“A saan damanin ye nin ye, an yɛrɛ tun t’a miiri ko an be se ka Alako dumuni sɔrɔ ɛntɛrɛnɛti sababu fɛ.” Yala o kumaw tɛ tiɲɛn ye wa? Geoffrey Jackson lo y’o kumaw fɔ Koow Ɲɛnabɔla Jɛnkulu ka rapɔɔri 6nan na saan 2020 kɔnɔ. A y’a fara a kan ko: “N’a sɔrɔ aw b’aw yɛrɛ ɲiningara ko: “An tun bena kɛ di fɔɲɔbana nin tuma na ni JW Library tun tɛ yen? Jehova tun b’an labɛnna le kabi saan damanin, o koo ɲɔgɔn kosɔn.””

 Jehova tun b’an labɛnna cogo di? Baaraba juman lo kɛra walisa ka JW Library apilikasɔn bɔ, k’a ladon ani k’a cogo fisaya?

 An ka sigiyɔrɔsoba la, biro dɔ sigira sen kan min be ɔridinatɛri porogramu dɔ koo ɲɛnabɔ. O biro be weele ko MEPS Programming. Saan 2013 mɛkalo la, Koow Ɲɛnabɔla Jɛnkulu y’a ɲini o balimaw fɛ u ka apilikasɔn dɔ bɔ, Traduction du monde nouveau lakurayanin bena sɔrɔ min kɔnɔ. Balimacɛ Paul Willies ye dɛmɛ don o baara la. A y’a fɔ ko: “An tun ma deli k’o apilikasɔn ɲɔgɔn bɔ ka ye. Nka, an ye jɛnkulu dɔ sigi sen kan, ka baara dɔw lalɔ ani ka biro wɛrɛ mɔgɔw ka dɛmɛ ɲini walisa k’a se k’o apilikasɔn labɛn ani k’a bɔ. An ye delili kɛ siɲɛ caaman na ani kalo duuru o kɔ, Jehova ka dɛmɛ barika la, o apilikasɔn bɔra Watch Tower ka saan o saan ɲɔgɔnye dɔ la!”

 Gwɛlɛya wɛrɛ tun ye k’o apilikasɔn yɛlɛma k’a kɛ biblotɛki dɔ ye o min na an ka sɛbɛ caaman bena sɔrɔ kaan caaman na. Saan 2015 zanwiyekalo la, an ka sɛbɛ kuraw fanba tun be sɔrɔ o apilikasɔn kɔnɔ angilikan na. Kalo wɔɔrɔ o kɔ le an tun be se k’u telesarse kaan caaman wɛrɛw la.

 Kabi o tuma, an balimaw ye o apilikasɔn cogo fisaya siɲɛ caaman na. U ye videwow fara a kan, ka gafew ni jaaw bɛɛ lajɛn yɔrɔ kelen na lajɛnw kama. U ye fɛɛrɛ dɔ labɛn walisa balimaw ka se ka to Bibulu ka vɛrisew la ani ka sɛgɛsɛgɛri kɛ Guide de Recherche kɔnɔ.

 Loon o loon, JW Library apilikasɔn be yɛlɛ telefɔni n’a ɲɔgɔnna miliyɔn 8 lo la ani kalo o kalo, o be yɛlɛ telefɔni n’a ɲɔgɔnna miliyɔn 15 lo la! Baara jumanw lo be kɛ walisa o apilikasɔn ka se ka yɛlɛ cogo nɔgɔman na? Balimacɛ Willies y’a fɔ ko: “N’i ye apilikasɔn dɔ bɔ, i tɛ se k’a fɔ ko sisan kɔni, a baara banna. An be baara kɛ tuma bɛɛ walisa ka fɛɛn kuraw fara a kan ani k’a cogo fisaya. Komi telefɔniw ka porogramuw be lakuraya tuma bɛɛ, an fana ka ɲi k’an ka apilikasɔn lakuraya walisa a ka se ka baara kɛ o telefɔniw na. Komi gafew, videwow ani fɛɛn lamɛnta minw be sɔrɔ JW Library kan, o hakɛ be cayara ka taga, an ka ɲi k’o apilikasɔn ladon ani k’a lakuraya.” JW Library apilikasɔn kɔnɔ, kaan hakɛ minw be yen, ni an ye olu bɛɛ fara ɲɔgɔn kan, an b’a ye ko gafe 200 000 ɲɔgɔn ani fɛɛn lamɛntaw ni videwo 600 000 ni kɔ lo be sɔrɔ a kɔnɔ sisan!

