TUMA min na u ye Yusufu minɛ ka taga Misira jamana na, a sanda tun ye 17 dɔrɔn ye. U tagara a feere cɛɛ dɔ ma min tɔgɔ ko Potifar. Potifar be baara kɛ Misira masacɛ ye min be weele ko Farahuna.

Yusufu ye baara kɛ kosɔbɛ a matigi Potifar ye. O kama, Yusufu bonyana tuma min na, Potifar y’a bila a ka soo bɛɛ kun na. O la do, mun na Yusufu be kaso la yan? Potifar muso lo kɛra o sababu ye.

Yusufu tun cɛ ka ɲi kosɔbɛ ani Potifar muso y’a ɲini ko a ka la n’ale ye. Nka Yusufu tun b’a lɔn ko o ye kojugu ye ani a banna k’o kɛ. Potifar muso dimina kosɔbɛ. O kama, a cɛɛ nana soo tuma min na, a ye ngalon tigɛ ko: ‘Yusufu, mɔgɔ jugu nin tun b’a fɛ ka la ni ne ye!’ Potifar lara a muso ka kuma na ani a dimina kosɔbɛ Yusufu kɔrɔ. O kama a y’a minɛ k’a fili kaso la.

Dɔɔni, kaso kɔrɔsibaga y’a ye ko Yusufu ye mɔgɔ ɲuman ye. O lo y’a to a ye kasoden tɔɔw bɛɛ kalifa a ma. Kɔfɛ, Farahuna dimina a ka dɔlɔ dibaga n’a ka buru dilanbaga kɔrɔ ani a y’u don kaso la. Loon dɔ sufɛ, o fila bɛɛ sikora nka u ma u ka sikow kɔrɔ lɔn. O dugusagwɛ, Yusufu y’a fɔ ko: ‘ A’ ye aw ka sikow fɔ ne ye.’ U y’o fɔ tuma min na, Ala ye Yusufu dɛmɛ k’u ka sikow kɔrɔ fɔ u ye.

A y’a fɔ dɔlɔ dibaga ye ko: ‘Yanni tile saba, i bena bɔ kaso la ani i bena kɛ Farahuna ka dɔlɔ dibaga ye tugun.’ O la, Yusufu y’a fɔ a ye tugun ko: ‘N’i bɔra kaso la, i ka ne koo fɔ Farahuna ye ani i ka ne dɛmɛ n ka bɔ yɔrɔ nin na.’ Nka, Yusufu y’a fɔ buru dilanbaga ye ko: ‘Yanni tile saba dɔrɔn Farahuna bena i kuun tigɛ.’

O tile sabanan loon, koow kɛra i n’a fɔ Yusufu tun y’a fɔ cogo min na. Farahuna ye buru dilanbaga kuun tigɛ. Nka, dɔlɔ dibaga bɔra kaso la ani a y’a daminɛ ka baara kɛ masacɛ ye tugun. Nka a ɲinɛna Yusufu kɔ pewu-pewu. A ma a koo fɔ Farahuna ye ani Yusufu tora kaso la yen.