Yesu ˗bha bɔmɛn ˗nu këwɔn ˗nu 16:1-40
-
Pɔdhö ˗yö ö ˗kɔ ˗yɛ Timote ˗bha (1-5)
-
Pɔdhö ˈˈɲan ˈgü ˗yö ˗da ˈö ˗kpan Maseduanö mi do ˗bha (6-10)
-
Lidi ˗bha ˗we ˗Zlan ˗wo ˗bha ˗sü ˈö ˗kë Filipö ˗pö ˈgü (11-15)
-
˗Wo Pɔdhö waa Sidhasö ˗an ˗da ˗kaso ˈgü (16-24)
-
˗Kaso ˗kɔ ˗maankëmɛn waa ö ˗bha ˈkɔɔmɛn ˗nu ˗wo ˗bɔ ˈˈyi ꞊bhaa (25-34)
-
Pɔdhö ˗kun ˗a ˈˈpiʋ̈ kö ˈwɔnɲanbhɔmɛn ˗nu ˗wo ˈgën˗ nu wo ˗dhɛ (35-40)
16 Pɔdhö ˗yö ˗dho ˈö ˗lo Dɛɛbe, ˈö go mü ˈö dho Dhitrö. Yesu ˗bha gwëëˈˈ do ˈö ˈwo˗ ˗dhɛ Timote ˗yö ˗kun ˈpödhɛ ˈö bhë ˗a ˈgü. ˗A dhe ˗kun Zuifö dhebɔ ˈö kun Yesu ˗bha gwëëˈˈ ˈka ˈpö ˗a ˈka, ˈˈkɛɛ ˗a dë ˗zë ˗yö ˗kun Glɛkö ˈka.
2 Kwa ꞊dhegblü ˗nu ˈwo kun Dhitrö ˗pö waa Ikoniɔmö ˗pö ˈgü, ˗wo ˗kun ˗a ˗wɔn ˗së blɛɛˈˈ ˗ni ˈgü ꞊dedewo.
3 Pɔdhö ˗kun ˗a ˈˈpiʋ̈ kö Timote ˗yö ʒiö ö ꞊kee˗, ˈyö˗ sü ˈö˗ ˗kë ˈˈbɔn ˈka. ˗Ya ˗kë ˈˈdhʋ̈ Zuifö ˗nu ˈwo kun ˈˈpian ˈö bhë ˗a ˗ta ˗an ˗wɔn ˈgü, ˈyö ˗tɔ ˗a ˈwɔn ˗kun ˗an ꞊gban ˈˈpɛpɛ ˈˈɲaan ꞊dhɛ Timote dë ˗yö Glɛkö ˈka.
4 ˈˈKwipö ꞊gban ˈˈpɛpɛ ˈwo bɔ ˗a ˈgü bhë, ˗wo ˈwɔn ˗nu ˈö bɔmɛn ˗nu waa mɛn zii ˗nu ˈwo Zedhizadhɛmö ˗an ˗wo ˗yö to ˗a ˗bha do bhë, ˗a ˗zɔn kwa ꞊dhegblü ˗nu ˈwo mü ˗an ˗dhɛ kö ˗wa ˗ya ꞊bhlëë ˈgü.
5 ˗A ˗wɔn ˈgü ˗zlanwokɔdhi ˗nu ˗bha ˗zoyödhe ˗gɛn ˗yö ˗kun ˗gban ˗ni ˈgü, ˈö ˈwo kun kë ˗ni ˈgü ꞊va ˗kplawo ˗dhɛkpaɔyi ˈˈpɛpɛ ˈka.
6 ˗Wo ˈˈta ˗sü ˈzü ˈwo bɔ Flizi ˗sɛ waa Gadhatö ˗sɛ ˗an ˈgü, ˗a ˗gɛn ˗mü ꞊dhɛ ˗zuu ˈˈslʋ̈ʋ̈slʋ̈ yö ˈti ˈˈwɩ ˗a ˗bha kö ˗wo ˗zlanwopö Azi ˗pö ˗nu ˈgü.
7 ˈDhɛ ˈwo ꞊yɔɔ ˈö ˈwo dho Misi ˗sɛ ˈgü, ˗wo pë ꞊gban ˈˈpɛpɛ ˗kë kö ˈwo ˈdho Bitini ˗sɛ ˈgü, ˈˈkɛɛ ˗zuu ˈˈslʋ̈ʋ̈slʋ̈ ˈö Yesu ˗ya nu ˗an ˗dhɛ bhë yö ˈti ˈˈwɩ ˗a ˗bha.
