A ˗bhɔ ˗kwɛ 1929 Desanblö 22 ˈgü ˈpödhɛ ˈnën ˈdɛdɛ do ˈwo˗ ˗dhɛ Novilö, ˈö pë ˗to ˗dhɛ ˈˈseishiö kun mü Bastɔnö ˈˈkwipö ˈˈsuee Atɛnö Bɛʒikö bhë, ˗a ˈgü. A ˈnëndhɛ ˗së ꞊dedewo ˗kë n ˗mɛn ˗nu ˈˈpiʋ̈ ˈbhlaa. Yaa n ˈzlaa˗ Lɛmɔn yi ˗dudhe ˈɲɔn ˈˈyi bho yi ˗kɔ ˈka ˗dhɛkpaɔyi ˈˈpɛpɛ ˈka. Yi ˗bhöpë ˗nu ˗kpaakwëë ˈyi ˗an ˗lo ˈkɔɔ. Yi ˗gɔ plöö mɛn ꞊gban ˗wo yökë wo ˈko ˈˈpiʋ̈, ˈwo wo ˗kɔ ˗da wo ˈko ˗nu ˗dhɛ.

N dë Emidhö waa n dhe Alisö ˗wo ˗kun katolikö ˗zlanwo ˈgü. ˈˈTɛɛdhoowayi ˈˈpɛpɛ ˈka, ˗wo ˗dho ˗zlanwokɔɔdhö. ˈˈKɛɛ ˈdhɛ ˈkwa dɔ ˗kwɛ 1939 ˈgü, ˗yödhiʋ̈ ˗nu ˗wo ˗go Angletɛɛ ˗wo nu yi ˗gɔ plöö ˈwo n dë gba Consolation (꞊dɛɛ, kwa˗ ˗dhɛ Réveillez-vous !) ˈka. N dë ˗ya ˗yö ꞊dhɛ ˈsëëdhɛ ˈö bhë ˗yö gagade ˗pö, ˗a ˗wɔn ˈgü ˗yö ˗ya Biblö ˗wopösü ˗bha. ˈDhɛ n dë ˗yö ˗kan ˗dho ˗zlanwokɔɔdhö ˗sü ˗bha, mɛn ˗nu ˈö yaa˗ ˗nu yi kun ˈˈtɔŋdë ˈka ˗be bhë ˗wo ˗ya ˗gban yi ˗gɔ ˗sü ˗bha ꞊dedewo. ˗Wo ˈˈgbɩɩdhɛ ˗wɔ n dë ˗ta kö ˗yö ˈto katolikö ˗zlanwo ˈgü ˗kplawo, ˈwo ˈˈdhiwo yaa pë ˗a ˗dhɛ.

˗Fɛɛ ˈwo kun ˗a ˗ya ˗ni ˈgü n dë ˗bha bhë ˗a ˗wɔn ˈgü, ˗wëë ˗yö ˗bɔ n ˗ta ꞊dedewo. A ˗bhɛɛ ˗Zlan ˗dhɛ n zuʋ̈ˈˈ ꞊gban ˈka ˈa˗ pö ˗a ˗dhɛ ˗yö n dë ˗takun ꞊dhɛ ˗kɔ ˈa˗ ꞊blɛɛ ˗a ˈka ˗kwɛzlan ˈö yö ˗a züdɔdhɛ ˈgü bhë ˗a ˈdhö. ˈDhɛ yi ˗züzümɛn ˗nu ˗bha ˈˈgbɩɩdhɛ ˗wɔ n dë ˗ta ˗sü ˗gɔ ˗yö zɔɔ, n zuʋ̈ˈˈ ˈˈgblü ˗dhi ꞊dedewo. A˗ ˗yö ꞊dhɛ Zoova ˗yö ö ‹ˈˈtʋ ˗to bhɛɛwo ˗nu ˗bha.›

ˈˈLüman ˈˈsɛ ˗yö ˗nu Bɛʒikö ˗gɔ ˗kwɛ 1940 ˈMɛn 10 ˈgü, ˈö mɛn ˗nu ˗wo ˗ya ˗duëë ˗sü ˗bha kö ˈwo ˈgo ˈˈsɛ ˈö bhë, ˗a ˈgü. Yaa n ˗man ˈkɔdhigümɛn ˗nu yi ˗dho Flansö ˈˈshiaŋ ꞊ʒiaan. Kö yi ˈdho ˗ni ˈgü, yi ˗yö ˗dhɛ do ˈö ˈˈLüman ˈˈsɔdha ˗nu waa Flansö ˈˈsɔdha ˗nu ˈwo kun ˈkozë ˗ni ˈgü mü ˗a ˗bha.

