JOKWA 10
Ne̱ni Weno̱ ná Wemba Jowe̱ la Mbale̱ e?
1. Mo̱ jowe̱ la mbale̱ le nde diwo̱ e?
“Bińo̱ no̱ngo̱ jangame̱ye̱ na bato̱pedi ba mudī ba lobango.” —MATEO 7:15.
Yesu okwe̱le̱ nde bokwedi bao jowe̱ diwo̱ na mune, jowe̱ la mbale̱. Le nde ka ngea ni malane̱ o longe̱ la bwindea. Yesu a kwali ná: “ngusu nde i madie̱” ni ngea. (Mateo 7:14) Jowe̱ lena Loba a memeano̱ le nde di di se̱medi o Eyal’ao, Bibe̱l. Bowe̱ Loba ba mbale̱ be̱se̱ be mulatako o dube̱ diwo̱.—Langa Yohane 4:23, 24; 14:6; Efeso 4:4, 5.
Ombwa sinima Mo̱ jowe̱ la mbale̱ le nde diwo̱ e?
2. Nje Yesu a kwalino̱ jombwea Kriste̱n a lobango e?
“Ba mapuse̱le̱ ná ba bi Loba nde ba mato̱bo̱ mo̱ na bebolo babu.”—TITO 1:16.
Yesu ome̱le̱ ná bato̱pedi ba mudī ba lobango ba me̱nde̱ o ńamse̱ dube̱ la mbale̱. O eboko ba me̱ne̱ne̱ nde ka bowe̱ Loba ba mbale̱. Bebasi babu be makwala ná be nde ba Kriste̱n. Nde wená o so̱ banja beno̱ na te̱ite̱i. Ne̱ni so̱ e? Kana bwele ba bwam bo mayano̱ pe̱ nde bepuma ba bwam, Kriste̱n ya mbale̱ pe̱ i membabe̱ nde tongwea na bede̱mo babu na bedangwedi babu ba bwam.—Langa Mateo 7:13-23.
3. Ne̱ni weno̱ ná wemba bowe̱ ba mbale̱ e?
Jombweye so̱ ben byemban betanu:
-
Bowe̱ Loba ba mbale̱ ba memba Bibe̱l ka Eyal’ao. Ba mawe̱ ná ba dangwe bupisane̱ bete̱sedi ba Bibe̱l. Jowe̱ la mbale̱ le so̱ diwengisan na mane̱ mowe̱ mena ma se̱medi nde o mo̱nge̱le̱ ma bato. (Mateo 15:7-9) Bowe̱ Loba ba mbale̱ ba si mabola mambo me diwengisan na nje ba mokwe̱le̱no̱.—Langa Yohane 17:17; 2 Timoteo 3:16, 17.
-
Bokwedi ba mbale̱ ba Yesu ba mabola dina la Loba, Yehova, edube. Yesu a boli dina la Loba edube ninka ná, okwe̱le̱ mo̱ bato. Ongwane̱ bato o bia Loba na jokwe̱le̱ pe̱ babo̱ o kane̱ ná dina la Loba di dubabe̱ [“sangisabe̱,” NW]. (Mateo 6:9) O wuma o majano̱, njik’ebasi e mokwe̱le̱ bato dina la Loba e?—Langa Yohane 17:26; Roma 10:13, 14.
-
Kriste̱n a mbale̱ i mate̱ dikalo jombwea Janea la Loba. Loba a lom Yesu ná a te̱ dikalo la myango ma bwam ma Janea. Janea la Loba nde le mpo̱m ma dipita la mbel’a moto. Yesu a te̱ di dikalo la Janea nate̱na o kwedi. (Lukas 4:43; 8:1; 23:42, 43, NW) A kwali ná bokwedi bao pe̱ bangame̱ne̱ o te̱ di dikalo. Mo̱, moto a sisedi te̱ wa be̱be̱ o kwalisane̱ wa jombwea Janea la Loba, o mo̱nge̱le̱ ná e nde ná a be̱ o njik’ebasi e?—Langa Mateo 24:14.
-
Bokwedi ba Yesu ba si be̱n dongo na nin was’a bobe. Wena wemba babo̱ ońolana ba si mano̱ngo̱ dongo o politik, to̱ o bila. (Yohane 17:16; 18:36) Ba si membilane̱ bede̱mo ba bobe na beboledi ba njo.—Langa Yakobo 4:4.
-
Kriste̱n a mbale̱ i be̱ne̱ne̱ mō̱ na nune̱ ndolo ni si be̱n elangisan. Eyal’a Loba e mokwe̱le̱ babo̱ o bola bato ba leme̱ le̱se̱ edube.To̱na nika bebasi be kwedi be masue̱le̱no̱ bila oteten a matumba, bokwedi ba mbale̱ ba si mabola nika. (Mika 4:1-3) O diwengisan, Kriste̱n a mbale̱ i mabolane̱ pond’abu, ngiń’abu na myam mabu o jongwane̱ na sue̱le̱ pe̱ bato.—Langa Yohane 13:34, 35; 1 Yohane 4:20.
4. Mo̱ wená wemba ebas’a mbale̱ e?
Njik’ebasi e be̱n belēdi be se̱medi o Eyal’a Loba e? Njik’ebasi e mabole̱ dina la Loba edube e? Njik’ebasi e mate̱ dikalo la Janea la Loba ka mpo̱m ma dipita ońola mbel’a moto e? Njika jowe̱ di malee̱le̱ ndolo na singe̱ pe̱ bila e? Mo̱, o mo̱nge̱le̱ so̱ ná nje e?—Langa 1 Yohane 3:10-12.
