1. ˈMën Zoova ˈdhö˗ ˈˈplüün bho ˗sü ˈka mɛn ˗nu ˈö ˗wa ˈgo wo ˗bha ꞊sɔnŋ yaa ˈgü ˗an ˗dhɛ?

 ˗YA ˈˈKAN Zoova ˗bha ˗kë kwa ˗Damɛn, ˈtɔŋ˗ ˗dɔ kwa ˗ta ˗mɛn waa kwa ˗bha Zadɔmɛn ˈka ˗sü ˗bha, ˗yö kwa Dë ˈö kwa ˗dhɔ ˗ya ˗kë ˗a ˈka ˈpö. (Ps. 100:3; Is. 33:22) ˈKwa ˈwɔn yaa kë ˗a ˈka, ˈkwa ˈgo kwa ˗bha ꞊sɔnŋ yaa ˈgü kwa zuʋ̈ˈˈ ꞊gban ˈka, ˗yö kë kwa ˈˈɲaan ꞊dhɛ kwa ˗bhawɔn ˈto ˗sü ꞊faan waa˗ zuʋ̈ga ˗wa ˗gɔ. (Ps. 86:5) ˗Yö ˗bɔ ö ˗wodhiʋ̈lomɛn Izai ˗ta ˈö kwa ˗zogban ˈö˗ pö: «ˈKö ˗kë ꞊dhɛ ka ˗bha ˈwɔn yaa ˗nu ˗wo ꞊dhɛ pë ˈˈɲan ˗zaɔndhö ˈdhö, ˗wo ˗dho kë ˈˈpuu ꞊dhɛ mënŋga ˈdhö.»—Is. 1:18.

2. ˈKwa˗ pö ˗dhikodhɛ ˗yö kë kwaa mɛn ˈˈwɛɛ ˗nu kwa ꞊zinŋgü, ˈmën ˈkwa dho ˗a kë?

² ˈDhɛ ˗kë ꞊dhɛ ˈwɔn yaa kë ˗dhii ˗yö kwa ˗bha, ˈˈtʋ̈ŋ ˈbha ˗nu ˈka kwa mɛn ˈˈwɛɛ ˗nu ˗shiödhɛwɔn ˗nu ˗blɛɛ ɛɛnˈˈ ˗an ˗kë. (Zak. 3:2) ˈˈKɛɛ ˈkwa kwa ˈko ˗nu ˗bhawɔn ˈto ˗sü draanˈˈ, kwaa˗ ˗nu kwa ˗bha ˈˈtɔŋdëdhɛ ꞊mɔɔn˗ ˗bha ˈö ˗kë ˈˈgbɩɩ˗. (Prov. 17:9; 19:11; Mat. 18:21, 22) Mɛn ˗nu ˗wa ˈwɔn ˈsɛɛn˗ ˗nu ˈwo ˗shiö kwa ˗dhɛ ˗an kë, Zoova ˗ya ˈˈpiʋ̈ kö ˈkwa ˗an ˗bhawɔn ˈto. (Kodh. 3:13) ˗A ˗dhɛ ˗a ˗bha kö ˈkwa˗ kë ˈˈdhʋ̈, ˈyö ˗tɔ ꞊dhɛ Zoova ˗yö kwa «˗bhawɔn -to ˈgbɛ ꞊dedewo.»—Is. 55:7.

3. ˈMën ˈkwa dho ˗a yö ˈwɔn ˗gɔ ˈö yö ˗a ˈgü?

³ ˈWɔn ˗gɔ ˈö yö ˗a ˈgü, ˗kɔ ˈö mɛnbhɩɩdhe ˗nu ˈö ˈwɔn yaa kë ˗dhii ˈdhö ˗an ˗bha ˈwo ꞊mɔɔn˗ ˗bha ˗wo ˈto Zoova ˗bha ˈwɔnzuan ˈˈpiʋ̈  ˗a ˈka, kwa ˗dho ˗a yö. ˈWɔn ˗mɛɛn ˗nu ˈö kwa dua ˈdhö ˗mü ˈkwa ˈdho ˗an ˈka mɛn zii ˗nu ˗kuu ˈˈdhiʋ̈? ˈMën ˗kë ˈö Zoova ˈdhö˗ ˈˈpiʋ̈ kö ˈkwa mɛn ˗nu ˗bhawɔn ˈto? ˈYö ˗gleŋ ˗mɛɛn ˈö ˈkwa ꞊mɔɔn˗ ˗bha ˈkwa˗ sü kwa ꞊dhegblü ˈbha ˗nu ˈö ˗an zuʋ̈ˈˈ ˈˈklʋʋ bhɔ ꞊dedewo ˈwɔn yaa ˗nu ˈwo- ˗kë ˗an ˈka ˗an ˗wɔn ˈgü, ˗an ˗bha?

4. (1) Zoova ˗dhɔkëmɛn ˈbha ˗ya ˈwɔn yaa ꞊gbɔɔnsü kë, ˗mën ˈö˗ dua ˈdhö ˗mü kö ˗ya kë? (2) Mɛn ˈö ˈwɔn yaa ꞊gbɔɔnsü ˗kë ˗ya nu mɛn zii ˗nu ˗kuu ˈˈdhiʋ̈, ˗mën ˈö ˗an dua ˈdhö ˗mü kö ˗wa kë?

