1. Mɛn ˈbha ˗ya ˈwɔn yaa ꞊gbɔɔnsü kë, ˈmën ꞊mɔɔn˗ ˗bha kö ˗yö kë ˗a ˈka?

 ˈWƆN ˗gɔ ˈö˗ ˗dhɛ ˈö yö ˈö dɔ ˗a ˈˈpiʋ̈ ˗a ˈgü, kwa ˗kɔ ˈö bɔmɛn Pɔdhö ˗yö mɛn ˈbha ˈö ˈwɔn yaa ꞊gbɔɔnsü ˗kë Kodhɛŋtö ˗a ˗wɔn ˈˈɲan bhɔ ˗a ˈka bhë, ˗a ˗yö. ˈWɔnyaakëmɛn ˈö ˈˈdhʋ̈ ˗yö ˈti ˈgo ö ˗bha ꞊sɔnŋ yaa ˈgü ˗a ˗wɔn ˈgü, ˗wa ˗bho ˗zlanwokɔdhigümɛn ˗nu ˈˈpiʋ̈. ˈˈKɛɛ ꞊dhɛ ˗kɔ ˈö ˈwɔn ˗gɔ ˈö yö ˗a ˗bha Biblö ˈˈɲan ˗ya pö ˗a ˈka bhë ˗a ˈdhö, mɛn ˈbha ˗nu ˈwo ˈwɔn yaa ꞊gbɔɔnsü kë, ˗Zlan ꞊mɔɔn˗ ˗bha ˈö ˗an ˗takun kö ˗wo ˈgo ˗a ˈgü. (Wlɔ. 2:4) Zoova ˗yö ˗bɔ mɛn zii ˗nu ˗ta ˈö ˗an ˗takun ˗kɔ ˗kë ꞊dhɛ?

2-3. ˈKwa˗ man ꞊dhɛ kwa ꞊dhegblü do ˗ya ˈwɔn yaa ꞊gbɔɔnsü kë, ˈmën ˈkwa dho ˗a ˈkë? ˈYö ˈmën ˗kë?

² ˈˈSanni mɛn zii ˗nu ˗wo mɛn ˈbha ˗takun, ˗an dua ˗mü kö ˈwɔn yaa ˈö˗ ˗mɛn ˗ya ˗kë ˗wa dɔ. ˈDhɛ ˈˈdhʋ̈, ˈkwa˗ man ꞊dhɛ kwa ꞊dhegblü do ˗ya ˈwɔn yaa ꞊gbɔɔnsü ˈö˗ ˗wɔn ˈgü ˈwo ꞊mɔɔn˗ ˗bha kö ˗wa bho kwa ˈˈpiʋ̈ ˗a kë, ˈmën ˈkwa dho ˗a kë? ˗Kwaa pö ˗a ˗dhɛ ꞊dhɛ ˗yö ˈdho kö ˗yö ˗takundhe ˗dhɛ mɛn zii ˗nu ˗gɔ.—Is. 1:18; Këw. 20:28; 1 Piɛ. 5:2.

³ ˈˈKɛɛ ˗ya kë ꞊dhɛ ˗yö ˈti ˈˈwɩ ˗a ˗blɛɛ mɛn zii ˗nu ˗dhɛ ˗sü ˗bha ꞊wɛ? Kwa ꞊mɔɔn˗ ˗bha kö kwa ꞊dede ˈkwa˗ blɛɛˈˈ ˗an ˗dhɛ, kö ˗yö kë ga ˗sü ˈka kwa ˈgü ꞊dhɛ ˗wo ˗dho ˗a ˗takun. ˗Dhɔ ˗zɔn kwa ꞊dhegblü ˗dhɛ ˗kɔ ˗së ꞊dede ˗mü, ˈyö sü ꞊dhɛ ˈkwaa˗ ˈˈpiʋ̈ kö kwa dhɔɔbhaamɛn ˈö bhë ˗yö ꞊dhiɔŋ. Mɛn ˈö ˗ya ˈto ˈwɔnyaakësü ˗bha ˗kplawo, ˗yö ˗dho waa Zoova wo ˗bha ˗mlɛɛn shiʋ̈ˈˈ. ˗A ˗mɛn ꞊mɔɔn˗ ˗bha ˈzü ˈö ˗zlanwokɔdhi ˈtɔ zë ˈˈkpɛnŋ ˗mɛn ˗nu ˈˈɲan ˈˈdhiʋ̈, ˈwo Zoova ˗wɔn yaa ꞊blɛɛ. ˗A ˗wɔn ˈgü ˈkö ˗kë ꞊dhɛ ˗yö kwa ˗kɔa ˈˈgbɩɩ˗, ˗kwaa blɛɛˈˈ mɛn zii ˗nu ˗dhɛ kö ˈkwa˗ ˗zɔn Zoova waa kwa ꞊dhegblü ˈö bhë ˗an ˗dhɛ ꞊dhɛ ˗an ˗dhɔ ˗yö kwa ˗kë.—Ps. 27:14.

