛ gafe nin kɔnɔ. Minw tun be La Tour de Garde kɔnɔ ka kɔrɔ, u ye olu labonya ani k’u cogoya lafisaya. Fɛɛn nafaman wɛrɛw farala a kɔnɔ, i n’a fɔ kartiw ani jaa min b’a yira koow kɛra wagati min na. Gafe U ka limaniya ladegi labɛnna kalan kama: an kelen n’an kelen, gwa kɔnɔ ani kafo kɔnɔ. N’a sɔrɔ a bena diya denbaya caaman ye k’a kalan dɔrɔn ni kaanba ye.
15 Mɔgɔ minw kɛra Jehova sagokɛla kantigimanw ye galen, an b’a fɛ gafe nin k’i dɛmɛ k’olu ka limaniya ladegi. I kɛtɔ k’i magwɛrɛ i sankolola Faa Jehova la, an b’a fɛ gafe nin k’i dɛmɛ fana ka dɔ fara i ka limaniya barika kan!
