Yesu ˗bha bɔmɛn ˗nu këwɔn ˗nu 3:1-26
3 ˗Dhɛkpaɔyi do ˈka, Piɛɛ waa Zan ˗wo ˗kun ˈdho ˗ni ˈgü ˗Zlan ˗dhɔkë ˗a ˈgü ˗kɔ ˈgü ˗bhɛɛ ˗Zlan ˗dhɛ ˈˈlɛlɛ ˈka, kö ˈkwa dɔ ˈˈlɛlɛ ˗kɔŋ do ˈö ga ˈˈsoodhu* ꞊tɛɛ˗ ˗bha ˈˈdooka.
2 ˗A ˈˈtʋ̈ŋ do ˈö bhë ˗a ˈgü ˈpö, mɛn ˗nu ˗wo ˗kun ˈdho ˗ni ˈgü gɔndënën do ˈö bhɔ kö ˗a ˗gɛn ˗yö ꞊niɔɔnsü ˈka ˗a ˈka mü. ˗Dhɛkpaɔyi ˈˈpɛpɛ ˈka, ˗wo ˗nu gɔndënën ˈö bhë ˗a ˈka ˈö ˈwo˗ ˗ya ˗Zlan ˗dhɔkë ˗a ˈgü ˗kɔ ˈˈkwee ˈˈdhi ˈö ˈwo˗ ˗dhɛ ˈˈKwee ˈˈdhi ˗së bhë ˗a ˈˈsuee, ˗yö kë ˈˈdhʋ̈ kö mɛn ˗nu ˈwo ˗da ˗ni ˈgü ˗Zlan ˗dhɔkë ˗a ˈgü ˗kɔ ˈgü ˗yö gbadhɛ ˗an ˗gɔ.
3 ˈDhɛ ˈö ˗kpan Piɛɛ waa Zan ˗an ˗bha kö ˗wo ˈdho˗ ˗da ˗Zlan ˗dhɔkë ˗a ˈgü ˗kɔ ˈgü, ˈyö ˗ya gbadhɛ ˗sü ˗bha ˗an ˗gɔ.
4 ˈYö Piɛɛ waa Zan ˈwo˗ ˗ga ˗pinŋdhö, ˈyö Piɛɛ ˗ya pö ˗a ˗dhɛ: «˗Bhö yi ˗ga ˈyö.»
5 ˈDhɛ ˈö ˗kë ˈˈdhʋ̈, ˈyö˗ gɔndënën ˗yö ˗ya ˗an ˗ga ˗sü ˗bha. ˗A ˗bha ˈgü ˗be ˗wo ˗dho pë ˈbhaa nu ö ˗dhɛ.
6 ˈˈKɛɛ ˈyö Piɛɛ ˗ya pö ˗a ˗dhɛ: «ˈWëë˗ ɛɛnˈˈ ˈˈsënŋ ˈyaa n ˗gɔ, ˈˈkɛɛ pë ˈdhɛ ˈö n ˗gɔ, ˈyö ˈa ˗dho ˗a nu ü ˗dhɛ bhë. Yesu Klito ˈö go Nazadhɛtö ˗a ˈtɔ ˈgü, ˗bhö luuˈˈ ˈü ˈˈta ˈsü!»
7 ˈDhɛ ˈö˗ pö ˈˈdhʋ̈, ˈyö ˗ya ˗a ˗kɔ ˗së ˗bha ˈö˗ ꞊luu ˈˈshia˗. ˈYö˗ gɔndënën ˗yö to mü ˈö˗ ˗gɛn ˗nu ˗wo bo ˈwo ˗kë ˈgiangian,
8 ˈyö ˗lö ˈö ˗gban ö ˗gɛn ꞊plɛ ˗ta, ˈö ˗ya ˈˈta ˈsü ˗sü ˗bha ˈö waa˗ ˗nu ˈwo ˗da ˗a ˈka ˗Zlan ˗dhɔkë ˗a ˈgü ˗kɔ ˈgü. ˗Yö ˈˈta ˈsü ˗ni ˈgü kö ˗yö ˗lö ˗ni ˈgü ˗Zlan ˈtɔ bhɔ ˗sü ˈka.
9 Mɛn ꞊gban ˈˈpɛpɛ ˗wo ˗kpan ˗a ˗bha kö ˗yö ˈˈta ˈsü ˗ni ˈgü, ˗yö ˗Zlan ˈtɔ bhɔ ˗ni ˈgü.
10 ˈDhɛ ˗an ˈˈɲan ˗ya kun, ˈö ˈwo˗ yö ꞊dhɛ gɔndënën ˈö ˗ya kë ꞊shiöŋ ˈö ˈɲaannu ˗Zlan ˗dhɔkë ˗a ˈgü ˗kɔ ˈˈkwee ˈö ˈwo˗ ˗dhɛ ˈˈKwee ˈˈdhi ˗së bhë ˗a ˈˈdhiʋ̈ ˈö gbadhɛ bhë yö ˗mü, ˈyö ˗a ˈwɔn ˗yö ˗an kun ꞊dedewo ˈö ˗an ˈˈdhi ˗yö pa ˈwɔn ˈö ˗kë ˗a ˗dhɛ bhë ˗a ˗wɔn ˈgü.
