1-3. Dhɛɛˈˈ ˗nu ˗mɛɛn ˈö ˗gban ga ˗bha ˈö mɛn ˗nu ˗wa kpɔ? ˗Zlanwo ˗nu ˈgümɛn ˈbhaa ˗nu ˗wa ˗yɔ ˗bɔ ˗kɔ ˗kë ꞊dhɛ?

BIBLÖ ˗ya ˗pö kwa ˗dhɛ ꞊dhɛ yi do ˈka, “ga ˈyii ˈdho bhɔ ˈzü.” (˗Dhɛkpaɔ dhiaˈˈ ˈsëëdhɛ 21:4) Kwa˗ ˗yö ˈwɔn ˗gɔ ˈˈsoodhu ˈgü ꞊dhɛ ˗gɔtadhɔpë ˗ya ˗tosɛta ˈö ˈyaa ɲën ˗a ˈˈdhiʋ̈ ˈˈpʋ kwa ˗gɔ. ˈˈKɛɛ ga ˗yö ꞊kun bhɔ ˗ni. (Ecclésiaste 9:5) Dhɛɛˈˈ ˈˈgblʋ̈gblʋ̈ ˗nu ˈö ˈkwa ˗an kpɔ kwa ˗de ˗gɔ ˗a do ˈnën ˗tɔ: ˈKwa ga kwa ˗dho ˈˈmɛn?

² Kö kwa dhɔɔbhaamɛn ˗yö ga, ˈyö dhɛɛˈˈ ˈö bhë kwa ˗bhawɔn ˗yö yö ˗a ˗yɔ ˗bha ꞊dedewo. ꞊Ya kë ˈˈdhʋ̈ kwa ꞊mɔɔn˗ ˗bha ˈkwa kwa ˗de dhɛɛˈˈ kpɔ ꞊dhɛ: ‘꞊Ya ˈdho ˈˈmɛn? ˗A ˈˈɲan ˗yö kwa ˗bha ˗ee? ˗Yö ꞊mɔɔn˗ ˗bha ˈö kwa ˗takun ˗ee? Kwa ˗dho ˗kpan ˗a ˗bha ˈzü ˗dɛɛwo ˗ee?’

³ Dhɛɛˈˈ ˗nu ˈwo bhë, ˗an ˗yɔ ˗nu ˈö ˗zlanwo ˗nu ˈgümɛn ˗nu ˗wa bɔ ˈwaa do. ˗A mɛn ˈbhaa ˗nu ˗wa ˗pö, ˈbha kë ˈwɔnsëkëmɛn ˈka, ü ˗dho dhaŋ˗ ˈgü, ˈˈkɛɛ ˈbha kë ˈwɔnyaakëmɛn ˈka, ü ˗dho ˈˈwo ˈgü. Mɛn ˈbhaa ˗nu ˗wa ˗pö ˈpö ꞊dhɛ, ˈkwa ga kwa ˗kë ˗zuu ˈka ˈkwa dho kwa ˈˈbheman ˗nu ˈˈpiʋ̈. ˈYö˗ mɛn ˈbhaa ˗nu ˗wa pö ˈzü, ˈkwa ga, ꞊wa zadɔ kwa ˗bha, ˈyö ˈkwa bhɔ ˈzü ˗dɛɛwo, ɛɛnˈˈ ˈyö ˈkwa ˗tosɛta kë ˈzü kwi ˈˈwɛɛ ˈgü. Kwa ꞊mɔɔn˗ ˗bha ˈkwa ˗kë mɛn ˈka, ɛɛnˈˈ ˈö ˈkwa ˗kë ˗ʒiaanwo wü ˈka.

4. ˗Zlanwopömɛn ˗nu ˗bha ꞊klaŋwo ˗nu ˈwo ˗gban ga ˗bha, ˗mën do ˈwo wo zü ˗gban ˗a ˗ta?

