1.  ˗Mën ˈö ˗tɔ Babidhɔnö ˗pö ˈkpii˗?

2.  ˈˈTʋ̈ŋ ˗mɛɛn ˈö kun ˗Zlan ˗bha ˗Yamɛn ˗zɔn ˈˈtʋ̈ŋ ˈka?

3.  Mɛn ˈˈdhekë ˗kɔ ˈö ˗gban ꞊ɲɔɔn ˗bha

4.  Dhe waa ö ꞊gɔn ˗an ˗bha ꞊kankwëësü

5.  ˈWɔn ˈbhaa ˗nu ˈwo ˗gban ˈwlaan˗ kë ˗sü ˗bha

6.  ˗Sü ˈkwëë˗ ˗yua

7.  ˈˈDhoo ˗wɔn waa ˗dho ö ˈko ˗nu ˈka ˗sü ˈö ˈˈkwi ˈˈdhiʋ̈

 1. ˗Mën ˈö ˗tɔ Babidhɔnö ˗pö ˈkpii˗?

ˈMën ˗kë ˈö ˈkwa˗ pö ꞊dhɛ ‹Babidhɔnö ˗pö ˈkpii˗› bhë ˈyö ˗tɔ ꞊sua ˗zlanwo ꞊gban ˈˈpɛpɛ ˗lokotasü? (˗Dhɛkpaɔ dhiaˈˈ ˈsëëdhɛ 17:5) ˗Kwaa ˗gɛn ˗yaaga ˗ga:

• ˗A ˗kɔ ˗yö ˈˈkpɔnŋtaawɔn ˗todhʋ̈sü ˈgü. Biblö ˗ya ˗pö Babidhɔnö ˗pö ˈkpii˗ ˗yö ˗ya ˗sü ˈka ‹mɛ kpö ˗nu [waa] ˈˈsɛgɔ ˗nu› ˗gɔ ˈˈdhiʋ̈. ˗Yö «˗gblüdëdhɛpö ˈˈpɛpɛ ˈwo ˈˈkpʋng ꞊taa ˗a ꞊gban ˗gɔ ˈka.»—˗Dhɛkpaɔ dhiaˈˈ ˈsëëdhɛ 17:15, 18.

• ˈˈSɛ ˗gɔ ˈˈgbɩɩ˗ ɛɛnˈˈ ˈˈdhoodɔmɛn ˈˈgbɩɩ˗ ˈyaa ˗mü. ˗A ˗gɛn ˗mü ꞊dhɛ Babidhɔnö ˗pö ˈkpii˗ ˈgü ˗yö ˗shiʋ̈, ˈˈkɛɛ kö «˗Gludë ˗nu ˈwo ˈkpongtaa» waa «ˈDhɔɔdɔmɛ ˗nu» ˗wo ꞊kun ˗dhö.—˗Dhɛkpaɔ dhiaˈˈ ˈsëëdhɛ 18:9, 15, NTBL.

• ˗Yö ˗Zlan ˈtɔ ˗zë ö këwɔn ˗nu ˈgü. Biblö ˗ya ˗dhɛ ‹˗zuadhe ɛɛnˈˈ ˈˈɲangüyaadhe ˈkpii˗› ˗a ˗gɛn ˗mü ꞊dhɛ ˗yö ˗mlɛɛn ˗da waa ˈˈsɛgɔdhiʋ̈mɛn ˗nu wo ꞊zinŋgü wëëga waa˗ ꞊trɔɔn ˈˈwɛɛ ˈbhaa ˗nu ˗wɔn ˈgü. (˗Dhɛkpaɔ dhiaˈˈ ˈsëëdhɛ 17:1, 2) ˗Yö ˈˈkpënŋ˗ ˗kë ˈˈsɛ ˈˈpɛpɛ ˈgümɛn ˗nu ˗gɔ, ˈö ˗ya mɛn ˈˈmliyɔn ꞊va ꞊dede zë.—˗Dhɛkpaɔ dhiaˈˈ ˈsëëdhɛ 18:23, 24.

ˈDho ˈzü ˈwɔn ˗gɔ 13 ˈwɔn ga 6 ˈgü.

 2. ˈˈTʋ̈ŋ ˗mɛɛn ˈö kun ˗Zlan ˗bha ˗Yamɛn ˗zɔn ˈˈtʋ̈ŋ ˈka?