 MƐN ZII ˗NU ˗WO MƐN ˈÖ ˗YA ˈWƆN YAA ꞊GBƆƆNSÜ KË, ˗A ˗TAKUN ˗KƆ ˗KË ꞊DHƐ?

4. Mɛn zii ˗nu ꞊waa˗ pö ˈwo ˗kpan mɛn ˈbha ˈö ˈwɔn yaa ꞊gbɔɔnsü ˗kë ˗a ˗bha, ˈmën ˈwo dho ˗a kë?

⁴ Mɛn ˈbha ˈö ˗zlanwokɔdhi ˈgü ˗ya ˈwɔn yaa ꞊gbɔɔnsü kë, mɛn zii ˗nu ˗wo wo ˗kɔ ˗yɛ mɛn zii ˗yaaga ˗bha wo kpö ˈgü kö ˗wo ˗kpan ˗a ˗mɛn ˗bha. a Mɛn zii ˗nu ˈwo ˈˈdhʋ̈ ˗an dua ˗mü kö ˗wo wo ˗de ˗naan dɔ, ˗wo wo ˗de ˈsü ˈˈtɩtɩ. ˈKö ˗kë ꞊dhɛ ˗wa ˈˈpiʋ̈ kö ˈwo˗ ˗takun, ˗an dua ˗mü kö ˗wa ˈwɔn dɔ ꞊dhɛ ˈwaa ꞊mɔɔn˗ ˗bha kö ˈwo ˈˈgbɩɩdhɛ wɔ ˗a ˗ta kö ˗yö ö ˈˈtakɔ bho ˈˈgblʋʋ. (Deut. 30:19) Mɛn zii ˗nu ˗wa ˈwɔn ˗dɔ ˈpö ꞊dhɛ ˈwɔnyaakëmɛn ˗nu ˈˈpɛpɛ ˈwi ˗dho ˗a yö ꞊dhɛ ˈwa ˈwɔn yaa kë. Pë ꞊dede ˈö ˗gblüdë Davi ˗ya ˗kë, ˈyö bhë. (2 Sam. 12:13) ˈWɔnyaakëmɛn ˈbha ˗nu ˗wo ꞊mɔɔn˗ ˗bha ˈwo ˗kɔ Zoova ˗bha ˗dhioo ˗nu ˈka. (ˈWun. 4:​6-8) ˈKö ˗kë ˈˈdhʋ̈, mɛn zii ˗nu ˗wa ˈˈpiʋ̈ kö ˈwo ˗an ˗takun ˗wo ˈgo wo ˗bha ꞊sɔnŋ yaa ˈgü. ˈTɔŋ˗ ˗gɛngbandhɛ ˗mɛɛn ˗nu ˈwo dho mɛn zii ˗nu ˗takun?

5. Mɛn zii ˗nu waa ˈwɔnyaakëmɛn ˗wa ˗kpan wo ˈkwëë˗, ˗dhioo ˗mɛɛn ˗nu ˈwo dho ˗an ˗ya ꞊bhlëë ˈgü? (2 Timote 2:​24-26) (Kpɔɔˈˈ ˈzü pë ˈˈbin ˗bha.)

⁵ Mɛn zii ˗nu ˗wo ˈwɔnyaakëmɛn ˗yö ꞊dhɛ Zoova ˗bha ˈˈbhlaanën ˗wɔngbɩɩsü ˈdhö. (Dhu. 15:​4, 6) ˗A ˗wɔn ˈgü waa ˈwɔnyaakëmɛn ˗wa ˗kpan wo ˈkwëë˗, ˈwaa ˗wo ˈˈdhiʋ̈˗ pö ˗a ˗dhɛ ɛɛnˈˈ ˈwaa˗ ꞊bhlëë ꞊shiö. ˈWaa˗ pö ˈzü wo ˗de ˗dhɛ ꞊dhɛ pë dosɛnŋ ˈö wo dua ˈdhö ˗mü kö ˈwo˗ kë ˈyö ˗tɔ dhɛɛˈˈ ˗kpɔ ˗a ˗gɔ ˗sü kö ˈwɔn ˈö˗ ˗kë ˈwo˗ dɔ. ˈPë ˗an dua ˈdhö ˗mü kö ˗wa kë ꞊ʒiaan ˈyö ˗tɔ ˈˈklʋʋsë ˗nu ˈwo 2 Timote 2:​24-26 ˈgü bhë, ˗an ˗zɔn ˗sü. (˗A ˗wo pö.) ˗An dua ˗mü kö ˗wo wo ˗de ˈsü ˈˈtɩtɩ, ˗an ˈˈgblü ˗yö kë ˗së ˈyö sü ꞊dhɛ ˗wa ˈˈpiʋ̈ ˈwo˗ ˗mɛn ˗takun kö ˗yö ö ˗bha ˈwɔn yö ˗kɔ bho ˈˈgblʋʋ.

