ZANNOO YƐLƐ 33
YIELOŊ 130 Be Forgiving
Bo Teɛroŋ Ka Jehoova Boɔrɔ Ka A Lantaapuoruu Maŋ Taa Kyaare Neɛ Naŋ E Yelfaa Naŋ E Nimizeɛ?
“Kyɛ ka yɛ [kaŋa zaaŋ] wa e yelbieri, te taa la soŋnɔ.”—1 GYN. 2:1.
YƐLƐ TE NAŊ NA ZANNE
Te na zannɛɛ yelnimizeere mine yi yɛlɛ naŋ da e a Korinti lantaapuoruu na poɔŋ saŋa na neɛ kaŋa naŋ da e yelfaa kaŋa naŋ e nimizeɛ yaga zaa na.
1. Bo yɛlɛ ka Jehoova boɔrɔ korɔ nensaaleba zaa?
JEHOOVA maalɛɛ nensaaleba a ko te someŋɛ ka te maŋ erɛ yelzaa te naŋ boɔrɔ. Bebiri zaa te maŋ de la gbɛɛ te zemmo poɔŋ. Gbɛre naŋ e nimizeɛ a gaŋ gbɛre zaa neɛ naŋ na baŋ de la ka o de o meŋɛ ko Jehoova, a wa poɔ Jehoova puorebiiri poɔŋ a puoruu. Jehoova boɔbo la ka neɛ zaa de a lɛ gbɛre ŋa. Bonso o nɔŋɛɛ nensaaleba a boɔrɔ te soŋ. O boɔrɔŋ ka te neŋ o nyɔge zɔmennoŋ naŋ soma a nyɛ nyɔvore naŋ ba taa baaraa meŋ.—Dut. 30:19, 20; Gal. 6:7, 8.
2. Bo ka Jehoova boɔrɔ ka noba naŋ e yelfaare naŋ e nimizeɛ na e? (1 Gyɔɔn 2:1)
2 Kyɛ Jehoova ba ferɛ neɛzaa ka o puoruu. O maŋ ko la neɛzaa a vuo ka o de gbɛre o naŋ boɔrɔ. Kyɛ boŋ aŋ seŋ ka a lantaapuoruu nembɛrɛ e ka Kristabieŋ wa e yelfaa naŋ e nimizeɛ? Ka onaŋ ba e kaŋdabaŋkalɛ a leɛre o eebo, aseŋ ka ba iri o bare a lantaapuoruu poɔŋ. (1 Kor. 5:13) Kyɛ ka ba naŋ iri a soba bare a lantaapuoruu poɔŋ gba, Jehoova sereŋ naŋ maŋ boɔrɔŋ ka a soba e kaŋdabaŋkalɛ a leɛre o eebo ka O neŋ o lɛ taa niiloŋ naŋ soma. Yelnimizeɛ na zuŋ Jehoova naŋ ko te a yɔɔdeɛbo la ka, o maŋ tu o eŋɛŋ kyɛ di suuri ko noba naŋ e kaŋdabaŋkalɛ ba yelfaare yɛlɛ. (Kanne 1 Gyɔɔn 2:1.) Jehoova eɛ nɔmmo Naaŋmen naŋ maŋ eŋnɛ noba na naŋ e yelfaare naŋ e nimizeɛ faŋa ka ba e kaŋdabaŋkalɛ a leɛre ba eebo.—Zek. 1:3; Uro. 2:4; Gyi. 4:8.
3. Boŋ teŋ na zanne a zannoo ŋa poɔŋ?
3 Jehoova boɔrɔŋ ka te taa teɛroŋ na o naŋ taa kyaare yelfaare ane noba naŋ maŋ e yelfaare naŋ e nimizeɛ na. A zannoo ŋa poɔŋ te na zanne nyɛɛ lɛ teŋ na baŋ e lɛ. Ka hooŋ wa kanna a zannoo ŋa, kaara ka ho nyɛ (1) lɛ a Korinti lantaapuoruu naŋ da e saŋa na neɛ kaŋa naŋ da e yelfaa naŋ e nimizeɛ na, (2) sowuli a bitontona Pɔɔl naŋ da de ko ba saŋa na a neɛ naŋ e a yelfaa naŋ da e kaŋdabaŋkalɛ na, ane (3) a lɛ nyɛ teɛroŋ na Jehoova naŋ maŋ taa kyaare noba naŋ e yelfaare naŋ e nimizeɛ na.
SAŊA NA NEƐ KAŊA NAŊ DA E YELFAA NAŊ E NIMIZEƐ KORINTI LANTAAPUORUU POƆŊ NA, BOŊ BAŊ DA E?
