Neɛ naŋ maale te na la taa yɛŋ naŋ e zuluŋ a gaŋ te. Te Saa Jehoova nɔŋɛɛ te yɛlɛ, a maŋ lɛ kaara te zu meŋ. Ane meŋ, Jehoova ba maale te ka te wulo te menne sori. (Jeremaiya 10:23) Aŋa lɛ na aŋ maŋ e nimizeɛ ka bidɔgreba wulo ba biiri sori na, a fɛrɛɛŋ ka Naaŋmen meŋ maŋ wulo te sori. (Aizeeya 48:17, 18) Baabole sowuli maŋ wulo teŋ sori, azuŋ te na baŋ yeliŋ ka a eɛ kyɔɔtaa naŋ yi Naaŋmen zie.​—Kanne 2 Timoti 3:16.

 Jehoova bege ane o sowuli na maŋ wulo teŋ lɛ teŋ na baŋ e a taa zeŋ laafeɛ pampana, ane maaloo naŋ koŋ baŋ baare nendaare kaŋa. Naaŋmen la maale te, azuŋ a somaŋ yaga zaa ka te tuuro o bege ane o sowuli na, a maŋ lɛ puoruu bareka o naŋ ko te a bege neŋ a sowuli ŋa meŋ.​—Kanne Yieme 19:7, 11; Yel-iriwulaa 4:11.

 Baabole sowuli eɛ yelmenne naŋ koŋ baŋ leɛre naŋ be a Baabole poɔŋ. Kyɛ, ba maŋ de la bege tonɔ neŋ toma wagre mine poɔŋ, kyɛ ka yɛlɛŋ wa leɛre, ba maŋ toɔ̃ leɛrɛɛ a bege. (Duturoonomi 22:8) Aseŋ ka te maŋ teɛre yɛlɛ gaa tɔɔre sɛre kyɛ na toɔ̃ baŋ Baabole sowuli na teŋ na baŋ de toŋ neŋ toma yɛlɛ mine poɔŋ. (Yeng Yelibie 2:10-12) Aŋa mannoo poɔŋ, a Baabole yeleeŋ ka nyɔvore eɛ kyɔɔtaa naŋ yi Naaŋmen zie. Te na baŋ de la a sowuli ŋa toŋ neŋ toma te tomazieŋ, yiriŋ, ane saŋa na teŋ wa tuuro sori. A sowuli ŋa maŋ soŋ teŋ teŋ kaara te menne zu velaa, a tage te menne yi yelzaa teŋ na baŋ e ka noba mine pere eŋɛŋ.​—Kanne Toma 17:28.

 Yezu yeleeŋ ka Baabole sowuli ayi mine bebeŋ a e tegroŋ yaga zaa. A dɛndɛŋ soba wulee bon nanso Naaŋmen naŋ maale te a  ko te nyɔvore. Ona la ka te baŋ Naaŋmen soŋ, a nɔmoo, a yi yelmennoŋ poɔŋ a puoruu. Aseŋ ka te maŋ de a dɛndɛŋ sowuli ŋa tonɔ neŋ toma te gbɛ-deree zaa poɔŋ. (Yeng Yelibie 3:6) Noba na naŋ maŋ de a sowuli ŋa tonɔ neŋ toma neŋ Naaŋmen maŋ nyɔgɛɛ zɔmennoŋ, ba maŋ taaɛ popeɛloŋ meŋɛmeŋɛ, ane nyɔvore naŋ ba taa baaraa meŋ.​—Kanne Matio 22:36-38.

 A yiiloŋ sowuli na baŋ soŋ teŋ ka emmaaroŋ be te neŋ te taaba kpakyagaŋ. (1 Korinti 13:4-7) Ka teneeŋ boɔrɔ ka te de a yiiloŋ sowuli ŋa tonɔ neŋ toma, aseŋ ka te tɔglɔ sori na Naaŋmen naŋ maŋ tu a wulo noba nɔmmo na.​—Kanne Matio 7:12; 22:39, 40.

 Baabole sowuli maŋ sonnɛɛ booree deme baŋ nɔnɔ taa a lɛ taa noɔreyeni meŋ. (Kolosi 3:12-14) Sowuli kaŋa naŋ be Naaŋmen Yelbiri na poɔŋ maŋ ko la booree deme gomeŋɛ. A sowuli la ka kultaa deme seŋ ka ba kpimare taa tegitegilɛ.​—Kanne Munpiilee 2:24.

 Ka teneeŋ maŋ de Baabole sowuli tonɔ neŋ toma, a na baŋ soŋ teŋ ka te kaara te bontaree zu velaa, a lɛ vɛŋ ka te taa sukyirimaaroŋ meŋ. Aŋa mannoo poɔŋ, tomazie neŋkpoŋ zaa maŋ boɔrɛɛ tontonneba naŋ de Baabole sowuli tonɔ neŋ toma, a taa yelmeŋɛ a kyɛ lɛ tonɔ tonkpeɛne meŋ. (Yeng Yelibie 10:4, 26; Hiburu 13:18) Naaŋmen Yelbiri na maŋ lɛ wulo teŋ ka te maŋ vɛŋ ka boma na teŋ taa na seŋ te, a lɛ moɔ a vɛŋ ka te neŋ Naaŋmen zɔmennoŋ na e tegroŋ ko te a gaŋ te bontaree.​—Kanne Matio 6:24, 25, 33; 1 Timoti 6:8-10.

 Ka teneeŋ de Baabole sowuli tonɔ neŋ toma, a na baŋ vɛŋeŋ ka te taa laafeeloŋ naŋ soma. (Yeng Yelibie 14:30; 22:24, 25) Aŋa mannoo poɔŋ, Naaŋmen yeleeŋ ka te ta maŋ nyu dãã lɛɛŋ a te kuoli. Ka teneeŋ de a sowuli ŋa tonɔ neŋ toma, a na soŋ teŋ ka te go te menne yi baaloŋ, ane yel-uraa zaa naŋ na baŋ pere te eŋɛŋ. (Yeng Yelibie 23:20) Jehoova ko teŋ sori ka te maŋ nyuuro dããkpeɛne, kyɛ o ba tere sori ka te maŋ nyu kuoli. (Yieme 104:15; 1 Koriniti 6:10) A Baabole sowuli maŋ lɛ wuli teŋ lɛ teŋ na baŋ e a kaara te yel-eree ane te teɛrɛ zieŋ velaa zaa. (Yieme 119:97-100) Kyɛ, tɔnɔ na Kristabiiri naŋ na nyɛ ko ba menne zuŋ naaneŋ maŋ vɛŋ baŋ tuuro Naaŋmen sowuli na. Ba maŋ tuuree a sowuli ba naŋ boɔrɔ ka ba eŋnɛ Jehoova zuŋ.​—Kanne Matio 5:14-16.