6. Mɛn zii ˗nu ˗wo ˗dho wo de baaˈˈ ˗kɔ ˗kë ꞊dhɛ kö waa ˈwɔnyaakëmɛn ˗wo ꞊kun ˗kpan wo ˈkwëë˗? (Wlɔmö 2:4)

⁶ Mɛn zii ˗nu ˗wo wo ˗de ˗baa ˗së ˈka kö ˈwo Zoova ˗zopiʋ̈wɔn dɔ. ˗Wo wo ˈgü ˗dɔ ˈˈgbɩɩ˗ kö ˈwo ˈto Zoova ˗bha ˈwɔnzuan ˈˈpiʋ̈. ˗A ˗wɔn ˈgü ˗an ˗zo ˗yö ˗bo Pɔdhö ˗wo ˈka. ˗Ya ˗pö: «[Zlan] ˗ya ˗kë ˈˈdhʋ̈ kö ˈi i bo ˈwɔn yaa kë ˗sü ˈka kö ˈi i zuëˈˈ slëë˗ ö ˈˈpiʋ̈.» (Wlɔmö 2:4 ˗wo pö.) Mɛn zii ˗nu dua ˗mü ˈzü kö ˗an ˗zo ˗yö ˗bo ꞊dhɛ wo ˗maankëmɛn ˗nu ˈka Klito ˗kɔ ꞊löö. (Is. 11:​3, 4; Mat. 18:​18-20) ˈˈSanni waa ˈwɔnyaakëmɛn ˗wo ˗kpan wo ˈkwëë˗, ˗an dua ˗mü kö ˗wo bhɛɛˈˈ Zoova ˗dhɛ kë ˈˈdhʋ̈ kö ˈwo˗ ˗mɛn ˗takun ˗yö ˈgo ö ˗bha ꞊sɔnŋ yaa ˈgü. ˗Wo ˗dhioo ˗mɛɛn Biblö waa kwa ˗bha ˈsëëdhɛ ˗nu ˈgü, ˈwo ꞊bhɛɛ kö ˈwɔnbhokoodɔdhe ˗yö kë wo ˗gɔ. ˗An dua ˗mü kö ˗wo ˈwɔnyaakëmɛn ˈö ˈˈdhʋ̈ ˗a ˗zotakɔ waa pë ˈö˗ ˗blü ˈwɔn ˗nu kë ˗sü ˗bha ˗an dɔ.—Prov. 20:5.

7-8. Mɛn zii ˗nu waa ˈwɔnyaakëmɛn ˗wa ˗kpan wo ˈkwëë˗, ˗wo ˗dho ˈto Zoova ˗bha zuʋ̈saadhɛ ˈwɔnzuan ˈˈpiʋ̈ ˗kɔ ˗kë ꞊dhɛ?

 ⁷ Mɛn zii ˗nu ˗wo ˗to Zoova ˗bha zuʋ̈saadhɛ ˈwɔnzuan ˈˈpiʋ̈. ˗Wo wo ˗zota ˗kɔ ˈö Zoova ˗yö ˈwɔnyaakëmɛn ˗nu sü ˗a ˈka ꞊kwɛŋzü ˗a ˈgü. ˗A ˈwɔnzuan do ˈnën ˗tɔ Zoova ˗yö ö zuʋ̈ˈˈ ˗kë ˗saa Kaɛn ˈˈpiʋ̈. ˗Ya ˗pö Kaɛn ˗dhɛ ꞊dhɛ ˗yö ˈti ö ˈˈtakɔ bho ˈˈgblʋʋ, ˗yö ˗dho ˈwɔn yaa ꞊slɔɔ ˗a ˈgü. ˈˈKɛɛ ˗ya ö ˈˈtʋ ˈto ö ˗bha ꞊ʒiaan, ö ˗dho ˈdhuëë˗ ˈkpɔ ˗a ˗bha. (ˈWun. 4:​6, 7) Zoova ˗yö ö ˗wodhiʋ̈lomɛn Natan ˗bɔ kö ˗yö ˗dhioo dɔ Davi ˗ta. Natan ˗yö ˗bɔ ˈwɔnzuan do ˗ta ˈö Davi ˗blü kö ˗yö ˈgo ö ˗bha ꞊sɔnŋ yaa ˈgü. (2 Sam. 12:​1-7) Zoova ˗yö ö ˗wodhiʋ̈lomɛn ˗nu ˗bɔ «꞊shiöŋ ꞊shiöŋ» Izraɛdhömɛn ˗nu ˈwo kun gɔɔgbɩɩdhɛ kë ˗ni ˈgü ˗an ˈˈpiʋ̈. (Jér. 7:​24, 25) ˗Yö ˈti ö ˗bha ˈˈsɛgümɛn ˗nu ˈˈdhiʋ̈ ˈˈgan kö ˗wo ˈgo wo ˗bha ꞊sɔnŋ yaa ˈgü kö ˗yö ꞊kun ˗an ˗takun. Pë ˈö˗ ˗kë ꞊ʒiaan ˈyö ˗tɔ ˗yö ˗an ˗to ˈwɔn yaa kë ˗sü ˈgü, ˈö ˗an ˗takun kö ˗wo ˈgo ˗a ˈgü.

