1-2. (1) ˈMën ˗kë ˈö kwa bɔ ˗ni ˈgü ˈwɔn ˈˈgbɩɩ˗ ˗nu ˈgü, ˈkwa ꞊mɔɔn˗ ˗bha ˈkwa˗ pö ꞊dhɛ ˈkwaa kwa do ˈka toŋtoŋdhö? (2) ˈMën ˈkwa dho ˗a yö ˈwɔn ˗gɔ ˈö yö ˗a ˈgü?

 ˈKWA kë ˈwɔn ˈˈgbɩɩ˗ ˗nu ˈgü, ˗a ꞊tɛɛ ˗yö kë ˗sü ˈka ꞊dhɛ mɛn ˈö ˗ya ˈto ˈˈblü ˗a ˈdhö. ˈKö ˗kë ˈˈdhʋ̈, ˈkwaa kwa do ˈka. Kwa Dë ˈö kwa ˗dhɔ ˗ya ˗kë ˈö ˗ya ˗sü ˈka dhaŋ˗ ˈgü bhë, ˗yö kwa ˗bha ˈwɔn ˈˈgbɩɩ˗ ˗nu ˗yö ˈö˗ pö ꞊dhɛ ö ˗dho kwa ˗takun. Zoova ˗yö kwa ˗zogban ˈö˗ pö: «A ˗dho [ka] ˗takun.»—Is. 41:10.

² ˈWɔn ˗gɔ ˈö yö ˗a ˈgü, kwa ˗dho ˗kɔ ˗yiishiö ˈö Zoova ˗yö kwa ˗takun ˗a ˈka ˗an yö. (1) ˗Yö ˈˈdhiʋ̈sü kwa ˈka, (2) ˈö kwa ˗bhawɔnyëëpë ˗nu ˈˈɲan bhɔ, (3) ˈö kwa ˗takpa, (4) ˈö go mü ˈö kwa ˗zogban. Zoova ˗ya ˗pö kwa ˗dhɛ ꞊dhɛ ˈkö ˗kë ꞊dhɛ kwa kë ˈwɔn ꞊suu ˈˈoo ˗su ˈgü, ˈö ˗zo ˈti ˗dho bhɔ kwa ˈka toŋtoŋdhö. ˗Yö ˈti ˗dho ˈˈkan kwa ˗bha. ˗A ˗wɔn ˈgü, ˈkwaa kwa do ˈka toŋtoŋdhö.

ZOOVA ˗YÖ ˈˈDHIƲ̈SÜ KWA ˈKA

3-4. Zoova ˗yö ˈˈdhiʋ̈sü kwa ˈka ˗kɔ kë ꞊dhɛ? (Ps. 48:14)

³ ˗Bhö Psaume 48:14 ˗wo pö. Zoova ˈyaa ˈˈpiʋ̈ kö ˈkwa ˈˈdhiʋ̈sü kwa ˗de ˈka. ˗Yö ˈˈdhiʋ̈sü ö ˗dhɔkëmɛn ˗nu ˈka ꞊dɛɛ ˗kɔ ˗kë ꞊dhɛ? ˗A kë ˗kɔ do ˈnën ˗tɔ ˗bɔ Biblö ˗ta ˗sü. (Ps. 119:105) Zoova ˗yö ˗bɔ ö ˈˈDhiwo ˗ta ˈö kwa ˗takun kö ˈkwa ˗da ˈwɔn ˗së ˗nu ˗ʒian ˗nu ˗ta. ˗Ya ˈgo mü kö ˈˈklʋʋsë ˗nu ˈwo dho kwa zuʋ̈ˈˈ ˈˈgblü dhi ꞊dɛɛ, ˈwo dho ˗tosɛta ˈö ˈyaa ɲën ˗a nu kwa ˗dhɛ ˗dhɛkpaɔ dhiʋ̈ˈˈ ˈgü bhë ˈkwa ˗an draanˈˈ. a ˗A ˈwɔnzuan ˈnën ˗tɔ Zoova ˗ya ˗pö ꞊dhɛ ˈkwa mɛn ˗nu ˗bhawɔn ˈto kwa zuʋ̈ˈˈ ˈˈpuu ˈka, ˈkwa kë kpɛnŋdhö ˈwɔn ˈˈpɛpɛ ˈgü, mɛn nu ˗dhɔ ˗yö kwa kë ꞊dedewo. (Ps. 37:8; Ebl. 13:18; 1 Piɛ. 1:22) ˈˈKlʋʋsë ˗nu ˈwo bhë ˗wa kë kwa ˗gɔ, kwa ˗kë ˈnënmɛn, dhegɔndë ɛɛnˈˈ gwanbhadhe waa mɛn ˈˈtɔŋdë ˗tiaandhö ˗nu ˈka.