 Walisa k’o apilikasɔn ladon, an mako tɛ ɔridinatɛriw ani a ɲɔgɔnnaw dama lo la. An mako be ɔridinatɛri porogramu damanin na fana. N’an y’o porogramuw sɔrɔ, an ka ɲi ka wari sara walisa ka sira sɔrɔ ka baara kɛ n’u ye. Porogramu kelen dɔrɔn sɔngɔ be se ka kɛ dolari 1 500 ye saan kɔnɔ (waa kɛmɛ kɔnɔntɔn ɲɔgɔn CFA wari la). Walisa k’a lɔn ni JW Library apilikasɔn bena se ka baara kɛ ɔridinatɛri kura, telefɔni, tablɛti n’a ɲɔgɔnnafɛn kuraw kan, saan o saan, MEPS programming ka biro be dolari 10 000 lo kɛ ka minan kuraw san (miliyɔn wɔɔrɔ ɲɔgɔn CFA wari la).

 Wari caamanba lo tun be ta k’an ka gafew papiyelaman bɔ ani k’o ci kafow ma. Nka, JW Library apilikasɔn sababu la, caaman bɔra o musakaw la. Misali la, saan 2013, an ye kitabunin Ala ka Kuma sɛgɛsɛgɛ loon o loon papiyelaman miliyɔn 12 lo bɔ. Nka saan 2020 na, an ye miliyɔn 5 dɔrɔn lo bɔ hali k’a sɔrɔ mɔgɔ 700 000 farala weleweledalaw kan duniɲa kuru bɛɛ kɔnɔ. Mun na an y’o yɛlɛmani kɛ do? An y’o kɛ sabu balima caaman be tilera kalan sɛgɛsɛgɛ JW Library lo kan. a

 JW Library apilikasɔn be mɔgɔw dɛmɛ cogo caaman na. Geneviève be bɔ Kanada ani a ko o apilikasɔn b’ale dɛmɛ k’a ka kelenna kalan kɛ tuma o tuma. A y’a fɔ ko: “Tiɲɛn na, ni n’ tun ka ɲi ka gafe caaman lo bɔ walisa ka kalan kɛ, n’ ma la a la ko n’ tun bena se ka kalan kɛ loon bɛɛ sɔgɔma. Nka ni n’ ye n’ ka telefɔni ta dɔrɔn, n’ mako be min bɛɛ la n’ b’o sɔrɔ. N’ be sera ka n’ ka kelenna kalan kɛ tuma o tuma minkɛ, o ye n’ ka limaniya barika bonya ani ka n’ magwɛrɛ kosɔbɛ Jehova la.”

 O apilikasɔn y’an dɛmɛ COVID-19 fɔɲɔbana tuma yɛrɛ lo la. Charlyn be bɔ Etazini jamana na ani a ko: “Tuma min na COVID-19 fɔɲɔbana jɛnsɛnna duniɲa kuru bɛɛ kɔnɔ, n’ ma an ka gafe papiyelaman kura si ye saan kelen ni kɔ bɛɛ kɔnɔ. Nka JW Library apilikasɔn sababu la, an tora ka dumuni sɔrɔ Alako ta fan fɛ ani an be Jehova fo o labɛn kosɔn o min b’a yira ko a b’an kanu.”