⁸ Mɛn zii ˗nu ˗wo ˗to Zoova ˗bha ˈwɔnzuan ˈˈpiʋ̈ ˈö ˈwo mɛn ˗nu ˈwo ˈwɔn yaa ꞊gbɔɔnsü ˗kë bhë, ˗an ˗takun. ꞊Dhɛ ˗kɔ ˈö 2 Timote 4:2 ˗ya pö ˗a ˈka bhë ˗a ˈdhö, ˗wo «wo zuʋ̈ˈˈ ˗kë ˗saa» ˈwo kwa ꞊dhegblü ˗nu ˈwo ˈwɔn ˈˈgbɩɩ˗ ˈgü, ˗an ˗takun. ˈDhɛ ˈˈdhʋ̈, mɛn zii ˗nu ˗bhawɔn ˗yö zuʋ̈saadhɛ ˗bha ˗kplawo kë ˈˈdhʋ̈ kö ˈwɔn yö ˗kɔ ˗së ˗yö kë ˈwɔnyaakëmɛn ˗gɔ. ˈˈKɛɛ kö ˈwɔn ˗yö ꞊shiö mɛn zii ˗nu ˗dhɛ, ˈwɔnyaakëmɛn ꞊mɔɔn˗ ˗bha ˈö ö ˈˈtʋ bho ˗an ˗bha ˗dhioo ˗nu ˈˈpiʋ̈ ɛɛnˈˈ ˈö ˗kɔ ˗go ö ˗bha ꞊sɔnŋ yaa ˈgü ˗sü ˈka.

9-10. Mɛn zii ˗nu ꞊mɔɔn˗ ˗bha ˈwo ˈwɔnyaakëmɛn ˗takun kö ˗ya yö ꞊dhɛ ˈya ˈwɔn yaa kë ˗kɔ ˗kë ꞊dhɛ?

⁹ Mɛn zii ˗nu ˗wa ˈˈslö ˗mɛɛn kö pë ˈö˗ ˗mɛn ˗blü ˈwɔnyaakësü ˗bha, ˈwo˗ dɔ. ˗Mën ˈö ˈwɔnyaakëmɛn waa Zoova ˗an ˗bha ˗mlɛɛn ˗gɔ ꞊zɔɔ? ˈˈKan ˈö˗ wo Biblö draansü waa ˗zlanwopösü ˗bha yö ˗mü ˗ee? Ö ꞊kwaa ˈö˗ wo bhɛɛsü ˗zü zoodhö zoodhö ˗ee? Zuʋ̈ˈˈ ˗bhɔ ˈwɔn yaa ˗bha ˗sü ˗mü ˗ee? De ˗nu ˈö ꞊nënŋ ˗an ˗bha? Trʋʋˈˈ suu ˗mɛɛn ˗nu ˈö ˗an ˗kë? ˈWɔn ˗nu ˈwo bhë ˗wa ˗zotakɔ ˗bho ˈˈgblʋʋ ˗kɔ ˗kë ꞊dhɛ? ˗Kɔ ˈö˗ ˗bha ˈwɔn kë ˗kɔ ˗yö pa ˗a Dë Zoova ˈka bhë, ˗yö ˗kë ö ˗de ˈgü ˗kɔ ˗kë ꞊dhɛ ˗a ˗wɔn ˈgü?

¹⁰ Mɛn zii ˗nu ˗wo ꞊mɔɔn˗ ˗bha ˈwo dhɛɛˈˈ ˗nu kpɔ ˈwɔnyaakëmɛn ˗gɔ kö ˗wa ˗takun kö ˈpë waa Zoova ˗an ˗bha ˗mlɛɛn ˗gɔ ꞊zɔɔ ˈö˗ ˗kɔ ˗da ˈwɔnyaakësü ˈgü bhë, ˗wa dɔ. ˗An ˈˈdhiwo ˗yö kë ˈˈnɛɛnnɛn, ˈˈkɛɛ ˈwa ˗dho ˈwɔn ˈsɛɛn˗ ˗nu ˈö ˗an dua ˈyaa ˗mü kö ˗wa dɔ ˈpö ˗an ˈˈpiʋ̈ ˈpɔn. (Prov. 20:5) ˗Wo ꞊mɔɔn˗ ˗bha ˈwo bɔ ˈwɔnzuan do ˗ta kö ˈwɔnyaakëmɛn ˗yö ö ˗zota ˈwɔn ˗nu ˈö ˗an kë ˗an ˈgü, kö ˗yö ˗an ˗bha ˗kë yaa ˗sü ˗dhɛ yö ˈpö ꞊dhɛ Natan waa Davi ˗an ˗bha ˗kwɛzlan ˈdhö. ˗A ˈbha ˗ya kë kö ˗an ˗bha ˗kpankwëësü ˗blɛɛsü ˈgü, ˗wëë ꞊mɔɔn˗ ˗bha ˈö bɔ ˈwɔnyaakëmɛn ˈö ˈˈdhʋ̈ ˗a ˗ta ˈö˗ yö ꞊dhɛ ö ˗zotakɔ ˗yö ˈya˗. ˗Yö ꞊mɔɔn˗ ˗bha ꞊ʒianwo ˈö go ö ˗bha ꞊sɔnŋ yaa ˈgü.