4. A dɛndɛŋ Kristabiiri saŋa na, bo yɛlɛŋ da e a Korinti lantaapuoruu na poɔŋ? (1 Korinti 5:1, 2)
4 Kanne 1 Korinti 5:1, 2. Pɔɔl sokyɛŋ ata soba na poɔŋ, o da woŋeeŋ ka yelfaa kaŋa naŋ ba soma da erɛŋ a Korinti lantaapuore-paalaa na poɔŋ. A lantaapuoruu neɛ kaŋa da gana neŋ la o saa pɔge. A lɛ yɛlɛ ŋa da eɛ seɛlee yaga zaa, “ka noba naŋ ba puoro Naaŋmen meŋ gba koŋ sage e a peɛ̃mo toma ŋa tɔ”! Kyɛ a lantaapuoruu da ba nyɛ ka a eɛ faa ka a dɔɔ ŋa naŋ be a lantaapuoruu poɔŋ. Aminekaŋaŋ a lantaapuoruu noba mine da teɛrɛŋ ka ba tɔglɛɛ Naaŋmen nimimaaroŋ na o naŋ taa kyaare nensaaleba naŋ ba pɛgeyi na. Kyɛ Jehoova ba tere sori ka yelfaare be o noba poɔŋ. A yɛlɛ ŋa oŋ da erɛ na da sããnɛɛ a lantaapuoruu yosoŋ na. Ka o naŋ da naŋ kyɛnɛ be a lantaapuoruuŋ, a lantaapuoruu deme mine meŋ da naaŋ piili tɔglɛɛ o gyog-faa na. Azuŋ bo sowuli ka Pɔɔl da de ko a lantaapuoruu?
5. Boŋ ka Pɔɔl da yelka a lantaapuoruu e, ka bo oŋ da boɔrɔ ka o wuli? (1 Korinti 5:13) (Kaa a foto meŋ.)
5 Kanne 1 Korinti 5:13. Jehoova da vɛŋɛɛŋ ka Pɔɔl sɛge lɛtɛ ko a lantaapuoruu, a vɛŋ baŋ baŋ ka aseŋ ka ba iri a neɛ na naŋ ba e kaŋdabaŋkalɛ o yelfaare zuŋ na bare a lantaapuoruu poɔŋ. Bo gyogo aŋ da seŋ ka yelmeŋɛ Kristabiiri taa kyaare a soba ŋa? Pɔɔl da yelko baŋ ka, “yɛ ta laŋna ne” o. Wala ka lɛ wuli? Pɔɔl da vɛŋɛɛŋ aŋ pɛle ka, ba “gba ta laŋna dire ne a neɛ ŋa tɔ.” (1 Kor. 5:11) Ka ho neŋ neɛ kaŋaŋ wa laŋ dire bondirii, a na baŋ vɛŋeŋ ka ho neŋ o soba di dama gaa tɔɔre. A pɛlɛɛŋ ka, Pɔɔl da boɔrɔŋ ka o wuli ka ba ta maŋ lanna neŋ a soba. Lɛ na go la a lantaapuoruu yi gyog-dɛgɛ eŋɛŋ. (1 Kor. 5:5-7) Lɛ meŋ na baŋ soŋɛɛ a soba ka o nyɛ ka o sereŋ eɛ yelfaa naŋ e nimizeɛ, ka lɛ vɛŋ ka o poɔ sãã ka o e kaŋdabaŋkalɛ a leɛre o eebo.
Jehoova da vɛŋɛɛŋ ka Pɔɔl sɛge lɛtɛ ko a lantaapuoruu a yelko ba ka ba iri a dɔɔ naŋ e yelfaa kyɛ ba e kaŋdabaŋkalɛ na bare a lantaapuoruu poɔŋ (Kanne o wɛlbo 5)
6. Saŋa na a lantaapuoruu nu naŋ wa kpɛ a lɛtɛ na, wala baŋ da e? Boŋ ka a dɔɔ naŋ da erɛ a yelfaa naŋ e nimizeɛ na meŋ da e?
