Jehova Seerew b’u janto kosɔbɛ u kerecɛnɲɔgɔnw na (1 Piyɛri 2:17). Balimamuso Tannis be bɔ Keniya, ale y’a fɔ ko: “N’ balima kanulen minw be duniɲa kuru bɛɛ kɔnɔ, a ka di n’ ye k’u ka kibaruya sɔrɔ.” An caaman be ni Tannis ka miiriya ɲɔgɔn ye. Balimamuso Tannis ani Jehova Seere miliyɔn caaman wɛrɛw b’a kɛ di ka balima tɔɔw ka kibaruya sɔrɔ? An be sera k’o sɔrɔ an ka site jw.org kan yɔrɔ nin na: Kunnafoniw Sɔrɔyɔrɔ. O site be yen kabi saan 2013.

 Kunnafoniw Sɔrɔyɔrɔ la, kunnafoni sɔbɛw dira Jehova Seerew koo la, i n’a fɔ Bibulu kuraw bɔko, dɛmɛ balawo tuma na, an ka batolikɛyɔrɔw lɔli ani koo kɔrɔtanin wɛrɛw koo la. An balima minw be kaso kɔnɔ u ka limaniya kosɔn, an b’olu fana ka kibaruya sɔrɔ o yɔrɔ la. Wale diimanw fana be sɔrɔ yen waajuli baara kanpaɲi, ani Hakilijigi lajɛn koo la. Jɔn lo be kunnafoniw ɲini o barokunw kama? U b’o barokunw labɛn cogo di?

 An ka sigiyɔrɔsoba la, biro dɔ sigira sen kan min be weele ko service des relations publiques (SRP). O biro lo be kunnafoniw sɔrɔko ɲɛnabɔ ani Koow Ɲɛnabɔla Jɛnkulu ka kɔrdinatɛriw ka kɔmite lo b’o biro ɲɛminɛ. Balima kɛmɛ ni kɔ lo be baara kɛ o biro la. U caaman y’u yɛrɛ di o baara la ani u be to soo le k’o baara kɛ n’o biro mɔgɔw ye. U dɔw ye kunnafoni sɛbɛbagaw ye, dɔw ye kunnafoni ɲinilaw ye, dɔw be jaaw labɛn ɔridinatɛri kan ani dɔ wɛrɛw ye bayɛlɛmabagaw ye. Dɔw be baara kɛ ni gofɛrɛnɛman ka lasigidenw ye, inivɛrisite ɲɛmɔgɔw, ani kunnafoni jɛnsɛnlaw ye. Service des relations publiques (SRP) ka birow be sɔrɔ tɔnbolow la duniɲa kuru bɛɛ kɔnɔ. O be weele ko bureaux des relations publiques (BRP). O biro 80 ni kɔ lo be dɛmɛ don (SRP) ka baaraw la.

 (SRP) balimaw be jɛn ka baara kɛ ni (BRP) balimaw ye walisa ka barokun kura bɔ. Ni balimaw y’a ye ko a ka ɲi u ka kuma koo dɔ koo la, u be sɛgɛsɛgɛri kɛ o koo la walisa ka kunnafoni sɔbɛw sɔrɔ. O kɔrɔ ko u be mɔgɔw ɲininga ani ka kuma o koo lɔnbaga ŋanaw fɛ. N’u ye kunnafoniw bɛɛ lajɛn ka ban, u be barokun kɔnɔnakumaw sɛbɛ ani ka yɛlɛmani dɔw kɛ a la. O kɔ, u be segi k’a kalan tugun ka fotow fara a kan ani k’a ci kɔrdinatɛriw ka kɔmite ma walisa u ka sira di u ka se k’o barokun bɔ.

 Kunnafoni minw be sɔrɔ jw.org kan Kunnafoniw Sɔrɔyɔrɔ la, balimaw be mun lo miiri o koo la? Balimamuso Cheryl be bɔ Filipine, a y’a fɔ ko: “Ni n’ wulila sɔgɔma, a ka di n’ ye ka kunnafoniw kalan Jehova ka ɔriganisasiyɔn ani a sagokɛlaw koo la.”

 Mɔgɔ caaman y’a yira k’u y’a ye ko faranfasi be jw.org ka kunnafoniw ni kunnafoni jɛnsɛnlaw ka kunnafoniw cɛ. Tatiana be bɔ Kazakstan, a y’a fɔ ko: “Kunnafoni minw be jw.org kan, u ka di n’ ye kosɔbɛ sabu kunnafoni sɔbɛw lo ani n’ be se ka la u la.” Balimamuso Alma be bɔ Mɛkisiko, a y’a fɔ ko: “Kunnafoni minw be Kunnafoni Sɔrɔyɔrɔ la jw.org kan, olu be mɔgɔ jija. U tɛ komi kunnafoni jɛnsɛnlaw ka kunnafoniw, o minw be mɔgɔ jaa tigɛ.”

 An be se ka la jw.org ka kunnafoniw na. Nka o dɔrɔn tɛ, u be mɔgɔ ka limaniya barika bonya fana. Bernard be bɔ Keniya, a y’a fɔ ko: “Balima minw be duniɲa kuru bɛɛ kɔnɔ, jw.org ka Kunnafoniw Sɔrɔyɔrɔ ye n’ dɛmɛ k’olu jati i ko n’ ka denbaya mɔgɔw. O y’a to n’ be se k’u kelen kelen bɛɛ tɔgɔ weele ani gwɛlɛya tigitigi min b’u kan, k’o kofɔ n’ ka deliliw la.” Balimamuso Bybron fana be bɔ Keniya, ale y’a fɔ ko: “Tuma o tuma ni n’ y’a ye barokun dɔ la k’u ye Bibulu bɔ kan wɛrɛ la, n’ ninsɔn ka di kosɔbɛ. O be n’ hakili jigi ko Jehova tɛ mɔgɔ bɔ mɔgɔ la.”

 Kɔrɔbɔli be an balima minw kan, an be kunnafoni minw sɔrɔ u koo la, o b’an nafa. Balimamuso Jackline be bɔ Keniya. A ko: “N’an miirila u ka jagwɛlɛya la, o b’an ka limaniya barika bonya. An b’an ɲini k’a lɔn tuma bɛɛ fɛɛn min y’u dɛmɛ ka muɲuli kɛ. N’ y’a faamu koo dennin dennin dɔw, i n’a fɔ delili, Bibulu kalan ani dɔnkili la ye fanga d’u ma cogo min na.”

 Balimamuso Beatriz be bɔ Kɔsta Rika. Kunnafoni minw be di balawokow koo la, ale y’a ka waleɲumanlɔn yira o kosɔn. A ko: “Kunnafoni minw be jw.org kan Kunnafoniw Sɔrɔyɔrɔ la, o y’a to n’ b’a ye ɔriganisasiyɔn be dɛmɛ lase balimaw ma joona joona cogo min na ni ɲumanya ye. O b’a to fana n’ be la a la ko n’ be Jehova ka ɔriganisasiyɔn lo kɔnɔ tiɲɛ tiɲɛna.”

 Ninsɔndiya yɛrɛ lo ka kunnafoni kuraw sɔrɔ an balimaw koo la duniɲa kuru bɛɛ kɔnɔ! An be sera k’o kunnafoniw sɔrɔ aw ka niliw lo barika la. Aw caaman b’o kɛ donate.jw.org kan. Aw b’aw tigɛ labila ka niliw minw kɛ, an b’aw fo kosɔbɛ o kosɔn.