 ꞊Taabha ˈdhɛ ˈyi yi ꞊yɛɛ˗ ˗kë yi ˗bha pë ˗to ˗dhɛ ˈgü, yi˗ ˗yö ꞊dhɛ ˗wa yi ˗bha ꞊kwɛɛ˗ ꞊vadhɛ ꞊kwaan. Yi ˗bha ˈgbɛn˗ ˈwo˗ ˗dhɛ Bobi yö dosɛnŋ ˈnën nu yi ˗gɔ ʒiaan. ˈWɔn ˗nu ˈwo bhë ˗wa ˗kë ˈa n ˗de dhɛɛˈˈ kpɔ, ˈa˗ pö: «ˈMën ˗kë ˈö ˗gblü waa saanˈˈ ˗nu ˈwo nu mɛnbhɩɩdhe ˗nu ˗ta?»

ˈˈTʋ̈ŋ ˈö bhë ˗a ˈgü, kwa ꞊dhegblü Emilö Shanzö a ˈö kun ˗yödhiʋ̈ waa mɛn zii ˈka bhë, ˗yö ˗nu ˈö ˗wo yi ˗dhɛ. ˗Yö ˈpë ˗kë ˈö saanˈˈ ˗kë ꞊va waa n ˗man dhɛɛˈˈ ˈbha ˗nu ˈwo ˗gban ˗tosɛta ˗bha, ˗an ˗yɔ ˗bɔ ˈˈpuu ˈka Biblö ˈgü. ˈDhɛ ˗kë ˈˈdhʋ̈, ˈa ˗ya yaa Zoova yi ˗bha ˗mlɛɛn ˗gɛn ˗gban ˗sü ˗bha, ˈö ga n ˈgü ꞊dhɛ ˗yö ˗dhɔkaa ˗Zlan ˈka.

ˈˈSanni ˗gblü ˗yö ɲën, yaa n ˗man ˈkɔdhigümɛn ˗nu yi ˈˈdoodɔ ˗kplawo Zoova ˗dhɔkëmɛn ˈˈwɛɛ ˈbha ˗nu ˈˈpiʋ̈. ˗Kwɛ 1943 ˈUtö ˈˈsu ˈgü, kwa ꞊dhegblü Ʒoze Nikola ˗yö ˗nu yi ˗bha pë ˗to ˗dhɛ ˈgü ˈö ˈˈdhɛɛtadhiaŋ˗ do zë. ˗Yö yi dhɛɛˈˈ ˈkpɔ ˈö˗ pö: «De ˈö˗ ˈˈpiʋ̈ kö ˈö bɔ ˈˈyi ꞊bhaa?» N dë ˗yö ö ˗kɔ ˗luu ˈö man ˗de ˈpö ˈa n ˗kɔ ꞊luu. Yi ˗bɔ ˈˈyi ꞊bhaa ˈˈyi ga ˈdɛdɛ ˈö kun yi ˗bha pë ˗to ˗dhɛ ˈˈsuee bhë, ˗a ˈgü.

