ˈWƆN ˗GƆ 24

Gagade ˈö ˗gban ˗Zlan ˗bha ˈˈkiö ˗nu ˗bha

-A "WƖ -DHƐ

Zoova ˗ya ˈˈpiʋ̈ kö ˗a ˗bha ˈkɔdhi ˈö dhaŋ˗ ˈgü bhë ˈkwa˗ ˈgümɛn ˗nu dɔ. ˗A mɛn ˈbhaa ˗nu ˈnën ˈwo ˗tɔ ˗a ˗bha ˈˈkiö ˗nu. Biblö ˗yö ˗an ˗dhɛ «˗Zlan ˗bha ˈnën ˗nu.» (Job 38:7) ˗Mën ˈö Biblö ˗ya pö ˈö ˗gban ˗an ˗bha? ˗Mën ˈö ˈˈkiö ˗nu ˗wa ˗kë mɛnbhɩɩdhe ˗nu ˗dhɛ? ˗An ꞊gban ˈˈpɛpɛ ˗wo ꞊kun ˗Zlan ˗bha ˈkɔdhigümɛn ˗nu ˈka ˗ee?

1. De ˗nu ˈwo ˗an ˗dhɛ ˗Zlan ˗bha ˈˈkiö ˗nu?

Zoova ˗yö ö ˗bha ˈˈkiö ˗nu ˗da ˈˈdhiʋ̈ ˗be ˈyö ꞊kun ˈˈsɛ ˗da. ˗Wo ˗zuu ˈka ˈpö ꞊dhɛ ˗a ˈdhö dhaŋ˗ ˈgü. (Eblö 1:14, NTBL) ˗Wo ˗mɔn ˈˈmliɲɔn ꞊va ˗bha, ˗a mɛn ˈö ˈdhö ˗yö ö ˗de ˗ta. (˗Dhɛkpaɔ dhiaˈˈ ˈsëëdhɛ 5:11) ˗Wo ‹ˈwɔn ˗man [Zoova] ˗ta, ˈö ˈwo˗ ˗wo ꞊bhlëë ˗ya.› (Psaume 103:20) ꞊Kwɛŋzü Zoova ˗yö ˗bɔ ö ˗bha ˈˈkiö ˗nu ˗ta ˈö ˈwɔn ꞊blɛɛ ö ˗dhɔkëmɛn ˗nu ˗dhɛ, ˈö ˗an ˗takun, ˈö ˗an dha. ˈˈKiö ˗nu ˗wo ʒiaan ˗bho kletiɛn ˗nu ˈka ꞊dɛɛ ˈö ˈwo dho ˗an ˈka mɛn ˗nu ˈö ˗Zlan dɔ ˗sü ˗dhɔ ˈdhö ˗an ˗bha ˗an ˈˈpiʋ̈.

2. De ˗nu ˈwo ˗tɔ Sɔtraan waa ˗zuu yaa ˗nu?

ˈˈKiö ˈbhaa ˗nu wo ˈti ˈto ˗klu ˗sü ˈka Zoova ˗bha. ˗A mɛn ˗blɛɛsü ˈö ˗gban ˗Zlan ˗gɔ ˗yö ˈnën ˈwo˗ ˗dhɛ «ˈˈyina yaa, ˈˈɛɛn Sɔtraan, ˈö ˈˈkpënng˗ ˗kë ˈˈkpʋngtaadhɛ ˗todhʋ̈sü ˗gɔ.» (˗Dhɛkpaɔ dhiaˈˈ ˈsëëdhɛ 12:9) ˗Yö ˗kun Sɔtraan ˈˈpiʋ̈ ꞊dhɛ ˈö mɛn ˈˈwɛɛ ˗nu ꞊kɔɔn. ˗A ˗wɔn ˈgü ˗yö ˈˈkpënŋ˗ ˗kë mɛnbhɩɩdhe ˗blɛɛsü ˗nu waa ˈˈkiö ˈbhaa ˗nu ˗gɔ kö ˗wo ˗gban ˗Zlan ˗gɔ. ˈˈKiö ˗nu ˈwo ˗gban ˗Zlan ˗gɔ ˈˈdhʋ̈ bhë, ˗wo ˗an ˗dhɛ ˗zuu yaa ˗nu. Zoova ˗yö ˗an ˗kë dhaŋ˗ ˈgü ˈö ˈwo nu ˈˈkpɔnŋ ꞊taa. ˗An ˈgüshiʋ̈ ˈˈtʋ̈ŋ ˈyaa ꞊gblɛɛn ˈzü.—˗Dhɛkpaɔ dhiaˈˈ ˈsëëdhɛ 12:9, 12 ˗wo pö.

