KALANSEN 6
Mɔgɔ saninw be ni jigiya juman lo ye?
1. Kibaro diiman juman lo be yen mɔgɔ saninw koo la?
Tuma min na Yezu sera Betani dugu la Zeruzalɛmu gɛrɛfɛ, o y’a sɔrɔ a tericɛ Lazari tun sara a tile naani ye nin ye. Yezu ni banbagatɔ balimamusow Marita ani Mariyamu tagara kaburuda la. Dɔɔni, jamaba lajɛnna yen. Tuma min na Yezu ye Lazari lakunu, i ka miiri k’a filɛ Marita ni Mariyamu ninsɔn diyara cogo min na!—Zan 11:21-24, 38-44 kalan.
Marita tun be sukununi kibaro diiman kala ma ka ban. A tun b’a lɔn ko Jehova bena suuw lakunu walisa u ka ɲɛnamaya kɛ dugukolo kan tugun.—Zɔbu 14:14, 15 kalan.
2. Mɔgɔ saninw cogoya be di?
Ala tun y’a fɔ Adama ye ko: “I ye buguri ye, i bena kɔsegi buguri la.”—ZƐNƐSI 3:19.
Adamadenw danna ni dugukolo buguri lo ye (Zɛnɛsi 2:7; 3:19). An tɛ ni jaa dɔ ye min be to niin na an sanin kɔ. An ye danfɛn farisogolamanw lo ye. N’an sara, foyi tɛ bɔ an fari la ka to niin na. An kunsɛmɛ be toli ani an ka miiriliw be ban fana. O la, Lazari tun be cogo min na a sanin kɔ, a ma foyi fɔ o koo la sabu mɔgɔ saninw tɛ foyi kala ma.—Zaburuw 146:4; Waajulikɛla 9:5, 6, 10 kalan.
Yala Ala be mɔgɔw tɔɔrɔ tasuma na u sanin kɔ wa? Bibulu b’a yira ko mɔgɔ saninw tɛ foyi kala ma. O kama, k’a fɔ ko Ala be mɔgɔ saninw tɔɔrɔ jahanama tasumaman kɔnɔ, o ye kalan ye min be Ala tɔgɔ tiɲɛ. O miiriya dama yɛrɛ ka gwo Ala ye.—Zeremi 7:31 kalan.
Videwo nin filɛ: Mɔgɔ saninw cogoya be di?
3. Mɔgɔ saninw be se ka kuma an fɛ wa?
Mɔgɔ saninw tɛ se ka kuma ani u tɛ se ka mɛnni kɛ fana (Zaburuw 115:17). Nka, mɛlɛkɛ jugu dɔw be se ka kuma mɔgɔw fɛ ani k’a to u k’a miiri ko mɔgɔ saninw lo be kumana (2 Piyɛri 2:4). K’a ɲini ka kuma mɔgɔ saninw fɛ, Jehova b’o haramuya.—Deteronɔmu 18:10, 11 kalan.
4. Jɔn ni jɔn lo bena kunu ka bɔ suuw cɛma?
Mɔgɔ miliyɔn caaman bena kunu ka bɔ kaburuw kɔnɔ ani ka ɲɛnamaya kɛ dugukolo kan tugun. Hali minw ma Ala lɔn ani u ye kojuguw kɛ, u dɔw bena lakunu fana.—Zaburuw 37:29; Kɛwalew 24:15 kalan.
Mɔgɔ minw bena lakunu, u bena sababu sɔrɔ ka tiɲɛn lɔn Ala koo la, ka limaniya Yezu la ani ka mɛnni kɛ a fɛ ( Yirali 20:11-13). U lakununin kɔ, n’u ye koo ɲuman kɛ, u bena se ka ɲɛnamaya kɛ dugukolo kan fɔɔ abada.—Zan 5:28, 29 kalan.
5. Sukununi be mun lo yira an na Jehova koo la?
Ala y’a Dencɛ ci ka na sa an kosɔn walisa mɔgɔ saninw ka se ka sukununi jigiya sɔrɔ. O la, sukununi koo b’a yira ko Jehova b’an kanu ani ko a ye nɛɛma kɛ an ye. Ele b’a fɛ ka jɔn lo ye sukununi tuma na?—Zan 3:16; Ɔrɔmukaw 6:23 kalan.
