˗Wo ˗bhöpë ˗nu n ˗man ˈgbɛnnën ˗nu ˗dhɛ
NIKÖ ˈö Oregɔn Zeta zuni, ˗ya ˗pö: «˗Dhɛkpaɔyi do ˈka ˗kwɛ 2014 ˈgü, a ˗dho ˈˈglü n ˗man ˈgbɛnnën ˈsɛɛn˗ ˗nu ꞊plɛ ˈka ˈˈkwipö ˈa kun ˗a ˈgü bhë, ˗a ˈgü. ꞊Ya kë ꞊shiö Zoova ˗bha ꞊Gbɛkiö ˗nu ˗wo ˗nu ˈˈdhɛɛ ꞊zinŋgü mü wo ˗bha plezantuaa ˈka. ˗Wo ˗kun sɔ ˗da ˗ni ˈgü wo ˗bha ˗së ˈka, ˈö ˈwo mɛn ꞊gban ˈˈpɛpɛ ꞊tuabho ˈˈyɩɩ ˈka.»
«Zoova ˗bha ꞊Gbɛkiö ˗nu bhë ˗an ˗bha ˈˈgblüsëkësü ˈˈdhiʋ̈ ˈyii ˈto mɛn ˗nu ˈˈpiʋ̈ dosɛnŋ, ˗wa ˗kë ˈpö n ˗man ˈgbɛnnën ˗nu ˈka. ˗Dhɛkpaɔyi do ˈka, Elɛnö ˈö kun dɔ ˗sü ˈka plezantuaa ˈˈsuee ˗yö ˗bhöpë ˗nu n ˗man ˈgbɛnnën ˗nu ˗dhɛ. ˈÖ sü yi ˈö bhë ˗a ˗bha yi bɔ ˗ni ˈgü ˗an ˈˈsuee, n ˗man ˈgbɛnnën ˗nu ˗wo ˗ɲɔɔn ˗an ˗bha kö ˗wo ˗bhöpë ˗nu wo ˗dhɛ.»
«Yi ˈˈsu ˈnën ˈbha ˗kë ˗a ˈgü. ˈYa ˈdho, ˗wa ˗bhöpë nu ˈgbɛnnën ˗nu ˗dhɛ ˗yö ˗kë ˗an ˗dhɛ ˗së, ˈö man ˗de ˈpö ˈa ˈˈtʋ̈ŋ ˈnën ˈbha sü, ˈö ˈyi ˈˈdoodɔ. ˈˈKɛɛ ˈmaan kun ˗a ˈˈpiʋ̈ kö yaa˗ ˗nu ˈyi ˈˈdoodɔ pinŋdhö. ˈDhɛ ˗kë ˈˈdhʋ̈ kö n ˗kwɛ ˗ya ʒiö 70 ˗ta, ˈgo mü ˈzü ˈmaan kun pë ꞊va dɔ ˗ni ˈgü Zoova ˗bha ꞊Gbɛkiö ˗nu ˗bha ˗zlanwo ˗bha. ˗A ˗de ˗ʒiaan ˈö ˗kë ˈˈdhʋ̈ kö ˗zlanwo ꞊vadhɛ ˗wa n ˈgü ga, ˗a ˗wɔn ˈgü a ˗kun ˗a ˈˈpiʋ̈ ˈa Biblö draanˈˈ n ˗de ˈˈpiʋ̈.»
«ˈˈTʋ̈ŋ do ˈö bhë ˗a ˈka, a ˗kpan Zoova ˗bha ꞊Gbɛkiö ˗nu ˗bha ˈˈkwipö ˈö bhë ˗a ˈˈpian ˈˈwɛɛ ˈgü kö ˗wo dɔ ˗sü ˈka plezantuaa ˈka mü. Wo ˗de ˈpö ˗an ˈˈgblü ˗kun ˗së. ˗Wo ˗bɔ Biblö ˗ta ˈwo n ˗man dhɛɛˈˈ ˗nu ˗yɔ bɔ, ˈyö ˈa ˗ya ˈdhaŋ˗ bho ˗sü ˗bha ˗an ˈˈdhiʋ̈ ˈzü ˈgbɛ.»