⁴ Mɛn ˈbha ˗nu ˈö ˈwɔn ˈˈgbɩɩ˗ ˗yö nu ˗an ˗ta, ˈwo ˗kë wo ˗de ˈgü ꞊dhɛ kwa ˈdhö ˈpö bhë Zoova ˗yö ˗an ˗wɔn ˗blɛɛ Biblö ˈgü. (1 Ko. 10:13; Zak. 5:17) ˈKwa ˗an ˗bha ˗kwɛzlan ˗wo pö, ˗gleŋ  ˗nu ˈkwa ˗an sü ˗an ˈgü ˈkwa ˗an ˗ya ˗bhlëë ˈgü, kwa ˈwɔn ˗së ꞊plɛ ˗slɔɔ ˗a ˈgü. ˗A ˗blɛɛsü ˈnën ˗tɔ kwa˗ ˗yö ꞊dhɛ kwa dosɛnŋ ˈkwaa ˈnën ˈö ˈwɔn ˈˈgbɩɩ˗ ˗nu ˗wo nu kwa ˗ta. ˗Wo ˗nu ˈpö mɛn ˈˈwɛɛ ˗nu ˗ta ˈö Zoova ˗yö ˗an ˗takun ˈwo bɔ ˗an ˈgü. (1 Piɛ. 5:9) ˗A ꞊plɛ ˗bha ˗naan ˈnën ˗tɔ ˈpë ˈkwa dho ˗a kë kö ˈkwa bɔ kwa ˗bha ˈwɔn ˈˈgbɩɩ˗ ˗nu ˈgü zuʋ̈gblüdhi ˈka, kwa ˗an ˗draan.—Wlɔ. 15:4.

5. De ˗nu ˈö Zoova ˗yö bɔ ˗an ˗ta ˈö ˈˈdhiʋ̈sü kwa ˈka?

⁵ Zoova ˗yö ˗bɔ ˈpö kwa ꞊dhegblü ˗nu ˗ta ˈö ˈˈdhiʋ̈sü kwa ˈka. b ˗A ˈwɔnzuan ˈnën ˗tɔ ˗ya kë ꞊shiöŋ ˈˈpian do ˈˈpiʋ̈ ˗maankëmɛn ˗nu ˗wo ˗nu ˈwo ˗wo ˗zlanwokɔdhi ˗nu ˗dhɛ kö ˈwo kwa ꞊faanmën. ˗An ˗bha ˈˈdhɛɛtadhiaŋ˗ nu ˗wo kwa ˗bha ˗zoyodhë ˗gɛn ˗gban, ˈwo kwa ˗takun kö kwa ˗kɔ ˗yö ˈto ˈwɔn do ˗bha. (Këw. 15:40–16:5) Mɛn zii ˗nu ˗de ˈpö ˗wo wo ˈgü ˗dɔ ˈˈgbɩɩ˗ kö ˈwo zlanwokɔdhigümɛn ˗dhɛ ˈö ˗dhö ˗a ˗takun kö ˗yö ˈto ˗klu ˗sü ˈka Zoova ˗bha. (1 Piɛ. 5:​2, 3) ˈNënmɛn ˗nu ˗wo wo ˗bha ˈnën ˗nu ꞊klaŋkë kö Zoova ˗dhɔ ˗yö ˗an kë, ˗wo ˗da ˈwɔn ˗nu ˗ʒian ˗ta ꞊kpɔɔdhɛ ˈka kë ˈˈdhʋ̈ kö ˗an ˈˈtakɔ ˗yö kë ˗së. (Prov. 22:6) Kwa ꞊dhegblü dhebɔ ˗nu ˈö ˈwo kletiɛn ˗zogbansü ˗nu ˈka bhë ˗wa mɛn ˗nu ˈwo ꞊kun wlüünën ˈka ˗an ˗takun wo ˗bha ˈwɔnzuan ˗së ˈka, ˈwo ˗dhioo ˗sɛŋbɔ ˗nu dɔ ˗an ˗ta, ˈwo ˗an ꞊faanmën ꞊dedewo.—Tit. 2:​3-5.

6. ˈMën ˈkwa dho ˗a kë kö ˈkwa Zoova ˗bha ˈˈdhiʋ̈sü kwa ˈka ˗sü ꞊trɔɔn ꞊slɔɔ?

⁶ Pë ˈˈpɛpɛ ˈkwa dho ˗a kë kö ˈkwa ˗da ˈwɔn ˗së ˗nu ˗ʒian ˗ta, kwa ˗bha ˗tosɛta ˗yö kë ˗së bhë Zoova ˗ya ˗zɔn kwa ˗dhɛ. ˈMën ˈkwa dho ˗a kë kö ˈkwa˗ ˗zɔn ꞊dhɛ ˗a ˈˈyi ˗yö ˈˈkan ˗sü ˈka kwa ˗dhɛ? Proverbes 3:​5, 6 ˗ya ˗pö: «˗Bhö ü ˗zo yö Zoova ˗dhɛ ü zuʋ̈ˈˈ ꞊gban ˈka, ˈbha ˗dho ü ˗zo yö ü ˗de ˗bha ˈwɔndɔdhe ˗dhɛ.» ˈKwa˗ kë ˈˈdhʋ̈, « ˗yö ˗dho [kwa] ˗bha ʒiaan ˗nu dɔ ꞊zinŋgü.» ˗A ˗gɛn ˈnën ˗tɔ ˗yö ˗dho ˗a kë ˈö ˈkwa dha ˈwɔn yaa ꞊va ˗gɔ ˈö ˈkwa zuʋ̈ˈˈ ˈˈgblü ˗yö dhi. Kwa Zoova ˈˈnuɛ ˗bho ꞊dedewo ˗a ˗bha ˗dhioo ˗nu ˈö ˗an dɔ ˗dhɔ ˈgü mɛn ˈˈpɛpɛ kwa ˗ta bhë, ˗a ˗wɔn ˈgü.—Ps. 32:8.