⁴ Mɛn ˈbha ˗ya ˈwɔn yaa ꞊gbɔɔnsü kë ˈkwa˗ yö, kwa dua ˗mü ˈkwa˗ blɛɛˈˈ mɛn zii ˗nu ˗dhɛ. ˈWɔn yaa ˗nu ˈwo ˈˈdhʋ̈ ˗a ˈbha ˗nu ˗bɛnzësü ˈka 1 Kodhɛngtö 6:9, 10 ˈgü. ˈMɛn ˗ya ˗Zlan ˗bha ˈtɔŋ˗ ˗nu ꞊lögü, kö ˗ya ˈwɔn yaa ꞊gbɔɔnsü kë. Kletiɛn ˈö ˈwɔn ˗nu ˈwo ˈˈdhʋ̈ ˗an ˗kë, ˗a dua ˗mü kö ˗yö ˗bhawɔntodhe ˗dhɛ Zoova ˗gɔ. ꞊Ya ˈgo mü, ˗yö ˈdho mɛn zii ˗nu ˈwo ˗zlanwokɔdhi ˈgü ˗an ˈˈpiʋ̈ kö ˗ya blɛɛˈˈ ˗an ˗dhɛ. (Ps. 32:5; Zak. 5:14) ꞊Ya kë ꞊dhɛ ˗kɔ bha˗ ˈdhö, ˈmën mɛn zii ˗nu dua ˈdhö ˗mü kö ˗wa kë? Zoova yö dosɛnŋ ˈnën ꞊mɔɔn˗ ˗bha kö ˗yö ˗gban ˗gɔtadhɔpë ˗ta ˗yö mɛn ˗bhawɔn ˈto. * ˈˈKɛɛ ˗yö ˈdhaŋ˗ ˗bho ˈpö mɛn zii ˗nu ˈˈdhiʋ̈ kö ˗wo ˗gban Biblö ˗ta ˗wo ˗dhɛ ˗ga ˈwɔn ˈö bhë ˗a ˈgü, kö ꞊ya kë ꞊dhɛ ˗a ˗mɛn ˗dho ˈto ˗zlanwokɔdhi ˈgü ɛɛnˈˈ ˗wo ˗dho ˗a bho mü, ˗wo wo ˗zota ˗a ˈgü. (1 Ko. 5:12) ˗An dua ˗mü kö ˗wo wo ˗zota dhɛɛˈˈ ˗nu ˈwo yö ˗an ˈgü: ˗A ˗mɛn ˗yö ˈwɔn yaa bhë ˗a ˗kë ö ˗de ˈˈɲaan ˗ee? ˗Ya ˗kë ˈko ˗ta ꞊va ˗ee? Pë ˈbha ˈö˗ ˗zɔn ꞊dhɛ ˗ya ˈgo ꞊dedewo ö ˗bha ꞊sɔnŋ yaa ˈgü ˗wa ˗yö ˗ee? Pë ˈbha ˈö˗ ˗zɔn ꞊dhɛ Zoova ꞊yaa˗ ˗bhawɔn ˈto ˗yö ˗dhö ˗ee?—Këw. 3:19.

5. Mɛn zii ˗nu -wa ˈwɔnyaakëmɛn ˗takun, ˈwɔn ˗së ˗mɛɛn ˈö go ˗a ˈgü?

⁵ Mɛn ˈbha ˗ya ˈwɔn yaa ꞊gbɔɔnsü kë mɛn zii ˗nu ˗wa ˈˈɲanbhɔ ˗ni ˈgü, ˈpë ˈwo˗ ˗ya wo ˗zo ˈˈpiʋ̈ ˈyö ˗tɔ wo ˗wo ˈˈdhiʋ̈todhɛ ˗yö kë ˈpë Zoova ˗zo ˈˈpiʋ̈ ˗a ˈka. (Mat. 18:18) ˗A ˗kë ˈˈdhʋ̈ ˗sü ˗yö ˗zlanwokɔdhi ˗bha ˈwɔn ˗së ˈka ˗kɔ ˗kë ꞊dhɛ? ˗Ya ˗kë ˈö ꞊sɔnŋyaakëmɛn ˈö ꞊mɔɔn˗ ˗bha ˗yö ˈwɔn yaa kë Zoova ˗bha ˗tuëë ꞊bhlëësü ˗nu ˈwo to ˗an ˈka, ˈwaa˗ ˈto ˗zlanwokɔdhi ˈgü. (1 Ko. 5:6, 7, 11-13; Tit. 3:10, 11) ˗Yö ꞊mɔɔn˗ ˗bha ˗ya kë ˈpö kö mɛn ˈö ˈwɔn yaa ˗kë bhë ˗yö ˈgo ö ˗bha ꞊sɔnŋ yaa ˈgü, kö Zoova ˗ya ˗bhawɔn ˈto. (Dhu. 5:32) ꞊Ya kë mɛn ˈö ˗ya ˈgo ö ˗bha ꞊sɔnŋ yaa ˈgü ˗a ˈka, mɛn zii ˗nu ˗wo ˗bhɛɛ ˗a ˗bha ˈka, ˈwo˗ pö Zoova ˗dhɛ ˗ya ˗takun kö ˗mlɛɛn ˈö waa˗ ˗nu ˗an ꞊zinŋgü ˗ya yö ö pinŋ˗ ˈgü.—Zak. 5:15.