11 Gɔndënën ˈö bhë ˈyaa kun ˈgo ˗ni ˈgü Piɛɛ waa Zan ˗an ꞊kee˗, ˗a ˗wɔn ˈgü mɛn ꞊gban ˈˈpɛpɛ ˗wo ˗bialö ˈö ˈwo dho ˗an ꞊kee˗ ˗Zlan ˗dhɔkë ˗a ˈgü ˗kɔ ˈˈpian ˈö ˈwo˗ ˗dhɛ Sadhomɔn bɔdhɛ ˈö ꞊gban ˈˈdhü ˗nu ꞊zinŋgü bhë ˗a ˈgü, kö ˗a ˈwɔn ꞊yaa ˗an ˈkun ꞊dedewo.
12 ˈDhɛ ˈö Piɛɛ ˗ya yö ˈˈdhʋ̈, ˈyö˗ pö ˗an ˗dhɛ: «Izraɛdhö ˗mɛn ˗nu, ˈmën ˗kë ˈö ˈwɔn ˈö ˗kë bhë ˗a ˈwɔn ˗yö ka kun ˈˈdhʋ̈? ˈMën ˗kë ˈö ˈka yi ˗ga ꞊dhɛ pë ˈö ˈwɔn ˈö bhë ˈyi˗ ˗kë yi ˗de ˗bha ˈˈpiigbɩɩdhɛ ˈka ɛɛnˈˈ ˈö yi ˗bha ˗klu ˗Zlan ˗bha ˗sü ˈnën ˈö˗ ˈsaa˗ ˈgü ˈö mɛn ˈö bhë ˈö ˈˈta sü ˗a ˈdhö?
13 Ablaamö ˗bha ˗Zlan, Izaakö ˗bha ˗Zlan waa Zakɔbö ˗bha ˗Zlan ˈö kwa ˈˈbhɛman ˗nu ˗bha ˗Zlan ˈka bhë, ˗ya ö ˗bha yökëmɛn Yesu ˗gɔ ˈˈdhiʋ̈ luuˈˈ. Yesu ˈö ˈˈdhʋ̈ bhë yö ˈnën ˈö ˈka˗ ˗da mɛn ˗nu ꞊kwɛɛ˗, ˈö ˈka ˗kɔ ˗a ˗wɔn ˈka Pidhatö ˗kuu ˈˈdhiʋ̈, ˈˈkɛɛ kö ˗yö ˗kun Pidhatö ˈˈpiʋ̈ ꞊dhɛ ˈö ö ꞊kwaa˗ ˗zü.
14 Mɛn ˈˈslʋ̈ʋ̈slʋ̈ ˈö kpɛnŋdhö bhë, ka ˗kɔ ˗a ˗wɔn ˈka, ˈö ˈka˗ pö ꞊ʒiaan ꞊dhɛ ˗wo gɔndënën ˈö kun mɛnzëmɛn ˈka bhë ˗a bho ˗kaso ˈgü ka ˗dhɛ.
15 ˈYö Mɛn ˈö ˗këdhösü ˗yö bɔ ˗a ˗ta bhë ˈka˗ zë. ˈˈKɛɛ ˗Zlan ˗ya ˗bho ga ˈgü. ˈWɔn ꞊dede ˈö ˗kë ˈö yi ˈˈɲan ˗yö ˗da ˗a ˈgü yö ˗mü.
16 ˗A ˈtɔ waa yi ˗bha ˗zo ˗yö ˗a ˈtɔ ˗dhɛ ˗sü ˈnën˗ ˈsaa˗ ˈgü, ˈyö gɔndënën ˈö ˈka ˗kpan ˗ni ˈgü ˗a ˗bha yö ˈö ka ꞊dede ˈka˗ dɔ bhë, ˗ya kë ˈgiangian yö. ˗Zoyödhe ˈö yi ˗gɔ Yesu ˈsaa˗ ˈgü bhë, yö ˈnën ˈö˗ ˗kë ˈö gɔndënën ˈö yö ˗a ˗dhɛ ˗ya bo ˈpapadhö mɛn ꞊gban ka ˈˈɲaan ˈka bhë.
17 ˈˈKɛɛ n ꞊dhegblü ˗nu, a˗ ˈwɔn ˗dɔ ꞊dhɛ ˈwɔn ˈö ˈka kun ˗a kë ˗ni ˈgü ˈˈdhʋ̈ bhë, ka ˗kun ˗a kë ˗ni ˈgü ka tii ˗bha ꞊dhɛ ka ˗gɔmɛn ˗nu ˈdhö ˈpö.