11. Yesu ˗yö ˈwɔn ˗nu ˗kë ˈwɔnyaakëmɛn ˗nu ˈˈpiʋ̈ ˗kɔ ˗kë ꞊dhɛ?

¹¹ Mɛn zii ˗nu ˗wo wo ˈgü ˗dɔ ˈˈgbɩɩ˗ ˈwo to Yesu ˗bha ˈwɔnzuan ˈˈpiʋ̈. Yesu ˗yö Sɔdhö ˈö go Taasö bhë ˗a ˗takun dhɛɛˈˈ do ˗së ˗kpɔ ˗a ˗gɔ ˗sü ˈka, ˈö˗ pö: «Sɔdhö, Sɔdhö, i n ˈˈyënng ꞊gbaɔn ˈˈdhʋ̈ ˗më ˗wɔn ˈgü?» Dhɛɛˈˈ ˈö bhë ˗yö Sɔdhö ˗takun ˈö˗ yö ꞊dhɛ ö ˈwɔn yaa kë ˗ni ˈgü. (Këw. 9:​3-6) Yesu ˗ya ˗pö «dhebhɔ [ . . . ] Zezabɛdhö» ˗dhɛ: «A kë ˈˈtʋ̈ng ˈnë ˈbha ˗nu ˗dhɛ kë ˈˈdhʋ̈ kö ˗yö ö kwaa˗ ˈwɔn yaa kë ˗sü ˗zü.»—˗Dhɛ. 2:​20, 21.

12-13. Mɛn zii ˗nu ˗dho ˈˈtʋ̈ŋ ˈto ˈwɔnyaakëmɛn ˗gɔ ˗kɔ ˗kë ꞊dhɛ kö ˗yö ˈgo ö ˗bha ꞊sɔnŋ yaa ˈgü? (Kpɔɔˈˈ ˈzü pë ˈˈbin ˗bha.)

¹² Mɛn zii ˗nu ˗wo ˗to Yesu ˗bha ˈwɔnzuan ˈˈpiʋ̈ ˈö ˈwaa˗ pö ˈˈvaandhö ꞊dhɛ ˈwɔnyaakëmɛn ˈö bhë ˗yö ˈti ˗dho ˈgo ö ˗bha ꞊sɔnŋ yaa ˈgü. Mɛn ˈbha ˗nu ˗wo ˗go wo ˗bha ꞊sɔnŋ yaa ˈgü ˈˈtʋ̈ŋ ˗blɛɛsü ˈö waa mɛn zii ˗nu ˈwo ˗kpan ˗a ˈka wo ˈkwëë˗ bhë ˗a ˈgü. ˈˈKɛɛ ˗a mɛn ˈbha ˗nu ˗de ˈpö ˗an ˗bhawɔn yö ˈˈtʋ̈ŋ ꞊va ˗bha kö ˗wa kë ˈˈdhʋ̈.  ˗A ˗wɔn ˈgü, mɛn zii ˗nu ꞊mɔɔn˗ ˗bha ˈwo ˗kpan ˗an ˗bha ˗gɛnɲan ˈka ꞊va. ˗A ˈbha ˗ya kë ˗wa wo bo ˗kpan wo ˈkwëësü ˈka, ˈwɔnyaakëmɛn ˗dho ö ˗zota ˈwɔn ˈwo˗ ꞊blɛɛ ˗a dhɛ bhë ˗a ˈgü ˈö ö ˗de ˗kë ˈˈtɩtɩ ˈö ˗bhawɔntodhe ˗dhɛ Zoova ˗gɔ. (Ps. 32:5; 38:18) ˗Ya kë ˈˈdhʋ̈ ˗wa ˗kpan wo ˈkwëë˗ ˈzü, ˈwɔnyaakëmɛn ˗bha ˈwɔn yö ˗kɔ ꞊mɔɔn˗ ˗bha ˈö go ˈˈgblʋʋ.