Biblö ˗ya ˗to ˈˈdhiʋ̈ ˈö˗ pö ˗Zlan ˗bha ˗yamɛn ˗dho yö zaŋta ˈˈdhoogɔ 69 ˈˈdhiʋ̈todhɛ ˈgü.—˗Ka Daniel 9:25 ˗wo pö.

• ˈˈDhoogɔ 69 ˈwo bhë ˗an zü ˗yö ˗dɔ ˈˈtʋ̈ŋ ˗mɛɛn ˈka? ˗An zü ˗yö ˗dɔ ˗kwɛ 455 ˈka kö Yesu yö ˈti bhɔ ꞊köŋ (K.Y.B.) ˗Kwɛ ˈö bhë yö ˈnën ˈö ˈˈsedë Neemi ˗yö dho Zedhizadhɛmö kö ˈö˗ ‹baaˈˈ ˈö˗ dɔ ˈzü.›— Daniel 9:25; Néhémie 2:1, 5-8.

• ˈˈDhoogɔ 69 ˈö bhë ˗wa ˗dhoŋ ˗kɔ ˗kë ꞊dhɛ? ˗Zlan ˗Wo ˈˈdhiʋ̈ ˗lo ˗kɔ ˈbhaa ˗nu ˈgü ˗wo ˗kwɛ do ˗dhɛ ˗dhɛkpaɔyi do. (Nombres 14:34; Ézéchiel 4:6) ꞊Ya kë ˈˈdhʋ̈ kö ˗a ˈˈdhoogɔ do ˈnën ˈö ˗tɔ ˗kwɛ ˈˈsɔɔplɛ. ˗A ˗wɔn ˈgü ˈˈdhoogɔ 69 ˈö bhë, ˗a ˈˈdhiʋ̈ ˗yö ˗to ˗kwɛ 483 ˈka (ˈˈdhoogɔ 69 ˗gwaa ˈˈsɔɔplɛ).

• ˈˈDhoogɔ 69 ˈwo bhë ˗an ˈˈdhiʋ̈ ˗yö ˗ta ˈˈtʋ̈ŋ ˗mɛɛn ˈka? Kö ˈkwa ˗kwɛ 483 dhʋʋsü züdɔ ˗kwɛ 455 ˈka kö Yesu yö ˈti bhɔ ꞊köŋ, kwa ˈˈdhiʋ̈ ˗yö ˗ta ˗kwɛ 29 ˈka kö Yesu ˗ya bhɔ (K.Y.). a ˗Kwɛ ꞊dede ˈö bhë yö ˈnën Yesu ˗yö bɔ ˗a ˈka ˈˈyi ꞊bhaa ˈö ˗kë ˗Zlan ˗bha ˗Yamɛn ˈka.—Dhukö 3:1, 2, 21, 22.

ˈDho ˈzü ˈwɔn ˗gɔ 15 ˈwɔn ga 5 ˈgü.

 3. Mɛn ˈˈdhekë ˗kɔ ˈö ˗gban ꞊ɲɔɔn ˗bha

Mɛn ˈˈdhekë ˗kɔ ˈˈslö ˈbhaa ˗nu ˈgü, ˗wo mɛn ˈˈdhekë ˗a ˗de ꞊ɲɔɔn ˈka. ˈˈKɛɛ ˗a ˈbhaa ˗nu ˈwaa ˗së kletiɛn ˗nu ˗bha ˈka. ˗A ˈwɔnzuan ˈnën ˗tɔ: Kletiɛn ˗nu ˈwaa wo ꞊ɲɔɔn nu mɛn ˈˈwɛɛ ˗dhɛ ɛɛnˈˈ ˈwaa ˈˈwɩ ˗a ˗bha kö ˗wo wo ꞊ɲɔɔn ˈsü ˗wa dɔ pë ˈbhaa ˈgü, kö ˗wa ˗da wo kwi ˈgü ˈzü wo ˈˈpɛ ˈˈtʋ̈ŋ ˈka.—Deutéronome 15:23.