⁴ ˗Yö ˗kë ꞊dhɛ pë ˗nu ˈö ˗zlanwo ˗nu ˈgümɛn ˗nu mɛn ˗nu ꞊klaŋ ˗kë ˗an ˈka ˈwaa do. ˈˈKɛɛ ˗an ˗bha ꞊klaŋwo ꞊vadhɛ ˗nu ˗wo ˗gban pë do ˗ta. ˗An ˗wo ˗yö do ꞊dhɛ mɛnbhɩɩdhe ꞊ya ga, pë ˈbha ˗yö ˗go ˗a ˈgü ˈö dho ˗tosɛta kë ˗dhɛ ˈbha ˈgü. Gagade ˗mü ˗ee?

5, 6. Kwa ga ˗mën ˈö ˈkwa ˗kë ˗a ˈka?

⁵ Kwa ga pë ˈö ˈkwa ˗kë ˗a ˈka, Zoova ˗ya ˗dɔ. ˗Ya ˗pö kwa ˗dhɛ ꞊dhɛ mɛnbhɩɩdhe ꞊ya ga, kö˗ ˗bha ˗tosɛta ꞊ya ɲën. Ga ˈnën ˗tɔ ˗tosɛta ˈyɔɔ˗. ˈˈDhɛ ˈö ˈˈdhʋ̈ kö mɛn ˗yö ga, ˗a zuʋ̈piʋ̈wɔn waa pë ˗nu ˈwo kun ˗a ˈˈɲaan ˈwaa ˈdho ˗dhɛ ˈbha ˈgü. * Kwa ga, kö ˈkwaa ˗dhɛ yö ˈzüdho, kö ˈkwaa ˈwɔn man, ɛɛnˈˈ kö ˈkwaa ꞊mɔɔn˗ ˗bha ˈkwa kwa ˗zota ˈwɔn ˈbha ˈgü.

⁶ ˗Gblüdë Sadhomɔn ˗yö ˈsëëdhɛ ˗bɛnzë ˈö˗ pö: “Mɛn ˗nu ˈö ꞊wa ga ˈwaa pë ˈbha ˈwɔn dɔ.” Mɛn ˗nu ˈö ꞊wa ga ˈwaa ꞊mɔɔn˗ ˗bha kö mɛn ˗dhɔ ˗yö ˗an kë ɛɛnˈˈ kö ˗wo mɛn ˗san kë, ɛɛnˈˈ “yökësü, ˈwɔn ˗yaki ˗ya ˗sü, ˈwɔndɔdhe, ɛɛnˈˈ ꞊kpɔɔdhɛ ˈwaa ga ˗gblü ˈgü.” (Ecclésiaste 9:5, 6, 10 ˗wo pö.) ꞊Ya ˈgo mü ˈzü, Biblö ˗ya ˗pö Psaume 146:4 ˈgü ꞊dhɛ mɛn ꞊ya ga, kö˗ “˗bha ˗zotadhe” ꞊ya shiʋ̈ˈˈ.

7. ˗Mën ˈö Yesu ˗ya pö ˈö ˗gban ga ˗bha?

⁷ ˈˈTʋ̈ŋ ˈö Yesu ˈˈtɔŋdë ˈˈgbɩɩ˗ Dhazaa ˗yö ga ˗a ˈka, Yesu ˗ya ˗pö ö ˗bha gwëëzë ˗nu ˗dhɛ ꞊dhɛ: “Kwa ˈˈtaɔngdë Dhazaa ꞊ya yi zë.” ˈˈKɛɛ Yesu ꞊yaa˗ pö ˈˈdhʋ̈ kö yö ˈti˗ pö ꞊dhɛ Dhazaa ˗yö ö ˈˈtee pa ˗ni ˈgü. ˗Ya ˗pö ꞊dhɛ: “Dhazaa ꞊ya ga.” (Zan 11:11-14) ˈDhɛ ˈö ˈˈdhʋ̈ Yesu ˗yö ga ˗zɔn yi zë ˗sü ˈka. Yö ˈti˗ pö ꞊dhɛ Dhazaa ꞊ya ˈdho dhaŋ˗ ˈgü ɛɛnˈˈ ꞊ya ˈdho ö ˈˈbheman ˗nu ˈwo ga ˗an ˈˈpiʋ̈. Yö ˈti˗ pö ˈzü ꞊dhɛ Dhazaa ˗yö saanˈˈ ˗ni ˈgü ˈˈwo ˈgü, ɛɛnˈˈ ꞊ya bhɔ ˈzü ˗dɛɛwo, ɛɛnˈˈ ˈzü ꞊ya ˈˈkan wü. ˗Abin ˗toŋtoŋdhö, ˗yö ˗kë ꞊dhɛ ˈpë Dhazaa ˈdhö yi ꞊gblɛɛn zë ˗ni ˈgü ˗a ˈdhö. Biblö ˈˈɲan ˈˈwɛɛ ˈgü ˈzü, Yesu ˗yö ga ˗zɔn yi zë ˗sü ˈka. ˈDhɛ ˈö dho zaidhiusö ˈdhu bho ga ˈgü,  ˗ya ˗pö: “˗Yö yi ꞊në˗ zë, ˈyii ga.”—Dhukö 8: 52

8. Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ ˗Zlan yö ˈti mɛnbhɩɩdhe ˗nu ˗da kö ˗wo ga?

⁸ ˗Zlan ˗yö Adan waa Ɛvö ˗an ˗da kö ˗wo ga ˗ee? Abin! Zoova ˗yö ˗an ˗da kö ˗wo ˗tosɛta ˗së ˗dhɛ yö ˈˈtʋ̈ŋ ꞊gban ˈka ˈˈklʋ̈ʋ̈klʋ̈dhɛ ˈgü. ˈDhɛ Zoova ˗yö mɛnbhɩɩdhe ˗nu ˗da, ˗yö ˗tosɛta ˗kë ˈˈtʋ̈ŋ ꞊gban ˈka ˗sü ˗dhɔ ˗ya ˗an zuʋ̈ˈˈ ˈˈpiʋ̈. (Ecclésiaste 3:11) ˈNënmɛn ˗nu ˈwaa˗ ˈˈpiʋ̈ kö wo ˗bha ˈnën ˗yö kë zii kö ˗yö ga. Pë do ˈö Zoova zuʋ̈ˈˈ ˈˈpiʋ̈ kwa ˗bhaa ˈka ˈyö bhë. ˈˈKɛɛ ꞊ya kë ꞊dhɛ ˗yö kwa ˗da kö ˈkwa ˗tosɛta kë yi ꞊gban ˈka, ˗mën ˈö ˗kë ˈsa ˈyö ˈkwa ga?

9. ˗Mën ˈö˗ ˗zɔn ꞊dhɛ ˈtɔŋ˗ ˈö Zoova ˗ya nu Adan waa Ɛvö ˗an ˗dhɛ bhë ˈyaa kun ˈˈgbɩɩ˗?

⁹ Zoova ˗yö ˗dhioo ˗dɔ Adan ˗ta Edɛnö ˈˈdhüdhɛɛdhö ˈö˗ pö: “ˈlü ˗nu ˈwo zö ꞊nɛ ˈü mɔa˗ kö ˈü ˗an ˈplɛ bhɛ ˗bhö, ˈkɛɛ ü ˈka ˗dho ˈwun ˗së waa ˈwun yaa ˗an dɔ ˗lü ˈö ꞊nɛ ˗a bhɛ ˗bhö, bhii yi ˈü ˗dho ˗a bhɛ ˗bhö ˗a ˈka, ü ˗dho gaa.” (ˈWunzüdɔdhɛ 2:9, 16, 17) ˈTɔŋ˗ ˈˈpuu ˈö bhë, ˗a ˈkun ˗sü ˈyaa ˈˈgbɩɩ˗. ꞊Ya ˈgo mü, Zoova ˈnën˗ dua ˈdhö ˗mü kö ˗yö ˈwɔn ˗së waa ˈwɔn yaa ˗zɔn Adan waa Ɛvö ˗an ˗dhɛ. Kö ˗wo ˈwɔn man ˗a ˗ta, ˗wo ˗dho ˗a ˗zɔn ꞊dhɛ, ˗a ˗bha ˗kë ˗an ꞊kɔɔnmɛn ˈka ˗sü ˈö bhë, wo ˗a ꞊bhlëë ˗ya. ˗Wo ˗dho ˗a ˗zɔn ˗a ˗dhɛ ˈpö ˈzü ꞊dhɛ pë ˈˈpɛpɛ ˈö ˗an nu ˗an ˗dhɛ bhë wo˗ ˈˈnuɛ ˗bho ˗an ˗wɔn ˈgü.