˗Kwɛ 1944 Desanblö ˈˈsü ˈgü, ˈˈLüman ˈˈsɔdha ˗nu ˗wo wo ˗bha ˗gblü ˗kaanta ˈkpii˗ ˗gɔn Edhɔpö ˈɲaan˗ ˗pö ˗ʒian ˈka. ˗Wo ˗kun ˗a ˗dhɛ ˗ni ˈgü Adɛnö ˗Gblü. ˗Yö ˗kun yi ˗bha ˈgbüdhɛ ˈˈsuee. ˗A ˗wɔn ˈgü, yi ˗to yi ˗bha ˈkɔ ꞊duudhö ˈˈsu do ˈˈpiʋ̈. ˗Dhɛkpaɔyi do ˈka ˈdhɛ ˈa yö ˈˈkpɛnŋ kö ˈa ˗bhöpë nu ˈwü ˗nu ˗dhɛ, ˈbɔnbö do ˗yö ˗pö yi ˗gɔ ˈbhlaa, ˈö yi ˗bha ˈˈwü ˗nu ˗bha ˈkɔ gba bho mü. Mlɛnkɛn ˈˈsɔdha do ˗yö ˗gla, ˈö˗ pö: «˗Bhö ˈwaannu!» A ˗bialö ˈa dho ˗a ˗pö ˗a ˈˈsuee, ˈö ö ˗bha ˗piö gblaa˗ ˗ya n ˗gɔ ˗bha kö ˈö n ˗takpa.

ˈDhɛ ˗gblü ˗yö ɲën, yi pë ˈˈpɛpɛ ˗kë kö yaa kwa ꞊dhegblü ˗nu ˈwo kun ˗zlanwokɔdhi ˈö Liɛʒö ˈˈkidhʋŋ 90 ˗naan ꞊taa bhë, ˈyi ˈˈdoodɔ zoodhö zoodhö. Yi ˗dho ˈyi ˗kë mɛn kpö ˈdɛdɛ ˈka Bastɔnö. A ˗ya yökësü ˗bha ꞊nii ꞊sɔnŋ ˈkun ˗dhɛ ˈgü ˈa ˈtɔŋ˗ ˗nu ꞊draan. ꞊Taabha, a yökë ˈˈsɛgɔmɛn ˗nu ˈˈpiʋ̈. ˗Kwɛ 1951 ˈgü, yi ˈˈpian do ˈˈpiʋ̈ ˗bhɔkwëë ˈdɛdɛ ˗kë Bastɔnö. Mɛn ˗nu ˈwo ˗mɔn këŋ do ˗bha ˗wo ˗kë ˗a ˗ta. Kwa ꞊dhegblüdhe do ˈwo˗ ˗dhɛ Edhi Rëtëë ˈö kun ˗yödhiʋ̈ ˈö ö ˗bha yö ˈwɔn kun ˈˈgbɩɩ˗ ˗a ˈka, ˗yö ˗kë mü ˈpö. ˗Yö ˗piösoo ˗blü ˈˈkidhʋŋ 50 ˈˈpiʋ̈ ˈö nu ˗bhɔkwëë ˈö ˈˈdhʋ̈ ˗a ˗ta. ˗A ˗dhɛ ˈti ꞊gwëë  ˈö yi ˗dhɔ ˗yö ˗ya yi ˈko kë ˗sü ˗bha, ˈyi yi ˈko ˗ga ˗sü zübho. ˗Wo ˈsëëdhɛ ˗bɔ Edhi ˗dhɛ kö ˗yö ˈdho Gadhaadö ꞊klaŋ ˈˈdhiʋ̈ Zeta zuni. Edhi ˗yö ˈpë ˗kë ˈö yaa kun ˗mɔn ˗ni ˈgü ˗a ˗bha kö ꞊klaŋ ˈö bhë ˈö˗ kë ꞊köŋ ˗a ˗blɛɛ ˗an ˗dhɛ. Kwa ꞊dhegblü Natan Nɔɔ ˈö kun ˈˈdhiʋ̈sü ˗ni ˈgü kwa ˗bha ˗kɔlokota ˈka, ˗ya ˗yɔ ˗bɔ ˈö˗ pö ˗a ˈbha ˗ya kë waa ö ꞊gɔɔn ˗wo ˗dho nu ꞊klaŋ ˈö bhë ˗a ˗ta yi do ˈka. Yi yi ˈkosü ˗kwɛ 1953 Fevlie ˈˈsu ˈgü.