6 Saŋa na Pɔɔl naŋ da wa de a lɛtɛ toɔle ko a Kristabiiri naŋ be Korinti na, o da ba baŋ lɛ na baŋ na e ba yɛlɛ a kyaare yɛlɛ na o naŋ sɛge ko ba na. Kyɛ Tiitu da wa kooŋ duoro mine naŋ da vɛŋ ka o poɔ pɛle yaga zaa. A lantaapuoruu da de la yɛlɛ na o naŋ sɛge ko ba na toŋ neŋ toma, a da iri a soba na naŋ e a yelfaa naŋ e nimizeɛ na bare a lantaapuoruu poɔŋ. (2 Kor. 7:6, 7) Kyɛ saŋa na Pɔɔl naŋ da toɔle a lɛtɛ ko ba baŋ de o poɔ yɛlɛ toŋ neŋ toma na, a da ba kɔɔre kyɛ ka a soba na naŋ da e a yelfaa naŋ e nimizeɛ na da e kaŋdabaŋkalɛ a leɛre o eebo! O da leɛrɛɛ o gyogo a piili tuuro Jehoova bege naŋ e forifori na. (2 Kor. 7:8-11) Boŋ ka Pɔɔl da lɛ yelka a lantaapuoruu e?
LƐ A LANTAAPUORUU NAŊ DA SEŊ KA BA E A DƆƆ NAŊ DA E KAŊDABAŊKALƐ NA
7. Saŋa na baŋ da iri a dɔɔ bare a lantaapuoruu poɔŋ na, boŋ oŋ da e? (2 Korinti 2:5-8)
7 Kanne 2 Korinti 2:5-8. Pɔɔl da yeleeŋ ka, “a dɔgroŋ ŋa a noba yaga zie naŋ ko a neɛ ŋa tɔ, seŋɛɛ la.” Lɛ wuleeŋ ka tɔnɔ da yi la a to-tage na ba naŋ koo na poɔŋ wa. Bo tɔnɔŋ da yi be wa? A tɔnɔ la ka, a da somooŋ oŋ e kaŋdabaŋkalɛ a leɛre o eebo. Azuŋ a da ba seŋ ka o naŋ nyɛrɛ a to-tage na baŋ da ko o na.—Hib. 12:11.
8. Boŋ ka Pɔɔl da lɛ yelka a lantaapuoruu e?
8 A dɔɔ naŋ da e kaŋdabaŋkalɛ zuŋ, Pɔɔl da yelko la a lantaapuoruu nembɛrɛ ka ba vɛŋ ka o leɛ wa poɔ Jehoova puorebiiri poɔŋ. O da la yelko baŋ ka: “Yɛ di suuri ko o, a moore ko” yɛ yɔɔ na naŋ da e yelfaa naŋ e nimizeɛ na, a kyɛ “leɛ maaleŋ wuli yɛ nɔmmo ko o.” Pɔɔl da boɔrɔŋ ka a lantaapuoruu noba de ba yel-eree ane ba yelyaga a wuli a dɔɔ ka ba di la suuri koo, a kyɛ nɔŋ o yɛlɛ meŋ. Lɛ na vɛŋeŋ ka ba yɔɔ na nyɛ ka ba leɛ deɛ oŋ a lantaapuoruu poɔŋ.
9. Bonso aŋ da naaŋ baŋ e kpeɛŋaa ka a lantaapuoruu noba mine di suuri ko ba yɔɔ na naŋ e yelfaa naŋ e nimizeɛ na?
9 Aminekaŋaŋ a da naaŋ eɛ kpeɛŋaa ko ba mine ka ba sage ka a dɔɔ ŋa leɛ wa poɔ la a lantaapuoruu poɔŋ bee? A Baabole ba yel, kyɛ aminekaŋaŋ a da na baŋ waaɛ lɛ. Aminekaŋaŋ ba mine suuri da naŋ ireeŋ, bonso yɛlɛ na oŋ da e na da dɛgɛɛ a lantaapuoruu yuori. Kaapɔge a yɛlɛ da naŋ beɛrɛɛ ba mine meŋ, bonso o yel-eree na da sãã la ba poɔ yaga zaa. Aminekaŋaŋ a lantaapuoruu deme mine da na teɛrɛŋ ka, ba na yɛŋ mɔɔrɛɛ ba moɔbo zaa ka ba de Jehoova bege tonɔ neŋ toma, azuŋ a ba tu sori ka ba leɛ deɛ a dɔɔ ŋa naŋ e yelfaare naŋ ba soma fẽẽ zaa ŋa ka o leɛ wa a lantaapuoruu poɔ. (De manne Luk. 15:28-30.) Kyɛ ananso la wala aŋ da e nimizeɛ ka a lantaapuoruu deme wuli nɔmmo meŋɛmeŋɛ ko ba yɔɔ na?
10-11. Boŋ na baŋ e ka a nembɛrɛŋ zagre ka ba di suuri ko neɛ kaŋa naŋ e kaŋdabaŋkalɛ o yelfaare yɛlɛ?