10, 11. (a) Sɔtraan ˗yö ˈˈkpënŋ˗ ˗kë Adan waa Ɛvö ˗an ˗gɔ ˗kɔ ˗kë ꞊dhɛ? (b) ˗Mën ˈö ˗kë pë ˈö Adan waa Ɛvö ˈwo˗ ˗kë bhë ˗an ˗bhawɔn ˈto ˗dhɛ ˈyaa ˈdhö?

¹⁰ ˗Wëëwɔn ˈö ˗kë ˈyö ˗tɔ Adan waa Ɛvö ˗wo ꞊gɔɔgbɩɩ˗ ˗dɔ Zoova ˗gɔ. Sɔtraan ˗ya ˗pö Ɛvö ˗dhɛ: “Kë˗ wo ꞊nɛ ˗Zlan ˗ya ˗pö giagia ˈka ˈlü ˈsaadhö ˈwo ˈlüdhɛidhö zö ꞊nɛ kö ꞊kun ˈka˗ gbɛ bhɛ ˗bhö ˗a?” ˈYö Ɛvö ˗ya ˗yɔ bɔ ˈö˗ pö: “ˈLü ˗nu ˈwo zö ꞊nɛ yi ˗kɔ ˗mɔ ˗a ˗bha ˈyiën˗ ˗an ˈplɛ bhɛ ˗bhö. ˈKɛɛ ˈlü mɛ ˈö dɔ ziën ꞊nɛ ˗a ˗wɔn ˈgü ˗Zlan ˗ya ˗pö yi ˗dhë: ‘Kö ꞊kun ˈka˗ ˗bhö; ˈiin kö ꞊kun ˈka˗ paa ˗dewo, ˈka˗ kë ˈdhö, ka ˗dho ga.’”—ˈWunzüdɔdhɛ 3:1-3.

¹¹ ˈDhɛ ˗kë ˈˈdhʋ̈ ˈyö Sɔtraan ˗ya pö ˈzü: “Daa˗! Ka ˈka ˗dho ga gbongbodhö. ˈˈKɛɛ ˗Zlan ˗ya ˈwun ˗dɔ ˗së ˈka ꞊dhɛ yi ˈka dho ˗a ˗bhö ˗a ˈka, ka ˈyan ˗dhoˈ po, ˈka ˗kë ꞊nɛ ˗Zlan ˈdhö, ˈkaan˗ ˈwun ˗së waa˗ ˈwun yaa ˗an ˗bhokou dɔ.” (ˈWunzüdɔdhɛ 3:4-6) ˗Yö ˗kun Sɔtraan ˈˈpiʋ̈ kö ˗yö kë Ɛvö ˈgü ꞊dhɛ yöö ꞊dede ˗yö ꞊mɔɔn˗ ˗bha kö ˈwɔn ˈö˗ ˈgü ˗së ɛɛnˈˈ ˈö˗ ˈgü ˈyaa˗ ˗yö ˗da ˗a ˗ʒian ˗ta. ˗A ˈˈtʋ̈ŋ do ˈö bhë ˗a ˈgü, Ɛvo ꞊ya ˗gban ˗Zlan ˗gɔ ˈpë ˗dho kë ˗a ˈka,  ˗ya ˗blɛɛ ˗a ˗dhɛ ꞊sua ˈka. Sɔtraan ˗ya ˗pö Ɛvö ˗dhɛ ꞊dhɛ yö ˈti ˗dho ga. ˈDhɛ ˗kë ˈˈdhʋ̈ ˈyö Ɛvö ˗yö ˈˈdhü ˈö bhë ˗a bhɛ ˗bhö, ˈyö˗ ˈbhaa ˗nu ö ꞊gɔn ˗dhɛ. Adan waa Ɛvö ˗wa ˈwɔn ˗dɔ ꞊dhɛ Zoova ˗ya ˗pö wo ˗dhɛ kö ˈkun ˈwo ˈˈdhü bhë ˈwo˗ bhɛ ˗bhö. ˈDhɛ ˈwo˗ ˗bhö ˈyö ˗kë ˈtɔŋ˗ ˈˈpuu ˈö˗ ˈkun ˗dhɛ ˈyaa ˈˈgbɩɩ˗ bhë, ˗a ꞊lögüsü ˈö ö ˗de ˈˈɲaan ˗a ˈka. ˗A ˗bhö ˈwo˗ wo ˗bhë, ˗wa ˗zɔn ꞊dhɛ wo Dë ˈö dhaŋ˗ ˈgü ˈö ˗dhɔkaa ˈdhö˗ ˈgü bhë, wo ˈti˗ ꞊bhlëë ˗ya. ˈPë ˈwo˗ ˗kë bhë, ˗an ˗bhawɔn ˈto ˗dhɛ ˈyaa ˈdhö!

