MUSA kɔsegira Misira tuma min na, a ye kabako nunu bɛɛ lakali a balimacɛ Arɔn ye. Musa ni Arɔn y’o kabakow kɛ k’a yira Israɛldenw na tuma min na, mɔgɔw bɛɛ lara a la ko Jehova be n’u ye.

O kɔ, Musa ni Arɔn tagara Farahuna fɛ a ka soo kɔnɔ. U y’a fɔ a ye ko: ‘Jehova, Israɛl ka Ala ko, “A to ne ka mɔgɔw ka tile saba tagama kɛ walisa u ka se ka ne bato kongokolon kɔnɔ.” ’ Nka Farahuna y’u jaabi ko: ‘Ne lanin tɛ Jehova la ani ne tɛna Israɛl to a ka taga.’

Farahuna dimina, sabu Israɛldenw tun b’a fɛ ka baara to yen ka taga Jehova bato. O kama a ye dɔ fara u ka baara kan. Israɛldenw ye Musa jalaki ko ale lo kɛra sababu ye dɔ farala u ka tɔɔrɔ kan. Musa dusu kasira, nka Jehova y’a fɔ a ye ko a kana a fari faga. A fana ko: ‘Ne bena Farahuna waajibiya a ka ne ka mɔgɔw bila ka taga.’

Musa ni Arɔn tagara Farahuna fɛ tugun. Nin seen nin na, u ye kabako dɔ kɛ. Arɔn y’a ka bere fili duguma, o kɛra saa belebeleba ye. Nka Farahuna ka hakilitigiw fana y’u ka berew fili duguma, u kɛra saaw ye. Nka a filɛ! Arɔn ka saa be Misirakaw ka saaw kununa. O bɛɛ n’a ta, Farahuna banna ka Israɛldenw bila ka taga.

O la, wagati tun sera Jehova fɛ ka koo yira Farahuna na. I b’a lɔn a ye min kɛ wa? A ye bɔnɛba wala tɔɔrɔba 10 lase Misira ma.

O tɔɔrɔ caaman kɛnin kɔ, Farahuna ye mɔgɔw ci ka taga Musa weele k’a fɔ ko: ‘Tɔɔrɔ nin lalɔ, ne bena a to Israɛldenw ka taga.’ Nka tɔɔrɔ tun mana lalɔ, Farahuna tun b’a ka miiriya yɛlɛma. A tun tɛ sira di u ma. Nka a laban, tɔɔrɔ 10nan kɔ, Farahuna ye Israɛldenw gwɛn ka taga.

I b’a lɔn o tɔɔrɔ 10 nunu kɛra min ye wa? Gafe ɲɛɛ yɛlɛma an k’o lajɛ.