8 ˈDhɛ ˈö ˗kë ˈˈdhʋ̈, ˈyö ˈwo ˗ʒiö wo ꞊gɛan Misi ˗sɛ ˈö bhë ˗a ˈgü, ˈyö ˈwo ꞊yɔɔ ˈwo dho ˈwo ˗lo Troasö.
9 ˈDhɛ ˈkwa dɔ gbeŋ, ˈyö Pɔdhö ˈˈɲan ˈgü ˗yö ˗da, ˈyö ˗kpan Maseduanö mi do ˗bha kö ˗yö ˈduaannu ˗sü ˈka, kö ˗yö bhɛɛˈˈ ˗ni ˈgü ˗a ˗dhɛ. ˗Yö ˗kun ˗a pö ˗ni ˈgü: «˗Bhö bɔ Maseduanö kö ˈü yi ˗takun.»
10 ˈDhɛ ˈö Pɔdhö ˈˈɲan ˈgü ˗yö ˗da ˈˈdhʋ̈, yi ˗to ˈˈshia˗ mü ˈö ˈyi˗ ˈˈslö ꞊mɛɛn kö ˈyi ˈdho Maseduanö, ˈyö ˗tɔ yi˗ ˈgüman ꞊dhɛ ˗Zlan ˈnën ˈö kun ˈdho ˗ni ˈgü yi ˈka mü kö ˈyi nɔɔn˗ ˗së pö ˗an ˗dhɛ.
11 ˈDhɛ ˈö ˗kë ˈˈdhʋ̈, ˈyö ˈyi ˗da ˈˈyitagɔ ˈgü Troasö ˈö ˈyi bɔ ꞊weeyi ˗ta ˈyi dho vɛɛdhö Samotrasö, ˈyö ˗dhɛkpaɔyi ˈdhɛ ˈö dɔ ˗a ˈˈpiʋ̈ ˈyi dho Neapolisö.
12 Yi ˗go ˗dhɛ ˈö bhë ˗a ˈgü ˈö ˈyi dho Wlɔmö ˗mɛn ˗nu ˗bha ˈpö˗ ˈwo˗ ˗dhɛ Filipö, ˈö ˈˈkwipö ꞊bhlëësü ꞊dede ˈka Maseduanö ˗sɛ ˈgü bhë ˗a ˈgü. Yi ˗to mü ˈö ˈyi ˗dhɛkpaɔyi ˈnën ˈbhaa ˗kë.
13 ˈDhɛ ˈö ꞊Glooyi ˗yö ˗wo, ˈyö ˈyi bɔ ˈpö˗ ˈö bhë ˗a ˈˈkwee ˈka ˈö ˈyi yö ˈˈkpɛnŋ ˈyi dho ˈˈyiga do ˈbhaa ˈˈkpɔnŋ ˈˈdhiʋ̈. Yi˗ ˗man ꞊dhɛ ˗dhɛ ˈö bhë bhɛɛˈˈ ˗dhɛ ˗mü. ˈYö ˈyi dho mü ˈyi ˈɲaannu, ˈö ˈyi ˗ya ˈˈdoo dɔ ˗sü ˗bha dhebɔ ˗nu ˈwo ˗kë wo ˈkwëëdhö mü ˗an ˈˈpiʋ̈.
14 Dhebɔnën do ˈö ˈwo˗ ˗dhɛ Lidi ˈö go Tiatii ˗yö ˗kë mü. ˗Yö ˗kun sɔ ˈö˗ ˈˈɲan ˈdhö ˈgɔɔyisü ˗a ˈˈdhoodɔmɛn ˈka, ˈö kun ˈpö ˗Zlan ˗dhɔkëdhe ˈka. ˈDhɛ ˈö kun ö ˈˈtʋ ˈto ˗ni ˈgü, Zoova ˗ya zuʋ̈ˈˈ ˗pʋ ˈˈgbɛɛ ˈö ˗we pë ˈö Pɔdhö kun ˗a pö ˗ni ˈgü bhë ˗a ˗bha.
15 ˈDhɛ ˈö waa ö ˗bha ˈkɔɔmɛn ˗nu ˈwo bɔ ˈˈyi ꞊bhaa, ˈyö ꞊bhɛɛ yi ˗dhɛ ˈö˗ pö: «˗Ya kë ꞊dhɛ ka n ˗sü Zoova gbamɛn ˈka ꞊dedewo, ˗ka nu n ˗gɔ ˈkɔɔ kö ˈka ˗ya mü.» ˈDhɛ ˈö ˗gban yi ˗bha, ˈyö ˈyi dho ˗a ˗gɔ ˈkɔɔ.