12. ˗Mën ˈö ˗kë ˗gban ˈö Adan waa Ɛvö ˈwo˗ wo Zoova ˗gɔ bhë, ˈwo˗ ˗kë ˈyaa˗ ꞊dedewo?

¹² ˗Gban ˈö kwa ˈˈbheman ˗nu ˗wa wo wo ˗Damɛn ˗gɔ bhë, ˗wa ˗kë ˈyaa˗ ꞊dedewo! ꞊Ya kë ꞊dhɛ ˈbha ü ˈgü dɔ ˈˈgbɩɩ˗ kö ˈü ü ˗zo kë ü gbö waa ü ˈdhu ˗an ˈˈpiʋ̈, kö ˗wo ˈdho ˗wo ˗gban ü ˗gɔ, kö pë ˈü˗ pö ˗wa kë, ˗wa ˈto, kö ˗wa ˈdhɛ ˈü˗ pö ꞊wa ˈdho˗ kë, kö ˗yö kë ˗an këpë ˈka, ˗yö ˗dho kë ü ˗dhɛ ˗së ˗ee? ꞊Wa˗ kë ˈˈdhʋ̈, yö ˈti ˗dho ˈmën ü ˈka ˗ee?

13. ˗A pö ˈö Zoova ˗ya wo ꞊dhɛ “Bhii ˈsɛ ˗mü ü ˈka ˈü ˗dhö dho ˈsɛidhö” bhë, ˗a ˗gɛn ˈtɔ˗ ˗mën?

¹³ ˈDhɛ Adan waa Ɛvö ˈwo ˗gban ˗Zlan ˗gɔ ˈyö ˗tosɛta ˈwo ˈdho˗ kë yi ˗gban ˈka ˗be bhë, ˈyö dha ˗an ˗gɔ. Zoova ˗ya pö Adan ˗dhɛ: “Bhii ˈsɛ ˗mü ü ˈka ˈü ˗dhö dho ˈsɛidhö.” (ˈWunzüdɔdhɛ 3:19 ˗wo pö.) ˗A ˗gɛn ˈnën ˗tɔ ꞊dhɛ Adan ˗dhö ꞊yɛɛ ˗kë ˈö ˗kë ˈˈsɛ ˗bi ˈka ꞊dhɛ ˗kɔ ˈö kun ˗a ˗bha ˗be kö ˗Zlan yö ˈti˗ ˗da ꞊köŋ ˗a ˈdhö. (ˈWunzüdɔdhɛ 2:7) ˈDhɛ ˈö Adan ˗yö ö bo ˈwɔn yaa kë ˗sü ˈka, ˈyö ga, ˈyö˗ ˗bha ˗këdhösü ˗yö ɲën ˈpapadhö.

14. ˗Mën ˈö ˗kë ˈkwa ga?

