Dina la Loba ná nja e? Loba mo̱me̱ne̱ a makwala ná: “Mba nde ne Yehova. Dina lam di.” (Yesaya 42:8) Dina la Loba di maso̱be̱ o Bibe̱l lambo ka 7 000 la ngedi. Nde betukwedi ba Bibe̱l jita be sumo di dina, be we̱le̱ beto̱ti ka “Sango” o epol’ao. Loba a mapula ná o be̱ diko̱m lao, ońola nika a mabaise̱ so̱ wa ná o “bele̱ dina lao.”​—Myenge 105:1.

Beto̱ti ba Yehova. Yehova a be̱n beto̱ti o Bibe̱l ka “Loba,” “Ńangum,” “Muwekedi,” “Tete̱,” “Sango,” na “Ńasam.” Mika jita mi tilabe̱ o Bibe̱l mi malee̱ ná bato ba bolane̱ be beto̱ti o kwalisane̱ Yehova, name̱ne̱ pe̱ na dina lao la timtim, Yehova.​—Daniel 9:4.

 Je̱ne̱ne̱ la Loba. Loba e nde mudī. (Yohane 4:24) Bibe̱l e mabamse̱ ná “to̱ moto a s’e̱n Loba.” (Yohane 1:18) E malee̱ ná Loba a be̱n besengedi ba teten. Bato be ná ba bwese̱ mo̱ ndutu, be pe̱ ná ba “bwese̱ mulema [mao] muńe̱nge̱.”​—Minia 27:11; Myenge 78:40, 41.

Bede̱mo ba bwam ba Loba. Loba a titi ndando. (Bebolo 10:34, 35) E pe̱ “muyao na ndolo, muńo̱ngo̱ o malinga, m’bwaṅ o ndedi na mbale̱.” (Bebusedi 34:6, 7) Nde a be̱n bede̱mo bene̱i bena be tobotobo.

Ngińa. Kana eno̱ “Loba la ngum,” a be̱n ngińa ni tombise̱ bonde̱ne̱ o londise̱ to̱ nje nde a kakanno̱.​—Bebotedi 17:1.

Dibie̱. To̱ moto a titi dibie̱ ka Loba. Ońola nika nde Bibe̱l e mabele̱no̱ mo̱ ná “mpo̱m ma Loba la dibie̱.”​—Roma 16:27.

Te̱me̱ la sim. Loba a mabola nde nje e te̱m ná sim ponda ye̱se̱. Beboledi bao be ná “ke̱nge̱nge̱,” ‘a te̱m pe̱ na sim.’​—Ndimbisedi 32:4.

Ndolo. Bibe̱l e makwala ná “Loba e nde ndolo.” (1 Yohane 4:8) Seto̱ ná Loba a malee̱le̱ ndolo​—nde e nde ndolo. Ndol’ao ninde̱ne̱ e me̱ne̱ne̱ o nje ye̱se̱ a mabolano̱, di matombwane̱ pe̱ mo̱ o mbadi jita.

Mulatako ma Loba na bato ba benama. Loba e nde Sango asu ńa ndolo ńe o mo̱ń. (Mateo 6:9) Di dube̱ te̱ mo̱, je ná di be̱ mako̱m mao. (Myenge 25:14) Yehova a mabele̱ wa ná o siseye mo̱ be̱be̱ o muka, na ná o ‘bambe̱le̱ mo̱ mutaka mo̱ngo̱ mwe̱se̱, ebanja a mombwea wa.’​—1 Petro 5:7; Yakobo 4:8.

Yesu a titi Loba. Yesu mo̱me̱ne̱ mō̱ nde Loba a wekino̱ esibe̱ jongwane̱ la moto nupe̱pe̱. Ońola nika nde Bibe̱l e mabele̱no̱ mo̱ ná Mun’a Loba. (Yohane 1:14) Ombusa mo̱ weka Yesu, Yehova a bolane̱ nde nu mun’ao ńaboso ka “sango ebolo” o weka mane̱ mambo me̱se̱.​—Minia 8:30, 31; Kolose 1:15, 16.

 Yesu Kristo a si kwali to̱ buńa ná mo̱ nde e Loba. O diwengisan, a tele̱ye̱ ná: “Na wu nde na [Loba], mo̱ nde a lom mba.” (Yohane 7:29) Ke̱ e o kwalisane̱ mokwed’ao mō̱, Yesu a bele̱ Yehova ná “Sango am na Sango ańu” na “Loba lam na Loba lańu.” (Yohane 20:17) Ponda Yesu a wedino̱, Yehova a pumbwe̱le̱ mo̱ ná a be̱ longe̱ o mo̱ń, a bola mo̱ ngińa ninde̱ne̱, a jese̱ pe̱ mo̱ o dia Lao la mom.​—Mateo 28:18; Bebolo 2:32, 33.

Yesu Kristo e ná ongwane̱ wa o sisea Loba be̱be̱

Yesu a po̱i o wase o jokwe̱le̱ biso̱ jombwea Sango ao. Yehova mo̱me̱ne̱ a kwali jombwea Yesu ná: “Nun nde e Mun’am ńa ndolo, bińo̱ sengane̱ mo̱!” (Marko 9:7) Yesu a bi Loba buka to̱ nja nde. Mo̱ ná: “To̱ moto a si bi nja . . . Tete̱ eno̱, ke̱ Muna, na nu pe̱, ńena Muna a to̱ndino̱ bīse̱ nika.”​—Lukas 10:22.

Yesu a malee̱le̱ bede̱mo ba Loba ná te̱ite̱i. Yesu embilane̱ bede̱mo ba Sango ao o dikala lena a kwalino̱ ná: “Nu ńe̱n mba e̱n nde Tete̱.” (Yohane 14:9) Yesu a boli ná bato ba siseye Loba be̱be̱ na ninka ná embilane̱ ndol’a Sango ao o bebolo na o byala. Mo̱ ná: “Mba nde ne ngea na mbale̱ na longe̱; to̱ moto a si mapo̱ na Tete̱ esibe̱ tongwea na mba.” (Yohane 14:6) A bati pe̱ ná: ‘Bowe̱ Loba ba mbale̱ ba me̱nde̱ jowe̱ Tete̱ o mudī na o mbale̱; ebanja Tete̱ a mapula nde ba bena ba mowe̱ mo̱ nika.’ (Yohane 4:23) Dutea te̱! Yehova a mawasa nde bato ka wa bena ba be̱n ńo̱ngi o bia mbale̱ jombwea mo̱.