Sane na noba naŋ ŋmeɛrɛ zɔɔre eŋɛŋ na maaleŋ duoree saa yaga zaa.

•   “Yuoni naŋ pare, gɔmenantere naŋ be a donɛɛ lombori zaa de la libie naŋ ta ŋa Amɛrika dɔɔlare 2.2 trillion toŋ neŋ toma zɔɔre yɛlɛ poɔŋ. Ba daaŋ ba de a libie naŋ seŋ lɛ toŋ neŋ toma zɔɔre yɛlɛ poɔŋ zaa ka yuoni ŋa naŋ pare ŋa yoŋ naane.”​—The Washington Post, February 13, 2024.

 Boma yaga poɔ la a sane ŋa poɔŋ, libie yoŋ naane. Yɛ vɛŋ ka te nyɛ a yeli ŋa kaŋa: A zɔɔre naŋ be Ukraine paaloŋ.

•   Sogyare. Noba naŋ maŋ peɛrɛ yɛlɛ velaa zaa yeleeŋ ka, saŋa na a zɔɔre naŋ piili yuomo ayi naŋ pare na, sogyare naŋ ta ŋa 500,000 kɔŋ la ba nyɔvoɛ, kyɛbee a pere nimizeɛ̃.

•   A paaloŋ noba. United Nations noba yeleeŋ ka, a paaloŋ noba naŋ pare 28,000 la kpi kyɛbee a pere nimizeɛ̃ a zɔɔre poɔŋ. Kyɛ, a United Nations neŋkpoŋ kaŋa yeleeŋ ka: “Lɛ na a zɔɔre ŋa naŋ de toɔrɔ waneŋ a paaloŋ noba zuŋ na eɛ yɛlɛ naŋ e kpoŋ yaga zaa a gaŋ lɛ na teŋ baŋ pampana na.” a

 Lɛ na nensaaleba naŋ dire dɔgɛɛ zɔɔre neŋ kpaŋkpaŋkpeɛ̃o yɛlɛ zuŋ a donɛɛ lombori zaa na eɛ kpoŋ yaga zaa.

•   Noba noɔre naŋ ta turituri 114 la zo yi ba yie pooreŋ zɔɔre neŋ kpaŋkpaŋkpeɛ̃o toma zuŋ a yi September 2023 a wa ta zenɛ ŋa.

•   Noba noɔre naŋ ta turituri 783 la kpiire neŋ kɔŋ zɔɔre zuŋ. “Zɔɔre eɛ yelkpoŋ kaŋa naŋ maŋ waneŋ kɔŋ, a yi noba pie zaa poɔŋ, noba bayɔpoi eɛ noba naŋ be kɔŋ poɔŋ. A noba ŋa meŋ kpeɛrɛɛ ziiri na zɔɔre neŋ kpaŋkpaŋkpeɛ̃o toma naŋ be.”​—World Food Programme.

 Bebiri kaŋa na taŋ ka zɔɔre baare kpɛlɛŋkpɛlɛŋ bee? Te na baŋ taaɛ teɛretɔ ka emmaaroŋ na be la a teŋɛ ŋa zuŋ bee? Wagre kaŋa na taŋ ka neɛzaa koŋ e nandaana, a dire a teŋɛzu boma wono noɔ̃, a lɛ taa bondirii baŋ na maŋ di a tigi bee? Wala ka a Baabole yeli?

 A Baabole daŋyeleeŋ ka wagre kaŋa na taŋ ka zɔɔre yaare a teŋɛzu zaa. A Baabole de la neɛ kaŋa naŋ zɔŋ wiri a de wuli neŋ a yɛlɛ ŋa yelmannaa poɔŋ.

•   “Wiri yuo kaŋa meŋ da lɛ yieŋ a wa, a da e wir-zeɛ, ba da ko la neɛ naŋ zɔŋ a wiri sori ka o iri emmaaroŋ yi a tendaa zuŋ, ka lɛ vɛŋ ka noba koorɔ taa, ba da de la zɔɔzɔɔsoɔ naŋ e kpoŋ meŋ koo.”​—Yel-iriwulaa 6:4.

 Wiri zɔnneba bayi mine naŋ are ko kɔŋ ane baalonne neŋ yeltaare yaga naŋ waana neŋ kũũ da tuuree a dɛndɛŋ wiri zɔŋna na puoriŋ. (Yel-iriwulaa 6:5-8) Ka hooŋ boɔrɔ ka ho zanne yɛlɛ yaga a kyaare a Baabole daŋyelbo ŋa yɛlɛ, ane bon nanso hoŋ na baŋ taa sagediibu ka a daŋyelbo ŋa nyɛrɛɛ eebo zie ŋaŋ, kanne a yelzu ŋa, “The Four Horsemen​—Who Are They?” (A Wiri-Zɔnneba Banaare Na​—Nembobo La)

 A koŋ kɔɔre ba koŋ lɛ de a teŋɛzu bontaree tonɔ neŋ toma zɔɔre poɔŋ. Kyɛ, nensaaleba naaneŋ na vɛŋ ka a yɛlɛ ŋa nyɛ eebo. A Baabole yeleeŋ ka:

•   Naaŋmen na vɛŋeŋ ka “zɔɔre baare a tendaa lombori zaa.”​—Yieme 46:9.

•   Naaŋmen na iree toɔrɔ na zaa zɔɔre naŋ waneŋ. “O na eɛrɛɛ nentaŋ zaa bare ba nimieŋ, kũũ koŋ la kyebe, woore, konni, ane kpɛlle ŋmeɛbo koŋ la bebe. A na e la yelkorɔ naŋ pare wa gaa.”​—Yel-iriwulaa 21:4.

•   Naaŋmen na vɛŋeŋ ka emmaaroŋ bebe tegitegilɛ a ko neɛzaa. “N noba na kpeɛrɛɛ maaroŋ ziiri poɔŋ, ziiri naŋ ba taa pulteɛ ane ziiri naŋ ba taa gɔmɔ.”​—Aizeeya 32:18.

 Baabole daŋyelbo wuleeŋ ka zɔɔre ane yɛlɛ na teŋ nyɛrɛ aŋ erɛ zenɛ na eɛ sieree naŋ wuli ka a koŋ kɔɔre kyɛ ka emmaaroŋ be a teŋɛzu zaa.

 Sobuo ka Naaŋmen na tu a waneŋ a emmaaroŋ ŋa nendaare kaŋa? O na tu la o sazu gɔmenante na kyɛbee Naaloŋ na eŋɛŋ a e lɛ. (Matio 6:10) Ka hooŋ boɔrɔ ka ho zanne a Naaloŋ ŋa yɛlɛ ane yɛlɛ a Naaloŋ naŋ na e ko bo, kaa a vidio ŋmaa ŋa, Bo La Naaŋmen Naaloŋ?