KALANSEN 16

Ka Yezu to dugukolo kan, a ye mun lo kɛ?

A LAMƐN KAAN NIN NA

Mɔgɔ caaman be Yezu ye i n’a fɔ denɲɛnin, kira, wala mɔgɔ min be ninmakala la. Nka a ye min kɛ k’a to dugukolo kan, o be se k’an dɛmɛ ka koo wɛrɛw lɔn a koo la wa? Yezu ye kobaba minw kɛ, an bena u dɔw lajɛ kalansen nin na. Ani, an ben’a ye o be se k’i dɛmɛ cogo min na.

1. Yezu ka baara jɔnjɔn tun ye mun lo ye?

Yezu ka baara jɔnjɔn tun ye “ka Ala ka masaya kibaru diman fɔ.” (Luka 4:43 kalan). O kibaro diiman tun ye ko Ala bena Masaya, wala gofɛrɛnɛman dɔ sigi sen kan min bena adamadenw ka gwɛlɛyaw bɛɛ ɲɛnabɔ. a Saan saba ni kalo wɔɔrɔ kɔnɔ, Yezu ye baaraba kɛ walisa k’o jijali kumaw lase mɔgɔw ma.—Matiyo 9:35.

2. Kuun juman lo kama Yezu ye kabakow kɛ?

Bibulu b’a yira ko Ala tɛmɛna Yezu fɛ ka ‘kobaw, ani kabakow, ani tagamasiyɛn’ caaman kɛ (Kɛwaliw 2:22, Biblu Ala ta Kuma). Ala ye see di Yezu ma ka sanfɔɲɔba mala, ka mɔgɔ waa caaman balo, ka banabagatɔw kɛnɛya, ani ka suuw yɛrɛ kunu (Matiyo 8:23-27; 14:15-21; Mariki 6:56; Luka 7:11-17). Yezu ka kabakow b’a yira ka gwɛ ko Ala lo y’a ci. O kabakow b’a yira ka gwɛ fana ko see be Jehova ye k’an ka gwɛlɛyaw bɛɛ ɲɛnabɔ.

3. An be kalan juman lo sɔrɔ Yezu ka ɲɛnamaya koo la?

Yezu ye mɛnni kɛ Jehova fɛ koo bɛɛ la (Zan 8:29 kalan). Kɔrɔbɔliw bɛɛ n’a ta, Yezu y’a Faa sago kɛ kantigiya la fɔɔ ka taga se saya ma. A y’a yira ko gwɛlɛyaw bɛɛ n’a ta, adamadenw be se ka baara kɛ Ala ye. O cogo la, Yezu ye ‘wale yira an na, an ka kan k’a nɔɔ ta.’—1 Piyɛri 2:21.

A ƝINI KA DƆ LƆN TUGUN

An k’a filɛ Yezu ye min kɛ walisa ka kibaro diiman fɔ mɔgɔw ye. Ani, an ka kuma fana a ka kabakow la.

4. Yezu ye kibaro diiman fɔ mɔgɔw ye

Yezu ye kilomɛtɛrɛ caaman caaman tagama gwangwan na walisa ka se ka kibaro diiman lase mɔgɔ caamanba ma. Luka 8:1 kalan. O kɔ, a’ ye ɲiningali nunu kɛ ani ka baro kɛ u kan:

Mɔgɔ minw tun be na Yezu lamɛn, a tun be kibaro diiman fɔ olu dɔrɔn lo ye wa?
Yezu ye jijali juman lo kɛ walisa ka mɔgɔw yɔrɔ ɲini?

Ala tun kɔnna k’a fɔ ko Masiya tun bena kibaro diiman fɔ mɔgɔw ye. Ezayi 61:1, 2 kalan. O kɔ, a’ ye ɲiningali nunu kɛ ani ka baro kɛ u kan:

Yezu y’o kiraya kuma dafa cogo di?
E ka miiri la, mɔgɔw mako b’a la k’o kibaro diiman mɛn bi bi nin na wa?

5. Yezu ye mɔgɔw kalan koo nafamanbaw la

Tiɲɛn lo ko Yezu ye waajuli kɛ Ala ka Masaya koo la. Nka, a ye mɔgɔw kalan fana koo nafamanbaw la. An k’u dɔw lajɛ a ka kalanba la a ye min kɛ kulu kan. Matiyo 6:14, 34 ani 7:12 kalan. O kɔ, a’ ye ɲiningali nunu kɛ ani ka baro kɛ u kan:

Yezu ye ladili nafaman jumanw lo di minw be sɔrɔ o vɛrisew kɔnɔ?
E ka miiri la, o ladiliw bele be se ka mɔgɔ nafa halibi wa?

6. Yezu ye kabakow kɛ

Jehova ye see di Yezu ma ka kabako caaman kɛ. An k’u la dɔ lajɛ: Mariki 5:25-34 kalan. Wala, a’ ye VIDEWO filɛ. O kɔ, a’ ye baro kɛ ka ɲiningali nunu jaabi:

VIDEWO: Yezu ye muso dɔ kɛnɛya (5:10)

O muso tun lanin be mun lo la tigitigi?
Mun lo b’i kabakoya o kabako la?

Zan 5:36 kalan. Ani, a’ ye ɲiningali kɛ ani ka baro kɛ o kan:

Yezu ka kabakow be mun lo yira a koo la?

I b’a lɔn wa?

An be min lɔn Yezu koo la, o fanba be sɔrɔ Bibulu ka kitabu naani dɔw kɔnɔ minw be weele ko Evanziliw: Matiyo, Mariki, Luka, ani Zan. Kunnafoni dɔw be sɔrɔ o kitabuw kelen kelen bɛɛ kɔnɔ minw tɛ sɔrɔ tɔɔw kɔnɔ. N’an y’u naani bɛɛ kalan, an be Yezu ka ɲɛnamaya koo faamu ka ɲɛ.

MATIYO

Matiyo lo kɔnna k’a ka Evanzili sɛbɛ. A be sinsin Yezu ka kalanw kan, sanko a ye min fɔ Ala ka Masaya koo la.
MARIKI

O Evanzili ka surun ka tɛmɛ tɔɔw kan. A be koo caaman lakali cogo dɔ la min be mɔgɔ kabakoya.
LUKA

Luka be sinsin delili koo kan, ani a b’a yira Yezu ye musow minɛ ni ɲumanya ye cogo min na.
ZAN

Zan b’a yira Yezu ye baro minw kɛ n’a teri sɔbɛw ni mɔgɔ wɛrɛw ye. A b’a yira fana Yezu tun ye mɔgɔ sifa min ye.