16 ˗Dhɛkpaɔyi do ˈka kö yi ˈdho ˗ni ˈgü bhɛɛˈˈ ˗dhɛ ˈgü, ˈyö dhebɔnën do ˈö yö ˗kë mɛn ˗nu ˗bha ˈka, ˈö ˗zuu yaa ˈdhö˗ ˈgü, ˗yö ˗kpan yi ˗bha. ˈDhɛ ˈö ˗kë ꞊dhɛ dhebɔnën ˈö bhë ˗yö ˗kun ˈwɔn ˗nu ˈto ˗ni ˈgü ˈˈdhiʋ̈ ˈö˗ ꞊blɛɛ bhë, ˗yö ˗kun pë ꞊va ꞊slɔɔ ˗ni ˗a ˈgü ˈö˗ nu ö ˗gɔmɛn ˗nu ˗dhɛ.
17 Dhebɔnën ˈö bhë ˗yö ˗kun ʒiö ˗ni ˈgü yaa Pɔdhö ˗nu yi ꞊kee˗ ˗kplawo, ˈö kun ˈˈgbla ˗ni ˈgü ˈö˗ pö: «Mɛn ˗nu ˈwo yö, ˗Zlan ˈö pë ꞊gban ˈˈpɛpɛ ˗gɔ ˗ta bhë ˗a ˗bha yökëmɛn ˗nu ˗mü ˗an ˈka. Dhasü ˗ʒian ˈnën ˈwo˗ ˗zɔn ˗ni ˈgü ka ˗dhɛ bhë.»
18 ˗Yö ˗to ˗a pö ˗sü ˗bha ˈˈdhʋ̈ ˈö ˗dhɛkpaɔyi ꞊va ˗kë ˗a ˈgü. ˈDhɛ ˈö ꞊ɲɔɔn mü kö ˗a ˗wo ˗ya kë Pɔdhö ˈˈtʋʋdhö ˗fɛfɛsü, ˈyö ꞊slëë ö ˗zü ˈö ˗gbla ˗zuu yaa ˈö bhë ˗a ˗ta ˈö˗ pö: «Yesu Klito ˈtɔ ˈgü, a˗ ˗pö ü ˗dhɛ ˈü ˈgo dhebɔnën ˈö bhë ˗a ˈgü.» ˈYö to mü ˈö ˗zuu yaa ˗yö go ˗a gü.
19 ˈDhɛ ˈö dhebɔnën ˈö bhë ˗a ˗gɔmɛn ˗nu ˗wa yö ꞊dhɛ wo ˗bha pë ˗slɔɔ ˗a ˈgü ˗pë ˈyaa ˗dhö ˈzü, ˈyö ˈwo Pɔdhö waa Sidhasö ˗an kun ˈö ˈwo ˗an ˗gan ˈwo dho ˗an ˈka ˈˈdhookwëë˗, ˈpö˗ ꞊kɔɔnmɛn ˗nu ˗kuu ˈˈdhiʋ̈.
20 ˈDhɛ ˈwo ˗lo ˗an ˈka ˈwɔnɲanbhɔmɛn ˗nu ˗kuu ˈˈdhiʋ̈, ˈyö ˈwo˗ pö: «Mɛn ˗nu ˈwo yö ˗wa ˗bhluubhluudhe ˗da kwa ˗bha ˈpö˗ ˈö yö ˗a ˈgü ˈgbɛ. Zuifö ˗nu ˗mü ˗an ˈka,
21 ˗ya ˈgo mü ˈzü, wɔkɔ ˗nu ˈö˗ ˗dhɛ ˈyaa˗ ˗bha kö mɛn ˈö ˈkwa ˗kë Wlɔmö ˗mɛn ˗nu ˈka ˈkwa ˈˈwɩ ˗an ˗bha ɛɛnˈˈ ˈkwa ˈto ˗an ˈˈpiʋ̈ bhë, ˈyö ˈwo˗ ˗wɔn blɛɛˈˈ ˗ni ˈgü mɛn ˗nu ˗dhɛ.»
22 ˈDhɛ ˈwo˗ pö ˈˈdhʋ̈, ˈyö mɛn ꞊va ˈwo kun ˈmü bhë ˈwo ꞊luu ˈwo ˗ya Pɔdhö waa Sidhasö ˗an ˗bha. ˈDhɛ ˈö ˈwɔnɲanbhɔmɛn ˗nu ˗wo sɔ bho ˗an ˗bha, ˈyö ˈwo˗ pö ˗wo ˗an ˗man ˗klaaga ˈka.
