Nɔɔn˗ ˗së ˈsëëdhɛ ˈö Makö ˗ya ˗bɛnzë 1:1-45
-
Zan mɛnbɔyibhaamɛn ˗bha ˗zlanwopösü (1-8)
-
Yesu ˗bha ˗bɔyibhaasü (9-11)
-
˗Kɔ ˈö Sɔtraan ˗yö Yesu ˈgüdan ˗a ˈka (12, 13)
-
Yesu ˗bha ˗zlanwopösü züdɔsü ˈö Galile (14, 15)
-
Yesu ˗yö ö ˗bha gwëëˈˈ ˗blɛɛsü ˗nu ˗dhɛ (16-20)
-
˗Zuu yaa ˗bho mɛn ˗nu ˈgü ˗sü (21-28)
-
Yesu ˗yö mɛn ꞊va ˗dhɛ ˗bo Kapɛɛnaɔmö (29-34)
-
Yesu ˗bha bhɛɛsü ˈö ˗dhɛ ˈö mɛn ˈbhaa ˈyaa mü ˗a ˈgü (35-39)
-
Yesu ˗yö ꞊weeyuamɛn do ˗dhɛ ˗bo (40-45)
1 Nɔɔn˗ ˗së ˈö ˗gban ˗Zlan Gbö Yesu Klito ˗bha, ˗kɔ ˈö˗ zü ˗yö dɔ ˗a ˈka ˈyö ꞊nɛn:
2 ˗Wo ˈö ˗bɛnzë ˗sü ˈka ˗Zlan ˗wodhiʋ̈lomɛn Izai ˗bha ˈsëëdhɛ ˈgü ˗ya ˗pö: «(˗Dhɛ ˗ga, ˈman n ˗man bɔmɛn bɔ ü ˗dhɛ ˈˈdhiʋ̈ kö ˗yö ü ˗bha ʒiaan ˗ta ˗dhɛ baaˈˈ.)
3 Mɛn do ˈbhaa ˗yö ˈˈgbla ˗ni ˈgü ˈˈyɛta ˈö˗ pö ˗ni ˈgü: ‹˗Ka Zoova ˗bha ʒiaan baaˈˈ, ˈka˗ ˗bha ˗kpinŋga ˗nu dɔ ꞊zinŋ ˈgü!›»
4 ˗Kɔ ˈö bhë yö ˈnën ˈö Zan mɛnbɔyibhaamɛn ˗yö kun ˗a ˈka ˈˈyɛta. ˗Yö ˗kun ˗a pö ˗ni ˈgü mɛn ˗nu ˗dhɛ ꞊dhɛ ˗wo bɔ ˈˈyi ꞊bhaa, kö ˗wa ˗zɔn ꞊dhɛ ˈwa wo zuʋ̈ˈˈ slëëˈˈ ˗Zlan ˈˈpiʋ̈, kö ˗yö ˗an ˗bha ˈwɔn yaa ˗nu ˗bhawɔn ˈto.
5 ˈYö mɛn ˗nu ˈö ˈwo go Zude ˗sɛ ˈˈpɛpɛ ˈgü waa Zedhizadhɛmö ˗mɛn ˗nu ˈˈpɛpɛ ˈwo kun ˈdho ˗ni ˈgü ˗a ˈˈpiʋ̈, ˈyö ˗an bɔ ˈˈyi ꞊bhaa Zuudɛn ga ꞊bhaa, kö ˗wo wo ˈˈdhi bho ˗ni ˈgü wo ˗bha ꞊sɔŋ yaa ˗nu ˗ta zuʋ̈ˈˈ ˈˈpuu ˈka.
6 Sɔ ˈwo˗ ˗yökë ꞊ɲɔɔnmian kaa˗ ˈka yö ˈnën kun Zan ˗bha, ˈyö wü kwi ˈˈpɛn ˗ʒiö ˗a ˗ta ö vɛɛdhö. ˗Kpaa waa ˈˈzɔ ˈˈɲɔn ˗nu ˈwo ˈˈblüblü ˈyö ˈwo kun ˗a ˗bhöpë ˗nu ˈka.
