Saan o saan, dugukoloyɛrɛyɛrɛ waa caaman lo be kɛ. Dɔw man bon ten, nka dɔw ka bon fɔɔ u be tiɲɛni kɛ, ka tɔɔrɔ ni saya yɛrɛ lase mɔgɔw ma. Tuma caaman na, kɔgɔji be mara minw na, dugukoloyɛrɛyɛrɛw be se k’a to jikurubaw be wuli ka tiɲɛni kɛ yen ani ka mɔgɔ caaman faga. Bibulu tun kɔnna k’o dugukoloyɛrɛyɛrɛbaw kofɔ wa?

An bena kuma min koo la barokun nin na:

•  Bibulu tun kɔnna ka dugukoloyɛrɛyɛrɛw kofɔ wa?

•  Dugukoloyɛrɛyɛrɛ minw be kɛra an ka wagati la, u be Bibulu ka kiraya kumaw dafara le wa?

•  Bibulu tun kɔnna ka min fɔ dugukoloyɛrɛyɛrɛw koo la: O b’an dɛmɛ ka mun lo faamu?

•  Mɔgɔw ka teli ka min fɔ Bibulu ka kiraya kuma ani dugukoloyɛrɛyɛrɛw koo la

 Yezu kumana dugukoloyɛrɛyɛrɛ koo la a ka kiraya kuma dɔw kɔnɔ. O kuma be sɔrɔ Bibulu ka kitabu saba kɔnɔ:

 “Siya dɔ bena wili siya wɛrɛ kama. Jamana dɔ bena wili jamana wɛrɛ kama. Kɔngɔ bena don yɔrɔ dɔw la, dugukolo bena yɛrɛyɛrɛ yɔrɔ dɔw la fana.”—Matiyo 24:7.

 “Siya dɔ bena wili siya dɔ wɛrɛ kama. Jamana dɔ bena wili jamana dɔ wɛrɛ kama. Dugukolo bena yɛrɛyɛrɛ yɔrɔ dɔw la, kɔngɔ fana bena don.”—Mariki 13:8.

 “Dugukolo bena yɛrɛyɛrɛ kosɔbɛ yɔrɔ dɔw la. Fɔɲɔbanaw ni kɔngɔ bena don yɔrɔ dɔw la fana.”—Luka 21:11.

 Yezu tun kɔnna k’a fɔ ko “dugukolo bena yɛrɛyɛrɛ yɔrɔ dɔw la” ani o wagati kelen na, kɛlɛw, dumuniko gwɛlɛya ani banaw fana bena kɛ. N’o koow bɛɛ jɛnna ka kɛ ɲɔgɔn fɛ, o b’a yira ka gwɛ ko an be “laban tuma” lo la (Matiyo 24:3; 2 Timote 3:1). N’an basigira Bibulu kan ka jatiminɛ kɛ, an b’a ye ko “laban tuma” daminɛna saan 1914 ani a bele ma ban fɔlɔ.

 Ɔnhɔn. Koo minw tun bena kɛ “laban tuma” na, i n’a fɔ dugukoloyɛrɛyɛrɛw, Yezu tun kɔnna k’o kofɔ. An be o lo yera bi bi nin na. Kabi saan 1914, dugukoloyɛrɛyɛrɛbaba 1 950 ni kɔ lo kɛra, ani o ye mɔgɔ miliyɔn fila ni kɔ bɛɛ lo faga. a An ka misali damanin lajɛ o koo la, minw be kɛra an ka wagati la.

 Saan 2004, Ɛndi kɔgɔji yɔrɔ la: Dugukoloyɛrɛyɛrɛ dɔ kɛra min juguyara kosɔbɛ (magnitude 9.1) fɔɔ ka jikurubaw lawuli, o minw ye jamana 12 ɲɔgɔn halaki ani ka mɔgɔ 225 000 ɲɔgɔn faga.

 Saan 2008, Sinuwa jamana na: Dugukoloyɛrɛyɛrɛba dɔ kɛra (magnitude 7.9) fɔɔ ka dugudenninw ni dugubaw halaki ani mɔgɔ 90 000 lo sara, mɔgɔ 375 000 mandimina ani mɔgɔ miliyɔn caaman ka boonw halakira.

 Saan 2010, Ayiti jamana na: Dugukoloyɛrɛyɛrɛba dɔ kɛra (magnitude 7.0) ani dɔ wɛrɛw tugura o kɔ ka mɔgɔ 300 000 ni kɔ faga ani ka mɔgɔ miliyɔn kelen ni kɔ ka boonw halaki.

 Saan 2011, Zapɔn jamana na: Dugukoloyɛrɛyɛrɛba dɔ kɛra (magnitude 9.0) fɔɔ ka jikurubaw lawuli o min ye mɔgɔ 18 500 ɲɔgɔn faga ani mɔgɔ waa caaman ni kɔ bolila ka bɔ u sigiyɔrɔw la. O y’a to Fukushima ka kuran mansin tiɲɛna ani iraniyɔmu min tun b’o mansin kɔnɔ, o woyora. Minw ka soo tun be o kuranmansin gɛrɛfɛ, hali saan tan o kɔ, mɔgɔ 40 000 ɲɔgɔn bele ma se ka kɔsegi u ka soo sabu iraniyɔmu min woyora, a bele be se ka kɛ farati ye mɔgɔw ka kɛnɛyako ma.

 Bibulu tun kɔnna ka min fɔ dugukoloyɛrɛyɛrɛw koo la, o b’an dɛmɛ k’a lɔn koo minw bena kɛ sini ma. Yezu ko: “Aw mana o koow kɛtɔ ye tuma min na, aw k’a lɔn ko Ala ka masaya waati surunyana.”—Luka 21:31.

 Bibulu b’a ɲɛfɔ ko Ala ka Masaya ye gofɛrɛnɛman yɛrɛ yɛrɛ ye min be sankolo la ani ko Yezu Krista lo y’o Masaya Masacɛ ye. Yezu ko a ka kalandenw ka delili kɛ o Masaya lo koo la.—Matiyo 6:10.

 Tuma min na Ala ka Masaya bena dugukolo mara, Ala bena an tanga balawokow ma i n’a fɔ dugukoloyɛrɛyɛrɛw (Ezayi 32:18). Ka fara o kan, dugukolo yɛrɛyɛrɛla ka mɔgɔ minw mandimi, Ala bena u kɛnɛya. O ye dusukasi lase minw ma, Ala bena u ka dusukasi ban pewu (Ezayi 65:17; Yirali 21:3, 4). Walisa ka dɔ lɔn o koo la, barokun nin kalan: “Que fera le royaume de Dieu?”