ˈˈKɛɛ kletiɛn ˈdhɛ ˈö ˗dhi ˗a ˗dhɛ ˗yö ꞊mɔɔn˗ ˗bha ˈö ˗we ˗a ˈˈslö ˈˈwɛɛ ˈbhaa ˗nu ˗bha. ˗A ˈˈslö ˗nu ˈwo ˈˈdhʋ̈ ˗an ˈbhaa ˈnën ˈwo ˗tɔ mɛn ꞊ɲɔɔn ˈsü ˗sü kö ˗wa ˗ga, mɛn ꞊ɲɔɔn ˈsü ˗sü ˈö ꞊manŋzi ˈgü, ˈö ˈwo ˈˈyi yö ˗a ˈˈgblʋʋ ˈgü ˗a ˈˈpɛ ˈˈtʋ̈ŋ ˈka, mɛn ꞊ɲɔɔn ˈö ban ˗a ˈˈpɛ ˈˈtʋ̈ŋ ˈka, ˗a ˈsü ˗sü ˈö ˈwo˗ ˗zu ˈö ˈwo˗ ˗da ˗a ˈgü ˈzü, ɛɛnˈˈ ꞊manŋzi ˈö yökë mɛn zuʋ̈ga ˈˈgblʋʋ ˈgü kö ˗wa ˗mɛn zuʋ̈ga ˈˈpɛ ˗ni. Kletien ˈdhɛ ˈö ˈdhö yö ˈnën ˈö˗ dua ˈdhö ˗mü kö pë ˈwo ˗dho ˗a kë ˗a ꞊ɲɔɔn ˈka ˗a ˈˈpɛ ˈˈtʋ̈ŋ, ˗a ˗ga ˈˈtʋ̈ŋ waa˗ ˈˈdhekë ˈˈtʋ̈ŋ ˈgü, ˗yö ö ˗kɔ ˈˈyɛ ˗a ˗bha. ˗A ˈˈslö ˗nu ˈwo bhë ˗dhɔtrɔɔ ˈdhɛ ˈö ˈdhö waa ö ˗bha kë ˗kɔ ˗mü. ˗A ˗wɔn ˈgü, ꞊ya kë ꞊dhɛ wo ˈdho ˗a ˈˈpɛ, wo ˈdho ˗a ˗ga ɛɛnˈˈ ˗a ˈˈdhekë, kletiɛn dua ˗mü kö pë ˈwo ˗dho ˗a kë ˗a ꞊ɲɔɔn ˈka ˗ya dɔ ˈkpakpadhö. Mɛn ˈö ˈdhö ˗a dua ˗mü kö ˗yö ö ˗de dhɛɛˈˈ ˈkpɔ ꞊dhɛ:

• Kö ˗wo n ꞊ɲɔɔn bɔ pë ˈˈwɛɛ ˈgü kö ˗yö ˈˈtʋ̈ŋ ˈnën ˈbhaa kë ˗mü, n zuʋ̈ˈˈ ˗dho ˈwaannu ꞊dhɛ n ꞊ɲɔɔn ˈö bhë ˗yö n ˈgü ˗kplawo ˗ee? ˗An dua ˈyaa ˗mü kö ˗wa «꞊wɛnŋ ˈˈshia˗ ˗ee»?—Deutéronome 12:23, 24.

• Kö ˗wo n ꞊ɲɔɔn ˈbhaa bho n ˈgü kö ˗wa ˈˈzu, kö ˗wa ˗da n ˈgü ˈzü, n zuʋ̈ga ˈö Biblö ˗yö ˈˈdhiʋ̈sü ˗a ˈka bhë, yö ˈti ˗dho zadɔ n ˗bha ˗ee? Ɛɛnˈˈ ˗yö ˗dho ˈˈwɩ ˈˈslö suu ˈö bhë ˗a ˗bha ˗ee?

ˈDho ˈzü ˈwɔn ˗gɔ 39 ˈwɔn ga 3 ˈgü.

 4. Dhe waa ö ꞊gɔn ˗an ˗bha ꞊kankwëësü

˗Zlan ˗Wo ˈyaa dhe waa ö ꞊gɔn ˗an ꞊faan ˈmën ꞊kankwëësü ˗bha. ˗Ya ˗pö ˈˈpuu ˈka ꞊dhɛ mɛn ˈö ˗kan ö ꞊gɔn ɛɛnˈˈ ö ˗bha dhebɔ ˗bha, ˗a dua ˈyaa ˗mü kö ˗yö dhe ˗dɛɛ ˈsü ɛɛnˈˈ kö ˗yö gwaan˗ ˈˈwɛɛ ˈkpɔ. (1 Kodhɛngtö 7:10, 11) ˈˈKɛɛ ˈwɔn suu ˈbha ˗nu ˈgü, kletien ꞊mɔɔn˗ ˗bha ˈö ˗kan ö ꞊gɔn ɛɛnˈˈ ö ˗bha dhebɔ ˗bha.