˗Kwɛ ꞊dede ˈö bhë ˗a ˈgü, yi ˗dho ˈˈkpɔnŋtaadhɛ ˗dɛɛ ˈgümɛn ˗nu ˗bha ˗bhɔkwëë ˗ta Yanki Stadiɔmö Nuyɔɔkö. Dhɛ ˈö bhë ˗a ˈgü, a ˗kpan kwa ꞊dhegblü do ˈö yö ˗tiaandhö nu n ˗dhɛ ˗a ˗bha, ˈö˗ pö n ˗dhɛ ˈa nu Zeta zuni. ˈDhɛ yi ꞊bhɛɛ Zoova ˗dhɛ ˗a ˗wɔn ˈgü, yaa Edhi yi ˗kɔ yö ˈö ˈˈdhʋ̈ ˗a ˈka. Yi yi ꞊yɛɛ˗ ˗kë Bɛʒikö kö ˈyi ˗zlanwopö mɛn ˗kɔŋ do ˈwo kun mɛn kpö ˈdɛdɛ ˈka Bastɔnö ˗an ˗dhɛ, kö ˈyi ˗an ˗takun. ˗A ˗kwɛ ˈö dɔ ˗a ˈˈpiʋ̈, ˗Zlan ˗yö ˈdhuëë˗ ˗kpɔ yi ˗bha ˈö yi gbö Sɛʒö ˗yö bhɔ. ˈˈKɛɛ ˈdhɛ ˈˈsu ˈˈsɔɔplɛ ˗yö ˗ʒiö ˗wëëwɔn ˗yö ˗kë yi ˈka ˈö Sɛʒö ˗wɔn ˗yö ˗kë. ˈWɔn ˈˈdhiʋ̈ suu ˈö ˗kë yi ˈka bhë, ˈyi˗ ˗lo Zoova ꞊kwɛɛ bhɛɛwo ˈgü ˈyi yi ˗zoyö ˗go ga ˈgü ˗sü ˗dhɛ, ˈö yi ˗zogban.

˗Kwɛ 1961 Ɔtɔblö ˈˈsu ˈgü, yö ˈö dho ˈˈtʋ̈ŋ ˈto n ˗gɔ kö ˈa kë ˗yödhiʋ̈ ˈka, ˗a ˗slɔɔ. ˗Dhɛkpaɔyi ꞊dede ˈö bhë ˗a ˈgü, Bɛʒikö Betɛdhö ˈwɔnyëë˗ do ˗yö n ˗dhɛ telefɔnö ˈˈdhiʋ̈ ˈö˗ pö: «Ü ꞊mɔɔn˗ ˗bha kö ˈü kë ˈˈpian do ˈˈpiʋ̈ ˗maankëmɛn ˈka ˗ee?» A˗ dhɛɛˈˈ ˗kpɔ ˈa˗ pö: «Yi ˗kɔ ꞊mɔɔn˗ ˗bha kö ˈyi kë ˗yödhiʋ̈ ˈka ꞊köŋ kö ˈyi ꞊kun ˈˈwɩ yö ˈö bhë ˗a ˗bha ˗ee?» Kwa ꞊dhegblü ˗nu ˗wo ˗wɩ ˗a ˗bha. ˈDhɛ ˈyi ˗kë ˗yödhiʋ̈ ˈka ˈˈsu ˈˈsaaga ˈˈpiʋ̈, ˈyö ˈyi kun kë ˈˈpian do ˈˈpiʋ̈ ˗maankëmɛn ˈka ˗kwɛ 1962 Sɛtanblö ˈˈsu ˈgü.

ˈDhɛ ˈyi ˗kë ˗maankëmɛn ˈka ˗kwɛ ꞊plɛ ˈˈpiʋ̈, ˗wo yi ˗dhɛ kö ˈyi yökë Betɛdhö ˈö Brusɛlö ˗a ˈgü. ˗Kwɛ 1964 Ɔtɔblö ˈˈsu ˈgü, ˈyi yö züdɔ mü. Yi ˈdhuëë ꞊va ꞊dede ˗slɔɔ ˗a ˈgü. ˗A yi ˈti ꞊gwëë ˈö kwa ꞊dhegblü Natan Nɔɔ nu mü ˗kwɛ 1965 ˈgü. ˈDhɛ n ˗ya Betɛdhö ˈwɔnyëë˗ do ˈka, ˗a ˈwɔn ˗yö n kun ꞊dedewo. ꞊Taabha, yaa Edhi ˗wo yi ˗dhɛ Gadhaadö ꞊klaŋ ˈkɔdhi 41 ˗bha. ˗Wo ˈö kwa ꞊dhegblü Nɔɔ ˗ya ꞊blɛɛ ˈö˗ ˗kwɛ ˗ya kë 13 bhë, ˗yö ˗yokodhiʋ̈. ˈDhɛ ˈyi yi bo ˈsëëdhɛ ꞊slɔɔ ˗sü ˈka, yi yi ꞊yɛɛ˗ ˗kë Betɛdhö ˈö Bɛʒikö ˗a ˈgü.