¹³ Mɛn zii ˗nu ꞊waa˗ pö ˈwo ˈwɔnyaakëmɛn ˗takun kö ˗yö ˈgo ö ˗bha ꞊sɔnŋ yaa ˈgü, ˗wo wo ˗de ˗ya ˗a ˗duɛɛ ˈgü ˈwo ˈˈgblüsë ˗kë ˗a ˈka. ˗Wo ˗bhɛɛ Zoova ˗dhɛ kö ˗yö ˈdhuëë˗ ˈkpɔ wo ˗bha, ˈyö ˈpë ˈwo˗ ˈˈpiʋ̈ ꞊dedewo ˈyö ˗tɔ kö ˗a ˗mɛn ˗yö ˈgo ˗a ˗bha ꞊sɔnŋ yaa ˈgü.—2 Tim. 2:​25, 26.

14. De ˈö ˈwɔnyaakëmɛn ˗takun ˈö go ö ˗bha ꞊sɔnŋ yaa ˈgü?

¹⁴ ˈWɔnyaakëmɛn ˗ya ˈgo ö ˗bha ꞊sɔnŋ ˈgü, kwa zuʋ̈ˈˈ ˈˈgblü ˗yö ˗dhi ꞊dedewo! (Dhu. 15:​7, 10) De ˈö ˈwɔnyaakëmɛn ˗takun ˗a ˗kë ˈˈdhʋ̈ ˗sü ˗bha? Mɛn zii ˗nu ˗mü ˗ee? ˈPë Pɔdhö ˗ya pö ˈö ˗gban ˈwɔnyaakëmɛn ˗nu ˗bha ˈyö ꞊nɛn: «[˗Zlan] ˗dho ˗a ˈˈslë kë [ . . . ] ˈö ˈwo wo zuëˈˈ ꞊slëë ˈgü.» (2 Tim. 2:25) ˈDhɛ ˈˈdhʋ̈, Zoova ˈnën ˈwɔnyaakëmɛn ˗takun kö ˗yö ö ˗zotakɔ waa ö ˗bha ˈwɔn kë ˗kɔ ˗nu bho ˈˈgblʋʋ. ˗A ˗mɛn ˗ya ˈgo ö ˗bha ꞊sɔnŋ yaa ˈgü, ˈwɔn ˗së ˈö go ˗a ˈgü Pɔdhö ˗ya ˗blɛɛ. ˗Yö ꞊mɔɔn˗ ˗bha ˈö gagade dɔ ˈzü ˗së ˈka, ˈö ˈwɔn yö ˗kɔ ˗së ˗yö ˗kë ˗a ˗gɔ, ˈö dha Sɔtraan ˗bha ꞊döŋ ˗gɔ.—2 Tim. 2:26.

15. Mɛn zii ˗nu ˗dho ˈwɔnyaakëmɛn ˗takun ˗kplawo ˗kɔ ˗kë ꞊dhɛ?

¹⁵ ˈWɔnyaakëmɛn ˗ya ˈgo ö ˗bha ꞊sɔnŋ yaa ˈgü, mɛn zii ˗nu ˗dho ˗a ˗takun ˗kplawo kö ˗a ˗bha ˗zoyödhe ˗yö kë ˈˈgbɩɩ˗, ˗yö ˗gban Sɔtraan ˗bha ˈgüdandhe ˗nu ˗gɔ kö ˗yö ˈwɔn ˗së kë. (Ebl. 12:​12, 13) ˈKö ˗kë ˈˈdhʋ̈, ˗an dua ˈyaa ˗mü kö ˈwɔn yaa ˈö˗ ˗mɛn ˗ya ˗kë ˗wa blɛɛˈˈ mɛn ˈˈwɛɛ ˗nu ˗dhɛ. ˈˈKɛɛ ˈmën ˗zlanwokɔdhigümɛn ˗nu dua ˈdhö ˗mü kö ˗wa dɔ ˈpö?

«˗BHÖ ˗A KË ˈˈDHƲ̈ MƐ ꞊GBAN ˈˈYAAN»

16. ˈKwa ˗dhɛ ˗ga 1 Timote 5:20 ˈgü, ˗a pö ˈö Pɔdhö ˗ya wo «mɛ ꞊gban ˈˈyaan» bhë, ˗yö ˗we de ˗nu ˈka?

¹⁶ ˗Bhö 1 Timote 5:20 ˗wo pö. Pɔdhö ˗ya ˗pö Timote ˈö kun mɛn zii ˈka bhë ˗a ˗dhɛ ꞊dhɛ ˗yö ˈwɔnyaakëmɛn dɔɔˈˈ «mɛ ꞊gban ˈˈyaan.»  ˈMën kun ˗a ˈˈpiʋ̈ kö ˈö˗ pö? ˈYaa kun ˗a ˈˈpiʋ̈ kö ˈö˗ pö ꞊dhɛ ˗ya kë ˈˈdhʋ̈ ˗zlanwokɔdhigümɛn ˗nu ꞊gban ˈˈpɛpɛ ˈˈɲan ˈˈdhiʋ̈. ˗Yö ˗we mɛn ˗nu ˈö ˈwɔn yaa ˈö ˈˈdhʋ̈ ˈwo˗ ˈwɔn dɔ ˈsaadhö ˗an ˈka. ˗Yö ꞊mɔɔn˗ ˗bha ˈzü ˈö ˗kë mɛn ˗nu ˈö ˈwɔn ˗yö ˗kë ˗an ˈˈɲaan ɛɛnˈˈ ˈö ˈwɔnyaakëmɛn ˗yö ö zuʋ̈ˈˈ ˗pʋ ˗an ˗dhɛ ˗an ˈka. Mɛn zii ˗nu ꞊mɔɔn˗ ˗bha kö ˗kɔ ˈwo˗ ꞊baa ˗a ˈka ˗wa pö ˗an ˗dhɛ.