ZOOVA ˗YÖ KWA ˗BHAWƆNYËËPË ˗NU ˈˈƝAN ˗BHƆ

7. Zoova ˗yö kwa ˗bhawɔnyëëpë ˗nu ˈˈɲan ˗bhɔ ˗kɔ kë ꞊dhɛ? (Filipö 4:19)

⁷ ˗Bhö Filipö 4:19 ˗wo pö. ˗Ya ˈˈkan Zoova ˗bha ˈˈdhiʋ̈sü kwa ˈka ˗sü ˗bha, ˗yö ˈdhuëë˗ ˗kpɔ kwa ˗bha ˈgüdɔgbɩɩsü ˗bha kö ˈkwa kwa ˗bhöpë, ˈkwa ˗da ˗sɔ waa ˈkɔ ˈkwa dho wɔ ˗a ˈgü bhë ˗an ꞊slɔɔ. (Mat. 6:33; 2 Tes. 3:12) ˈKö ˗kë ꞊dhɛ pë ˗nu ˈwo bhë ˗ya ˗an ꞊zɔnŋ ˗ta ˗sü ˈyaa ˈya˗, Zoova ˈyaa ˈˈpiʋ̈ kö ˈkwa ˗an ʒiö ꞊gɔɔ. (Mat. 6:25) ˈMën ˗kë? ˈYö sü ꞊dhɛ kwa Dë ˈti ˗dho ˈö ˗kɔ ˈˈkan ö ˗dhɔkëmɛn ˗nu ˈwo ˗klu ö ˗bha bhë ˗an ˈˈdhiʋ̈ toŋtoŋdhö ˈwɔn ˈˈgbɩɩ˗ ˗nu ˈgü. (Mat. 6:8; Ebl. 13:5) ˈDhɛ ˈˈdhʋ̈, ˗a pö ˈö Zoova ˗ya wo ꞊dhɛ ö ˗dho kwa ˗bhawɔnyëëpë ˗nu ˈˈɲan bhɔ bhë kwa ꞊mɔɔn˗ ˗bha ˈkwa ˈdhaŋ˗ bho ˗a ˈˈdhiʋ̈ ˈkpakpadhö.

8. ˈMën Zoova ˗ya ˗kë Davi ꞊dhɛ?

⁸ ˗Kɔ ˈö Zoova ˗yö Davi ˗takun ˗a ˈka, ˗kwaa ˗ga. ˗Kwɛ ˈö Davi ˗yö kun ˗duëë ˗ni ˈgü ˗a ˈka ˗gblüdë Saidhö ˗gɔ bhë ˗a ˈgü, Zoova ˗yö waa ˈö ˈˈpiʋ̈ ˗mɛn ˗nu ˗bhawɔnyëëpë ˗nu ˈˈɲan ˗bhɔ. ˈDhɛ Davi ˗zo ˗yö ˗da ˈwɔn ˈö bhë ˗a ˈˈpiʋ̈, ˗ya ˗pö: «A ˗kun wlüünën ˈka ˈö ˈman kë zii, ˈˈkɛɛ n ˈti mɛn ˈö kpɛnŋdhö ˗a yö kö ˗wa wo ˗kɔ ˈˈkan ˗a ˈˈdhiʋ̈ toŋtoŋdhö, ɛɛnˈˈ kö ˗a ˗bha ˈnën ˗nu ˗wo ˈbluu˗ ˈˈklu mɛɛnˈˈ ˗ni ˈgü.» (Ps. 37:25) ꞊Dhɛ Davi ˈdhö, ˗a ˈbha ˗ya kë kö kwa ˗zo ˗yö ˗da kɔ ˈö Zoova ˗yö kwa ꞊dhegblü ˈbha ˗nu ˗takun ˗a ˈka kö ˗wo bɔ ˗ni ˈgü ˈwɔn ˈˈgbɩɩ˗ ˗nu ˈgü ˗a ˈpiʋ̈.

9. ˈWɔn ˈˈgbɩɩ˗ ˗nu ˗wa kë, ˈmën Zoova ˗dhɔkëmɛn ˗nu ˗wa ˗kë? (Kpɔɔˈˈ ˈzü pë ˈˈbin ˗nu ˗bha.)