6. ˗Wa mɛn ˈbha bho kwa kpö ˈgü, Zoova ꞊mɔɔn˗ ˗bha ˈzü kö ˗ya ˗bhawɔn ˈto ˗ee? ˗A ˈgü ˈˈpʋ.

⁶ ˗Kwa kwa ˗zota kö mɛn ˈbha ˈö ˈwɔn yaa ꞊gbɔɔnsü ˗kë ˈö mɛn zii ˗nu ˗wo yö ˗a ˗bha, ˈyaa˗ ˈˈpiʋ̈ ˈö ˈgo ö ˗bha ꞊sɔnŋ yaa ˈgü. ꞊Ya kë ꞊dhɛ ˗kɔ bhë ˗a ˈdhö, ˗wo ˗dho ˗a bho ˗zlanwokɔdhigümɛn ˗nu kpö ˈgü. ꞊Ya kë ꞊dhɛ ˈˈsɛ ˗bha ˈtɔŋ˗ ˈbha ˈnën˗ ꞊lögü, mɛn zii ˗nu ˈti ˗dho ˗a ˗takpa. ˈKö˗ ˗de ˈö˗ ˗mɛn ˗yö go ö ˗bha ꞊sɔnŋ yaa ˈgü ɛɛnˈˈ ˈyii ˈgo ˗a ˈgü, Zoova ˗yö ö ˗kwaa ˈˈsɛkɔɔnmɛn ˗nu ˗zü kö ˗wo za dɔ mɛn ˈö ˈtɔŋ˗ ꞊lögü ˗a ˗bha, ˗wo ˈwɔn bho ˗a ˈgü. (Wlɔ. 13:4) ˈˈKɛɛ ꞊taabha ˗a ˗mɛn ˗ya nu ö ˗de ˈˈpiʋ̈, ꞊yaa˗ yö ꞊dhɛ ˈya ˈwɔn yaa ꞊gbɔɔnsü kë, ˗ya ö ˗zotakɔ waa ö ˈˈtakɔ ˗nu bho ˈˈgblʋʋ, Zoova ˗dho ˈˈwɩ ˗a ˗bha ˈö˗ ˗bhawɔn to. (Dhu. 15:17-24) ˈKö˗ ˗de ˈö ˗kë ˈwɔn yaa ꞊gbɔɔnsü ˈka, ˗yö ˗dho ˗a ˗bhawɔn ˈto.—2 Chron. 33:9, 12, 13; 1 Tim. 1:15.

7. Mɛn ˈbha ˗ya ˈwɔn yaa ꞊gbɔɔnsü kë kwa ˈka, kwa ˗dho ˗a ˗bhawɔn ˈto ˗kɔ ˗kë ꞊dhɛ?

⁷ ˗A ˈwɔn dɔ ˗sü ˈö ꞊dhɛ Zoova ˗bha ˈwɔnyaakëmɛn ˗bhawɔn ˈto ˗sü ˈyii ˗dho ˈsü kwa ˗bha bhë, ˗yö kwa zuʋ̈ˈˈ ˗kë ˗saa. ˈˈKɛɛ ˗a ˈbha ˗nu ˗dhö ˈpö ˈwo dho ˈsü kwa ˗bha. ˈˈTʋ̈ŋ ˈbha ˗nu ˈka,  mɛn ˈbha ꞊mɔɔn˗ ˗bha ˈö ˈwɔn yaa ˗kë kwa ˈka ˈö ˗shiö kwa ˗dhɛ, ˈˈkɛɛ ˈö ꞊taabha ˈö ˗bhawɔntodhe ˗dhɛ kwa ˗gɔ. ˗A ˈbha ˗ya kë ˈzü ˗a ˗mɛn ˈti ˗dho ˗bhawɔntodhe ˗dhɛ. ˈˈKɛɛ ˈkö ˗kë ˗kɔ ꞊gban ˈgü, kwa ꞊mɔɔn˗ ˗bha ˈkwa˗ ˗mɛn ˗bhawɔn ˈto, ˈö ˈwɔn ˈdhɛ bhë ˈkwa˗ bho kwa ˗zo ˈˈpiʋ̈. ˗Yö kë kwa ˈˈɲaan ꞊dhɛ ꞊ya kë ꞊dhɛ ˈwɔn ˈwo˗ ˗kë kwa ˈka bhë ˗yö ˗mën kwa ˈka ꞊dedewo, kö kwa ˗bhawɔn ˗yö ˈˈtʋ̈ŋ ꞊va waa ˈgüdɔgbɩɩsü ˗bha. ˈˈGlaadhiʋ̈ ˗tɔn ˈö yö ˈˈkpɛɛn ˗kwɛ 1994 Sɛtanblö 15 ˈgü ˗ya ˗pö: «Mɛn ˗ya ˈwɔn yaa kë kwa ˈka, ˗a -bhawɔn ˈto ˗sü ˈyaa ˈnën ˗tɔ ꞊dhɛ ˈwɔn ˈö˗ ˗kë kwa ˈka bhë, ˗yö kwa ˗dhɛ ˗së. Kletiɛn ˗ya mɛn ˗bhawɔn ˈto, kö ˗ya ö ˗zo yö Zoova ˗dhɛ ˗ya ˈwɔn ˈdhɛ bhë ˗a ˈto ˗a ꞊kwɛɛ˗. Yö ˈnën ˗tɔ ˈˈkpɔnŋtaamɛn ˗nu ˈˈpɛpɛ ˗bha Zadɔmɛn ˈö kpɛnŋdhö. ˗Yö ˗dho ˗a ˈwɔn ˈˈɲanbhɔ ˈˈtʋ̈ŋ ˗së ˗bha.» ˈMën ˗kë ˈö Zoova ˗ya pö ˈkwa kwa ˈko ˗nu ˗bhawɔn ˈto, ˈkwa kwa ˗shiödhɛwɔn ˗nu ˗lo ö ꞊kwɛɛ˗?