7 ˗Yö ˗kun ˗zlanwopö ˗ni ˈgü ˈö˗ pö: «Mɛn do ˈbhaa ˈö˗ ꞊bhlëë ˈdhö ˈkpii˗ ˈö ˗ʒiö ˗a ˈka n ˗ta, ˗yö ˗dho nu n ꞊taabha. ˗A ˗bha ˗sabha ˗de ˈö˗ ˗gɛn ˗bha, ˗a ˈˈse ˈyaa n ˗dhɛ ˗ʒiaanwo kö ˈa ˈˈgblëënnu ˈa˗ gën ˈˈpʋ.
8 Man ˗zë ˈˈyi ˈnën ˈa ka bɔ ˗a ꞊bhaa, ˈˈkɛɛ yö ˗zë ˗yö ˗dho ö ˗bha kë ˗zuu ˈˈslʋ̈ʋ̈slʋ̈ ˈka.»
9 ˗A ˈˈtʋ̈ŋ ˈö bhë ˗a ˈgü, Yesu ˗yö ˗go Nazadhɛtö, Galile ˗sɛ ˈgü ˈö nu, ˈyö Zan ˗ya bɔ ˈˈyi ꞊bhaa Zuudɛn ga ꞊bhaa.
10 ˈDhɛ ˈö ˈgo ˗ni ˈgü ˈˈyi ꞊löö, ˈö ˗dho ˗dhɛ ˗ga kö dhaŋ˗ ˈˈdhi ˗ya ˈˈpʋ, kö ˗zuu ˈˈslʋ̈ʋ̈slʋ̈ ˗yö yɔɔˈˈ ˗ni ˈgü ˗a ˗ta ꞊dhɛ ˗toŋ ˈdhö.
11 ˈYö ˗wo do ˈbhaa ˗yö ˗we dhaŋ˗ ˈgü ˈö˗ pö: «Bhi ˈnën ˈü ˗tɔ n Gbö dhɔɔbhaasü, ü n zuʋ̈ˈˈ ꞊nii ˗da ꞊dedewo.»
12 ˈDhɛ ˈö ö bo ˗kë ˈˈdhʋ̈ ˗sü ˈka, Yesu ˗yö ˗to ˈˈshia˗ mü ˈö ˗zuu ˈˈslʋ̈ʋ̈slʋ̈ ˗yö ˈˈdhiʋ̈sü ˗a ˈka ˈö dho ˗a ˈka ˈˈyɛta.
13 ˗Yö ˗dhɛkpaɔyi ˗kɔŋ ˗yiishiö (40) ˗kë ˈˈyɛta mü, ˈö Sɔtraan ˗yö ˗a ˈgüdan. Waa ˈˈblü ˗wü ˗nu ˗wo ˗kë wo ˈko ꞊bhaa mü, ˈˈkɛɛ ˗Zlan ˗bha ˈˈkiö ˗nu ˗wo wo ˗zoto ˗a ˈˈpiʋ̈.
14 ˈDhɛ ˈö ˈwo Zan kun, ˈyö Yesu ˗yö dho Galile, ˈö ˗Zlan ˗bha nɔɔn˗ ˗së pö mü
15 ˈö˗ pö: «ˈˈTʋ̈ŋ ˈö ˗Zlan ˗ya ˗ya bhë ˗ya ˗lo, ˗a ˗bha ˗Gblüdëdhɛ ˗ya yö ꞊klöö˗. ˈDhɛ ˈö ˈˈdhʋ̈, ˗ka ˈgo ka ˗bha ꞊sɔŋ yaa ˈgü, ˈka ka zuʋ̈ˈˈ slëëˈˈ kö ˈka ka ˗zo yö nɔɔn˗ ˗së ˈö go ˗Zlan ˈˈpiʋ̈ ˗a ˗dhɛ.»
16 ˈDhɛ ˈö Yesu ˗yö kun ˈˈta ˈsü ˗ni ˈgü Galile ꞊weeyi ˈˈkpɔnŋ ˈˈdhiʋ̈, ˗yö ˗kpan Simɔn waa ö ꞊dhegblü Andre ˗an ˗bha kö ˗wo ˈˈkplʋ̈ ˗zuö ˗ni ˈgü. ˗A ˗gɛn ˗mü ꞊dhɛ ˗wo ˗kun ˈˈyiblükëmɛn ˗nu ˈka.
17 ˈYö Yesu ˗ya pö ˗an ˗dhɛ: «˗Ka ʒiö n ꞊kee˗. A ˗dho ka kë ˈˈkplʋ̈ ˗zuö mɛnbhɩɩdhe ˗nu ˗gɔ ˗mɛn ˗nu ˈka.»