• Mɛn ˈö ˈyaa ˈˈwɩ ˗a ˗bha kö ˈö ö ˗zokë ö ˗bha ˈkɔdhigümɛn ˗nu ˈˈpiʋ̈: ˈKɔdë ˈö ˈyaa ˈˈwɩ ˗a ˗bha kö ˈö ö ˗zokë ö ˗bha ˈkɔdhigümɛn ˗nu ˈˈpiʋ̈, yö ˈnën ˈö ˗tɔ mɛn ˈö pë ˈö˗ ˗bha ˈkɔdhigümɛn ˗nu ˗bhawɔn ˈdhö˗ ˗bha ˈö ˈyaa˗ mɛɛnˈˈ, ˈö ˈˈfleedhɛ ꞊gbɔɔnsü ˗yö nu ˗an ˗ta.—1 Timote 5:8.

• ˈˈVaanvandhɛ: ˗Kë ˈˈvaanvansü ˈnën ˈö ˗tɔ mɛn ˗mansü waa mɛn ˗gisü. Mɛn ˈbha ꞊mɔɔn˗ ˗bha ˈö˗ yö ꞊dhɛ ö ꞊gɔn ɛɛnˈˈ ö ˗bha dhebɔ ˗yö ꞊mɔɔn˗ ˗bha ˈö pë yaa ˗kë ö ˈka ɛɛnˈˈ ˈö ö zë.—Gadhatö 5:19-21.

•   Mɛn ˈö˗ ˈˈpiʋ̈ ꞊dedewo kö ˈö ö ꞊gɔn ɛɛnˈˈ ö ˗bha dhebɔ waa Zoova ˗an ˗man ˗mlɛɛn shiʋ̈ˈˈ: ˗A ˗mɛn këwɔn ˗nu ˗wa ˗kë ˈö˗ ꞊gɔn ɛɛnˈˈ ˗a ˗bha dhebɔ ˗kɔ ˈyaa ˗mɔn Zoova ˗dhɔkësü ˗bha toŋtoŋdhö.—Këwɔn ˗nu 5:29.

ˈDho ˈzü ˈwɔn ˗gɔ 42 ˈwɔn ga 3 ˈgü.

 5. ˈWɔn ˈbhaa ˗nu ˈwo ˗gban ˈwlaan˗ kë ˗sü ˗bha

ˈWlaan˗ ˗nu ˈö ˈwaa Zoova ˗dhɛ ˗së, kletien ˗nu ˈwaa ˗an kë. ˈˈKɛɛ ˈwɔn ˈbhaa ˗nu ˈwo ˗gban ˈwlaan˗ ˗nu ˈwo ˈˈdhʋ̈ ˗an ˗bha ꞊wa kë, kletiɛn ˈdhɛ ˈö ˈdhö ˗a zuʋ̈ga ˈö Biblö ˗yö ˈˈdhiʋ̈sü ˗a ˈka bhë, ˗ya ˗takun ˈö pë ˈö ˗dho ˗a kë ˈö˗ dɔ. ˗A ˈwɔnzuan ˈbhaa ˗nu ꞊nɛn:

• ˗Wo ꞊mɔɔn˗ ˗bha ˈwo ü ˈˈyʋʋ sü ˈwlaan˗ yi ˈka. ꞊Ya kë ˈˈdhʋ̈, ü ꞊mɔɔn˗ ˗bha ˈü˗ pö ˗a ˗mɛn ˗dhɛ «Ü ˈˈnuɛ ˈgbɛ.» ꞊Ya kë ꞊dhɛ ˗ya ˈˈpiʋ̈ kö ˈpë ˗kë ˈü˗ ˗kë ˈˈdhʋ̈ ˈö˗ ˈgüman ˗së ˈka, ˈpë ˗kë ˈö ˈwlaan˗ bhë ˈbhaa˗ kë, ü ꞊mɔɔn˗ ˗bha ˈü˗ ˗gɛn pö ˗a ˗dhɛ.