8. Mɛn ˈˈwɛɛ ˗nu ˗bhawɔn ˈto ˗sü ˗ya ˗zɔn ˗kɔ ˗kë ꞊dhɛ ꞊dhɛ kwa ˗bhawɔn ˈto ˈö Zoova ˗ya wo bhë, ˗yö kwa ˗dhɛ ˗së?

⁸ ˈKwa mɛn ˗nu ˗bhawɔn ˈto, kö kwa˗ ˗zɔn ꞊dhɛ Zoova ˗bha mɛn ˗bhawɔn ˈto ˗sü ˗yö kwa ˗dhɛ ˗së. ˈˈGɔɔn do ˈö Yesu ˗ya bɔ ˗a gü, ˗yö Zoova ˗zɔn ꞊bhɔɔmɛn do ˈö˗ ˗bha ˈˈpö ꞊va kun ˗a ˗bha yökëmɛn do ˗bha, ˈˈkɛɛ ˈö ö ꞊kwaa ˗a ˗wɔn ˗zü, ˗a ˈka. Yökëmɛn ˈö ˈˈdhʋ̈ ˗a ˗bha ˈˈpö ˗kë ˗a ˈˈtɛɛdo ˗bha ˈpö, ˈö ˈyaa kun ˈˈpö ꞊va ˈka, ˈˈkɛɛ yö ˈti˗ ˗bhawɔn ˈto. (Mat. 18:23-35) ˗Mën ˈö Yesu kun ˗a ˈˈpiʋ̈ ˈö˗ ˗zɔn kwa ˗dhɛ? ˗Yö ˗kun ˗a ˈˈpiʋ̈ ˈö˗ ˗zɔn ꞊dhɛ, ꞊ya kë ꞊dhɛ ˈwɔn yaa ꞊va ˈö ˈkwa˗ kë ˗ni ˈgü ˈö Zoova ˈdhö˗ ˗bhawɔn ˈto ˗ni ˈgü bhë ˗ya kë kwa ˗dhɛ ˗së, ˗yö ˗dho kwa ˗blü mɛn ˈˈwɛɛ ˗nu ˗bhawɔn ˈto ˗sü ˗bha. (Ps. 103:9) ˈˈGlaadhiʋ̈ ˗tɔn do ˈbha ˗ya ˗pö: «ˈKö˗ ˗de ˈö ˈkwa dho mɛn ˗nu ˗bhawɔn ˈto ˗kɔ ˈˈoo ˗kɔ ˈgü, ˈkwaa ꞊mɔɔn˗ ˗bha toŋtoŋdhö kö ˈkwa˗ ˗zɔn kwa ˗wëë ˈö Zoova ˗kë, ˈö kwa ˗bhawɔn to ˗bɔ Yesu ˗ta ˗sü ˈka bhë, ˗a ˈka.»

9. De ˈö˗ ˗wëë ˗yö Zoova ˗kë, ˈö˗ ˗bhawɔn to? (Matiö 6:14, 15)

⁹ Mɛn ˈö mɛn ˗nu ˗bhawɔn to, ˈyö ˗Zlan ˗ya ˗bhawɔn to. Mɛn ˈö mɛn ˗nu ˗wëë ˗ya ˗kë, ˈyö˗ ˗wëë ˗yö Zoova ˗kë ˈpö. (Mat. 5:7; Zak. 2:13) Yesu ˗ya ˗zɔn ˈˈdhʋ̈ ˈˈpuu ˈka bhɛɛˈˈ ˗kɔ ˈö˗ ˗zɔn ö ˗bha gwëëˈˈ ˗nu ˗dhɛ bhë, ˗a ˈgü. (Matiö 6:14, 15 ˗wo pö.) Zoova yö ꞊dede ꞊yaa˗ ˗zɔn ˈˈdhʋ̈ ˗be ˈwɔn ˈö˗ ꞊blɛɛ ö ˗bha yökëmɛn Zɔbö ˗dhɛ, ˗a ˈgü. ˗Wo yaa ˗nu ˈö Edhifazö, Bildadö waa Zofaa ˈwo kun ˗an pö ˗ni ˈgü Zɔbö ˗dhɛ bhë, ˗wo ˗kun ˗a zuʋ̈ˈˈ ˈˈklʋʋbhɔ ˗ni ˈgü ꞊dedewo. ˈˈKɛɛ Zoova ˗ya ˗pö Zɔbö ˗dhɛ ˗yö bhɛɛˈˈ ˗an ˗bha ˈka. ˈDhɛ Zɔbö ˗ya ˗kë ˈˈdhʋ̈, Zoova ˗yö ˈdhuëë˗ ˗kpɔ ˗a ˗bha.—Job 42:8-10.

