Sɔli wolola Tarisisi ani Ɔrɔmu fasoden tun lo. Fariziɲɛ tun lo min be Yahutuw ka sariya lɔn kosɔbɛ ani kerecɛnw koo tun ka gwo a ye. A tun be kerecɛnw sama ka bɔ u ka soow kɔnɔ, cɛɛw fara musow kan ka taga u don kaso la. Tuma min na jama dimininba ye Yezu ka kalanden Etiyɛni bon ni kabakuru ye k’a faga, Sɔli yɛrɛ tun lɔnin be yen n’a b’u filɛra.

Ka kerecɛnw tɔɔrɔ ani k’u don kaso la Zeruzalɛmu, o dɔrɔn ma Sɔli ɲɛɛ fa. A ko sarakalasebagaw kuntigiba k’ale ci Damasi walisa a k’o yɔrɔ kerecɛnw fana tɔɔrɔ. Tuma min na a be surunyana o dugu la, yeelenba dɔ barila k’a lamini ani a bɔra ka ben duguma. A ye kumakan dɔ mɛn ko: ‘Sɔli, mun na i be ne tɔɔrɔla ten?’ Sɔli ko: ‘E ye jɔn ye?’ Kumakan nin ko: ‘Ne Yezu lo. Taga Damasi, i ka kan ka min kɛ, u bena o fɔ i ye.’ O yɔrɔnin kelen, Sɔli ɲɛɛw fiyenna ani u y’a bolo minɛ ka don n’a ye Damasi dugu kɔnɔ.

Kerecɛn kantigi dɔ tun be Damasi dugu la min tɔgɔ ko Ananiyasi. Yezu y’a fɔ a ye yelifɛn dɔ la ko: ‘U be sira min weele ko Siratilennin, tɛmɛ n’o ye ka taga Zuda ka soo, ani cɛɛ dɔ koo ɲininga min tɔgɔ ko Sɔli.’ Ananiyasi ko: ‘Matigi, cɛɛ nin ye koo minw bɛɛ kɛ, n’ b’o bɛɛ kala ma! A b’i ka kalandenw minɛna k’u don kaso la!’ Nka Yezu ko: ‘Taga a fɛ. Ne ye Sɔli sugandi walisa a ka kibaro diiman fɔ siya caaman ye.’

O la, Ananiyasi tagara Sɔli sɔrɔ k’a fɔ a ye ko: ‘ N’ balima Sɔli, Yezu lo ye n’ ci ka na i ɲɛɛw yɛlɛ.’ O yɔrɔnin kelen, Sɔli ɲɛɛw yɛlɛla ani a ye yeli kɛ tugun. U y’a kalan Yezu koo la ani a kɛra a ka kalanden ye. Sisan, Sɔli batizera ka kɛ kerecɛn ye. A y’a daminɛ ka waajuli kɛ Alabatosow kɔnɔ n’a  kerecɛnɲɔgɔnw ye. Tuma min na, Yahutuw y’a ye ko Sɔli be mɔgɔw kalanna Yezu koo la, miiri k’a filɛ o koo y’u kɔnɔ gwan cogo min na! U y’ a fɔ ko: ‘Cɛɛ kelen kelen nin lo tun tɛ Yezu ka kalandenw tɔɔrɔla wa?’

Saan saba kɔnɔ, Sɔli tora ka Damasikaw waaju. A koo gwoyara Yahutuw ye fɔɔ u ye fɛɛrɛ ɲini walisa k’a faga. Nka, balimaw bɔra o koo kala ma ani u y’a dɛmɛ a bolila. U y’a don sinsin dɔ kɔnɔ k’a jigi ni juru ye dugu laminikogo woo dɔ fɛ.

Tuma min na Sɔli tagara Zeruzalɛmu, a y’a ɲini ka jɛn ni balimaw ye. Nka, u tun be siranna a ɲɛ. Kalanden ɲuman dɔ tagara ni Sɔli ye cidenw fɛ. A tɔgɔ tun ko Barnabasi. A y’a fɔ u ye ko Sɔli sɔɔn yɛlɛmana tiɲɛn tiɲɛn na. Sɔli y’a daminɛ ka kibaro diiman fɔ ni Zeruzalɛmu kafo mɔgɔw ye ni kisɛya ye. Kɔfɛ, a tɔgɔ yɛlɛma ko Pol.