 ¹⁴ ꞊Ya kë ꞊dhɛ Adan waa Ɛvö ˗wo ˈwɔn ˗man ˗Zlan ˗ta ˗be kö ˗wo ꞊kun ˗dhö ꞊dɛɛ. ˈˈKɛɛ ˗wo ˗gban ˗a ˗gɔ, ˈyö ˗kë ˗an ˗gɔ ˈwɔn yaa kë ˗sü ˈka, ˈyö ˈwo ga. ˈˈDhaŋga ˗yö kë ˗sü ˈka ꞊dhɛ ˗sü ˈkwëë˗ ˗yua yaa ˈö ˈkwa˗ sü kwa ˈˈbheman ˗blɛɛsü ˗nu ˗bha ˗a ˈdhö. Mɛn ꞊gban ˈˈpɛpɛ kwa ˗bhɔ ˈˈdhaŋga ˈgü. Yö ˈnën˗ ˗wɔn ˈgü ˈyö ˈkwa ga. (Wlɔmö 5:12) ˈˈKɛɛ ˗Zlan dhɔɔbhaawɔn ˈö ˗gban mɛnbhɩɩdhe ˗nu ˗bha ˈyaa kë ˈˈdhʋ̈. ˗Zlan ˈyaa˗ ˈˈpiʋ̈ ˗be toŋtoŋdhö kö mɛnbhɩɩdhe ˗nu ga. ꞊Ya ˈgo mü ˈzü, Biblö ˗yö ga ˗dhɛ “ˈyaɔ˗.”—1 Kodhɛngtö 15:26.

15. Gagade ˈö ˗gban ga ˗bha, ˗yö ˗dho kwa bho ˈˈgan ˈgü ˗kɔ ˗kë ꞊dhɛ?

¹⁵ Gagade ˈö ˗gban ga ˗bha ˗yö ˗dho kwa bho ꞊sua ꞊va ˗gɔ ˈˈgan ˈgü. Biblö ˗ya ˗pö kwa ˗dhɛ ꞊dhɛ mɛn ˗nu ˈö ꞊wa ga, pë ˈbha ˈyaa ˈmën ˗an ˈka ɛɛnˈˈ ˈwɔn ˈyaa ˗shiö ˗an ˗dhɛ. ˈKwaa ꞊mɔɔn˗ ˗bha kö ˈkwa ˈwɔn blɛɛˈˈ ˗an ˗dhɛ ɛɛnˈˈ ˈwaa ꞊mɔɔn˗ ˗bha kö ˗wo ˈwɔn blɛɛˈˈ kwa ˗dhɛ. Mɛn ˗nu ˈö ꞊wa ga ˈkwaa ꞊mɔɔn˗ ˗bha kö ˈkwa ˗an ˗takun, ɛɛnˈˈ ˈwaa ꞊mɔɔn˗ ˗bha kö ˗wo kwa ˗takun. ˈWaa ꞊mɔɔn˗ ˗bha kö ˗wo ˈwɔn yaa kë kwa ˈka. ˈdhɛ ˈö ˈˈdhʋ̈, kwa dua ˈyaa ˗mü kö ˈkwa ˈˈsuʋ̈ ˗an ˗gɔ. ˈˈKɛɛ ˗zlanwo ꞊vadhɛ ˈgümɛn ˗nu ˗wa ˗pö mɛn ˗nu ˈö ꞊wa ga ˗wo ˗tosɛta kë ˗ni ˈgü ˗dhɛ ˈbha ˈgü, kö ˈkwa ˈwëëga nu ˈpɛɛ˗ ˗nu ɛɛnˈˈ mɛn ˗nu ˈkwa ˗an yö ꞊dhɛ mɛn ˈˈslʋ̈ʋ̈slʋ̈ ˈdhö ˗an ˗dhɛ, kwa ꞊mɔɔn˗ ˗bha ˈkwa ˗an ˗takun. ˈˈKɛɛ gagade ˈö ˗gban ga ˗bha kö ˈkwa˗ dɔ, kwa ˈti ˗dho kwa ˗zo yö ꞊sua ˈˈvlanvlan ˗nu ˈwo ˈˈdhʋ̈ ˗an ˗dhɛ.

