KALANSEN 26
Mun na koo juguw ni tɔɔrɔkow be kɛ?
Ni gwɛrɛgwɛrɛko dɔ kɛra, mɔgɔw ka teli k’a fɔ ko “mun na o kɛra do?” O be faamu. An ninsɔn ka di k’a ye ko Bibulu b’o ɲiningali jaabi ka gwɛ.
1. Koo jugu daminɛna cogo di?
Sutana murutira Ala ma. Komi a tun b’a fɛ ka kuntigiya kɛ tɔɔw kun na, a ye cɛɛ fɔlɔ Adama n’a muso Awa lasun u murutira Ala ma fana. A ye ngalon tigɛ Awa ye walisa ka se k’a lafili (Zɛnɛzi 3:1-5). A y’a kɛ Awa y’a miiri ko Jehova b’a jɛnna fɛɛn ɲuman dɔ la. A ko adamadenw bena kɛ hɛɛrɛ la n’u ye Ala kaan bila. Sutana lo kɛra mɔgɔ fɔlɔ ye ka ngalon tigɛ: a y’a fɔ Awa ye ko a tɛna sa. O le kama Bibulu be Sutana weele ko “nkalontigɛla” ani “nkalon fa.”—Zan 8:44, Bible senuma.
2. Adama ni Awa y’a latigɛ ka mun lo kɛ?
Jehova tun ye Adama ni Awa sɔn fɛɛn caaman na. A y’a fɔ u ye ko yiri minw be Edɛn nankɔtu kɔnɔ, u be se k’u bɛɛ deen dumu, fɔɔ yiri kelenpe dama (Zɛnɛzi 2:15-17). O bɛɛ n’a ta, u y’a latigɛ k’o yiri nin deen dumu. Awa “ye dɔ tigɛ k’a dumu.” Kɔfɛ, Adama “fana y’a dumu.” (Zɛnɛzi 3:6). Komi Adama ni Awa tun ye mɔgɔ dafaninw ye, a tun man gwɛlɛ u ma ka koo ɲuman kɛ. Nka, u fila bɛɛ ye tugubanciya kɛ ka Ala kaan bila. O cogo la, u kɛra jurumutɔw ye ani u y’a yira ko u t’a fɛ Ala k’u ɲɛminɛ. U ye tɔɔrɔ caaman sɔrɔ o desizɔn kosɔn.—Zɛnɛzi 3:16-19.
3. Adama ni Awa ka desizɔn nɔfɛkow kɛra mun lo ye an ma?
Adama ni Awa ka jurumu kosɔn, u kɛra mɔgɔ dafabaliw ye, ani u y’o dafabaliya yɛlɛma u deenw bɛɛ la. Bibulu b’a fɔ Adama koo la ko: “Hakɛ daminɛna mɔgɔ kelen le sababu la diɲɛ na, saya fana nana hakɛ sababu la. O cogo la fana, saya sera mɔgɔ bɛɛ ma.”—Ɔrɔmukaw 5:12.
An be tɔɔrɔ koo caaman kosɔn. An yɛrɛ ka desizɔn juguw wala mɔgɔ wɛrɛ ka desizɔn juguw be se k’a to an be tɔɔrɔ. Tuma dɔw la, an be se ka tɔɔrɔ sɔrɔ sabu an be yɔrɔ min na ani wagati min na, o man ɲi.—Waajulikɛla 9:11 kalan.
A ƝINI KA DƆ LƆN TUGUN
Tɔɔrɔko minw b’an kan, an k’a filɛ fɛɛn min kama o tɛ Ala nɔɔ ye. An k’a filɛ fana an ka tɔɔrɔkow be min kɛ Ala la.
4. An ka tɔɔrɔkow ye jɔn lo nɔɔ ye?
Mɔgɔ caaman b’a miiri ko Ala lo be duniɲa nin marala. Nka, o ye tiɲɛn ye wa? A’ ye VIDEWO filɛ.
Zaki 1:13 ani 1 Zan 5:19 kalan. O kɔ, a’ ye ɲiningali nin kɛ ani ka baro kɛ o kan:
-
Tɔɔrɔkow ni koo jugu minw be kɛra, o ye Ala nɔɔ lo ye wa?
5. Sutana ka kuntigiya nɔfɛkow
Zɛnɛzi 3:1-6 kalan. O kɔ, a’ ye ɲiningali nunu kɛ ani ka baro kɛ u kan:
-
Sutana ye ngalon kuma juman lo fɔ?—Vɛrise 4, 5 lajɛ.
-
Sutana ye min fɔ, o b’a yira cogo di ko a b’a fɛ k’a fɔ le ko Jehova be adamadenw jɛnna fɛɛn ɲuman dɔ la?