• Ü ꞊gɔn ɛɛnˈˈ ü ˗bha dhebɔ ˈö ˈyaa Zoova ˗dhɔkëmɛn ˈka ˗yö ꞊mɔɔn˗ ˗bha ˈö˗ pö kaa ü ˗bha ˈkɔɔmɛn ˗nu ˈka ka ˗kɔ ˗da ˈˈkwɩɩ ˈwlaan˗ yi ˈka. ꞊Ya kë ꞊dhɛ ü zuʋ̈ˈˈ ˗ya ˈˈwɩ ˗a ˗bha kö ˈü ˈdho, ü ꞊mɔɔn˗ ˗bha ˈü˗ pö ˗a ˗dhɛ ꞊dhɛ kö ˗wo pë ˈö ˈyaa ˗Zlan ˗dhɛ ˗së ˗wa kë mü, ü ˈti ˗dho ü ˗kɔ ˗da ˗a ˈgü.

• Ü ˗gɔmɛn ꞊mɔɔn˗ ˗bha ˈö pë ˈnën ˈbhaa ˗da ü ꞊saa ˗ta ˈwlaan˗ ˈˈtʋ̈ŋ ˈka. ˈˈGbɩɩdhɛ ˈyaa ˗mü kö ˈü ˗kɔ ˗a ˈka. ˈBha ˈˈwɩ ˗a ˗bha, ü ˗gɔmɛn ˗dho ˗a pö ˈwlaan˗ ˈö bhë ˈü˗ ˗kë ˗ee? Ɛɛnˈˈ ˗ya ˗kë ˈˈdhʋ̈ kö ˈö ü ˈˈnuɛ bho yö ˗së ˈü˗ ˗kë ˗a ˗bha ˗ee?

• ˗Wo ꞊mɔɔn˗ ˗bha ˈwo gbɔɔ ü ˗gɔ ˈwlaan˗ ˈˈtʋ̈ŋ ˈka. ˗A ˗mɛn ꞊mɔɔn˗ ˗bha ˈö˗ pö ü ˗dhɛ: «A˗ ˈwɔn ˗dɔ ꞊dhɛ ˈbhaa ˈwlaan˗ ˈö yö ˗a kë, ˈˈkɛɛ a˗ ˈˈpiʋ̈ ˈa pë ˈö yö ˗a gbɔɔ ü ˗gɔ.» ˗A ˈbhaa ˗ya kë kö ˈˈgblüsë ˈnën mɛn ˈö bhë ˈö˗ ˈˈpiʋ̈ ˈö˗ kë ü ˈka. ˈˈKɛɛ ü ꞊mɔɔn˗ ˗bha ˈü ü ˗de dhɛɛˈˈ kpɔ ꞊dhɛ: N ˈgü ˈyaa ˈnën ˈö˗ dan ˗ee? ˈYaa˗ ˈˈpiʋ̈ kö ˈa n ˗kɔ ˗da ˈwlaan˗ ˈö yö ˗a ˈgü ˗ee? ˈBha ü ˗zota ˗a ˈgü ˗së ˈka, ü ꞊mɔɔn˗ ˗bha ˈü ˗we ˗a ˗bha ɛɛnˈˈ ˈü ˗kɔ ˗a ˈka. ˈWɔn suu ˈˈoo ˗su ˈö ˈkwa ˗dho ˗a kë, kwa zuʋ̈ˈˈ dua ˈyaa ˗mü kö ˗yö zadɔ kwa ˗bha, kwa dua ˗mü ˈkwa ˈto ˗klu ˗sü ˈka Zoova ˗bha.—Këwɔn ˗nu 23:1.

ˈDho ˈzü ˈwɔn ˗gɔ 44 ˈwɔn ga 1 ˈgü.

 6. ˗Sü ˈkwëë˗ ˗yua

Kë ˈö˗ wo ꞊dhɛ mɛn ˗nu ˗dhɔ ˗yö kwa ˗kë bhë, kwa pë ꞊gban ˈˈpɛpɛ ˗kë kö ˈwa ˗dho ˈˈyua ˈsü kwa ˗bha. ꞊Ya kë ꞊dhɛ ˗sü ˈkwëë˗ ˗yua ˗yö kwa ˗bha ɛɛnˈˈ ˈö kwa ˗bha ˈgü ˗yö ꞊mɔɔn˗ ˗bha ˈö ˗kë kwa ˗bha, kwa dua ˗mü ˈkwa ˈwɔn ˗nu kë kwa ˈsuaan˗ ˈka kö mɛn ˈˈwɛɛ ˗nu ˈwa ˗dho ˗a ˈsü kwa ˗bha. Kwa dua ˗mü ˈkwa˗ kë ˈˈdhʋ̈ ˈyö ˗tɔ ꞊dhɛ Biblö ˗ya ˗pö: «I këyɔɔ ˗dhɔ ˗yö i kë ꞊dhɛ i ˗dɩ ˈdhö.»—Wlɔmö 13:8-10.