17. Mɛn ˈbha ˗ya ˈwɔn yaa ꞊gbɔɔnsü kë, ˗zlanwokɔdhigümɛn ˗nu ꞊waa˗ ˈwɔn dɔ ɛɛnˈˈ ˗wo ˗dho ˗a ˈwɔn dɔ ꞊taabha, ˈmën mɛn zii ˗nu dho ˗a kë? ˈYö ˈmën ˗kë?

¹⁷ ˗Ya kë ꞊shiöŋ, ˈwɔn yaa ꞊gbɔɔnsü ˈö mɛn ˈbha ˗ya ˗kë bhë ˗zlanwokɔdhigümɛn ꞊vadhɛ ˗wa ˈwɔn ˗dɔ ɛɛnˈˈ ˗wo ꞊mɔɔn˗ ˗bha ˈwo˗ ˈwɔn dɔ ꞊taabha. ˗Ya kë ꞊dhɛ ˗yö ˈˈdhʋ̈, kö «mɛ ꞊gban» ˈö˗ ˈwɔn ˈdhö ˗an ˈˈɲaan ˈnën ˈwo ˗tɔ ˗zlanwokɔdhigümɛn ˗nu ˗todhʋ̈sü. ˗A ˗wɔn ˈgü, mɛn zii do ꞊mɔɔn˗ ˗bha ˈö˗ pö ˗an ˗dhɛ ꞊dhɛ kwa ꞊dhegblü ˈö bhë ˗wa ˗dhioo dɔ ˗a ˗ta. ˈMën ˗kë? Pɔdhö ˗ya ˗yɔ ˗bɔ ˈö˗ pö: «Kö ˈˈsuʋ̈˗ ˗nu ˗da mɛ ˗kpɛa ˈwo to ˗a ˗nu ˈgü» kë ˈˈdhʋ̈ kö ˈwa ˗dho ˈwɔn yaa kë.

18. ˈNën ˈö˗ ˗kwɛ ˈti yö 18 ˗bha ꞊köŋ ˈö ˗ya bɔ ˈˈyi ꞊bha ˗ya ˈwɔn yaa ꞊gbɔɔnsü kë, ˈmën mɛn zii ˗nu dho ˗a kë? (Kpɔɔˈˈ ˈzü pë ˈˈbin ˗bha.)

¹⁸ Mɛn ˈbha ˈö˗ ˗kwɛ ˈti kë 18 ꞊köŋ ˈö ˗ya bɔ ˈˈyi ꞊bhaa, ˗ya ˈwɔn yaa ꞊gbɔɔnsü kë, ˈmën mɛn zii ˗nu dho ˗a kë? Mɛn zii ˗nu ˗dho wo ˗kɔ ˈˈyɛ mɛn ꞊plɛ ˗bha wo kpö ˈgü kö ˗wo ˗kpan ˈwɔnyaakëmɛn ˈö ˈˈdhʋ̈ waa ö ˗mɛn ˗nu ˈwo kletiɛn ˈka ˗an ˗bha. b Mɛn zii ˗nu ˗dho ˗a ˗mɛn ˗nu dhɛɛˈˈ ˈkpɔ pë ˈö ꞊waa˗ kë ˈsaadhö kö ˈwo˗ ˗takun ˗yö ˈgo ö ˗bha ꞊sɔnŋ yaa ˈgü ˗a ˈka. ꞊Ya kë ꞊dhɛ ˈnën ˗yö ö ˈˈtʋ ˗to ö ˗mɛn ˗nu ˗bha ˈö ö ˗zotakɔ waa ö ˈˈtakɔ bho ˈˈgblʋʋ, mɛn zii ˗nu dua ˗mü kö ˗wo wo ꞊kwaa ˗an ˗zü ˗wo ˈdho  ˗a ˈka ˈˈdhiʋ̈. Mɛn zii ˗nu ˗wa ˈwɔn ˗dɔ ꞊dhɛ ˈnënmɛn ˗nu ˈnën Zoova ˗yö ˗an ˗ya kö ˗wo wo ˗bha ˈnën ˗nu dɔɔˈˈ ˗dhɔ ˈgü. (Deut. 6:​6, 7; Prov. 6:20; 22:6; Efɛ. 6:​2-4) Mɛn zii ˗nu ˗dho ˈnënmɛn ˗nu dhɛɛˈˈ ˈkpɔ zoodhö zoodhö kö ˗ya kë ꞊dhɛ ˗an ˗bha ˈnën ˗yö ˗takundhe ˈö˗ ˗bhawɔn ˈdhö˗ ˗bha ˗a ꞊slɔɔ ˗ni ˈgü, ˗wa ˈwɔn dɔ. ˈˈKɛɛ ˗ya kë ꞊dhɛ ˈwɔnyaakëmɛn ˈö ˗ya bɔ ˈˈyi ꞊bhaa ˈö ꞊kun ˈnën ˈka ˗yö ˈti ˈˈwɩ ˗go ö ˗bha ꞊sɔnŋ yaa ˈgü ˗sü ˗bha, ˈmën mɛn zii ˗nu dho ˗a kë? Mɛn zii ˗yaaga ˗dho ˗kpan waa ö ˗mɛn ˗nu ˈwo kletiɛn ˈka ˗an ˗bha.