⁹ Zoova ˗yö ö ˗dhɔkëmɛn ˗nu ˗takun ˈˈtʋ̈ŋ ˈˈgbɩɩ˗ ˗nu ˈwo ˗kë ꞊dhɛ ˈˈsɛ ˗bha ꞊ziisü ˗nu, ˈˈyi  ˗bha pa ˗sü ˈˈɛɛn ˈˈtee ˈˈgbɩɩ˗ ˗bha ʒiö ˗sü ˗nu ˈdhö bhë ˗an ˈgü. ˗Kwɛ këŋ do ˗blɛɛsü ˈgü ˗dhɛ ˈö din ˗yö ˗da Zedhizadhɛmö, kletien ˗nu ˈwo kun ˗dhɛ ˈˈwɛɛ ˗nu ˈgü bhë ˗wo pë ˗nu ˗bhokwëë kë ˈˈdhʋ̈ kö ˈwo wo ꞊dhegblü ˗nu ˈwo kun mü ˗an ˗bhawɔnyëëpë ˈˈɲan ˗nu bhɔ. (Këw. 11:​27-30; Wlɔ. 15:​25, 26) ꞊Dɛɛ ˈpö, Zoova ˗dhɔkëmɛn ˗nu ˗wo wo ˗kɔ ˗da wo ꞊dhegblü ˗nu ˈö ˗an ˗bhawɔn ˈdhö ˗takundhe ˗bha ˗an ꞊dhɛ. ˈWɔn ˗nu ˈwo ˗kë ꞊dhɛ ˈˈsɛ ˗bha ꞊ziisü, ˈˈyi ˗bha pa ˗sü waa ˈˈtee ˈˈgbɩɩ˗ ˗nu ˈdhö bhë ˗wa kë, Zoova ˗yö ö ˗dhɔkëmɛn ˗nu ꞊faanmën ˗dhɔkaadhe ˈgü kö ˗wo wo ꞊dhegblü ˗nu ˗takun ˗bhöpë, ˈˈyi, sɔ waa ꞊blɛɛdhɛ ˗nu ˈka. Kwa ˗bha ˈkɔdɔmɛn ˗nu ˗wo kwa ˗bha ˗bhɔkwëëkëgükɔ ˗nu waa kwa ꞊dhegblü ˗nu ˗bha ˈkɔ ˈwo ꞊shiʋ̈ ˗an ˗baa. ˗Ya ˈgo mü ˈzü, kwa ˈˈdhiʋ̈ʒiöwomɛn ˗nu ˗wo mɛn ꞊faanmën ˗wo ˗nu ˗sü Biblö ˈgü ˈwo˗ pö kwa ꞊dhegblu ˗nu ˈö ˗an ꞊slɔɔpë ˗nu ˗wo ꞊shiʋ̈ ɛɛnˈˈ ˈö ˗an ˗bha mɛn ˗wɔngbɩɩsü ˗wɔn ˗yö ˗kë, ˗an ꞊dhɛ. c

10-11. ˗Gleŋ ˗mɛɛn ˈö Borisö ˗bha ˈwɔnzuan ˗ya ˗da kwa ˗bha?

¹⁰ Zoova ˗yö ˈˈgblüsë ˗kë mɛn ˗nu ˈö ˈwaa˗ ˗dhɔkë ˈpö ˗an ˈka. ꞊Dhɛ Zoova ˈdhö, kwa ˈˈgblüsë ˗kë mɛn ˗nu ˈö ˈwaa Zoova ˗dhɔkë bhë ˗an ˈka. (Ga. 6:10) ˈKwa˗ kë ˈˈdhʋ̈, kwa ˗dho ˗an ˗takun kö ˗wo Zoova dɔ. Gɔndë do ˈwo˗ ˗dhɛ Borisö ˈö ꞊klaŋkɔ ˗gɔmɛn do ˈka Üklɛnö, ˗kwaa ˗bha ˈwɔnzuan ˗ga. Kö ˗kë ꞊dhɛ ˈyaa Zoova ˗dhɔkë, ˗yö ꞊klaŋnën ˗nu ˈwo Zoova ˗bha ꞊Gbɛkiö ˗nu ˈka mü ˗an ˗sü ˗së, ˈö ˗an ˗bha ˗zoyödhe ꞊bhlëë ˗ya. ˈDhɛ ˗gblü ˗yö ˗da Uklɛnö, Borisö ˗yö ˗duëë ˈö go ˈpödhɛ ˈö kun ˗a ˗bha bhë ˗a ˈgü ˈö dho ˈdhɛ ˗gblü ˈyaa mü ˗a ˗bha. Kwa ꞊dhegblü ˗nu ˈnën ˈwo˗ ˗takun kö ˗yö ˈdho  ˗dhɛ ˈö ˈˈdhʋ̈ ˗a ˗bha. ꞊Taabha, Borisö ˗yö ˗dho Yesu ˗bha ga ˗zo ˗bo ˈwlaan˗ ˗ta. ˗Dhɛ ˈö ö ˗zota pë ˈö kwa ꞊dhegblü ˗nu ˗wa ˗kë ˗a ˗dhɛ bhë ˗a ˈgü , ˗ya ˗pö: «Zoova ˗bha ꞊Gbɛkiö ˗nu ˗wo ˈˈgblüsë ˗kë n ˈka, ˈö ˈwo wo ˗zokë n ˈˈpiʋ̈. ˈMan ˗an ˈˈnuɛ bho ꞊dedewo!»

¹¹ Kwa ˗de ˈpö kwa ꞊mɔɔn˗ ˗bha kwa ˈto kwa Dë dhɔɔbhaasü ˈö dhaŋ˗ ˈgü bhë ˗a ˗bha ˈwɔnzuan ˈˈpiʋ̈ ˈkwa mɛn ˈˈpɛpɛ ˈwo Zoova ˗dhɔkë ɛɛnˈˈ ˈwaa˗ ˗dhɔkë ˗an ˗takun. (Luk. 6:​31, 36) ˗A ˈbha ˗ya kë kö ˗dhɔ ˈkwa˗ ˗zɔn ˗an ˗dhɛ ˈˈdhʋ̈ ˗yö ˗dho ˗an ˗blü Zoova dɔ ˗sü ˗bha ˈwo ˗kë ˈpö Yesu ˗bha gwëëˈˈ ˗nu ˈka. (1 Piɛ. 2:12) ˈKö ˗kë ꞊dhɛ ˗wo ˗we Zoova ˗dhɔkësü ˗bha ˈˈɛɛn wo ˈti ˈˈwɩ ˗a ˗bha kwa zuʋ̈ˈˈ ˈgblü ˗dho dhi, ˈyö sü ꞊dhɛ kwa ˗bha pë ˗nu mɛn ꞊dhɛ ˗sü ˗yö ˈwɔn së ˈka.—Këw. 20:35.