A ˗bɔ n ˗man ˈtɔŋ˗ ꞊klaŋkësü ˗ta ˈa Zoova ˗dhɔkëmɛn ˗nu ˗takun kö ˗wo ˗zlanwopö ˗wo ˈflëëgü Edhɔpö waa ˗dhɛ ˈˈwɛɛ ˗nu ˈgü. (Fdh. 1:7) ˗A ˗wɔn ˈgü ˈzü, ˈˈsɛ 55 ˈwo kwa ˗bha yö ꞊kɛɛ˗ ˗kan mü ɛɛnˈˈ ˈwo˗ ˗kan ˈˈpiʋ̈ bhë, a dhiaŋzë ˗an ˗bha ˈwɔnyëë˗ ˗nu ˗dhɛ. ˈˈKɛɛ ˈmaan n ˗de ˗zɔn ˗an ˗dhɛ ꞊dhɛ mɛn ˈö ˈtɔŋ˗ dɔ ˗së ˈka ˗a ˈdhö. A˗ ˗pö ˗an ˗dhɛ ꞊ʒiaan ꞊dhɛ «˗Zlan ˗bha mɛn ˗mü n ˈka.» A ˗kun ˗a ˈwɔn dɔ ˗ni ˈgü ꞊dhɛ «˗gblüdë ɛɛnˈˈ ˗zakanmɛn zuʋ̈ga ˗yö ꞊dhɛ ˈˈyi ga ˗nu ˈdhö Zoova ꞊kwɛɛ» ˈö ˗an ˗blü ˗dhɛ ˈö ˗dhi ˗a ˗dhɛ, ˗a ˗bha.»—Prov. 21:1.

ˈWɔn do ˈbha ˈö to n ˈˈɲaan ˗kplawo ˈyö ˗tɔ dhiaŋ ˈa˗ zë Edhɔpömɛn do ˗dhɛ. A˗ ˗pö ˗an ˗dhɛ ˈko ˗ta ꞊va ꞊dhɛ a˗ ˈˈpiʋ̈ kö yaa˗ ˗nu ˈyi ˈwɔn blɛɛˈˈ. ˗Wo ˗dho ˈwo ˗wɩ ˗a ˗bha kö ˈyi ˗kpan yi ˈkwëë˗. A˗ ˗pö ˗an ˗dhɛ: «Minitö ˈˈsoodhu ˈˈkpaan ˈnën ˈa dho ˈwɔn blɛɛˈˈ  ˗a ˈˈpiʋ̈, n ˈti ˗dhö ˗a do ˗ʒiaan ˗da ˗a ˗ta.» ˈDhɛ ˗kë ˈˈdhʋ̈, ˈa n ˗gɔ ˈˈgblëënnu ˈa ˗ya bhɛɛsü ˗bha. ˈWɔn ˗yö ˗shiö gɔndë ˈö bhë ˗a ˗dhɛ ˈö n dhɛɛˈˈ kpɔ ˈpë ˈa kun ˗a kë ˗ni ˈgü, ˗a ˈka. A n ˗gɔ ˗luu ˈa˗ pö: «A ˗kun ˗Zlan ˈˈnuɛ bho ˗ni ˈgü, ˈyö sü ꞊dhɛ ˗a ˗bha yökëmɛn do ˗mü ˈka.» ˈYö˗ pö n ˗dhɛ: «ˈMën ˈü˗ ˈˈpiʋ̈ kö ˈü˗ pö?» ˈA Wlɔmö 13:4 ˗zɔn ˗a ˗dhɛ. ˗Yö ˗kun protɛstan ˗zlanwopömɛn ˈka ˈö Biblö ˗wɔn ˈdhö˗ ˗gɔ ˈˈgbɩɩ˗. ˗A ˗wɔn ˈgü, ˗yö ö ˈˈtʋ ˗to n ˗bha minitö 30 ˈˈpiʋ̈ ˈö yi ˗bha ˗yakwëë ˗yö ˗kë ˗së. ˗A ˗de ꞊ʒiaan, ˗yö ˗dho ˈö ꞊bhlëë ˗ya kwa ˗bha yö ˗bha.