16. ꞊Sua ˗mɛɛn ˈö ˗zlanwo ꞊vadhɛ mɛn ˗nu ꞊klaŋ ˗kë ˗a ˈka ˈö ˗gban ga ˗bha?

¹⁶ Sɔtraan ˗yö ˗bɔ ꞊sua ˗zlanwo ˗nu ˗ta ˈyö ꞊sua ˗kë kwa ˗gɔ kö ˗yö kë kwa ˈgü ꞊dhɛ mɛn ˗nu ˈö ꞊wa ga ˗wo ˈˈbhɩɩ˗. ˗A ˈwɔnzuan ˈnën ˗tɔ ˗zlanwo ˈbha ˗nu ˗wa ˗pö ꞊dhɛ ˈkwa ga, pë ˈbha ˗go kwa ˈgü ˈö dho ˗dhɛ ˈbha ˈgü. ˗Wa ˗pö ˈˈdhʋ̈ ü ˗bha ˗zlanwokɔɔdhö ˗ee, ɛɛnˈˈ pë ˈö Biblö ˗ya pö ˈö ˗gban ga ˗bha ˈyö ˈwo˗ pö ka ˗dhɛ ˗ee? Sɔtraan ˗yö ˗bɔ ꞊sua ˗nu ˗ta kö ˈö mɛn ˗nu bho Zoova ꞊keŋ˗.

17. ˗Mën ˈö ˗kë ˈö ˗zotadhe ˈö ˗kë mɛn ˗gʋ̈ ˈˈwo ˈgü ˗sü ˈka bhë, ˈö ˈsi ˗bho Zoova ˗gɔ ˗sü ˈka?

 ¹⁷ ˗Zlanwo ꞊vadhɛ nu ˗bha ꞊klaŋwo ˗nu ˗bɔ mɛn ꞊taabha. ˗A ˈwɔnzuan ˈbha ˈnën ˗tɔ ꞊dhɛ, ˗zlanwo ˈbha ˗nu ˗wa ˗pö ˈwɔnyaakëmɛn ˗nu ˗dho ˈˈgʋ̈ ˈˈwo ˈgü ˈˈtʋ̈ŋ ꞊gban ˈka. ꞊Sua suu ˈö bhë ˗we Zoova ˗dhɛ ˗sü ˗mü. Yö ˈti ˗dho ˈˈwɩɩ˗ ˗bha toŋtoŋdhö kö mɛnbhɩɩdhe ˗nu ˗wo saanˈˈ suu ˈö bhë ˗wa ˈsü. (1 Zan 4:8 ˗wo pö.) Mɛn ˈbha ˈö ˗dho ˈwɔn bho ö ˗bha ˈnën ˈgü, kö ˗yö ˈnën bhë˗ ˗kɔ ˗da ˈˈwo ˈgü, ü ˗dho ˗a mɛn ˈsü ˗kɔ ˗kë ꞊dhɛ? ˈMɛn ˈö ˈˈdhʋ̈, ü ˗dho ˗a ˈsü suuyaamɛn ꞊dede ˈka. ˈBhi ˗dho ˈˈwɩɩ˗ ˗bha kö kaa˗ ˗mɛn ˈka ˗da ˈˈtɔŋdëdhɛ ˈgü. ˗Kɔ ꞊dede ˈö Sɔtraan ˈdhö˗ ˈˈpiʋ̈ kö ˈkwa Zoova ˈsü˗ ˗bha ˈyö bhë.

18. ˗Mën ˈö ˗kë kwa dua ˈyaa ˗mü kö ˈkwa ꞊duëë mɛn ˗nu ˈö ꞊wa ga ˗an ˗gɔ?