ZOOVA ˗YÖ KWA ˗TAKPA

12. Zoova ˗ya ˗pö ö ˗dho kwa ˗takpa ˗kɔ ˗kë ꞊dhɛ? (Psaume 91:​1, 2, 14)

¹² ˗Bhö Psaume 91:​1, 2, 14 ˗wo pö. ꞊Dɛɛ, Zoova ˗ya ˈˈplüün ˗bho ꞊dhɛ ö ˗dho kwa ˗takpa pë ˈˈpɛpɛ ˈö dho kwaa˗ ˗nu kwa ˗bha ˈˈtɔŋdëdhɛ shiʋ̈ˈˈ ˗a ˗gɔ. ˈYö ˈti ˗dho ö ꞊kwaa Sɔtraan ˈzü kö ˗yö ˗Zlan ˗dhɔkë ˗kɔ ꞊dede bho ˈˈshia˗. (Zan 17:15) ˈDhɛ ˈˈdhʋ̈ ˗yö ꞊mɔɔn˗ ˗bha ˈö ga kwa ˈgü ꞊dhɛ «ˈˈklʋʋbhɔdhe ˈkpii˗» ˈˈtʋ̈ŋ ˈgü, Zoova ˗dho kwa ˗takun kö kwa ˗bha ˗zoyödhe ˗yö ˈto ö ˗wɛɛ ˈgü, ˈö ö ˗kɔ kpa kwa ˗ta.—Dhɛ. 7:​9, 14.

13. Zoova ˗yö mɛn ˈö ˗dhö ˗a ˗takpa ˗kɔ ˗kë dhɛ?

¹³ ˗Kɔ ˈkwa˗ ˗bha do do ˈka bhë, Zoova ˗yö kwa ˗takpa ˗kɔ ˗kë ꞊dhɛ? Zoova ˗bɔ ö ˈˈDhiwo ˗ta ˈö kwa ˗takun kö pë ˈö ˗së waa˗ ˗dhɛ ˈö ˈyaa ˗së ˈkwa ˗an dɔ. (Ebl. 5:14) ˈKwa kwa ˗bha ˗tosɛta ˗bɛ Biblö ˗bha ˈtɔŋ˗ ˗gɛngbandhɛ ˗nu ˗bha, kwaa Zoova kwa bha ˗mlɛɛn ˗yö ˗to ö ˗wɛɛ ˈgü, ˈö pë ˈˈdhiʋ̈˗ ˈyaa kë kwa ˈka. (Ps. 91:4) Zoova ˗go mü ˈzü ˈö bɔ ˗zlanwokɔdhi ˗ta kö ˗takundhe ˈö kwa ˗bhawɔn ˈdhö˗ ˗bha, ˈkwa˗ ꞊slɔɔ. (Is. 32:​1, 2) Kwa ꞊dhegblü ˗nu ˈwo bhë Zoova ˗dhɔ ˗yö ˗an ˗kë ˈwo ˈwɔnman ˗a ˗ta. ˗A ˗wɔn ˈgü, kwaa˗ ˗nu ˈkwa ˈˈtʋ̈ŋ kë kwa ˈkwëë˗ ˗bhɔkweë ˗ta, ˗zlanwopödhɛ ˈgü waa ꞊niidhadhe ˗nu ˗ta, kwa ꞊faanmëndhe ꞊slɔɔ˗ ˈö ˈkwa ˗gban ˈwɔn yaa ˗nu ˗gɔ.—Prov. 13:20.

14. (1) ˈMën ˗kë ˈö Zoova ˗yö ö ꞊kwaa˗ ˈwɔn ˈˈgbɩɩ˗ ˗nu ˗zü ˈwo kë kwa ˈka? (2) ˈMën Psaume 9:10 ˗ya pö ˈö kwa zuʋ̈ˈˈ ˗kë ˗saa? (Kpɔɔˈˈ ˗zoto ˗a ˈˈpiʋ̈ ˗wɔn ˗bha.)