˗Kwɛ ꞊va ˈˈpiʋ̈, Zoova ˗dhɔkëmɛn ˗nu ˗wo ˗dɔ zakanmɛn ˗nu ˗kuu ˈˈdhiʋ̈ Edhɔpö ˈwɔn ˗nu ˈwo ˗kë ꞊dhɛ kletiɛn ˗nu ˗bɔ ˗a ˈka ˈyaa dhö, ˗zokë ˈnën ˗nu ˈˈpiʋ̈ ˗sü, ꞊nii ꞊sɔnŋ bho ˗sü waa pë ˈˈwɛɛ ˈbha -nu ˈdhö bhë, ˗an ˗wɔn ˈgü. A ˗bɔ ˗an ˗ta kö ˗kɔ ˈö Zoova ˗yö ˈwɔn ˗nu ˗dhi ˗a ˈka kwa ˗gɔ ˈö ˈkwa to ˗a ˈˈgbɩɩ˗ ˈka, ˈa ˗an yö. Edhɔpömɛn ˗nu ˗bha zakandhɛ ˈö- ˗bha yö ˗yö ˗gban mɛnbhɩɩdhe ˗nu ˗dua ˗bha bhë, ˗yö Zoova ˗bha ꞊Gbɛkiö ˗nu ˗bha za ˗dhi ˗gɛnɲan ˈka 140.

˗Kwɛ 1990 ˈgü, yaa kwa ꞊dhegblü Fidhipö Blumli ˈö kun kwa ˗bha Betɛdhö ˗kɔ ˈkpii˗ ˈö ˈˈkpɔnŋ ꞊taa ˗a ˈgü waa kwa ꞊dhegblü Vatɛɛ Faneti ˈö kun Itali, yi kwa ꞊dhegblü ˗nu ˈwo Kuba ˗sɛ ˈgü ˗an ˗takun kö ˗potaadhe ˗yö kë ˗an ˗gɔ ˗wo Zoova ˗dhɔkë, ˈyö sü ꞊dhɛ ˗wo kwa ˗bha yö ˈˈkan ˈˈpiʋ̈ ˈˈsɛ ˈö bhë ˗a ˈgü. A ˈsëëdhɛ ˗bɔ Kubamɛn ˗nu ˗bha ˈwɔnyëë˗ ˗nu ˈwo kun Bɛʒikö ˗a ˗dhɛ, ˈa ˗kpan ˗a mɛn do ˗bha. ˈˈTʋ̈ŋ ˗blɛɛsü yi ˗kpan ˗a ˈka yi ˈkwëë˗ ˈˈdhʋ̈ ˗a ˈgü, yi ˈti kë yi ˈko ˗wo ˈgüman ˗ni ˈgü ˈwɔn ˈö ˗gban kwa ˗bha yö ꞊kɛɛ˗ ˈˈkan ˗sü ˗bha Kuba ˗a ˈgü.

