Zoova ˗bha ꞊Gbɛkiö ˗nu ˈwo ˗ya mɛn ˗nu ꞊klaŋ kë ˗sü ˗bha, ˗a yi ˗ya ꞊gwëë. Mɛn ˗nu ˗wo ˗zlanwopö ˈˈtʋ̈ŋ ꞊gban ˈgü, ˗wo ꞊mɔɔn˗ ˗bha kö ˗wo ˈdho ꞊klaŋ ˈbha ˗nu ˈˈdhiʋ̈ kë ˈˈdhʋ̈ kö ‘yë ˗nu ˈwo ˗gban ˗Zlan ˗wɔn ˗bha bha, [...] ˗wa ꞊gban ˈˈpɛpɛ kë ˗së ˈka.’—2 Timote 4:5.

˗Yödhiʋ̈ ˗nu ˗bha ꞊klaŋ. ˈˈTʋ̈ŋ ꞊gban ˈgü ˗yödhiʋ̈ ˗nu ˗wa ˗kwɛ do kë ˗yödhiʋ̈dhɛ ˈgü, ˗wo ˈdho ˗dhɛkpaɔyi ˈˈsɔɔdo ꞊klaŋ ˈˈdhiʋ̈. ˗A ꞊klaŋ ˈö ˈˈdhʋ̈ ˗yö ꞊mɔɔn˗ ˗bha kö ˗yö kë ˗Bhɔkwëëkëgükɔ do ˈö ˗an ˈˈsuee, ˗a ˈgü. ꞊Klaŋ ˈwo˗ kë bhë, ˗yö ˗an ˗takun kö ˗wo ꞊ɲɔɔn Zoova ˈˈsuee, kö ˗wo kë ˗zlanwopömɛn ˗tiaandhö ˗nu ˈka. ˈGo mü ˈzü ˗yö ˗an ˗takun kö ˗wo ˈdho ˗an ˗bha yö ˗së bhë, ˗a ˈka ˈˈdhiʋ̈.

˗Gblüdëdhɛ ˗nɔɔnpömɛn ˗nu ˗bha ꞊klaŋ. ˈˈSu ꞊plɛ ꞊klaŋ ˈö bhë, ˗yö ˗yödhiʋ̈ ˗nu ˈö ˗wa ˗kian, ˈö ˈwo˗ ˈˈpiʋ̈ kö ˗wo ˈdho ˗zlanwopö ˗dhɛ ˈö mɛn ˗bhawɔn ˈdhö ˗zlanwopömɛn ˗nu ˗bha mü, ˗a ˗bha, ˗an ˗takun. ˗Wa ˗pö: ‘Man ˈnën ˈa yö! ˗Bhö n bɔ! ꞊dhɛ ˗zlanwopömɛn ˈkpii˗ ꞊dede ˈö suu ˈyii kë do ˈˈsɛ ˗ta, ˈö ˗kë Yesu Klito ˈka bhë, ˗a ˈdhö.’ (Isaïe 6:8; Zan 7:29) Mɛn ˈü˗ ˈˈpiʋ̈ kö ü ˈdho ˗zlanwopö ˈˈsɛ ˈˈwɛɛ ˈgü, ü dua ˗mü kö ˈü ü ˗bha ˗tosɛta kë ˗bhaasü, ˈyö ˗tɔ ꞊dhɛ ˗dhɛ ˈü ˈdho ˗ni ˗a ˗bha bhë, ˗a ˈbha ˗ya kë, kö ˗an wɔkɔ ˗nu, ˗an bhöpë ˈwaa ꞊dhɛ ü ˗bhaa ˈdhö. ˗A ˗bha ˗ya kë ˈzü kö ü dua ˗mü kö ü ˗wo ˈˈwɛɛ draanˈˈ. ꞊Klaŋ ˈö bhë, ˗yö ˗kɛgbɔɔ ˗nu, dhe waa ö ˗gɔn ˗nu, ˈö ˗an ˗kwɛ ˈdhö ꞊mɔɔn 23 ˗bha ˈö ˗dho ˈö yö˗ ˈka 65 ˗bha, ˗an ˗takun kö ˈˈklʋʋsë ˗nu ˈö ˗an ˗bhawɔn ˈdhö ˗an ˗bha, ˗an ˗bha yö ˈgü, ˗wo ˗an ꞊slɔɔ. ˗Yö ˗an ˗takun ˈpö kö ˈwɔn ˗kë ˗kɔ ˗nu ˈwo ˗dho ˗a kë kö ˗wo yö kë ꞊dedewo Zoova ˗bha ˗kɔlokota ˗dhɛ, ˗wo kë ˗an ˗gɔ.

