ZANNOO 8
Bonso Ka Naaŋmen Tere Sori Ka Faaloŋ Ane Dɔgɛɛ Bebe?
1. Wala ka faaloŋ e piili?
Naaŋmen terɛɛ sori ka nensaaleba de wagre kɔɔroo a dire naaŋ a kaara ba menne. Lɛ eebo vɛŋɛɛŋ aŋ pɛle ka nensaaleba koŋ baŋ iri ba yelwonii bare
Faaloŋ piileeŋ saŋa na Setaana naŋ wa ŋma a ziri-fɔrɔ na. Setaana da eɛ maleke naŋ ba taa faaloŋ zaa, kyɛ o da “ba be a yelmeŋɛ poɔŋ.” (Gyɔɔn 8:44) O da boɔrɔŋ ka noba puoruu aŋa lɛ na baŋ puoro Naaŋmen na. Kyɛ, Naaŋmen yoŋ aŋ seŋ ka te puoro. Setaana da ŋma la zirii a ko a pɔg-dɛndɛŋ na baŋ boɔlɔ Hawaa na. Setaana da bɛnlooŋ oŋ zagre Naaŋmen noɔre, a kyɛ tu o noɔre. Adama meŋ da tu la Hawaa puori a zagre Naaŋmen noɔre. Gbɛre na Adama naŋ da de naŋ vɛŋ ka dɔgɛɛ ane kũũ bebe.—Kanne Munpiilee 3:1-6, 19.
Saŋa na Setaana naŋ da bɛnle Hawaa ka o zagre Naaŋmen noɔre na, Setaana da iri zɔɔrɔ neŋ la sori na Naaŋmen naŋ taa ka o dire naaŋ a kaara bonvore zaa na. Noba yaga iri tuuree Setaana puoriŋ a meŋ zagre Naaŋmen Naaloŋ diibu na bare. Azuŋ, Setaana wa leɛ la “a teŋɛ ŋa zu naa.”—Kanne Gyɔɔn 14:30; 1 Gyɔɔn 5:19.
2. Lɛ na Naaŋmen naŋ maale te na la ba soma bee?
Naaŋmen bonmaalee zaa toreeŋ. Nensaaleba ane malekere na Naaŋmen naŋ maale na na toɔ̃ sagrɛɛ o nɔɛ yelzaa poɔŋ. (Duturoonomi 32:4, 5) Naaŋmen maale teŋ a ko te son-meŋɛ ka te kaa iri soŋ ane faaloŋ. A son-meŋɛ ŋa maŋ yuo la sori ko te teŋ wulo nɔmmo korɔ Naaŋmen.—Kanne Gyimisi 1:13-15; 1 Gyɔɔn 5:3.
3. Bonso ka Naaŋmen tere sori ka dɔgɛɛ bebe lɛɛŋ a wa ta zenɛ ŋa?
A yi wagre fẽẽ kaŋa poɔŋ, Jehoova terɛɛ sori ka noba iri zɔɔrɔ neŋ sori na oŋ taa ka o dire naaŋ a kaara bonvore zaa na. Ananso la wala? Ananso la ka, o boɔrɔŋ ka te baŋ ka nensaaleba koŋ baŋ dire naaŋ a kaara ba menne ka yɛlɛ kyɛnɛ soŋ zaa korɔ ba. (Ikilisiasitiz 7:29; 8:9) Nensaaleba naŋ be a teŋɛzuŋ yuomo 6,000 la ŋa, te zaa nyɛɛ a sieree aŋ pɛle. Nensaaleba namine ba toɔ̃ iri zɔɔre, yelfaare, daŋkyagre, kyɛbee baaloŋ a bare.—Kanne Jeremaiya 10:23; Urom 9:17.