¹⁸ ˗Zlanwo ˈgümɛn ˈbhaa ˗nu ˗wa ˗pö ꞊dhɛ mɛn ˗nu ꞊wa ga, ˗wo ˗kë ˗zuu ˗nu ˈka. ˗Zlanwo ˈgümɛn ˗nu ˈwo ˈˈdhʋ̈, ˗wa ˗pö ꞊dhɛ kwa dua ˗mü kö ˈkwa mɛn ˗zuu ˗nu ꞊bhlëë ˗ya, kö ˈkwa ˈˈsuʋ̈ ˗an ˗gɔ, ˈyö ˗tɔ ꞊dhɛ ˗wo ꞊mɔɔn˗ ˗bha ˈwo ˗kë kwa ˈˈtɔŋdë ˈˈpiigbɩɩsü ˗nu ɛɛnˈˈ kwa ˈyɔɔ˗ ˗ziisü ˗nu ˈka. Mɛn ꞊vadhɛ wo ˗zo ˗yö ꞊sua ˈö bhë ˗a ˗dhɛ. ˗A ˗wɔn ˈgü ˈyö ˈwo ꞊duëë mɛn ˗nu ˈö ꞊wa ga ˗an ˗gɔ, ˈyö ˈwo Zoova to, ˈyö ˈwo ˗an ˗dhɔkë. ˗Yö kë ü ˈˈɲaan ꞊dhɛ mɛn ˗nu ˈö ꞊wa ga, ˈwaa pë ˈbha ˈwɔn dɔ ˈzüdho ɛɛnˈˈ ˈwɔn ˈbha ˈyaa ˈmën ˗an ˈka, ɛɛnˈˈ ˈyaa dhi ˗an ˗dhɛ. ˈDhɛ ˈö ˈˈdhʋ̈, kwa dua ˈyaa ˗mü kö ˈkwa ꞊duëë ˗an ˗gɔ. Zoova ˈnën ˗tɔ kwa ˗Damɛn. Yö ˈnën ˗tɔ ˗Zlan ꞊dede. Yö dosɛnŋ ˈnën kwa dua ˈdhö ˗mü kö ˈkwa˗ ˗dhɔkë.—˗Dhɛkpaɔ ˈˈdhia ˈsëëdhɛ 4:11.

19. Gagade ˈö ˗gban ga ˗bha ˗a dɔ ˗sü ˗yö kwa ˗takun ˗kɔ ˗kë ꞊dhɛ?

¹⁹ Gagade ˈö ˗gban ga ˗bha ˗a dɔ ˗sü ˗yö kwa ˗bho ˗zlanwo ˗nu ˗bha ꞊sua ˗nu ˗gɔ ˈˈgan ˈgü. ꞊Ya ˈgo mü ˈzü, ˗a gagade ˈö bhë, ˗yö ˗dho kwa ˗takun ˈö pë ˗së ˈö Zoova ˗ya ˈˈplüün bho ˈö ˗gban kwa ˗bha ˗tosɛta waa kwa ˗bha ˗dhɛkpaɔ dhiʋ̈ˈˈ ˗bha ˈkwa˗ ˈgüman ˗së ˈka.

20. ˗Mën ˈö ˈkwa ˗dho ˗a draanˈˈ ˈwɔn ˗gɔ ˈkwa ˗dho yö˗ ˗bha bhë ˗a ˈgü?

²⁰ ˈÖ kun ꞊kwɛŋzü, ˗Zlan ˗dhɔkëmɛn ˈwo˗ ˗dhɛ Zɔbö ˗yö dhɛɛˈˈ ˗kpɔ ˈö˗ pö: “Mɛnbhɩɩdhe ꞊ya ga, ˗yö ꞊mɔɔn˗ ˗bha ˈö ˗tosɛta ˗kë ˈzü ˗dɛɛwo ˗ee?” (Job 14:14) Mɛnbhɩɩdhe ˈö ꞊ya ga, ˗yö ꞊mɔɔn˗ ˗bha ꞊dedewo kö ˗yö ˗tosɛta kë ˈzü ˗dɛɛwo? ˗A ˗yɔ ˈö ˗Zlan ˗ya ˗bɔ kwa ˗gɔ Biblö ˈgü, ˗yö mɛn zuʋ̈ˈˈ ˈˈgblü ˗dhi. ˈWɔn ˗gɔ ˈö ˈkwa ˗dho yö˗ ˗bha bhë ˗yö ˗dho ˗a ˈgü ˈˈpʋ kwa ˗dhɛ.