10. ˈKwa ˈwɔn ˈkun kwa ˗zo ˈˈpiʋ̈ mɛn ˈbha ˗bha kö ˈkwa ˈwɔn yaa kë kwa ˗de ˈka. ˈMën ˗kë? (Efɛzö 4:31, 32)

¹⁰ ˈWɔn ˗kun ö zuʋ̈ˈˈ ˈˈpiʋ̈ ˗sü pë ˈˈdhiʋ̈˗ ˗kë kwa ˈka. ˈWɔn ˗kun ö zuʋ̈ˈˈ ˈˈpiʋ̈ ˗sü ˗yö ꞊dhɛ ꞊kwɛɛ˗ ˈgbinŋ˗ ˈdhö. Zoova ˗ya ˈˈpiʋ̈ kö ˈkwa˗ bho kwa ˗ta, kö kwa zuʋ̈ˈˈ ˗yö ˈwaannu. (Efɛzö 4:31, 32 ˗wo pö.) ˗Ya ˗pö kwa ˗dhɛ ˈkwa ‹ˈˈkan ˗naanzuëdhe ˗bha, ˈkwa kwa ꞊kwaa zuʋ̈dhiʋ̈dhɛ ˗zü.› (Ps. 37:8) ˈKwa ˈto ˗dhioo ˈö bhë ˗a ˈˈpiʋ̈ ˗yö ˗dho kwa ˗takun. ˈKwa ˈwɔn ˈkun kwa zuʋ̈ˈˈ ˈˈpiʋ̈ mɛn ˈbha ˗bha, ˗yö ꞊mɔɔn˗ ˗bha ˗yö ˈˈyua ˗ya kwa ˗bha, ˗yö kwa ˗gɔ ˈgü kaanˈˈ ˈˈkwöö. (Prov. 14:30) Kö ˗a ꞊tɛɛ˗ ˈgü ˗ya kë ꞊dhɛ ˈdhɛ ˈkwa mɛnzëpë ˈˈyi mü ˗a ˗bha, ˗a ˈdhö. Kwa ˈnën dho pë ˈˈdhiʋ̈˗ kë kwa ˈka, mɛn ˈö ˈkwa ˈwɔn kun kwa zuʋ̈ˈˈ ˈˈpiʋ̈ ˗a ˗bha bhë, ˈyaa ˗mü. ˗Dhɛ ˈö ˈˈdhʋ̈ ˈkwa mɛn ˗nu ˗bhawɔn ˈto, kö ˈkwa ˈwɔn ˗së kë kwa ˗de ˗dhɛ. (Prov. 11:17) ꞊Ya kë ˈˈdhʋ̈, ˗yadeflëëgüsü waa zuʋ̈waannusü ˗wo ˗kë kwa ˗gɔ, ˈö ˈkwa dho kwa ˈˈdhiʋ̈ Zoova ˗dhɔkësü ˈka.

11. ˗Mën ˈö Biblö ˗ya pö ˈö ˗gban kwa ˗de bhlɔɔ bho ˗sü ˗bha? (Wlɔmö 12:19-21)

¹¹ Zoova ˈnën dho kwa ˗bha ˈko zë. Zoova ˈti˗ pö kwa ˗dhɛ mɛn ˈö ˈwɔn yaa ˗kë kwa ˈka ˈkwa˗  ˈˈyoo bho ˗a ˗gɔ. (Wlɔmö 12:19-21 ˗wo pö.) Mɛnbhɩɩdhe ˗nu ˗mü kwa ˈka, ˈö kwa ˗bha ˈwɔn yö ˗kɔ ˈyaa ꞊zinŋgü. ˗A ˗wɔn ˈgü, ˈkwaa dɔ ˗sü ˈka ˗së kö ˈkwa ˈwɔn ˗nu ˈˈɲanbhɔ ˗së ˈka ꞊dhɛ ˗kɔ ˈö ˗Zlan ˗ya ˗kë ˗a ˈka ˗a ˈdhö. (Ebl. 4:13) ˈˈTʋ̈ŋ ˈbha ˗nu ˈka ˗ʒiaanwo, kwa zuʋ̈ga ꞊mɔɔn˗ ˗bha ˈö ʒiaan yaa sü kwa ˈka, ˈö ˈwɔn ˗së dɔ ˗sü ˗kë kwa ˗kɔa ˈˈgbɩɩ˗. Zoova ˗bɔ Zakö ˗ta ˈö˗ pö: «ˈWɔn ˗yɛ mɛ ˗bha ˗sü ˈö ˈˈdhʋ̈ bha ˈyaa mɛ kë ˈwɔn ˈö ˗dhi [˗Zlan] ˗dhɛ ˗a këmɛ ˈka.» (Zak. 1:20) ˗Yö ga kwa ˈgü ꞊dhɛ ˈwɔn ˈdhɛ ˈö ˗së Zoova ˗dho ˗a kë, ˈö ˈwɔn bhë ˗a ˈˈɲanbhɔ kpɛnŋdhödhɛ ˈgü.