10 Wala aŋ da naaŋ waa ko a dɔɔ ka o naŋ da e kaŋdabaŋkalɛ kyɛ ka a nembɛrɛ da zagre ka ba wuluu nɔmmo? A da naaŋ kyɛrɛɛ o sukyiri yaga zaa ka lɛ vɛŋ ka o eŋɛ kyoɔre. A da naaŋ baŋ vɛŋeŋ ka o teɛrɛ ka o koŋ baŋ lɛ puore Jehoova. Lɛ na vɛŋeŋ o koŋ lɛ mɔɔrɔ o moɔbo zaa ka o maale o neŋ Jehoova niiloŋ na naŋ sãã na.
11 A yɛlɛ faa zie la ka, ka a lantaapuoruu demeŋ da zagre ka ba di suuri ko ba yɔɔ na, a da naaŋ baŋ sãã la ba neŋ Jehoova meŋ niiloŋ. Bonso ka ba naŋ e lɛ, a wuleeŋ ka ba ba tɔglɔ Jehoova naŋ maŋ dire suuri korɔ noba naŋ e yelfaare na, kyɛ ba na tɔglɛɛ Setaana naŋ taa nimikuonii a ba maŋ wulo nimimaaroŋ na. Ba da naaŋ terɛɛ sori ka a Dɛɛvul de ba toŋ neŋ toma, a tu ba eŋɛŋ kyɛ vɛŋ ka ba yɔɔ na bare Jehoova puoruu.—2 Kor. 2:10, 11; Efe. 4:27.
12. Sobuoŋ ka a lantaapuoruu na baŋ tɔgle Jehoova?
12 Azuŋ, wala ka a Korinti deme da na baŋ e a tɔgle Jehoova a kyɛ ta tɔgle Setaana? A da seŋ ka ba maŋ dire suuri korɔ noba naŋ e kaŋdabaŋkalɛ a leɛre yi ba yelfaare eŋɛŋ. Hooŋ nyɛ lɛ Baabole sɛgsɛgreba mine naŋ yelkyaare Jehoova. Deevid da yeleeŋ ka, O “yɛlɛ somaŋ, [a e] siri meŋ ka [o] di suuri ko noba.” (Yiem. 86:5) Maika da sɛgɛɛŋ ka: ‘Nembuoŋ e Naaŋmen aŋa hooŋ, a maŋ vɛnɛ noba yelfaare korɔ ba, a maŋ ŋmaa o noba naŋ e o kyɛŋ bon na bege saammo bare?’ (Maik. 7:18) Ka Aizeeya meŋ sɛge ka: “Vɛŋ ka neŋfaa bare o sori ka toŋfatona meŋ bare o teɛrɛ; vɛŋ ka o leɛ wa Jehoova zie, o na zo la o nembaaloŋ, a leɛ wa te Naaŋmen na zie, o na vɛŋ kooŋ kpɛlɛŋkpɛlɛŋ.”—Aiz. 55:7.
13. Ananso la wala aŋ da seŋ neŋ ka ba leɛ deɛ a dɔɔ naŋ da e kaŋdabaŋkalɛ o yelfaare yɛlɛ na? (Kaa a daga ŋa, “ Bo Saŋa Baŋ Da Leɛ Deɛ A Dɔɔ Korinti Lantaapuoruu Poɔŋ?”)
13 Ka a Korinti lantaapuoruu naŋ da boɔrɔ ka ba tɔgle Jehoova, aseŋ ka ba wuli nɔmmo ko ba yɔɔ na, a wuli ka ba di la suuri koo. Pɔɔl da yeleeŋ ka ka ba naŋ di suuri ko a dɔɔ naŋ e kaŋdabaŋkalɛ na, a lantaapuoruu wuleeŋ ka ba “taa la noɔre sagoo yɛlɛ zaa poɔ.” (2 Kor. 2:9) Saŋa na baŋ da iri a dɔɔ bare a lantaapuoruu poɔŋ na, kyuuri awala mine puoriŋ, o da eɛ kaŋdabaŋkalɛ a leɛ yi o yelfaare poɔŋ. Azuŋ a da ba seŋ ka a nembɛrɛ kyɛnle kɔɔre kyɛ leɛ de o.
WALA TEŊ NA BAŊ E A TƆGLE JEHOOVA DANTORII ANE O NIMIMAAROŊ NA?
14-15. Boŋ teŋ zanne yi yɛlɛ na naŋ da e Korinti paaloŋ na? (2 Piita 3:9) (Kaa a foto meŋ.)