Mɛn ˈö ˗sü ˈkwëë˗ ˗yua ˈdhö˗ ˗bha, ˗yö ˗dho ˗a ˗zɔn ꞊dhɛ mɛn ˈˈwɛɛ ˗nu ˗dhɔ ˗yö ö ˗kë ˗kɔ ˗kë ꞊dhɛ? ˈYaa˗ ˈsü ö ˗de ˈgü ˈyaa ˈwü ˗an ˗bha kö ˗yö ö ˗kɔ ˗da ˗an ꞊kwɛɛ˗ ɛɛnˈˈ kö ˗yö ˗an ˈˈkpɛnŋ mü. Mɛn ˈbha yö ˈti˗ ˗dhɛ ö ˗gɔ ˈkɔɔ ˈˈyua ˈö˗ ˗bha ˗a ˗wɔn ˈgü, ˗a dua ˈyaa ˗mü kö ˗yö ˗shiö ˗a ˗dhɛ. ˗A ˗bha ˗bɔ ˈˈyi ꞊bhaa ˈˈtʋ̈ŋ ˗yö ˗wo ˗ni ˈgü, ˗a dua ˗mü kö ˈˈyua ˈö˗ ˗bha ˗ya blɛɛˈˈ mɛn zii ˗nu ˗bha ˈwɔnyëë˗ ˗dhɛ. ꞊Ya kë ˈˈdhʋ̈ ˗wo ˗dho ˗a ˈˈslö mɛɛnˈˈ kö mɛn ˈˈwɛɛ ˗nu ˈwo ˗dho bɔ ˈˈyi ꞊bhaa ˈwa ˗dho ˈˈyua ˈö bhë ˗a ˈsü. Mɛn ˈö˗ yö ꞊dhɛ ˗sü ˈkwëë˗ ˗yua ꞊mɔɔn˗ ˗bha ˈö ˗kë ö ˗bha, waa mɛn ˈbhaa wo ˈdhö˗ ˗da wo ˈkosüsü ˗mlɛɛn ˈgü, ˗a dua ˗mü kö ˗yö ö ꞊ɲɔɔn ˗ga kö ꞊ya kë ꞊dhɛ ˈˈyua ˈö bhë ˈyaa˗ ˗bha kö ˗ya ˈwɔn dɔ. ꞊Ya kë ˈˈdhʋ̈ kö ˗ya ˗zɔn ꞊dhɛ ö ‹˗ya ö ˈˈtɛɛdo ˗mawɔn zuën ˗ta, ˈyaa ˗ya yö dosɛnŋ ö ˗de ˗wɔn zuën ˗ta.›—Fidhipö 2:4.

ˈDho ˈzü ˈwɔn ˗gɔ 56 ˈwɔn ga 2 ˈgü.

 7. ˈˈDhoo ˗wɔn waa ˗dho ö ˈko ˗nu ˈka ˗sü ˈö ˈˈkwi ˈˈdhiʋ̈

ˈKö ˗kë ꞊dhɛ kletiɛn ꞊plɛ ˈnën ˈwo ˈwëëga ˗wɔn waa ˈˈdhoo ˗wɔn ˗nu ˈˈɲanbhɔ ˗ni ˈgü wo ˈko ꞊zinŋgü, ˗an dua ˗mü kö ˗wa ˗bɛnzë ˈsëëdhɛ ˗ta kö ˈya ˗dho yö ˗zuöödhe ˗bha. (Jérémie 32:9-12) ˈˈKɛɛ ꞊ya kë ꞊dhɛ ˈwëëga ˗wɔn ɛɛnˈˈ pë ˈbhaa ˗ya nu ˈˈdhinaan ˈsɛɛn˗ ˗nu ˈka kletiɛn ˗nu ꞊zinŋgü, ˗an dua ˗mü kö ˗wa ˈˈɲanbhɔ ˈˈvaandhö ˗dhɔkaa ˈgü wo ˈko ꞊zinŋgü.