12. Kwa ˗dho ˗a ˗zɔn ˗kɔ ˗kë ꞊dhɛ ꞊dhɛ kwa kwa ˗zoyö Zoova ˗bha kpɛnŋdhödhɛ ˗dhɛ?

¹² ˈKwa mɛn ˗nu ˗bhawɔn ˈto, kö kwa˗ ˗zɔn ꞊dhɛ kwa ˈdhaŋ˗ ˗bho Zoova ˗bha kpɛnŋdhödhɛ ˈˈdhiʋ̈. ˈKwa ˈwɔn ˗nu ˈto Zoova ꞊kwɛɛ˗, kö kwa˗ ˗zɔn ꞊dhɛ ˗yö ga ˗sü ˈka kwa ˈgü ꞊dhɛ ˗yö ˗dho ˈwɔn yaa ˈˈpɛpɛ ˈö ꞊sɔnŋ yaa nu ˗a ˈka kwa ˗ta, ˗an ˈˈɲanbhɔ. ˗A ˗bha ˈˈkpɔnŋtaadhɛ ˗dɛɛ ˈö˗ ˈˈplüün bho bhë ˗a ˈgü, ˈwɔn ˈˈdhiʋ̈˗ ˗nu ˈwo kë ˗ni ˈgü kwa ˈka ꞊dɛɛ, ‹kwa ˗zo ˈti ˗dho ˗da ˗an ˈˈpiʋ̈, ɛɛnˈˈ wo ˈti ˗dho nu kö ˗wo kwa zuʋ̈ˈˈ kaanˈˈ ˈˈkwöö ˈzü.› (Is. 65:17) ˈˈKɛɛ ˗wa ˈwɔn ˈˈdhiʋ̈˗ ꞊dede kë kwa ˈka, kwa ꞊mɔɔn˗ ˗bha ˈkwa˗ bho kwa ˗zo ˈˈpiʋ̈ ˗ee? ˗Kɔ ˈö mɛn ˈbha ˗nu ˗wa ˗kë ˗a ˈka ˈö ˈwo ˗mɔn ˗a ˗kë ˈˈdhʋ̈ ˗sü ˗bha, ˗kwaa ˗ga.

13-14. ˗Mën ˈö Ʒoze waa Toni ˗an ˗bha ˈwɔn bhë ˈö˗ ˗zɔn kwa ˗dhɛ ˈö ˗gban mɛn ˗bhawɔn ˈto ˗sü ˗bha?

¹³ Kwa ꞊dhegblü ˈbha ˗nu ˈö mɛn ˗nu ˗wo ˈwɔn ˈˈdhiʋ̈˗ ꞊dede ˗kë ˗an ˈka, ˗wo ˗wɩ ˗a ˗bha ˈwo ˗an ˗bhawɔn to. ˈWɔn ˗së ˗nu ˗mɛɛn ˈwo ˗an ꞊slɔɔ ˗a ˗kë ˈˈdhʋ̈ ˗sü ˈgü?