23 ˈDhɛ ˗wa ˗klaa ˗ɲaan ꞊va ꞊dede ˈsü ˗an ˗gɔ, ˈyö ˈwo dho ˗an ˈka ˈwo ˗an ˗da ˗kaso ˈgü, ˈö ˈwo˗ pö ˗kaso ˗kɔ ˗maankëmɛn ˗dhɛ ˗yö ö ˈˈɲan ˈto ˗an ˗bha ˗së ˈka.
24 Pë ˈwo˗ pö ˗a ˗dhɛ bhë ˗a ˗wɔn ˈgü, ˗yö Pɔdhö waa Sidhasö ˗an ˗sü ˈö dho ˗an ˈka ˗kaso ˈö bhë ˗a ˈkɔ ꞊duudhö, ˈö ˗an ˗gɛn ˗nu yö ˈˈdhü ˈgü.
25 ˈDhɛ ˈkwa dɔ gbeŋ ꞊zinŋgü, Pɔdhö waa Sidhasö ˗wo ˗ya bhɛɛˈˈ ˗sü ˗bha, kö ˗wo ˗Zlan ˈtɔ bhɔ ˈˈtan ˗nu bho ˗ni ˈgü. ˗Kaso ˈgümɛn ˗nu ˈwo to ˗wo ˗kun wo ˈˈtʋ ˈto ˗ni ˈgü ˗an ˗wo ˗bha.
26 ˈYö to mü ˈö ˈˈsɛ ˗yö ꞊zii ˈˈgbɩkɩgbɩkɩ ˈka, ˈö ˗kaso ˗kɔ ˈö bhë ˗a ˗gɛngbandhɛ ˗nu ˗wo ꞊zii. ˗Ya ˈgo mü ˈzü, ˗a ˈˈkwee ˗nu ꞊gban ˈˈpɛpɛ ˗wo ˗pʋ, ˈö mɛn ˈˈpɛpɛ ˈö ꞊yɔɔ˗ kun ˗an ˗bha, ˗an ˗bha ꞊yɔɔ˗ ˗nu ˗wo ˗pʋ.
27 ˈDhɛ ˈö ˗kaso ˗kɔ ˗maankëmɛn ˈö bhë ˈö go yiö, ˈö ˗kpan ˗kaso ˈˈkwee ˗nu ˗bha kö ˗wo ˈˈpʋ ˗sü ˈka, ˈyö ö ˗bha ˗blaan ˗dhaa sü kö ˈö ö ˗de zë, ˈyö sü ꞊dhɛ ˗a ˗bha ˈgü ˗kaso ˈgümɛn ˗nu ˗wa ꞊duëë.
28 ˈˈKɛɛ ˈyö Pɔdhö ˗yö ˗gbla ˈˈgbɩɩ˗ ˈö˗ pö: «ˈBha ˗dho pë ˈˈdhiʋ̈˗ kë ü ˗de ˈka, mɛn ꞊gban yi ˈyö!»
29 ˈDhɛ ˈö ˗kë ˈˈdhʋ̈, ˈyö ˗kaso ˈkɔ ˗maankëmɛn ˈö bhë ˈö˗ pö ˗wo ˈˈshiʋ̈ ˗nu dɔ, ˈyö ˗da ˈkɔɔ ˗bia ˈka kö ˗yö ꞊zii ˗ni ˈgü, ˈyö yö ö kpɔn ˈgü Pɔdhö waa Sidhasö ˗an ˈwëëdhö.
30 ˈDhɛ ˈö ö bo, ˈyö yö ˗an ˈka ˈˈkpɛnŋ, ˈö˗ pö ˗an ˗dhɛ: «N dë ˗nu, ˈmën n dua ˈdhö ˗mü ˈa˗ kë kö ˈa dha?»
31 ˈYö ˈwo˗ ˗yɔ bɔ ˗a ˗gɔ ˈwo˗ pö: «˗Bhö ü ˗zo yö Dëmɛn Yesu ˗dhɛ, kö bhi ˗nu, ü ˗bha ˈkɔɔmɛn ˗nu ˈka dha.»
32 ˈDhɛ ˈö ˗kë ˈˈdhʋ̈, ˈyö ˈwo Zoova ˈˈdhiwo ꞊blɛɛ waa ö ˗bha ˈkɔɔmɛn ˗nu ꞊gban ˈˈpɛpɛ ˗an ˗dhɛ.