Naaŋmen naaŋ diibu na ba waa ŋa nensaaleba naaŋ diibu na. Naaŋmen naaŋ diibu na maŋ sonnɛɛ noba na oŋ kaara na zu. (Aizeeya 48:17, 18) A koŋ kɔɔre, Jehoova na sãã la nensaaleba gɔmenantere ŋa zaa. Noba naŋ sage ka Naaŋmen kaara ba la na zeŋ a teŋɛzuŋ.—Aizeeya 11:9.—Kanne Daaniel 2:44.
Kaa a vidio, Bonso Ka Naaŋmen Tere Sori Teŋ Dire Dɔgɛɛ?
4. Naaŋmen naŋ diree kannyiri a wa ta zenɛ ŋa, bo sori la ka Naaŋmen kannyiri diibu na yuo ko te?
Setaana yeleeŋ ka boma na Jehoova naŋ korɔ te na zuŋ teŋ puoruu. Ho boɔrɔŋ ka ho de ho yel-eree wuli ka zirii ka Setaana ŋma bee? Ho na toɔ̃ eɛ lɛ meŋ! Kannyiri na Naaŋmen naŋ dire na yuo la sori ko te, ka te kaa iri ka te boɔrɛɛ Naaŋmen naaŋ diibu kyɛbee ka te boɔrɛɛ nensaaleba naaŋ diibu. Lɛ na teŋ maŋ erɛ te zemmo poɔŋ la na wuli kaŋa na teŋ kaa iri.—Kanne Joob 1:8-12; Yeng Yelibie 27:11.
5. Wala teŋ na toɔ̃ e a kaa iri Naaŋmen ka o e te Naa?
Yɛlɛ na te naŋ erɛ te zemmo poɔŋ la na wuli ka te kaa iree Naaŋmen ka o e te Naa
Ka teneeŋ zanne yelmeŋɛ puoruu yɛlɛ naŋ be Naaŋmen Yelbiri a Baabole poɔŋ na, a de yɛlɛ na meŋ teŋ zanne na tonɔ neŋ toma, lɛ wuleeŋ ka te kaa iree Naaŋmen ka o e te Naa. (Gyɔɔn 4:23) Ka teneeŋ tɔglɔ Yezu a tage te menne yi a donɛɛ nadi yɛlɛ ane zɔɔre yɛlɛ zaa poɔŋ, lɛ na wuliŋ ka te zagrɛɛ Setaana naaloŋ diibu na bare.—Kanne Gyɔɔn 17:14.
Setaana maŋ de la o kpeɛ̃o na bɛnlɛ noba baŋ teɛrɛ ka gyog-faare ane yelfaare eebo somaŋ. Kyɛ tenee yɛŋ maŋ zagrɛɛ a yɛlɛ ama zaa bare. Lɛ zuŋ te zɔmenne mine na baŋ erɛ teŋ seɛ, kyɛbee a iri zɔɔrɔ ne te. (1 Piita 4:3, 4) Azuŋ, aseŋ ka te zaa kaa iri yɛlɛ te naŋ seŋ ka te e. Te na kaa iriŋ ka te laŋna neŋ noba naŋ nɔŋ Naaŋmen bee? Te lɛ kaa ireeŋ ka te sagra o bege na oŋ yi nɔmmo poɔŋ a ko te na bee? Ka teneeŋ wa erɛ lɛ, te maŋ wuliŋ ka zirii ka Setaana da ŋma saŋa na oŋ yelka ka neɛŋ wa tuoro yelkpeɛne o koŋ sagra Naaŋmen nɔɛ na.—Kanne 1 Korinti 6:9, 10; 15:33.
Nɔmmo na Naaŋmen naŋ taa ko nensaaleba na vɛŋɛɛŋ teŋ baŋ ka faaloŋ ane dɔgɛɛ na baareŋ. Noba naŋ de ba yel-eree wulo ka ba sagɛɛ a yɛlɛ ŋa di na zeŋ la a teŋɛzuŋ tegitegilɛ.—Kanne Gyɔɔn 3:16.
