Elizabɛti somɔgɔ dɔ tun ye sungurunin ye min tɔgɔ ko Mariyamu. A tun be Nazarɛti, Galile mara la. Miniziyecɛ Yusufu tun y’a maminɛ. Elizabɛti kɔnɔ kalo wɔɔrɔnan na, mɛlɛkɛ Gabiriyɛli y’a yɛrɛ yira Mariyamu la. A ko: ‘I ni tile Mariyamu. Jehova ye nɛɛmaba kɛ i ye.’ Gabiriyɛli ye min fɔ, Mariyamu m’o faamu. O kama, Gabiriyɛli y’a fɔ a ye ko: ‘I bena kɔnɔ ta, ka cɛden wolo ani k’a tɔgɔ la ko Yezu. A bena kɛ Masacɛ ye. A ka masaya tɛna ban abada.’

Mariyamu ko: ‘Nka ne tɛ cɛɛ lɔn. Ne do bena se ka deen wolo cogo di?’ Gabiriyɛli ko: ‘Jehova tɛ dɛsɛ foyi la. Hakili senu bena jigi i kan. O sen fɛ, i bena deen sɔrɔ. I balimamuso Elizabɛti fana kɔnɔman lo.’ O wagati la, Mariyamu ko: ‘Ne ye Jehova ka jɔnmuso ye. O koo ka kɛ i n’a fɔ i y’a fɔ cogo min na.’

 Mariyamu tagara bɔ Elizabɛti ye dugu dɔ la, kuluyɔrɔw la. A ye Elizabɛti fo tuma min na, denɲɛnin lamagara Elizabɛti kɔnɔ. A tun fanin lo hakili senu na ani a ko: ‘Mariyamu, Jehova ye i duga. Nɛɛma lo ne fɛ ka ne Matigi bamuso sɔrɔ ne ka soo.’ Mariyamu ko: ‘Ne be Jehova tando ni n’ dusu bɛɛ ye.’ Mariyamu tora Elizabɛti fɛ kalo saba. O kɔ, a kɔsegira Nazarɛti.

Yusufu y’a mɛn tuma min na ko Mariyamu kɔnɔman lo, a tun b’a fɛ k’u ka furuko dabila. Nka, mɛlɛkɛ dɔ y’a yɛrɛ yira a la siko la ani a ko: ‘Kana siga k’a furu. A ma koo jugu foyi kɛ.’ O kama Yusufu ye Mariyamu furu ka taga n’a ye a ka soo.