Gidheadö ꞊klaŋ. Eblö ˗wo ˈgü, ꞊wa˗ pö “Gidheadö, ˗a ˗gɛn ˈnën ˗tɔ “꞊Gbɛkiö kpö”.” Gidheadö ꞊klaŋ ˗zü ˗yö ˗dɔ 1943 ˈka. ˈÖ sü ˗kwɛ bhë˗ ˗bha, mɛn ˈwo ˗ʒiö mɛn 8.000 ˗ta, ˈö ˈwo go ꞊klaŋ bhë˗ ˈˈdhiʋ̈, ˗wo ˗an bɔ ꞊dhɛ bɔmɛn ˗nu ˈdhö kö ˗wo ˗zlanwopö “ˈˈsɛgɔ ˗nu ˈwo ˗dhɛ ꞊gblɛɛn ˈgü,” ˗an ˈgü. (Këwɔn ˗nu 13:47) ˗Dhɛ ˈö Gidheadö ꞊klaŋnën ˗nu ˈwo wo Pedhu, kö ˗zlanwokɔdhi ˈˈwɛɛ ˈbha ˈyaa mü. ˈˈKɛɛ ꞊dɛɛ ˗zlanwokɔdhi ˈwo ˗ʒiö ˗zlanwokɔdhi 1.000 ˗ta, ˗wo mü. ˗Dhɛ ˈö bɔmɛn ˗nu ˈwo ˗ya ˗zlanwopösü ˗bha ʒapɔn, kö Zoova ˗bha ꞊Gbɛkiö ˈwo kun ˈˈsɛ bhë, ˗a ˈgü ˈwaa ꞊mɔɔn ˗kɔŋ do ˗bha. ˈˈKɛɛ ꞊dɛɛ ˗wa ˗ʒiö mɛn 200.000 ˗ta. ˈˈSu ˈˈsoodhu ˈwo˗ kë Gidheadö bhë, ˗Zlan ˈˈDhiwo ˈnën ˈwo˗ ꞊draan ꞊dedewo. Mɛn ˗nu ˈwo ˗an ˗dhɛ ꞊klaŋ ˈö bhë, ˗a ˈˈdhiʋ̈ ˈyö ˈwo ˗tɔ ˗yödhiʋ̈ ˗detasü ˗nu, bɔmɛn ˗nu, Betɛdhömɛn ˗nu, ˈˈpian do ˈˈpiʋ̈ ˗maankëmɛn waa ˗an ˗bha dhebɔ ˗nu. ˗Wo ˗an ꞊klaŋ ꞊dede kë kö ˗zlanwopö ˗yö ˈö ˈˈsɛ ˗todhʋ̈sü ˈgü, ˗wo ˗a ˗gɛn ˗gban.

• ˗Mën ˈö ˗yödhiʋ̈ ˗nu ˗bha ꞊klaŋ ˗ya ˗kë?

• De nu ˈwo ꞊mɔɔn˗ ˗bha kö ˗wo ˈdho ˗Gblüdëdhɛ ˗nɔɔnpömɛn ˗nu ˗bha ꞊klaŋ ˈˈdhiʋ̈?