¹⁴ ˈˈSanni ˗yö gagade dɔ, Toni * ˈö Fidhipinö ˗sɛ ˈgü ˗ya ˗yö ꞊dhɛ gɔndënën do ˈwo˗ ˗dhɛ Ʒoze yö ˈnën ˈö ö ꞊dhoo do zë. ˗A ˈˈtʋ̈ŋ ˈö bhë ˗a ˈka, Toni ˗kun zuʋ̈dhiʋ̈mɛn ꞊dede ˈö ˈˈvaanvan, ˗a ˈka. ˗Yö ˗kun ˗a ˈˈpiʋ̈ kö ˈwɔn ˈö Ʒoze ˗ya ˗kë ö ꞊dhoo ˈka bhë, ˈö˗ ˈˈyoo bho ˗a ˗gɔ. ˗Wo Ʒoze ˗kun ˈwo˗ ˗da ˗kasho ˈgü ˈwɔn ˈö ˈˈdhʋ̈ ˗a ˗wɔn ˈgü. ꞊Taabha, ˈdhɛ go ˗kasho ˈgü, Toni ˗kun ˗a mɛɛnˈˈ ˗ni ˈgü kö ˈö˗ zë. ˗A ˗wɔn ˈgü, ˗yö bu do ˗dhɔ. ˈˈKɛɛ ˈyö Toni ˗ya Biblö draansü ˗bha Zoova ˗bha ꞊Gbɛkiö ˗nu ˈˈpiʋ̈. ˗Ya ˗pö: «ˈDhɛ ˈa ˗ya Biblö draansü ˗bha, a˗ ˗yö ꞊dhɛ n dua ˗mü kö ˈa n ˈˈtakɔ bho ˈˈgblʋʋ, kö ˈa n ꞊kwaa zuʋ̈dhiʋ̈dhɛ ˗zü.» ˈDhɛ ˈˈtʋ̈ŋ ˈbha ˗yö ˗ʒiö, ˗a ˗gɛn ˗yö ˗dho ˈˈdhiʋ̈ ˈö bɔ ˈˈyi ꞊bhaa, ˈö dho ˈö ˗kë mɛn zii ˈka. ˗Dhɛ ˈö˗ man ꞊dhɛ Ʒoze ˗ya kë ˈpö Zoova ˗dhɔkëmɛn ˈö ˗ya bɔ ˈˈyi ꞊bhaa  ˗a ˈka, ˗kɔ ˈö ˗kë ˗a ˈka ö ˗de ˈgü, ˗kwa kwa ˗zota ˗a ˈgü. ˗Dhɛkpaɔyi ˈwo ˗kpan ˗a ˈka wo ˈko ˗bha, ˗wo ˗wü wo ˈkwëë˗ ˈˈwowosü ˈka, ˈö Toni ˗ya pö Ʒoze ˗dhɛ ꞊dhɛ ˈya˗ ˗bhawɔn ˈto. Toni ˗ya ˗pö ˗a ˗bhawɔn ˈto ˈö˗ wo bhë, zuʋ̈gblüdhi ˈö ˗kë ö ˗gɔ ˗a blɛɛˈˈ ˗dhɛ ˈyaa kun ˗dhö. ꞊Ii, ˈˈwɩ ˈö Toni ˗ya wo ˗a ˗bha kö ˈö mɛn ˗bhawɔn ˈto bhë, Zoova ˈdhuëë˗ ˗kpɔ ˗a ˗bha ˗a ˗wɔn ˈgü.

15-16. ˈWɔn ˈö ˗kë Pitɛɛ waa Sue ˗an ˈka bhë, mɛn ˗bhawɔn ˈto ˗sü ˗gleŋ ˗mɛɛn ˈö˗ ˗da kwa ˗bha?

¹⁵ ˗Kwɛ 1985 ˈgü, Pitɛɛ waa Sue ˗wo ˗kun ˗bhɔkwëë ˗ta. ˈYaa kun ˗an ˈˈɲaan ꞊dhɛ gɔndënën do ˗ya ˈbɔnŋbö ˗ya ˗bhɔkwëëkëgükɔ ˈö bhë ˗a ˈgü. ˗Wo ˗to mü, ˈyö˗ ˈbɔnŋbö ˗yö ꞊pʋ̈ʋ̈. ˗Yö pë ˈˈdhiʋ̈˗ ˗kë Sue ˈka ꞊dedewo, ˈö ˗a ˈˈɲan ˗nu, ˗a ˈˈtʋ ˗nu, ˗an ꞊gban ˗dhɛ to ˗a ˗bha. ˗Dhɛ ˈö ꞊ɲɔɔn mü, kö ˗a ɲun ˈyaa pë ꞊fii man ˈzü. * Pitɛɛ waa Sue ˗wo ˗kun wo ˗de dhɛɛˈˈ ˈkpɔ ˗ni ˈgü ˈˈtʋ̈ŋ ꞊gban ˈka ˈwo˗ pö: ‹De ˈö zuʋ̈yaadhɛ ˗wɔn suu ˈö ˈˈdhʋ̈ ˗a ˗kë?› ˈDhɛ ˗kwɛ ꞊va ˗ʒiö, mɛn ˈö ˈbɔnŋbö bhë ˗a ˗ya, ˈö ˈyaa kun Zoova ˗dhɔkëmɛn ˈka bhë ˗wa ˗da ˗kasho ˈgü, kö ˗yö ˈto mü ˗yö yö˗ ˈka ˗a ga ˗yi ˗bha. ˈDhɛ ˈwo ˗an dhɛɛˈˈ kpɔ ˈˈni ꞊ya kë ꞊dhɛ ˗wa gɔndënën ˈö bhë ˗a ˗bhawɔn ˈto, Pitɛɛ waa Sue ˗wa ˗pö: «Zoova ˗ya ˗zɔn yi ˗dhɛ ꞊dhɛ ˈwɔn ˗kun ö ˗zo ˈˈpiʋ̈ ˗sü ꞊mɔɔn˗ ˗bha ˗yö ˈˈyua ˗ya yi ˗bha, ˗yö yi ˗gɔ ˈgü kaanˈˈ ˈˈkwöö. ˈDhɛ ˈwɔn bhë ˈö ˗kë, yi ˗bhɛɛ Zoova ˗dhɛ kö ˗yö yi ˗takun kö ˈyi˗ ˗mɛn ˗bhawɔn ˈto, kë ˈˈdhʋ̈ kö ˈyi yi ˗bha ˗tosɛta kë zuʋ̈waannudhe ˈgü.»