«[ZOOVA] BHA˗ ˈˈGBLÜ ˈYAA ˈYA˗, MƐ ˗WËË ˗YA ˗KË ꞊DEDEWO»

19. Mɛn zii ˗nu ˗wo mɛn ˈbha ˈö ˈwɔn yaa ꞊gbɔɔnsü ˗kë ˗a ˗wɔn ˈˈɲan bhɔ ˗ni ˈgü, ˗wo ˗to Zoova ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

¹⁹ Zoova ˗ya ˈˈpiʋ̈ kö mɛn zii ˗nu ˗wo ˗zlanwokɔdhi kë ˈˈslʋ̈ʋ̈slʋ̈. (1 Ko. 5:7) Mɛn zii ˗nu ˗wa ˈˈpiʋ̈ ˈpö kö ˈwo pë ˈˈpɛpɛ kë, kë ˈˈdhʋ̈ kö ˈwɔnyaakëmɛn ˗nu ˗wo ˈgo wo ˗bha ꞊sɔnŋ yaa ˈgü. ˗A ˗wɔn ˈgü ˗wo mɛn ˈbha ˗takun ˗ni ˈgü, ˗wa ˗pö wo ˗de ˗dhɛ ꞊dhɛ ˗a ˗mɛn ˗dho ˈö ˗bha ˗tosɛta bho ˈˈgblʋʋ. ˈMën ˗kë? ˗A ˗gɛn ˗mü ꞊dhɛ ˗wa ˈˈpiʋ̈ kö ˈwo ˈto Zoova ‹ˈö˗ ˈˈgblü ˈyaa ˈya˗, ˈö mɛ ˗wëë ˗ya ˗kë ꞊dedewo› bhë ˗a ˗bha ˈwɔnzuan ˈˈpiʋ̈. (Zak. 5:11) Bɔmɛn Zan ˗yö ˗dhɔ ˗zɔn ˈö ꞊dhegblü ˗nu ˗dhɛ. ˗Ya ˗pö: «N bhang ˗nu, ˈwɔn ˗nu ya a˗ ˗bɛn ˗zë ˈa˗ bɔ ka ꞊dhɛ ˈˈdhʋ̈ kö ˈka ˈdho ˈwɔn yaa ꞊në˗ kë tongtongdhö. ˗Ɛɛ! Kö mɛ ˈbha ꞊ya ˈwɔn yaa kë ˈzü, kö˗ ˗mɛ ˈdhang bho ˗sü kë˗ ˈˈdhiʋ̈ ꞊dhɛ Yesu Klisi ˈö pö ˈaa˗ ˗bha tongtongdhö bha ꞊në kwa ˗mawɔn pö ˗mɛ ˈka kwa Dë [˗Zlan] ˗kuu ˈˈdhiʋ̈.»—1 Zn. 2:1.

20. ˈMën ˈkwa dho ˗a yö kwa ˗bha ˈwɔn ˗gɔ ˗totaabhasü ˈgü?

²⁰ ˗A ˗wëëwɔn ˈö mü ˈyö ˗tɔ ˗ya kë ꞊shiöŋ kletiɛn ˈbha ˗yö ˗kɔ ˗go ˈö ˗bha ꞊sɔnŋ yaa ˈgü ˗sü ˈka. ˗Ya kë ˈˈdhʋ̈, ˗an dua ˗mü kö ˗wa bho ˗zlanwokɔdhigümɛn ˗nu ˈˈpiʋ̈. ˈWɔn suu ˈö bhë mɛn zii ˗nu ˗dho ˗a ˈˈɲan bhɔ ˗kɔ ˗kë ꞊dhɛ? Kwa ˗dho ˗a ˗yɔ ꞊slɔɔ kwa ˗bha ˈwɔn ˗gɔ ˗totaabhaasü ˈgü.