«˗Dhɛkpaɔyi do ˈka, Elɛnö ˗yö n dhɛɛˈˈ ˗kpɔ ˈö˗ pö: ‹Ü˗ ˈwɔn ˗dɔ ꞊dhɛ wü ˗nu ˈwo bhë ˗Zlan ˗bha gbɔɔdhe ˗mü ˗ee?› ˈYö ˈa˗ pö ˗a ˗dhɛ: ‹꞊Ii a˗ ˈwɔn ˗dɔ.› Elɛnö ˗yö Isaïe 11:6-9 ˗bha, ˗a ˗wo ˗pö n ˗dhɛ. ˈÖ sü ˈˈtʋ̈ŋ ˈö bhë ˗a ˗bha, Biblö ˗draan ˗an ˈˈpiʋ̈ ˗sü ˗dhɔ ˗da n ˈgü. ˈˈKɛɛ ˈmaan kun ˗a ˈˈpiʋ̈ ˈa ˗an ˗bha ˈsëëdhɛ gbɛ˗ ˈsü.»
«˗A ˗dhɛkpaɔyi ˗nu ˈwo dɔ ˗a ˈˈpiʋ̈, yaa Elɛnö waa ö ꞊gɔɔn Blɛntö yi ˗ya ˈˈdɔɔ ˗nu dɔ ˗sü ˗bha. ˈYaa kun ˈˈtʋ̈ŋ ꞊va ˈsü ˗ni ˈgü, ˈˈkɛɛ ˗yö ˗kun n ˗dhɛ ˗së. ˈYö ˈwo˗ pö n ˗dhɛ ˈa Matiö ˈö dho ˈö yö˗ ˈka Këwɔn ˗nu ˈsëëdhɛ ˗bha ˗a ˗wo pö kö pë ˈwo˗ ˗dhɛ ˗kë kletiɛn ꞊dede ˈka ˗sü, ˈa˗ dɔ. A˗ ˗wo ˗pö. ˗A ˗dhɛ ˈti ꞊gwëë, ˈyö ˈa ˗wɩ Biblö draansü ˗bha Blɛntö waa Elɛnö ˗an ˈˈpiʋ̈ kö ˈkwa dɔ ˗kwɛ 2016 ꞊zinŋgü.»
«A ˗kun n ˗man Biblö draansü ˈö ˈˈdhoogɔ ˈˈpɛpɛ ˈka waa ˗nu ˗bhɔkwëë ˗nu ˗ta ˗sü ˈsü ˗ni ˈgü n ꞊sɔbhɛɛ ꞊dede ˈka. A gagade ˗nu ˈwo Biblö ˈgü ˗an draansü ˗yö ꞊dhɛ ˈdhuëë˗ ꞊va ˈdhö, ˈö n zuʋ̈ˈˈ ꞊nii ˗da. ˈDhɛ ˗kwɛ do ˗yö ˗ʒiö, ˈyö ˈa bɔ ˈˈyi ꞊bhaa ˈa ˗kë Zoova ˗bha ꞊Gbɛkiö ˈka. ꞊Dɛɛ n ˗kwɛ ˗ya kë 79. A ˗Zlan ˈˈnuɛ ˗bho ˈyö ˗tɔ ꞊dhɛ ˈman ˗da ˗zlanwo ꞊dede ˈgü. Zoova ˗ya ˈdhuëë˗ ˈkpɔ n ˗bha, ˗ya n kë ö ˗bha ˈkɔdhi ˈö ˈˈkpɔnŋtaadhɛ ˗todhʋ̈sü ˈgü ˗a ˈgümɛn do ˈka.»