 Faye, be Filipine jamana na ani a ye min fɔ, mɔgɔ caaman b’o lo miiri fana. A ko: “N’ be baara kɛ n’o apilikasɔn barikaman ye walisa n’ magwɛrɛnin ka to Jehova la. Ni dugu gwɛra dɔrɔn, n’ be kɔn k’o apilikasɔn lo yɛlɛ. N’ b’a kɔnɔnakow lamɛn ni n’ be n’ ka sokɔnɔ baaraw kɛra. N’ be lajɛnw ni n’ ka bibulukalanw labɛn n’o lo ye fana. Ni n’ ye wagati dɔ sɔrɔ, n’ be videwow filɛ a kɔnɔ. Ni n’ be bisi (bus) kɔnɔna, n’ be Bibulu wala barokun dɔ kalan o apilikasɔn kɔnɔ. Tiɲɛn tiɲɛn na, a nafa ka bon kosɔbɛ yɛrɛ le.”

 O apilikasɔn b’an dɛmɛ yɛrɛ le waajuli baara la. Misali la, balimamuso dɔ be bɔ Kameruni jamana na. K’a to waajuli la, a tun b’a fɛ ka bibulusen dɔ kalan mɔgɔ dɔ ye balimamuso wɛrɛ tun ye baara kɛ ni min ye lɔgɔkun damanin ka kɔn o ɲɛ. Nka, a tun t’a lɔn a be se k’o bibulusen sɔrɔ yɔrɔ min na. A y’a fɔ ko: “N’ hakili jigira o vɛrise ka kumasen dɔ la. O la, n’ ye Bibulu yɛlɛ JW Library kɔnɔ ani k’o kumasen ɲini. O kɔ dɔrɔn, n’ y’o vɛrise sɔrɔ. Ni n’ be baara kɛ n’o apilikasɔn ye, n’ ka teli ka ɲinɛ vɛrise minw kɔ, n’ b’u sɔrɔ joona joona.”

 Aw b’aw tigɛ labila ka niliw kɛ ka kɛɲɛ ni nili kɛcogo ye min kofɔra donate.jw.org kan. O lo sababu la an sera ka JW Library dilan, k’a ladon ani an be sera k’a cogo fisaya walisa o ka balimaw nafa duniɲa kuru bɛɛ kɔnɔ. Aw ni ce kosɔbɛ aw ka niliw kosɔn.

1. Saan 2013 ɔkutɔburukalo la: JW Library apilikasɔn bɔra ni Traduction du monde nouveau lakurayanin ye a kɔnɔ.

2. Saan 2015 zanwiyekalo la: Gafe wɛrɛw bilara o apilikasɔn kɔnɔ angilikan na. O kɔ, gafew bilara o apilikasɔn kɔnɔ kaan caaman wɛrɛw la.

3. Saan 2015 novanburukalo la: Fɛɛrɛ dɔ farala o apilikasɔn kɔnɔ walisa ka kumadenw kɔrɔci.

4. Saan 2016 mɛkalo la: Yɔrɔ nin farala o apilikasɔn kɔnɔ: Réunions.

5. Saan 2017 mɛkalo la: Fɛɛrɛ dɔ farala o apilikasɔn kɔnɔ walisa ka kunnafoniw sɛbɛ.

6. Saan 2017 desanburukalo la: Bible d’étude farala o apilikasɔn kɔnɔ.

7. Saan 2019 marisikalo la: Fɛɛn lamɛntaw be se ka telesarse o apilikasɔn kɔnɔ, videwow be se ka filɛ a kɔnɔ hali n’i m’u telesarse ani gafe Guide de recherche farala a kan.

8. Saan 2021 zanwiyekalo la: Fɛɛn kuraw farala gafe Ɲɛnamaya kɛ hɛɛrɛ la fɔɔ abada! kɔnɔ walisa ka baarakɛcogo fisaya n’a ye JW Library kan.