꞊Ya kë ˈpö ˈwɔn ˈˈgblʋ̈gblʋ̈ ˗nu ˈwo ˗kë ꞊dhɛ mɛn ˈtɔ zë ˗sü ɛɛnˈˈ mɛn ꞊flüübhösü ˈdhö ˗an ˈka ꞊wɛ? ˗Wa ˈˈɲan ˗bhɔ ˗kɔ ˗kë ꞊dhɛ? (˗Ka Matiö 18:15-17 ˗wo pö.) Yesu ˗yö ˗an ˈˈɲanbhɔ ˗kɔ ˗yaaga ˈwo yö ˗an ˗zɔn:

1. (1) Mɛn ꞊plɛ ˈö ˈka bhë ˗kaa ˈˈslö mɛɛnˈˈ kö ˈka˗ ˈˈɲanbhɔ ka ˈko ꞊zinŋgü.—˗Ka kpɔɔˈˈ ˗a ˈˈɲan ˈsɛɛn˗ 15 ˗bha.

2. (2) ˈˈKɛɛ ka ˈti ˗mɔn ˗a ˈˈɲanbhɔ ˗sü ˗bha, ˗ka kletiɛn ˗zogbansü do ɛɛnˈˈ ꞊plɛ kpa ka ˗bha kö ˈka˗ baaˈˈ. —˗Ka kpɔɔˈˈ ˗a ˈˈɲan ˈsɛɛn˗ 16 ˗bha.

3. (3) ꞊Ya kë ˈzü ꞊dhɛ ˗a ˈˈɲan yö ˈti bhɔ toŋtoŋdhö, ka ꞊mɔɔn˗ ˗bha ˈö ˈka˗ ꞊blɛɛ mɛn zii ˗nu ˗dhɛ.—˗Ka kpɔɔˈˈ ˗a ˈˈɲan ˈsɛɛn˗ 17 ˗bha.

ˈWɔn ꞊vadhɛ ˈgü, kletiɛn ˗nu ˈkwaa ˈdho kwa ˈko ˗nu ˈka ˈˈkwi ˗nu ˈˈdhiʋ̈ kö ˗wo kwa ˗bha ˈwɔn ˗nu ˈˈɲanbhɔ. ˗A ˗kë ˈˈdhʋ̈ ˗sü ˗yö Zoova waa ˗zlanwokɔdhi ˗an ˈtɔ ˗zë. (1 Kodhɛngtö 6:1-8) ˈˈKɛɛ ˈwɔn ˈbhaa ˗nu ˈwo ˗kë ꞊dhɛ: dhe ˗bho ˈˈblü ˗sü, ˈnën ˗bha ˗to ö mɛn ˈˈpiʋ̈ ˗sü, ˗bhopë ˗nu ˈnën ˗dhɛ ˗sü, asilansö ꞊saa bho ˗sü, soete ˗bha ˗puö ˗sü ɛɛnˈˈ ˈˈkɛnŋ˗ ˈsëëdhɛ ˗nu ˈdhö bhë, kwa ꞊mɔɔn˗ ˗bha ˈkwa dho ˈˈkwi ˗nu ˈˈdhiʋ̈ kö ˗wa ˈˈɲanbhɔ. ˈDhɛ ö ˈˈdhʋ̈, kletiɛn ˈö dho ˈwɔn suu ˗nu ˈwo bhë ˗an ˈka ˈˈkwi ˈˈdhiʋ̈ kö ˗a ˈˈɲan ˗yö bhɔ ˗së ˈka ˈˈvaandhö bhë, kö yö ˈti Biblö ˗bha ˈtɔŋ˗ ꞊lögü.

ˈWɔn yaa ꞊gbɔnŋsü ˗nu ˈwo ˗kë ꞊dhɛ ꞊kwaan ˈkpii˗ wo ˗sü, ˈˈgbɩɩdhɛ ˗wɔ mɛn ˗ta ˗sü, trʋʋˈˈ yaa ˗kë ˈnën ˈsɛɛn˗ ˗nu ˈka ˗sü ɛɛnˈˈ ˈˈgbɩɩdhɛ ˗wɔ ˗an ˗ta ˗sü waa mɛn zë ˗sü ˗nu ˈdhö bhë, mɛn ˈö ˗an ˗kë, kö kletiɛn ˗ya yö, kö ˗ya blɛɛˈˈ ˈˈkwi ˗nu ˗dhɛ, kö yö ˈti Biblö ˗bha ˈtɔŋ˗ ꞊lögü ˈpö.

ˈDho ˈzü ˈwɔn ˗gɔ 56 ˈwɔn ga 3 ˈgü.