¹⁴ ˈˈTʋ̈ŋ ˈbha ˗nu ˈka ꞊kwɛŋzü, Zoova ˗yö ö ˗dhɔkëmɛn ˗nu ˗takpa ˈwɔn yaa ˗nu ˗gɔ. ˈˈKɛɛ ˗yö ˈti ö ˗kɔ kpa ˗an ˗ta ˈwɔn ꞊gban ˈˈpɛpɛ ˈgü. Biblö ˗ya ˗pö ꞊dhɛ «ˈwɔn yaa -nu ˈö -an ˈgodhɛ ˈyaa ˈdhö, -wo -kan kwa ˈgü.» (Eccl. 9:11) ˗Ya ˈgo mü, Zoova ˗yö ö ꞊kwaa˗ ˈwɔn ˈˈgbɩɩ˗ ˗nu ˗zü ˈwo ˗nu ö ˗dhɔkëmɛn ˗nu ˗ta, ˈö˗ mɛn ˈbha ˗nu ˗gɔ ˗yö to ˗a ˈgü ˗ʒianwo kö ˈö˗ ˗zɔn ꞊dhɛ ꞊suakëmɛn ˗mü Sɔtraan ˈka. (Job 2:​4-6; Mat. 23:34) Pë do ˈö bhë ˈnën˗ ˗kë ˈpö ꞊dɛɛ. ˈKö ˗kë ꞊dhɛ Zoova ˈyaa kwa ˗bha ˈwɔn ˈˈgbɩɩ˗ ˗nu bho kwa ˗bha, ˗yö ꞊mɔɔn˗ ˗bha ˈö ga kwa ˈgü ꞊dhɛ ˗yö ˈti ˗dho ˈˈkan mɛn ˗nu ˈwo ö ˗dhɔkë ˗an ˗bha toŋtoŋdhö. d—Ps. 9:10.

ZOOVA ˗YÖ KWA ˗ZOGBAN

15. ˗Kɔ ˗mɛɛn ˈö bhɛɛsü, Biblö ˗wopösü waa ˗kë kwa ꞊dhegblü ˗nu ˈˈpiʋ̈ sü ˗wo kwa ˗zogban ˗a ˈka? (2 Kolɛntö 1:​3, 4)

¹⁵ ˗Bhö 2 Kolɛntö 1:​3, 4 ˗wo pö. ˈˈTʋ̈ŋ ˈbha ˗nu ˈka kwa ˗bɔ ˈwɔn ˈˈgbɩɩ˗ ˗nu ˈwo kwa zuʋ̈ˈˈ ˈˈdhiʋ̈ ˗tɛ ˗an ˈgü. ˗A ˈbha ˗ya kë kö ˈwɔn ˈˈgbɩɩ˗ ˈö kwa ˗ta ˗a ˗wɔn ˈgü, ˗yö ˗kë kwa ˈgü ꞊dhɛ ˈpë ˈkwa kwa do ˈka ˗a ˈdhö. Mɛn ˈbha ˗ya ˈgüman kwa ˗gɔ ˗ee? ꞊Ii, Zoova ˗ya ˈgüman. ˗Kɔ ˈö ˈmën ˗ni ˈgü ˗a ˈka kwa ˈka bhë ˗ya ˗dɔ ˈö dho kwa ‹zʋ ˗gban ˈˈyënng ꞊gbaɔndhe ꞊gban ˈˈpɛpɛ suu ˈgü.» ˗Kɔ ˗kë ꞊dhɛ? ˈKwa bhɛɛˈˈ Zoova ˗dhɛ ꞊dedewo, ˗yö kwa ˗gba «zuëˈˈ ˈwaanu ˗sü ˈö ˗ziö mɛbhɩɩdhe ˗zʋgɔngüwɔn ˗zë ꞊gban ˈˈpɛpɛ ˈˈdhiʋ̈todhɛ ˗ta»  ˗a ˈka. (Flp. 4:​6, 7) Kwa ˗zogbandhe ꞊slɔɔ˗ ˈzü Biblö ˈö ˗kë Zoova ˈˈDhiwo ˈka bhë ˗a ˈgü. Zoova ˗yö ˗kɔ ˈö ˗dhɔ ˗zɔn ˗a ˈka kwa ˗dhɛ, ˈö kwa ꞊klaŋkë kö ˈkwa kë ꞊kpɔɔsü, ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö kë kwa ˗gɔ bhë ˗an ˗wɔn ˗blɛɛ Biblö ˈgü. ˈKwa mɛn ꞊faanmën ˗wo ˗nu ˈwo Biblö ˈgü ˗an man kwa ˗bha ˗bhɔkwëë ˗nu ˗ta, kwaa kwa ꞊dhegblü ˗nu ˈö kwa ˗dhɔ ˗yö ˗an ˗kë ˈkwa kë kwa ˈko ꞊bhaa, ˗yö kwa ˗zogban.

16. ˗Gleŋ ˗mɛɛn ˈkwa˗ sü Natan waa Prisila ˗an ˗bha?