3. Sɔtraan waa ˗zuu yaa ˗nu ˗wo ˈˈkpënŋ˗ ˗kë kwa ˗gɔ ˗kɔ ˗kë ꞊dhɛ?

Sɔtraan waa ˗zuu yaa ˗nu ˗wo ˗bɔ dükësü ˗ta ˈö ˈwo ˈˈkpënŋ˗ ˗kë mɛn ꞊va ꞊dede ˗gɔ. Dükësü ˈnën ˈö ˗tɔ pë ˈˈpɛpɛ ˈö mɛnbhɩɩdhe ˗nu ˗wa ˗kë kö waa ˗zuu yaa ˗nu ˈwo ˈwɔn blɛɛˈˈ. ˗A ˗kë ˈˈdhʋ̈ ˗sü ˈyaa ˗së. ˗A ˈwɔnzuan ˈnën ˗tɔ ꞊dhɛ mɛn ˗nu ˗wo ˗dho ˗dɛ ˗nu waa ˈˈzʋʋ ˗nu ˗an ˈˈpiʋ̈ kö ˈwɔn ˗nu ˈwo ˗an ˗bha ˗tosɛta ˈgü ˗wa blɛɛˈˈ ˗an ˗dhɛ. Mɛn ˈbhaa ˗nu ˗de ˈpö ˗wo wo ˈˈdhekë blɛɛdhɛ ˈö dü ˗kɔ ˈdhö˗ ˈgü ˗a ˈka. Mɛn ˗nu ˗wa ˈˈslö ˗mɛɛn ˈzü kö ˈwo ˈwɔn blɛɛˈˈ mɛn ˗nu ˈö ˗wa ga ˗an ˗dhɛ. ˈˈKɛɛ Zoova ˗ya ˗pö kwa ˗dhɛ: «Ka dua ˈyaa ˗mü kö ˈka ˈdho ˗dɛ ˗nu ˈˈpiʋ̈ ɛɛnˈˈ kö ˈka ˈdho mɛn ˗nu ˈwo˗ pö wo mɛn ˗nu ˗bha ˗dhɛkpaɔ dhiʋ̈ˈˈ ˗blɛɛ bhë ˗an ˈˈpiʋ̈.» (Lévitique 19:31) ˗Yö ˗dhioo ˈö bhë ˗a ˗dɔ kwa ˗ta kö ˈö kwa ˗takpa Sɔtraan waa ˗zuu yaa ˗nu ˗an ˗gɔ. ˗Zlan ˈyɔɔ˗ ˗nu ˗mü ˗an ˈka, ˗wa ˈˈpiʋ̈ ˈwo ˈwɔn yaa kë kwa ˈka.

˗KAA ˈˈPIƲ̈ ˈPƆN

ˈPë ˗Zlan ˗bha ˈˈkiö ˗nu ˗wa ˗kë ˗zlanwopösü ˈgü, ˈpë ˗kë ˈö dükësü ˈyaa ˗së waa pë ˈö ˈkwa ˗dho ˗a kë kö ˈkwa dha Sɔtraan waa ˗zuu yaa ˗nu ˗an ˗gɔ, ˗kwaa ˗an ˗ga.

4. ˗Zlan ˗bha ˈˈkiö ˗nu ˗wo mɛn ˗nu ˗takun Zoova dɔ ˗sü ˗bha.

˗Zlan ˗bha ˈˈkiö ˗nu ꞊dede ˈwaa ˗zlanwopö mɛn ˗nu ˗dhɛ. ˈˈKɛɛ ˗wo ʒiaan ˗bho ˗Zlan ˗dhɔkëmɛn ˗nu ˈka ˈö ˈwo ˗kpan mɛn ˗nu ˈwo˗ ˈˈpiʋ̈ kö ˈwo ˗Zlan ˗dɔ ˗an ˗bha. -Ka ˗Dhɛkpaɔ dhiaˈˈ ˈsëëdhɛ 14:6, 7 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

ˈMën ˗kë ˈö kwa ˗bhawɔn ˈdhö ˗Zlan ˗bha ˈˈkiö ˗nu ˗bha ˗takundhe ˗bha kö ˈkwa ˗zlanwopö?
˗Zlan ˗bha ˈˈkiö ˗nu ꞊mɔɔn˗ ˗bha ˈwo ü ˗takun, kö mɛn ˗nu ˈö ˗an ˗bhawɔn ˈdhö Biblö ˈgümansü ˗bha ˈü ˗kpan ˗an ˗bha. ˗A ˈwɔn ˗dɔ ˈˈdhʋ̈ ˗sü ˗yö ü ꞊faan ˗mën ˗ee? ˈMën ˗kë?

5. ˗Bhö ˈˈkan dükësü ˗bha.

Zoova ˈyɔɔ˗ ˗nu ˈnën ˈwo ˗tɔ Sɔtraan waa ˗zuu yaa ˗nu. Kwa ˈyɔɔ˗ ˗nu ˗mü ˗an ˈka ˈpö. ˗Ka Dhukö 9:38˗42, NTBL ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

˗Mën ˈö ˗zuu yaa ˗nu ˗wa ˗kë mɛn ˗nu ˈka?