18 ˈDhɛ ˈö ˗kë ˈˈdhʋ̈, ˈyö ˈwo wo ˗bha ˈˈkplʋ̈ ˗nu to ˈˈshia˗ ˈwo ˗ʒiö ˗a ꞊kee˗.
19 ˈDhɛ ˈö ꞊ɲɔɔn ˈˈdhiʋ̈ ˈdɛdɛ ˈka, ˈyö ˗kpan Zakö Zebede gbö waa ö ꞊dhegblü Zan ˗an ˗bha kö ˗wo wo ˗bha ˈˈkplʋ̈ ˗nu baaˈˈ ˗ni ˈgü wo ˗bha ˈˈyitagɔ ˈgü.
20 ˗Yö ˗to mü ˈö ˗an ˗dhɛ. ˈYö ˈwo wo dë Zebede waa ö ˗bha yökëmɛn ˗nu ˗an to ˈˈyitagɔ ˈgü mü ˈö ˈwo ˗ʒiö Yesu ꞊kee˗.
21 ˈYö ˈwo dho ˈö ˈwo ˗lo Kapɛɛnaɔmö.
ˈDhɛ ˈö ꞊Glooyi ˗yö ˗lo, Yesu ˗yö ˗dho ˗yakwëë ˗kë ˗a ˈgü ˗kɔ ˈgü ˈö ˗ya mɛn ˗nu ꞊klaŋ kë ˗sü ˗bha mü.
22 ˈYö˗ ˗bha mɛn ꞊klaŋ kë ˗kɔ ˈwɔn ˗yö mɛn ˗nu kun ꞊dedewo, ˈyö sü ꞊dhɛ ˗yö ˗kun mɛn ˗nu ꞊klaŋ kë ˗ni ˈgü ˗wogbinŋdhɛ ˈka. ˈYaa kun ˗a kë ˗ni ˈgü ꞊dhɛ ˈtɔŋ˗ ˗gɔmɛn ˗nu ˈdhö.
23 ˈˈTʋ̈ŋ ꞊dede ˈö bhë ˗a ˈka, gɔndënën do ˈbhaa ˈö ˗zuu yaa ˗yö kun ˗a ˈgü, ˗yö ˗kë ˗an ˗bha ˗yakwëë ˗kë ˗a ˈgü ˗kɔ ˈgü mü. ˈYö ˗gbla ˈö˗ pö:
24 «Yesu Nazadhɛtö mi, ˗mën ˈö kwaa˗ ˗nu kwa ꞊zinŋ ˈgü? Ü ˗nu ˗dhɛ ˈö yö ˗a ˈgü kö ˈü yi ˈgüshiʋ̈ ˗ee? A˗ ˈwɔn ˗dɔ ꞊dedewo ꞊dhɛ mɛn ˈö ˈˈslʋ̈ʋ̈slʋ̈ ˈö ˗Zlan ˗ya bɔ yö ˗mü ü ˈka!»
25 ˈˈKɛɛ ˈyö Yesu ˗yö ˗gbla ˗a ˗ta ˈö˗ pö: «Ü ˈˈdhi ta ˈü ʒiö ˈü ˈgo gɔndënën ˈö bhë ˗a ˈgü.»
26 ˈDhɛ ˈö ˗kë ˈˈdhʋ̈, ˈyö ˗zuu yaa ˗yö gɔndɔnën ˈö bhë ˗a ˗zuuzuu ˈˈgbɩɩ˗ ˈka kö ˗yö ˈˈgbla ˗ni ˈgü ö ꞊faan ꞊gban ˈka, ˈyö go ˗a ˈgü ˈö ˗ʒiö.
27 Mɛn ˈˈpɛpɛ ˈö ˈwo kun mü, ˗a ˈwɔn ˗yö ˗an ˗kun ꞊dedewo ˈö ˈwo ˗ya ˗a pö ˗sü ˗bha wo ˈko ˗nu ˗dhɛ: «˗Mën ˗wɔn ꞊suu ˈö ꞊nɛn? ˗A ˗bha mɛn ꞊klaŋ kë ˗kɔ ˈö bhë ˗yö ˗dɛɛ ˈdhɛ! ˗Yö ˗gbla ˗zuu yaa ˗nu ˗ta ˗ʒiaanwo ˈö ˈwo ˈwɔn man ˗a ˗ta.»
