DAWUDA ye Goliyati faga ka ban tuma min na, Israɛl ka kɛlɛdenw kuntigi Abinɛri y’a minɛ ka na n’a ye Sayuli fɛ. Dawuda koo diyara kosɔbɛ Sayuli ye. Sayuli y’a sigi a ka kɛlɛdenw kun na ani a nana to a kɔrɔ.

Loon dɔ la, kɛlɛdenw tagara Filisitikaw kɛlɛ. U kɔsegitɔ, musow bɔra ka dɔnkili la ko: “Sayuli ye mɔgɔ waa damani faga, Dawuda ye mɔgɔ waa tan tan faga.” O koo ye ɲangoya bila Sayuli la sabu musow ye bonya la Dawuda kan ka tɛmɛ ale kan. Nka, Dawuda ɲangoya ma Sayuli dencɛ Zonatan minɛ. Dawuda koo ka di a ye kosɔbɛ ani Zonatan fana koo ka di Dawuda ye. O la, u fila ye layidu ta ɲɔgɔn ye ko u bena kɛ teriw ye fɔɔ abada.

Dawuda be se gɔni la kosɔbɛ ani a ka gɔni fɔli ka di Sayuli ye. Loon dɔ la, Sayuli ka ɲangoya y’a bila ka koo juguba dɔ kɛ. Ka Dawuda to gɔni fɔ la, Sayuli y’a ka taman ta k’a bon ani k’a fɔ ko: ‘N b’a sɔgɔ ka nɔrɔ kogo la!’ Nka, Dawuda sera k’a yɛrɛ bɔ taman ɲɛɛ kɔrɔ. Loon wɛrɛ tugun, Sayuli ye Dawuda bon ka fɔn ni taman ye. O la, Dawuda y’a faamu sisan ko a ka kan k’a yɛrɛ kɔrɔsi kosɔbɛ Sayuli ma.

I hakili b’a la Sayuli tun ye layidu min ta wa? A tun y’a daa di ko mɔgɔ min sera ka Goliyati faga, a bena a denmuso di o tigi ma. Sayuli labanna k’a fɔ Dawuda ye ko a be se k’ale denmuso Mikali furu, nka a ka kan k’ale jugu Filisitika 100 faga fɔlɔ. I ka miiri k’a filɛ! Sayuli jigi tun b’a la ko Filisitikaw bena Dawuda faga le. Nka u ma se ka Dawuda faga, ani Sayuli y’a denmuso di a ma furu la.

Loon dɔ la, Sayuli y’a fɔ Zonatan n’a ka baaradenw bɛɛ ye ko a b’a fɛ ka Dawuda faga. Nka, Zonatan y’a fɔ a faa ye ko: ‘Kana koo jugu kɛ a la. A ma koo jugu si kɛ i la ka ye. Nka a ye i dɛmɛ koo bɛɛ la. A y’a yɛrɛ niin di ka Goliyati faga. I yɛrɛ y’o ye, ka ninsɔndiya.’

Sayuli sɔnna a dencɛ ka kuma ma ani a y’a daa di ko a tɛna koo jugu kɛ Dawuda la. U ye Dawuda minɛ ka na n’a ye Sayuli fɛ, ani a tora ka baara kɛ a ye i n’a fɔ fɔlɔ la. Nka loon dɔ la, ka Dawuda to gɔni fɔ la, Sayuli y’a bon tugun ni taman ye. Dawuda y’a yɛrɛ jɛngɛ ani taman tagara kogo sɔgɔ. A siɲɛ sabanan tun ye nin ye. Sisan kɔni, Dawuda y’a faamu ko a ka kan ka boli.

O suu yɛrɛ la, Dawuda bolila ka taga a yɛrɛ ka soo. Sayuli ye mɔgɔw bila walisa u ka taga a faga. Sayuli tun b’a fɛ ka min kɛ, a denmuso Mikali bɔra o kala ma. A y’a fɔ a cɛɛ ye ko: ‘N’i ma boli k’i yɛrɛ kisi bi sufɛ, sini sɔgɔma u bena i faga.’ O suu la, Mikali ye Dawuda dɛmɛ ka jigi ni finɛtiri ye soo kɔfɛ. Saan wolonfila ɲɔgɔn kɔnɔ Dawuda tora ka boli ka dogo dogo walisa Sayuli kana se k’a sɔrɔ.