A FILƐ jɔlɔkɔ be Pol bolo la, ani Ɔrɔmu sɔrɔdasi dɔ b’a kɔrɔsira. Pol be kaso la Ɔrɔmu. A be kɔnɔni kɛra Ɔrɔmu masacɛ k’a latigɛ a bena min kɛ a la. Ka Pol to kaso la, sira dira mɔgɔw ma u ka na bɔ a ye.

Tile saba Pol senin kɔ Ɔrɔmu, a ye cii di ko Yahutuw ɲɛmɔgɔ dɔw ka na bɔ ale ye. O la, Ɔrɔmu Yahutu caaman nana a fɛ. Pol ye u waaju Yezu ani Ala ka Masaya koo la. U dɔw lara a la ani u kɛra kerecɛnw ye, nka dɔ wɛrɛw ma la a la.

Sɔrɔdasi minw tun be Pol kɔrɔsi, a y’u caaman fana waaju. A ye saan fila kɛ kasobon nin kɔnɔ, ani mɔgɔ o mɔgɔ tun mana na bɔ a ye a tun b’o tigi waaju. O la, hali Ɔrɔmukaw ka masacɛ somɔgɔw ye Ala ka Masaya kibaro mɛn, ani u dɔw kɛra kerecɛnw ye.

Nka, mɔgɔ min be sɛbɛri kɛra tabali kan, jɔn lo? Timote lo. Ale fana tun be kaso kɔnɔ Masaya waajuli kosɔn, nka sisan u y’a labila. A nana yan walisa ka Pol dɛmɛ. I b’a lɔn Timote be fɛɛn min sɛbɛra wa? An k’o lajɛ.

Filipi ani Efɛzi dugu minw kofɔra maana 110nan na, i hakili b’u la wa? Pol kɛra sababu ye kerecɛn kafow sigira o duguw kɔnɔ. Sisan, k’a to kaso kɔnɔ, a be lɛtɛrɛw sɛbɛra o kerecɛnw ma. O lɛtɛrɛw be sɔrɔ Bibulu kɔnɔ ani u be weele ko Efɛzikaw ani Filipikaw. Pol b’a fɔra Timote ye a ka kan ka min sɛbɛ u teriw ma minw ye kerecɛnw ye Filipi dugu kɔnɔ.

Filipikaw tun ye Pol minɛ ka ɲɛ kosɔbɛ. U tun ye bonyafɛn dɔ ci a ma kaso kɔnɔ, ani a be u fora o kosɔn. Epaforaditi lo tun tagara o bonyafɛn di a ma. Nka, a banana fɔɔ a tun be ɲini ka sa. Sisan a kɛnɛyara ani a labɛnnin lo ka kɔsegi Filipi. Ale lo bena taga Pol ni Timote ka lɛtɛrɛ nin di Filipikaw ma.

K’a to kasobon kɔnɔ, Pol ye lɛtɛrɛ fila wɛrɛ sɛbɛ, u be sɔrɔ Bibulu kɔnɔ. Kelen cira Kɔlɔsi dugu ka kerecɛnw ma. U b’o lɛtɛrɛ weele ko Kɔlɔsikaw. A filanan cira Pol tericɛ sɔbɛ Filemɔn ma, ale fana siginin be Kɔlɔsi dugu kɔnɔ. O lɛtɛrɛ kɔnɔ, Pol be kuma Filemɔn ka baaraden Onezimu koo la.

Onezimu tun bolila ka bɔ Filemɔn fɛ ka taga Ɔrɔmu. A y’a mɛn ko Pol be kaso la Ɔrɔmu. A nana bɔ Pol ye, ani Pol y’a waaju. A ma mɛɛn, Onezimu fana kɛra kerecɛn ye. A tun bolila ka bɔ Filemɔn fɛ minkɛ, a nimisara o la sisan. O la, i b’a lɔn Pol be fɛɛn min sɛbɛra ka ci Filemɔn ma wa?

Pol be Filemɔn delila ko a ka yafa Onezimu ma. A ko: ‘Ne be kɔsegi k’a ci i ma. Nka sisan, a tɛ i ka jɔɔn dama ye tugun, kerecɛn balima sɔbɛ lo fana.’ Onezimu kɔsegira Kɔlɔsi dugu la n’o lɛtɛrɛ fila ye, a ye kelen di Kɔlɔsikaw ma ani ka tɔɔ kelen di Filemɔn ma. An ka miiri k’a filɛ cogo min na Filemɔn ninsɔndiyara k’a ye ko a ka baaraden kɛra kerecɛn ye.

Pol ye kibaro duman dɔw sɛbɛ a ka lɛtɛrɛw kɔnɔ k’u ci Filipikaw ni Filemɔn ma. A y’a fɔ Filipikaw ye ko: ‘Ne jigi b’a la ko ne bena Timote ci aw fɛ. Nka, yanni dɔɔni ne yɛrɛ fana bena na aw fɛ.’ A y’a fɔ Filemɔn ye ko: “I ka jigiyɔrɔ dɔ labɛn ne ye.”

Pol bɔnin kɔ kaso la, a tagara bɔ kerecɛn balimaw ye yɔrɔ caaman na. Nka, kɔfɛ u ye Pol minɛ k’a don kaso la tugun Ɔrɔmu. Sisan kɔni, a y’a lɔn ko u bena ale faga. O la, a ye lɛtɛrɛ ci Timote ma ko a ka banba ka na ale fɛ joona. A y’a sɛbɛ ko: ‘Ne ye kantigiya kɛ Ala ye, ani a bena ne sara.’ Saan damanin Pol faganin kɔ, Zeruzalɛmu halakira tugun. Nin seen nin na, Ɔrɔmukaw lo y’o kɛ.

Ayiwa, koo caaman wɛrɛw be sɔrɔ Bibulu kɔnɔ. Jehova Ala ye cii di ciden Zan ma ko a ka Bibulu ka kitabu labanw sɛbɛ, i n’a fɔ Yirali ka kitabu. O kitabu be koo nataw fɔ. An k’a filɛ siniɲasigi be min mara an ye.