28 ˈDhɛ ˈö ˗kë ˈˈdhʋ̈, ˈyö Yesu ˗tɔɔ ˗yö ˗pɛn ˈzozodhö Galile ˗sɛ ꞊gban ˈˈpɛpɛ ˈgü.
29 ˈDhɛ ˈwo go ˗yakwëë ˗kë ˗a ˈgü ˗kɔ ˈgü ˈyö ˈwo dho Simɔn waa Andre ˗an ˗gɔ ˈkɔɔ. Zakö waa Zan ˗wo ˗kë ˗an ˈˈpiʋ̈.
30 ˈDhɛ ˈwo ˗lo mü kö Simɔn ˗bha dhebɔ dhö ˗yö ˈwaannu ˗sü ˈka, kö ˈˈnɛnnɛn ˗ya nu ˗a ˗ta. ˈYö ˈwo to mü ˈwo˗ ꞊blɛɛ Yesu ˗dhɛ.
31 ˈYö Yesu ˗yö ꞊ɲɔɔn ˗a ˗bha ˈö˗ ˗kɔ kun, ˈö˗ ꞊luu ˈˈshia˗. ˈYö to mü ˈö ˈˈnɛnnɛn ˗yö go ˗a dhebɔnën ˗ta, ˈö ˗ya ˗bhöpë ˗kpa ˗an ˗dhɛ ˗sü ˗bha.
32 ˈDhɛ ˈö ˈɲaan˗ ˗ya ˗puö, ˈö ˈˈbin ˈdhö ˈmën ˗ni ˈgü, ˈyö ˈwo nu mɛn ˈˈpɛpɛ ˈö ˈˈyua ˈdhö ˗an ˗bha waa mɛn ˗nu ˈö ˗zuu yaa ˈdhö ˗an ˈgü ˗an ˈka Yesu ˈˈpiʋ̈.
33 Mɛn ˈˈpɛpɛ ˈwo ˈpödhɛ ˈö bhë ˗a ˈgü, ˗wo ˗kun ˗lo ˗sü ˈka wo ˈko ˗ta ˈkɔ ˈˈkpan ˈˈdhiʋ̈ mü.
34 ˈYö mɛn ꞊vadhɛ ˈö ˈˈyua ꞊suu ˈˈpɛpɛ kun ˗an ꞊sëë bho ˗ni ˈgü ˗an ˗dhɛ bo, ˈyö ˗zuu yaa ꞊va ꞊dede bho mɛn ˗nu ˈgü. ˈˈKɛɛ yö ˈti ö ꞊kwaa ˗zuu yaa ˗nu ˗zü kö ˗wo ˈwɔn blɛɛˈˈ, ˈyö ˗tɔ ˗wa ˈwɔn ˗dɔ ꞊dhɛ yö ˈnën ˈö ˗tɔ Klito.*
35 Dhiapiʋ̈ ˗kpo tii ˈgü, ˈyö ꞊luu ˈö yö ˈˈkpɛnŋ ˈö dho ˗dhɛ ˈbhaa ˈö mɛn ˈbhaa ˈyaa mü ˗a ˈgü, ˈyö ˗ya bhɛɛˈˈ ˗sü ˗bha mü.
36 ˈˈKɛɛ ˈyö Simɔn waa mɛn ˗nu ˈwo kun ˗a ꞊kee˗ bhë, ˈwo ˗ya ˗a mɛɛnˈˈ ˗sü ˗bha.
37 ˈDhɛ ˈwo ˗kpan ˗a ˗bha, ˈyö ˈwo˗ pö ˗a ˗dhɛ: «Mɛn ꞊gban ˈˈpɛpɛ ü mɛɛnˈˈ ˗ni ˈgü.»
38 ˈˈKɛɛ ˈyö Yesu ˗ya pö ˗an ˗dhɛ: «˗Kwa ˈdho ˈpödhɛ ˈˈwɛɛ ˗nu ˈwo kwa ˗züzü yö ˗an ˈgü, kö ˈa ˗zlanwopö mü ˈpö. ˗A ˗gɛn ˗mü ꞊dhɛ pë ˈa nu ˗a ˗wɔn ˈgü ˈyö bhë.»