-
Sutana ka fɔta la, adamadenw mako be Jehova ka kuntigiya la walisa ka kɛ hɛɛrɛ la wa?
Waajulikɛla 8:9 kalan. O kɔ, a’ ye ɲiningali nin kɛ ani ka baro kɛ o kan:
-
Kabi tuma min na adamadenw banna Jehova ka kuntigiya la, mun lo be kɛra duniɲa na?
-
Adama ni Awa tun ye mɔgɔ dafaninw ye ani u tun be alijɛnɛ kɔnɔ. Nka u ye mɛnni kɛ Sutana fɛ ani u murutira Jehova ma.
-
Adama ni Awa murutinin kɔ, duniɲa fara jurumukow ni tɔɔrɔkow la, ani saya sera mɔgɔ bɛɛ ma.
-
Jehova bena jurumu, tɔɔrɔ ani saya ban. O la, adamadenw bena kɛ mɔgɔ dafaninw ye ani u bena ɲɛnamaya kɛ alijɛnɛ kɔnɔ i ko a daminɛ na.
6. An ka tɔɔrɔkow be Jehova fana tɔɔrɔ
Tiɲɛn lo ko an ka tɔɔrɔkow tɛ foyi kɛ Ala la wa? An k’a filɛ masacɛ Dawuda ni ciden Piyɛri ye min sɛbɛ. Zaburuw 31:7 ani 1 Piyɛri 5:7 kalan. O kɔ, a’ ye ɲiningali nin kɛ ani ka baro kɛ o kan:
-
K’a lɔn ko Jehova b’an ka tɔɔrɔkow kala ma ani ko a b’a janto an na, o be mun lo kɛ i la?
7. Ala bena adamadenw ka tɔɔrɔkow bɛɛ ban
Ezayi 65:17 ani Yirali 21:3, 4 kalan. O kɔ, a’ ye ɲiningali nin kɛ ani ka baro kɛ o kan:
-
Tɔɔrɔko minw ye adamadenw sɔrɔ, Jehova bena u nɔfɛkow bɛɛ lalaga. Mun na o be mɔgɔ dusu saalo?
I b’a lɔn wa?
Tuma min na Sutana ye ngalon fɔlɔ tigɛ, a ye Jehova tɔgɔ tiɲɛ. A y’a to mɔgɔw k’a miiri ko Jehova tɛ Kuntigi tilennin ye ani ko a tɛ mɔgɔw kanu. Nka yanni dɔɔni, Jehova bena adamadenw ka tɔɔrɔkow bɛɛ ban. O cogo la, a ben’a tɔgɔ lafasa, o kɔrɔ, a ben’a yira ko ale ka kuntigiya ɲɔgɔn tɛ yen. Ka Jehova tɔgɔ lafasa, o ye koo ye min kɔrɔtanin lo kosɔbɛ yɛrɛ le!—Matiyo 6:9, 10.
NI MƆGƆ DƆ Y’A FƆ I YE KO: “An ka tɔɔrɔkow ye Ala ka latigɛ lo ye.”
-
I bena mun lo fɔ?
MIIRIYA JƆNJƆN
Duniɲa nin ka tɔɔrɔkow fanba ye Sutana ani Adama ni Awa nɔɔ lo ye. An ka tɔɔrɔkow be Jehova tɔɔrɔ kosɔbɛ. Yanni dɔɔni, a bena u bɛɛ ban.
I ye mun lo faamu?
-
Sutana ye ngalon kuma juman lo fɔ Awa ye?
-
Adama ni Awa ka murutili nɔfɛkow kɛra mun lo ye an ma?
-
An b’a lɔn cogo di ko an ka tɔɔrɔkow be Jehova tɔɔrɔ?
NUNU LAJƐ FANA
Jurumu ye min ye, a filɛ Bibulu be min fɔ o koo la.
Sutana ye sɔsɔliko min lawuli Edɛn nankɔtu kɔnɔ, kunnafoni wɛrɛw lajɛ o koo la.
“Pourquoi Dieu permet-il les souffrances ?” (Saan 2014, zanwiyekalo tile fɔlɔ ka Kɔrɔsili Sangaso)
A filɛ Bibulu be jaabili min di ɲiningali dɔ koo la min be mɔgɔ kɔnɔ gwan. O jaabili be mɔgɔ dusu saalo.
“Mun na Ala y’a to Naziw ye Yahutu caamanba faga? Mun na a m’o bali?” (A be sɔrɔ jw.org kan)
Tɔɔrɔko minw be kɛra duniɲa kɔnɔ, a filɛ cɛɛ dɔ ye min faamu o koo la.