ˈDhɛ ˈyi ꞊bhɛɛ Zoova ˗dhɛ kö ˗yö ˈˈdhiʋ̈sü yi ˈka, ˈyi˗ pö ˗an ˗dhɛ ˗wo wo ꞊kwaa yi ˗zü kö ˈyi nu Biblö ˗be 5.000 ˈka Kuba, ˗wo ˗wɩ ˗a ˗bha. ˗A Biblö ˗be ˗nu ˗wo ˗lo, ˈyi ˗an nu kwa ꞊dhegblü ˗nu ˗dhɛ ˈö ga yi ˈgü ꞊dhɛ Zoova ˈnën ˈdhuëë˗ kpɔ yi ˗bha ˈgüdɔgbɩɩsü ˗bha. ˗Wo ˗wɩ ˗a ˗bha ˈzü kö ˈyi Biblö ˗be 27.500 bɔ mü. Kwa ꞊dhegblü ˗nu ˈwo kun Kuba ˗an ˗takun ˗sü kö mɛn ˈö ˗dhö ˗a ˗de ˗bha Biblö ˗be ˗yö kë ˗dhö bhë, ˗yö n zuʋ̈ˈˈ ˈˈgblü ˗dhi ꞊dedewo.

A n ˗gɛn ˗dɔ Kuba ꞊va kö ˈwɔn ˗nu ˈwo ˗gban kwa ˗bha yö ˗bha ˈa ˗an ˈˈɲan bhɔ zakanmɛn ˗nu ˗kuu ˈˈdhiʋ̈. ˗Ya ˗kë ˈö yaa ˈˈsɛkɔɔnmɛn ˗nu ˗bha yökëmɛn ˗nu ˈö yi ˗wo ˗yö ˗mɔn ˈwɔn ꞊vadhɛ ˈgü.

˗Kwɛ 1994 ˈgü, mɛn ˗nu ˈwo ˗ʒiö 1.000.000 ˗ta ˗wo ˗an ˗zë Wlanda. ˗Wëëwɔn ˈö kun mü ˈyö ˗tɔ wo kwa ꞊dhegblü gɔɔn˗ waa dhoo ˗nu ˗zë ˈpö. ˗A ˗dhɛ ˈti ꞊gwëë ˈwo kwa ꞊dhegblü ˗nu ˈbha ˗ya kö ˗wo kë kwa ꞊dhegblü ˗nu ˗takunmɛn ˈka ˈˈsɛ ˈö bhë, ˗a ˈgü.

 ˈDhɛ ˈyi ˗lo Kigali ˗an ˗bha ˈˈkwipö ˈkpii˗ ˈgü, kö ˈˈbu ga pin ˗nu ˗wo kwa ˗bha ˗wodhiëëtadhɛ ꞊bidhoŋ ˈkɔbhaŋ ˗bha ˗dhɛ ꞊gban ˈgü. Yi˗ ˗man ꞊dhɛ ˗wo kwa ꞊dhegblü ˗nu ˗zë ˗dhaa ˈka, ˈˈkɛɛ yi˗ ˗man ˈzü ꞊dhɛ kwa ꞊dhegblü ˗nu ˗wo ˗dhɔ ˗zɔn wo ˈko ˗dhɛ. ˗A ˈwɔnzuan ˈnën ˗tɔ yi ˗kpan kwa ꞊dhegblü Tusi do ˗bha. ˈYi˗ man ꞊dhɛ ˗yö kwa ꞊dhegblü Utu ˈkɔdhigümɛn do ˗bin ˗gblüdhi ˈgü ˗dhɛkpaɔyi 28 ˈˈpiʋ̈. ˗Bhɔkwëë do ˈyi˗ ˗kë Kigali bhë, yi kwa ꞊dhegblü ˗nu ˈwo ˗ʒiö 900 ˗ta ˗an ˗zogban.