39 ˈDhɛ ˈö ˗kë ˈˈdhʋ̈, ˈyö dho ˗zlanwopö Galile ˗sɛ ꞊gban ˈgü ˗an ˗bha ˗yakwëë ˗kë ˗a ˈgü ˗kɔ ˗nu ˈgü, ˈyö ˗zuu yaa ˗nu bho mɛn ˗nu ˈgü.
40 ꞊Weeyuamɛn do ˗yö ˗nu ˗a ˈˈpiʋ̈ ˈpö ˈö yö ö kpɔn ˈgü, ˈö ꞊bhɛɛ ˗a ˗dhɛ ˈö˗ pö: «N Dëmɛn, ˗ya kë ꞊dhɛ ü ˗we ˗a ˗bha, dɔ ˈˈgbɩɩ˗ ˈü n kë ˈˈklʋ̈ʋ̈klʋ̈.»
41 ˈDhɛ ˈö˗ pö ˈˈdhʋ̈, ˈyö˗ ˗wëë ˗yö Yesu ˗kë ꞊dedewo, ˈö ö ˗kɔ pa ˗a ˈka, ˈyö˗ pö ˗a ˗dhɛ: «ˈMan ˈˈwɩ ˗a ˗bha! ˗Bhö kë ˈˈklʋ̈ʋ̈klʋ̈.»
42 ˗Yö ˗to ˈˈshia˗ mü ˈö˗ ˗bha ꞊wee ˗yua ˗yö bo ˈpapadhö, ˈö˗ kwibhadhɛ ˗yö ˗kë ˈˈslʋ̈ʋ̈slʋ̈.
43 ˈDhɛ ˈö ˗kë ˈˈdhʋ̈, ˈyö Yesu ˗ya pö ˗a ˗dhɛ ˗yö ˈdho. ˈˈKɛɛ ˈyö ˗dhioo dɔ ˗a ˗ta ꞊glɔɔglɔɔdhö ˈö˗ pö ˗a ˗dhɛ:
44 «ˈBha ˗dho ˗a blɛɛˈˈ mɛn ˈbhaa ˗dhɛ toŋtoŋdhö, ˈˈkɛɛ ˗bhö ˈdho ˈü ü ˗de ˗zɔn ˈˈsaabhomɛn ˗nu ˗dhɛ kö ˈü ü ˗bha ˗kë ˈˈslʋ̈ʋ̈slʋ̈ ˗sü gbɔɔdhe kë ꞊dhɛ ˗kɔ ˈö Moizö ˗ya pö ˗a ˈka bhë ˗a ˈdhö. ˗Ya kë ˈˈdhʋ̈, ˗yö ˗dho ˗a ˗zɔn ˈˈsaabhomɛn ˗nu ˗dhɛ ꞊dedewo ꞊dhɛ ˈbha kë ˈˈklʋ̈ʋ̈klʋ̈.»
45 ˈˈKɛɛ ˈdhɛ ˈö gɔndënën ˈö bhë ˈö ˗ʒiö, ˈyö ˈwɔn ˈö ˗kë ˗a ˗dhɛ bhë ˈö ˗ya ˗a blɛɛˈˈ ˗sü ˗bha mɛn ꞊gban ˈˈpɛpɛ ˗dhɛ. ˗A ˗wɔn ˈgü, Yesu ˈyaa kun ˗mɔn ˗ni ˈgü ˗a ˗bha kö ˗yö ˗da ˈpödhɛ ˈbhaa ˈgü ˗suɛɛdhö kö mɛn ˗nu ˈti˗ ˈsuaan˗ bho. ˈDhɛ ˈö ˗kë ˈˈdhʋ̈, ˈyö dho ˗dhɛ ˈbhaa ˈö mɛn ˈbhaa ˈyaa mü ˗a ˈgü. ˈˈKɛɛ mɛn ˗nu ˗kun ˈgo ˗ni ˈgü ˗dhɛ ꞊gban ˈˈpɛpɛ ˈgü ˈwo nu ˗a ꞊kee˗.
-Zoto -a ˈˈpiʋ̈ -wɔn -nu
^ ˗Yö ꞊mɔɔn˗ ˗bha ˈö ˗kë, «mɛn ˈö kun ˗a ˈka ˗wa ˗dɔ» ˈka.