¹⁶ ˗Kɔ ˈö Zoova ˗yö bɔ Biblö ˗ta ˈö Natan waa Prisila ˈwo ˗Mlɛɛnkin ˗sɛ ˈgü ˗an ˗zogban, ˈö ˗an ꞊faanmën ˗a ˈka ˗kwaa ˗ga. ˗A ˗kwɛ ˈbha ˗ya kë ˈwo dho ˈwo ˗ya ˗dhɛ ˈö ˗zlanwopömɛn ˗nu ˈwaa mü ꞊va ˗a ˈgü. Natan ˗ya ˗pö: «˗Yö ˗kun ga ˗sü ˈka yi ˈgü ꞊dhɛ Zoova ˗dho ˈdhuëë˗ ˈkpɔ yi ˗bha ˈgüdɔgbɩɩsü ˗bha.» ˈˈKɛɛ ˈdhɛ ˈwo ˗lo mü ˈˈyua ˗yö ˗ya ˗an ˗bha, ˈö go mü ˈö ˗an ˗bha ˈwëëga ˗yö ɲën. ˗A ˗wɔn ˈgü ˗wo wo ꞊yɛɛ˗ ˗kë wo ˗gɔ ˈˈsɛ ˈgü. ˈKö ˗kë ˈˈdhʋ̈ ˈwëëga ˗wɔn ˗yö ˗kë ˗an ˗ta ˈˈgbɩɩ˗ ˗kplawo. Natan ˗ya ˗pö ˈzü: «A n ˗de dhɛɛˈˈ ˗kpɔ ꞊dhɛ ˈmën ˗kë ˈö Zoova ˈti ˈdhuëë˗ ˈkpɔ yi ˗bha ꞊dhɛ ˗kɔ ˈö yi ˗zo ˈˈpiʋ̈ ˗be ˗a ˈdhö? ˗Yö ˗kë n ˈgü ˗ʒianwo ꞊dhɛ ˈpë ˈman ˈwɔn yaa ˈbha kë ˗a ˈdhö.» ˈˈKɛɛ ˈdhɛ ˈˈtʋ̈ŋ ˈbha ˗yö ˗ʒiö, Natan waa Prisila ˗wa ˗yö ꞊dhɛ Zoova ˈti ˈˈkan wo ˗bha ˈwɔn ˈˈgbɩɩ˗ ˈö bhë ˗a ˈgü. Natan ˗ya ˗pö: «ˈˈTʋ̈ŋ ˈö ˈˈdhʋ̈ ˗a ˈgü, Biblö ˗kë꞊dhɛ ˈyi ˈˈtɔŋdë ꞊kpɔɔsü ˈö yi ꞊faanmën, ˈö ˈˈdhiʋ̈sü yi ˈka ˗a ˈdhö. ˈYa yi ˈˈɲan ˗klu dosɛnŋ ˗kɔ ˈö Zoova ˗yö yi ˗takun ˗a ˈka kö ˈyi bɔ yi ˗bha ˈwɔn ˈˈgbɩɩ˗ ˗nu ˈgü ˗a ˗bha, ˗ya ˗kë yi ˗kë baasü ˈka ˗a ˗dhɛ ˗nu ˈwo dho nu yi ˗ta ˗dhɛkpaɔ dhiʋ̈ˈˈ ˈgü bhë ˗an ˗bha.»

17. Kwa ꞊dhegblüdhe do ˈwo˗ ˗dhɛ Ɛlüga bhë ˗yö ˗zogbandhe ꞊slɔɔ ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)

¹⁷ Kwa ꞊dhegblü ˗nu ꞊mɔɔn˗ ˗bha ˈwo kwa ˗zogban ˈzü. ˗Kɔ ˗kë ꞊dhɛ? Kwa ꞊dhegblüdhe do ˈwo˗ ˗dhɛ Ɛlüga ˈö Ɔngri, ˗kwaa ˗bha ˈwɔnzuan ˗ga. ˗Kwɛ ꞊va ˈˈpiʋ̈, ˈwɔn ˈˈgbɩɩ˗ ˗nu ˗wo ˗nu ˗a ˗ta ˈö˗ zuʋ̈ˈˈ ˈˈdhiʋ̈ ˗yö ˗tɛ, ˈö ˗kë ö ˗de ˈgü ˗ʒianwo ꞊dhɛ mɛn ˈö˗ ꞊bhlëë ˈyaa ˗dhö ˗a ˈdhö. ˈˈKɛɛ ˗kɔ ˈö Zoova ˗yö bɔ ˗a ˈka ˗zlanwokɔdhigümɛn ˗nu ˗ta ˈö˗ ˗zogban ˗ya ˗blɛɛ, ˈö˗ pö: «Zoova ꞊yaa˗ yö ꞊dhɛ n ꞊faan ˗ya ɲën, ˗yö n ˗takun. ˈYö sü ꞊dhɛ a ˗kun n ˗man yökë ˗ni ˈgü, ˈa kun ˈzü n  ˗zokë ˗ni ˈgü n gbö ˈö ˈyaa ˈö ˈˈflëëgü ˗a ˈˈpiʋ̈, ˈö ˈwɔn ˈˈgbɩɩ˗ ˈˈwɛɛ ˈbha ˗nu kun n ˗bha. ˗A ˗kwɛ ˗ya kë 30 ꞊dɛɛ ˈö ˗dhɛkpaɔyi ˈˈpɛpɛ ˈka, Zoova ˗yö n ˗zogban. ˗Yö ˗bɔ n ꞊dhegblü ˗nu ˗bha ˈwɔn ˗daa ˗sɛŋbɔ ˗nu ˗ta ˈö n ˗zogban ˈzü. ˗Ya kë ꞊shiöŋ, ˗a mɛn ˈbha ˗nu ˗wo nɔɔn˗ ɛɛnˈˈ ˈsëëdhɛ ˈˈklunën ɛɛnˈˈ mɛn ꞊faanmën ˗wo ˗nu ˗ya, ˈwo˗ bɔ n ˗dhɛ ö ˈˈtʋ̈ŋ ˗së ˗bha.»