18 ˗Zlan ˗ya ˗kë ˈˈdhʋ̈ kö ˈwɔn ˗nu ˈö ˗an to ˈˈdhiʋ̈ ˈö bɔ ö ˗wodhiʋ̈lomɛn ˗nu ˈˈpɛpɛ ˗ta ˈö ˗an ꞊blɛɛ ˈö˗ pö ꞊dhɛ Klito ˗dho saanˈˈ ˈsü bhë ˗yö yökodhiʋ̈.
19 «ˈDhɛ ˈö ˈˈdhʋ̈, ˗ka ˈgo ka ˗bha ꞊sɔŋ yaa ˈgü, ˈka ka wë slëëˈˈ ˗Zlan ˈˈpiʋ̈ kö ˗yö ka ˗bha ˈwɔn yaa ˗nu ˗bhawɔn ˈto, ˗yö kë ˈˈdhʋ̈ kö zuʋ̈waannusü ˈˈtʋ̈ŋ ˈö go Zoova yö ꞊dede ˗a ˈˈpiʋ̈ bhë ˈka˗ ꞊slɔɔ,
20 kö Klito ˈö˗ ˗ya ka ˗bha ˈka ˈö ˗kë Yesu ˈka bhë ˗ya bɔ.
21 Yesu ˈö bhë ˗yö ˗dho ˈto dhaŋ˗ ˈgü ꞊köŋ ˈö to ˗a ˈka ˈˈdhʋ̈ ˈö yö ˗a ˈka ˈwɔn ꞊gban ˈˈpɛpɛ baaˈˈ ˈˈtʋ̈ŋ ˈö ˗Zlan ˗yö bɔ ö ˗wodhiʋ̈lomɛn ˈˈslʋ̈ʋ̈slʋ̈ ˗nu ˗ta ˈö˗ ˗wɔn ꞊blɛɛ ꞊kwɛŋzü bhë ˗a ˗bha.
22 ˈWɔn ˈö ˗gban ˗a ˗bha Moizö ˗ya ˗blɛɛ ˈö˗ pö: ‹Zoova ka ˗bha ˗Zlan ˗dho ö ˗wodhiʋ̈lomɛn do ˈö ˗kë ꞊dhɛ n ˈdhö ˗a ˗ya ka ˗bha ˈˈsɛgümɛn ˗nu ꞊zinŋgü. Pë ˈˈpɛpɛ ˈö ˗dho ˗a pö ka ˗dhɛ, ˗ka ka ˈˈtʋ ˈto ˗a ˗bha.
23 Mɛn ˈˈoo ˗mɛn ˈö yö ˈti ö ˈˈtʋ ˈto ˗Zlan ˗wodhiʋ̈lomɛn ˈö bhë ˗a ˗bha, ˗a ˈgü ˗dho shiʋ̈ˈˈ ˈpapadhö ˈö go ˗Zlan ˗bha ˈˈsɛgümɛn ˗nu ꞊zinŋgü.›
24 ˗Zlan ˗wodhiʋ̈lomɛn ˗nu ˈˈpɛpɛ ˈö ˈwo yö wo ˈko ˈˈpiʋ̈ ˈö go ˗a ˈka Samiɛdhö ˗bha, ˗an ˈˈpɛpɛ ˈö ˈwo ˈwɔn ꞊blɛɛ, ˗wo ˈˈtʋ̈ŋ ˈö yö ˗a ˗wɔn ˗blɛɛ ˈpö ˈkpakpadhö.
25 Ka ˈnën ˈö ˈka ˗tɔ ˗Zlan ˗wodhiʋ̈lomɛn ˗nu gbö ˗nu waa ˗mlɛɛn ˈö ˗Zlan ˗ya ˗da waa ka ˈˈbhɛman ˗nu wo ꞊zinŋgü bhë ˗a ˈgü ˈnën ˗nu. ˗A ˗gɛn ˗mü ꞊dhɛ ˗ya ˗pö Ablaamö ˗dhɛ: ‹Ü ꞊suugünën ˈnën ˈˈsɛgɔ* ˈˈpɛpɛ ˈwo ˈˈkpɔnŋ ꞊taa ˈwo ˗dho bɔ ˗a ˗ta kö ˗wo ˈdhuëë˗ ꞊slɔɔ.›
26 ˈDhɛ ˈö ˗Zlan ˗yö ö ˗bha yökëmɛn ˈö bhë ˗a ˗ya, ˗ya ˗bɔ ka ˗dhɛ ꞊köŋ ˗blɛɛsü kö ˗yö ˈdhuëë˗ ˈkpɔ mɛn ˈö ˈdhö ˗a ˗bha, ka ˗kɔ ˗bho ka ˗bha ˈwɔn yaa ˗nu ˈgü ˗sü ˈka.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈˈlɛlɛ ˈˈseishiö ˗naan.»
^ Glɛkö ˗wo ˈgü ˈyö ˗tɔ «ˈkɔdhi.»