33 Gbeŋ ꞊dede ˈö bhë ˗a ˈka, ˗kaso ˈkɔ ˗maankëmɛn ˗yö ˗dho ˗an ˈka ˈö ˗an ˗bha bhuöö ˗nu ˗zu. ˗Wo ˗to ˈˈshia˗ mü ˈö ˈwo waa ö ˗bha ˈkɔɔmɛn ˗nu ˈˈpɛpɛ ˗an bɔ ˈˈyi ꞊bhaa.
34 ˈYö dho ˗an ˈka ö ˗gɔ ˈkɔɔ ˈö ˗bhöpë dɔ ˈtaablö ˗ta, ˈyö waa˗ ˗nu waa mɛn ˈˈpɛpɛ ˈwo˗ ˗gɔ ˈkɔɔ, ˈwo zuʋ̈gblüdhi ˗kë wo ˈkwëë˗ kë ˈö ꞊yaa˗ wo ˗zo ˗yö ˗Zlan ˗dhɛ ˗mɛn ˈka bhë ˗a ˗wɔn ˈgü.
35 ˈDhɛ ˈö ˗dhɛ ˗yö ꞊kpɔɔ, ˈyö ˈwɔnɲanbhɔmɛn ˗nu ˗wo ˈˈsɔdha ˗nu bɔ kö ˗wo ˈdho ˗wa pö: «Mɛn ˈwo bhë ˗ka ˗an bho ˗kaso ˈgü.»
36 ˈYö ˗kaso ˈkɔ ˗maankëmɛn ˗yö dho ˗an ˗wo ˈka ˈö˗ pö Pɔdhö ˗dhɛ: «ˈWɔnɲanbhɔmɛn ˗nu ˗wa mɛn ˗nu bɔ kö ˗kɔ ˈö ˈka˗ ˗bha ꞊plɛ ˈyi ka bho ˗kaso ˈgü. ˈDhɛ ˈö ˈˈdhʋ̈, ˗ka yö ˈˈkpɛnŋ ˈka ka ˗bha ˈdho wo ka ˈflëëgü.»
37 ˈˈKɛɛ ˈyö Pɔdhö ˗ya pö ˗an ˗dhɛ: «ˈMɛn yi ˗kë Wlɔmö ˈnën ˗nu ˈka, ˗wo yi ˗man mɛn ꞊gban ˈˈpɛpɛ ˈˈɲan ˈˈdhiʋ̈, ˈö ˈwo yi ˗da ˗kaso ˈgü ˈˈkɛɛ kö za ˈwo ˗dho ˗a dɔ yi ˗bha kö ˗yö yi ˈkun ˈyaa ˈdhö. ˈYö ˈwo˗ pö ˈwo yi bho ˗kaso ˈgü ˗bindhe ˈgü ˗ee? ˗Abin toŋtoŋdhö! Wo ꞊dede ˗wo nu kö ˗wo yi bho ˗kaso ˈgü.»
38 ˈYö ˈˈsɔdha ˗nu ˗wo dho ˈö ˈwo ˗an ˗wo ˈö bhë ˗a pö ˈwɔnɲanbhɔmɛn ˗nu ˗dhɛ. ˈDhɛ ˈö ˈwɔnɲanbhɔmɛn ˗nu ˗wa man ꞊dhɛ Wlɔmö ˈnën ˗nu ˗mü ˗an ˈka, ˈyö ˈˈsuʋ̈ ˗yö ˗da ˗an ˈgü ꞊dedewo.
39 ˈDhɛ ˈö ˗kë ˈˈdhʋ̈, ˈyö ˈwo nu ˈwo ꞊bhɛɛ ˗an ˗dhɛ. ˈDhɛ ˈwo ˗an bho ˗kaso ˈgü, ˈyö ˈwo˗ pö ˗an ˗dhɛ ˗wo ʒiö ˗wo ˈgo ˈˈkwipö ˈö bhë ˗a ˈgü.
40 ˈˈKɛɛ ˈdhɛ Pɔdhö waa Sidhasö ˗wo go ˗kaso ˈgü, ˈyö ˈwo dho Lidi ˗gɔ ˈkɔɔ. ˈDhɛ ˈwo ˗kpan kwa ꞊dhegblü ˗nu ˗bha, ˈyö ˈwo ˗an ꞊faanmën, ˈyö ˈwo ˗ʒiö.