ˈKwaa˗ ˈˈpiʋ̈ ˈkwa kwa ˗de nu ˗zuu yaa ˗nu ˗dhɛ kö ˗wo ˈˈdhiʋ̈sü kwa ˈka. ˗Ka Deutéronome 18:10˗12 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

˗Zuu yaa ˗nu ˗wa ˈˈslö ˗mɛɛn ˗kɔ ˗kë ꞊dhɛ kö kwaa˗ ˗nu ˈkwa ˗da ˗mlɛɛn ˈgü, kö ˈwo ˈwɔn blɛɛˈˈ kwa ˗dhɛ? Dü kë ˈˈslö ˗mɛɛn ˈö ˗dhɛ ˈü˗ ˗bha ˗a ˈgü?
˗A pö ˈö Zoova ˗ya wo ꞊dhɛ ˈkwa ˈˈkan dü suu ˈˈpɛpɛ ˗bha bhë, ü ˗bha ˈgü ˗dhioo ˗së ˗mü ˗ee? ˈMën ˗kë ˈü˗ pö ˈˈdhʋ̈?

˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.

VIDEO: ‹˗Kwa dɔ Sɔtraan ˗gɔ ˗gɔn ˗yan ˈgü› (5:02)

꞊Döŋga ˈö kun Palesa ˈdhu ˗kɔ ˗bha bhë, ü ˗bha ˈgü pë ˗së ˗mü ˗ee? ˈMën ˗kë ˈü˗ pö ˈˈdhʋ̈?
˗Mën ˈö Palesa ˗ya ˗kë kö ˗yö dha ˗zuu yaa ˗nu ˗gɔ?

Kletiɛn ꞊dede ˗nu ˗wo ˗gban ˗kplawo ˗zuu yaa ˗nu ˗gɔ. ˗Ka Këwɔn ˗nu 19:19 waa 1 Kodhɛngtö 10:21 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

˗Ya kë ꞊dhɛ dü ˗kwɛɛ ˗nu ˗wo ü ˗gɔ, ˈmën ˗kë ˈö ü dua ˈdhö ˗mü kö ˈü ˗an ˈgüshiʋ̈?

6. ˗Kwa ˈto ˗a ˈˈgbɩɩ˗ ˈka Sɔtraan waa ˗zuu yaa ˗nu ˗an ˗ta.

Sɔtraan ˈnën ˗tɔ ˗zuu yaa ˗nu ˗gɔmɛn. ˈˈKɛɛ ˈˈkiö ˗nu ˈwo ˗klu ˗Zlan ˗bha, ˗an ˗gɔmɛn ˈnën ˈö ˗tɔ Misɛdhö. Yesu ˈtɔ ˈˈwɛɛ ˈbha ˈnën ˈö ˗tɔ Misɛdhö. Misɛdhö ˈˈpii ˗yö ˈˈgbɩɩ˗ ˗ee? ˗Ka ˗Dhɛkpaɔ dhiaˈˈ ˈsëëdhɛ 12:7˗9 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

Misɛdhö waa˗ ˗bha ˈˈkiö ˗nu ˈpö ˗an ˈˈpii ˈdhö ˈˈgbɩɩ˗ ˗ee ɛɛnˈˈ Sɔtraan waa˗ ˗bha ˗zuu yaa ˗nu ˗mü ˗ee?
Ü ˗bha ˈka Yesu ˗bha gwëëˈˈ ˗nu dua ˗mü kö ˗wo ˈˈsuʋ̈ Sɔtraan waa ö ˗bha ˗zuu yaa ˗nu ˗an ˗gɔ ˗ee?

Ü ꞊mɔɔn˗ ˗bha ˈü to ˗a ˈˈgbɩɩ˗ ˈka Sɔtraan waa ö ˗bha ˗zuu yaa ˗nu ˗an ˗ta. ˗Ka Zakö 4:7 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

Ü ˗dho ˗gban Sɔtraan waa ö ˗bha ˗zuu yaa ˗nu ˗an ˗gɔ ˗kɔ ˗kë ꞊dhɛ?

MƐN ˈBHAA ˗NU ˗WA ˗PÖ: «Video trʋʋˈˈ ˗nu ɛɛnˈˈ fimö ˗nu ˈö ˈwo dü ˗kë ˗an ˈgü bhë ˈwaa ˈyaa˗. Trʋʋˈˈ kë ˗sü ˈˈkpaan ˗mü.»

ˈWɔn yö ˗kɔ suu ˈö ˈˈdhʋ̈ ˈyaa ˗së. ˈMën ˗kë?

˗A ˈDHƐ TO KWA ˈˈƝAAN

˗Zlan ˗bha ˈˈkiö ˗nu ˈwo ˗klu ˗a ˗bha ˗wo kwa ˗takun. Zoova ˈyɔɔ˗ ˗nu ˈnën ˈwo ˗tɔ Sɔtraan waa ˗zuu yaa ˗nu. ˗Wo ˗bɔ dükësü ˗ta ˈö ˈwo ˈˈkpënŋ˗ ˗kë mɛn ˗nu ˗gɔ.