Yi ˗go mü ˈyi dho Zai (ˈwo˗ ˗dhɛ ˗ni ˈgü ꞊dɛɛ République démocratique du Congo) bhë ˗a ˈgü, kö ˈyi kwa ꞊dhegblü ꞊va ˈwo go Wlanda ˈwo kun ˗duëë ˗gblü ˗dhɛ ˗mɛn ˗nu ˗bha kanŋ ˈgü Goma ˈˈkwipö ˈˈsuee ˗an ꞊mɛɛn. Yi ꞊mɔɔn˗ ˗bha ˈyi ˗kpan ˗an ˗bha, ˗a ˗wɔn ˈgü yi ˗bhɛɛ Zoova ˗dhɛ kö ˗yö ʒian bho yi ˈka yi ˈdho ˗an ˈˈpiʋ̈. ˈDhɛ ˗kë ˈˈdhʋ̈, yi ˗kpan mɛn do ˗bha kö ˗yö nu ˗ni ˈgü yi ˗gɔ. ˈYi˗ dhɛɛˈˈ kpɔ ꞊dhɛ ˗yö Zoova ˗bha ꞊Gbɛkiö ˈbha dɔ ˗ee? ˈYö˗ ˗yɔ bɔ ˈö˗ pö: «꞊Ii Zoova ˗bha ꞊Gbɛkiö do mü n ˈka. A ꞊mɔɔn˗ ˗bha kö ˈa ˈdho ka ˈka ˗numɛndhɛmɛn ˗nu ˗bha ˈwɔnyëë˗ ˗nu ˈˈpiʋ̈.» Yi ˗dho ˈyi ˗kpan kwa ꞊dhegblü nu ˈwo ˗duëë ˗gblü ˗dhɛ bhë ˗a mɛn 1.600 ˗bha ˈyi ˗an ˗zogban, ˈyi ˗an ꞊faanmën Biblö ˈka. Yi ˗go mü ˈzü ˈyi kwa ˈˈdhiʋ̈ʒiöwomɛn ˗nu ˗bha ˈsëëdhɛ ˗wo pö ˗an ˗dhɛ ˈö pa ˗an ˈka ꞊dedewo. ˗Yö ˗kun pö ˗sü ˈka ˗a ˈgü: «Yi ˗bhɛɛ ˗kplawo ka ˗bha ˈka. Yi˗ ˈwɔn ˗dɔ ꞊dhɛ Zoova ˈti ˗dho ˈˈkan ˈka ˗bha.» Kwa ˈˈdhiʋ̈ʒiöwomɛn ˗nu ˗wo ˈö bhë ˗yö ˗kun gagade ˈka. ꞊Dɛɛ, Zoova ˗dhɔkëmɛn ˗nu ˈwo ˗ʒiö 30.000 ˗ta ˗wa ˗dhɔkë ˗ni ˈgü ˈwo ˈko ꞊bhaa Wlanda.

˗Kwɛ 2011 ˈgü, yaa n ˗man dhebɔ dhɔɔbhaasü Edhi ˈö ˈya ˗kwɛ 58 kë yi ˈkwëë˗ bhë ˗a ˗wɔn ˗yö ˗kë. ˗Wëë ˗kun bɔ ˗ni ˈgü n ˗ta ꞊dedewo ˈa ꞊bhɛɛ Zoova ˗dhɛ, ˈö n ˗zogban. A ˗go mü ˈzü ˈa ˗zogbandhe ꞊slɔɔ nɔɔn˗ ˗së ˗pö n këyoo ˗nu ˗dhɛ ˗sü ˈgü.

ˈKö ˗kë ꞊dhɛ n ˗kwɛ ˗ya kë 90 ꞊dɛɛ, a ꞊kun ˗zlanwopö ˗kplawo ˈˈdhoogɔ ˈˈpɛpɛ ˈka. ˗A kë ˗sü kö ˈa n ˗kɔ ˗da kwa ˗bha za ˗bha ˈwɔnyëë ˗nu ˗dhɛ Betɛdhö ˈö Bɛʒikö ˗a ˈgü, kö ˈa wlüünën ˗nu ꞊faanmën bhë ˗yö n zuʋ̈ˈˈ ˈˈgblü ˗dhi.

˗A ˗kwɛ ˗ya ʒiö 84 ˈgü, ˈa bhɛɛˈˈ ˗blɛɛsü wo Zoova ˗dhɛ. ˗Yö ˗kun ˈˈta do ˗së ˈö dho n ꞊ɲɔɔn Zoova ˗bha ꞊dedewo ˗a züdɔdhɛ ˈka. N ˗man ˗tosɛta ꞊gban ˈgü, Zoova ˗yö ö ˈˈtʋ ˗to n ˗man bhɛɛwo ˗nu ˗bha. A˗ ˈˈnuɛ ˗bho ꞊dedewo ˗a ˗wɔn ˈgü.—Ps. 66:19. b