Zozuwe ye Jehova ka mɔgɔw ɲɛminɛ saan caaman kɔnɔ. A sara k’a sii to saan 110. K’a to sii la, Israɛldenw tun be Jehova bato. Nka, Zozuwe sanin kɔ, u y’a daminɛ ka boliw bato i ko Kanankaw. Komi Israɛldenw ma sɔn ka tugu Jehova kɔ, Jehova y’a to Kanaan masacɛ Yabin y’u niin tɔɔrɔ. Jama ye Jehova deli a k’u dɛmɛ. O kama, Jehova ye kuntigi kura di u ma: Baraki. A tun bena jama dɛmɛ u ka kɔsegi Jehova ma.

Debora tun ye Jehova ka kiramuso ye. A ye cii bila ka Baraki weele. Jehova ka kuma tun b’a fɛ k’a lase Baraki ma. A ko: ‘I ka cɛɛ 10 000 ɲɛminɛ ka taga Yabin ka kɛlɛbolo kama Kisɔn kɔji la. O yɔrɔ la, i bena see sɔrɔ a ka kɛlɛbolo kuntigi Sizera kan.’ Baraki y’a fɔ Debora ye ko: ‘Ne bena taga ni ele bena tugu n’ kɔ.’ Debora ko: ‘N’ bena tugu i kɔ, nka a lɔn ko ele lo tɛna Sizera faga. Jehova ko muso dɔ lo bena a faga.’

Debora tugura Baraki n’a ka kɛlɛbolo kɔ ka taga Tabɔri kulu kan walisa k’u yɛrɛw labɛn kɛlɛ kama. Sizera y’o mɛn dɔrɔn, a y’a ka kɛlɛkɛwotorow n’a ka sɔrɔdasiw lajɛn kɛnɛba la. Debora  y’a fɔ Baraki ye ko: ‘Bi loon nin na, Jehova bena a to i be see sɔrɔ.’ Baraki n’a ka sɔrɔdasi 10 000 nunu ye kulu jigi ka taga Sizera ka kɛlɛbolo barikaman kama.

O kɔ, Jehova y’a kɛ Kisɔn kɔji fara. Sizera ka kɛlɛkɛwotorow donna pɔtɔpɔtɔ kɔnɔ, u tɛ sera ka bɔ. Sizera y’a ka kɛlɛkɛwotoro to yen ka boli daminɛ. Baraki n’a ka sɔrɔdasiw sera Sizera ka kɛlɛbolo kɔrɔ, nka u ma Sizera sɔrɔ! A bolila ka taga dogo muso dɔ ka fanibugu kɔnɔ, o muso tɔgɔ ko Yayɛli. Yayɛli ye nɔnɔ di a ma a y’a min ani Yayɛli y’a biri ni birifani ye. Komi a tun sɛgɛnnin lo, a sinɔgɔra. O tuma na, Yayɛli gwɛrɛla a la dɔɔni dɔɔni ka lɔgɔ gwengwe a kuun na k’a faga.

Baraki nana Sizera yɔrɔ ɲini. Yayɛli lɔra a ka fanibugu daa la k’a fɔ a ye ko: ‘Na don. I be cɛɛ min kɔ, n’ bena a yira i la.’ Baraki donna ka Sizera lanin ye, a sara. Baraki ni Debora ye dɔnkili la ka Jehova tando sabu a y’a to Israɛldenw ye see sɔrɔ u juguw kan. Saan 40 minw tugura o kɔ, Israɛldenw sigira hɛɛrɛ la.