18. Kwa ˗dho mɛn ˈˈwɛɛ ˗nu ˗zogban ˗kɔ ˗kë ꞊dhɛ?

¹⁸ Kwa ˗bha ˗to Zoova ˗bha ˈwɔnzuan ˈˈpiʋ̈ ˗sü kö ˈkwa mɛn ˈˈwɛɛ ˗nu ˗zogban bhë, ꞊bhlëëwɔn ˗mü kwa ˗bha ˈka. Kwa ˗dho ˗a kë ˈˈdhʋ̈ ˗kɔ ˗kë ꞊dhɛ? Kwa ꞊mɔɔn˗ ˗bha ˈkwa kwa ˈˈtʋ ˈto ˗an ˗bha zuʋ̈saadhɛ ˈka, ˈkwa ˗wo ˗së pö ˗an ˗dhɛ, ˈkwa kwa ˗kɔ ˗da ˗an ˗dhɛ ˈwɔn ˈbha ˗nu kë ˗sü ˈka. (Prov. 3:27) ˗Kwa kwa ˈgü dɔ ˈˈgbɩɩ˗ kö ˈkwa mɛn ˈˈpɛpɛ ˈwo saanˈˈ ˗ni ˈgü ˗an ˗zogban, ˈkö ˗kë ꞊dhɛ ˗a mɛn ˈbha ˗nu ˈwaa ˗Zan ˗dhɔkë. ˗Wëë ˗ya bɔ kwa ˗yayoo ˗nu ˗ta ɛɛnˈˈ ˈwaa wo ˈˈflëëgü, ɛɛnˈˈ ˈzü ˗an zuʋ̈ˈˈ ˈˈdhiʋ̈ ˗yö ˈˈtɛ ˗ni ˈgü, kwa ˗dho ˈkwa ˗wo ˗an ˗dhɛ, ˈkwa kwa ˈˈtʋ to ˗an ˗bha ˈö ˈkwa ˗an ꞊faanmën Biblö ˈˈɲan ˗nu ˈka. ˈKwa ˈto Zoova ‹˗Zlan ˈö mɛ ˗zʋ ˗gban ˗kɔ ꞊gban ˈgü› bhë ˗a ˗bha ˈwɔnzuan ˈˈpiʋ̈, kwa ˗dho ˗mɔn kwa ꞊dhegblü ˗nu ˈö ˈwɔn ˈˈgbɩɩ˗ ˈdhö ˗an ˗ta ˗an ˗zogban ˗sü ˗bha ˈö mɛn ˗nu ˈwaa Zoova ˗dhɔkë ˗ʒianwo ˈkwa ˗an zuʋ̈ˈˈ ˗dhuaa, ˈwo˗ dɔ ˗sü ˗ʒian ꞊mɛɛn.—Mat. 5:16.

ZOOVA ˗DHO KWA ˗TAKUN YI ꞊GBAN ˈKA

19. ˈMën Zoova ˈdho˗ kë ˗ni ˈgü kwa ˗dhɛ? ˈYö kwa ˗dho ˈto ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

¹⁹ Mɛn ˗nu ˈö Zoova ˗dhɔ ˗yö ˗an kë bhë, ˗yö ö ˗zokë ˗an ˈˈpiʋ̈. Kwa bɔ ˗ni ˈgü ˈwɔn ˈˈgbɩɩ˗ ˈbha ˈgü, ˗yö ˈti ˗dho ö ˗kɔ ˈˈkan kwa ˈˈdhiʋ̈. ꞊Dhɛ ˗kɔ ˈö ˈnënmën ˗nu ˗wo wo ˗zokë ˗a ˈka wo ˗bha ˈnën ˈˈpiʋ̈ ˗dhɔkaadhe ˈgü bhë ˗a ˈdhö, ˗kɔ do ˈö bhë ˗a ˈka ˈpö Zoova ˗yö ö ˗zokë ö ˗dhɔkëmɛn ˗nu ˈˈpiʋ̈. ˗Yö ˈˈdhiʋ̈sü kwa ˈka, ˈö kwa ˗bhawɔnyëëpë ˗nu ˈˈɲan ˗bhɔ, ˈö kwa ˗takpa, ˈö go mü ˈzü ˈö kwa ˗zogban. ˈKwa mɛn ˈˈwɛɛ ˗nu ˗takun, ˈkwa ˗an ꞊faanmën ˗an ˗bha ˈwɔn ˈˈgbɩɩ˗ ˗nu ˈgü kö kwa ˈto ˗ni ˈgü kwa Dë ˈö ˗ya ˗sü ˈka dhaŋ˗ ˈgü ˈö kwa ˗dhɔ ˗ya ˗kë bhë, ˗a ˗bha ˈwɔnzuan ˈˈpiʋ̈. ˈWɔn ˈˈgbɩɩ˗ ˗nu ꞊mɔɔn˗ ˗bha ˈwo nu kwa ˗ta ˈˈkpɔnŋtaadhɛ ˈö yö ˗a ˈgü. ˈˈKɛɛ ˗yö ga kwa ˈgü ꞊dhɛ Zoova ˗yö kwa ˈˈpiʋ̈ ˈˈtʋ̈ŋ ꞊gban ˈka. ˗Ya ˈˈplüün ˗bho ˈö˗ pö: «ˈˈSuʋ̈ ˈya ˗dho ü kë, ˈyö ˗tɔ ꞊dhɛ a ü ˈˈpiʋ̈.» (Is. 41:10) ˗Wo ˈö bhë ˗ya ˗zɔn kwa ˗dhɛ ꞊dhɛ Zoova ˗yö kwa ˈˈpiʋ̈, ˈkwaa kwa do ˈka toŋtoŋdhö.