14 Yɛlɛ na naŋ da e Korinti paaloŋ baŋ sɛgaa biŋ na, ba sɛgaaŋ biŋ “ka a wuli te.” (Uro. 15:4) A lɛ sɛgre na soŋ teŋ teŋ nyɛ ka Jehoova ba tere sori ka neɛ naŋ e yelfaare naŋ e nimizeɛ be a lantaapuoruu poɔŋ. Aminekaŋaŋ noba mine maŋ teɛrɛŋ ka, Jehoova naŋ taa nimimaaroŋ zuŋ, ka nobaŋ wa e yelfaare naŋ e nimizeɛ a kyɛ ba e kaŋdabaŋkalɛ, kyɛ o na maŋ bare baŋ ka ba naŋ be a lantaapuoruu poɔŋ, kyɛ lɛ naane ka Jehoova maŋ wuli o nimimaaroŋ ko te. Aneazaa ka Jehoova taa la nimimaaroŋ, kyɛ gyogo zaa naane oŋ maŋ sage; o bege naŋ kyaare yɛlɛ naŋ soma ane yɛlɛ naŋ ba soma na meŋ ba leɛrɛ. (Gyud. 4) Ka Jehoovaŋ da maŋ bare noba naŋ e yelfaare naŋ e nimizeɛ ka ba naŋ be a lantaapuoruu poɔŋ, a na baŋ de la saammo waneŋ a lantaapuoruu poɔŋ.—Yeng. 13:20; 1 Kor. 15:33.
15 Kyɛ te wa zanne baŋɛɛŋ meŋ ka Jehoova ba boɔrɔ ka neɛzaa nyɛ saammo. O maŋ mɔɔrɛɛ o moɔbo zaa ka o faa nensaaleba nyɔvoɛ. O maŋ wulee nimimaaroŋ ko noba naŋ e kaŋdabaŋkalɛ ba yelfaare zuŋ, a leɛre ba eebo a boɔrɔ ka ba lɛ puoruu na. (Izik. 33:11; kanne 2 Piita 3:9.) Azuŋ saŋa na a dɔɔ naŋ be Korinti naŋ da e kaŋdabaŋkalɛ a leɛre o eebo na, Jehoova da ko la a lantaapuoruu sowuli ka ba di suuri ko a dɔɔ a leɛ de o.
Te maŋ tɔglɛɛ Jehoova ka teneeŋ wa wulo nɔmmo ane nimimaaroŋ korɔ bana na ba naŋ da iri ba bare a lantaapuoruu poɔŋ kyɛ leɛ deɛ ba na (Kanne o wɛlbo 14-15)
16. Sobuo ka yɛlɛ na naŋ da e Korinti paaloŋ teŋ zanne a yɛlɛ na vɛŋ hoŋ maaleŋ taa nimipa yaga zaa ko Jehoova?
16 A yɛlɛ na naŋ da e Korinti paaloŋ na soŋ teŋ teŋ nyɛ ka Jehoova e la nɔmmo, mennoŋ, ane dantorii Naaŋmen. (Yiem. 33:5) O gyog-sonne ŋa teŋ wa zanne nyɛ na vɛŋɛɛŋ teŋ boɔrɔ ka te maaleŋ pugiruu yaga zaa. A e teŋ popeɛloŋ yaga zaa Jehoova naŋ taa nimimaaroŋ, bonso te kaŋa la kaŋa zaa ba pɛgeyi, azuŋ a fɛrɛɛŋ ka te nyɛ yelbebe sudi. Te puoree Jehoova bareka yaga zaa a neŋ o naŋ ko te a yɔɔdeɛbo, ka te maŋ tu o eŋɛŋ kyɛ nyɛ te yelbebe sudi. Nyɛ lɛ a naŋ diire sukyiri yaga zaa ka te baŋ ka Jehoova nɔŋ la o puorebiiri yaga zaa, a boɔrɔ ba soŋ meŋ!
17. Boŋ teŋ na zanne a zannoo naŋ tɔnne na poɔŋ?
17 Zenɛ ŋa meŋ ka neɛŋ wa e yelfaa naŋ e nimizeɛ, wala ka a lantaapuoruu nembɛrɛ na baŋ tɔgle Jehoova nɔmmo na a soŋ a soba ka o e kaŋdabaŋkalɛ a leɛre o eebo? Wala aŋ seŋ ka a lantaapuoruu e ba yɛlɛ ka a nembɛrɛŋ wa de gbɛre ka ba iri neɛ kaŋa bare a lantaapuoruu poɔŋ, bee a leɛ deɛ neɛ kaŋa baŋ da iri bare a lantaapuoruu poɔŋ? Te na nyɛɛ a soorebie ŋa nɔɛ iribo a zannoo naŋ tɔnne na poɔŋ.
YIELOŊ 109 Love Intensely From the Heart