¹⁶ Gɔndënën ˈö ˈˈdhʋ̈ ˗a ˗bhawɔn ˈto ˗sü ˗kë ˗an ˗kɔa ˈˈplëëplë ˗ee? ˗Abin toŋtoŋdhö. ˗Wa ˗pö: «ˈˈTʋ̈ŋ ˈbha ˗nu ˈka, Sue ˗bha pë ˈˈdhiʋ̈˗ ˗ya bhɔ ˈˈdhu, ˗yö yi zuʋ̈ˈˈ ˗da ˈzü. ˈˈKɛɛ ˈyaa yi ˗zota ˗a ˈgü ꞊gbɔɔnsü. ˈYa˗ kë ˈˈdhʋ̈, ˗a ˗dhɛ ˈyaa ꞊gwëë ˈyö yi ˗zo ˗yö go ˗a ˈˈpiʋ̈. Yi ꞊mɔɔn˗ ˗bha ˗ʒiaanwo ˈyi˗ pö ꞊dhɛ dhiʋ̈ˈˈ ˗nu ö ꞊taabha ˗nu ˈka, mɛn ˈö ˈbɔnŋbö ˗ya bhë ˗ya kë kwa ꞊dhegblü ˈka, yi ˗dho yi ˗kɔ ˗ya ˗a ˗gɔ ˗së ˈka. ˈWɔn ˈö ˗kë bhë ˗ya ˗zɔn yi ˗dhɛ ꞊dhɛ ˈkwa Biblö ˗bha ˈtɔŋ˗ ˗gɛngbandhɛ ˗nu ˗ya ꞊bhlëë ˈgü, ˗potaadhe ˈö˗ ˗wɔn ˈyaa kwa ˈˈɲaan ˗be ˗yö ˗kë kwa ˗gɔ. ˗Ya ˈgo mü ˈzü ˗a ˈwɔn dɔ ˗sü ˈö ꞊dhɛ ˗a ˈˈtʋ̈ŋ ˈyaa ꞊gblɛɛn ˈzüdho kö Zoova ˗yö ˈwɔn yaa ˗nu bhë ˗an bho ˈˈshia˗, ˗yö yi ˗zogban ꞊dedewo.»

17. ˗Mën ˈö Mira ˗bha ˈwɔnzuan ˗ya ˗zɔn kwa ˗dhɛ ˈö ˗gban mɛn ˗bhawɔn ˈto ˗sü ˗bha?

 ¹⁷ ˈDhɛ Mira ˗yö gagade dɔ, kö ˗yö gwan ˗bha, ˗a ˗bha ˈnën ˗nu ˗wa kë ꞊plɛ. ˈˈKɛɛ ˗a ꞊gɔɔn ˗zë ˗yö ˈti ˈˈwɩ gagade ˗bha. ˗A ꞊gɔɔn ˗dho ˈö ˈˈnɔnbɔ ˗nu kun ˈˈkpɛɛndhö, ˈö ˗kan waa ö ˗bha ˈnën ˗nu ˗an ˗bha. Mira ˗ya ˗pö: «ˈDhɛ n ꞊gɔɔn ˗yö yaa n ˗bha ˈnën ˗nu ꞊plɛ yi to ˈö dho, mɛn ˈˈpɛpɛ ˈö ˗an dhɔɔbhaamɛn ˗ya ˈˈkan ˗an ˗bha ˗zotadhe suu ˈö ˗kë ˗an ˗gɔ, ˗yö ˗kë n ˗gɔ ˈpö. ˗Yö ˗mën n ˈka ꞊dedewo, ˈö n ˈgü ga ˈwɔn ꞊gban ˈka. N zuʋ̈ˈˈ ˗to ˈzlöö, ˈö ˈˈtʋ̈ŋ ˈbha ˗nu ˈka ˈa za dɔ n ˗de ˗bha ꞊dhɛ man ˈnën ˈa˗ ˗kë.» ˗A zuʋ̈ˈˈ ˈˈklʋʋ ˗yö ˗bhɔ, ˈyö ˗tɔ ꞊dhɛ ˗a ꞊gɔɔn ˗yö ˗kan ˗a ˗bha. Mira ˗ya ˗pö ˈzü: «Zuʋ̈dhiʋ̈tɛ ˗kë n ˗bha, ˈö n zuʋ̈ˈˈ ˗kë ˈˈdhiʋ̈˗ ˈˈsu ꞊va ˈˈpiʋ̈. ˈYö ˈa˗ yö ꞊dhɛ ˗mlɛɛn ˈö yaa Zoova waa mɛn ˈˈwɛɛ ˗nu yi ꞊zinŋgü, a˗ shiʋ̈ˈˈ ˗ni ˈgü.» ˗Ya ˗pö ˈwɔn ˈdhɛ bhë ˈya ö ꞊kwaa˗ ˗zü. ˗Zotadhe yaa gbɛ˗ ˈyaa ö ˗gɔ ˈzüdho ö ꞊gɔɔn zii ˗bha ˈka. ˗Yö ö ˗zoyö ꞊dhɛ ˗dhɛkpaɔyi do ˗dho ˗wo, ˈö ö ꞊gɔɔn ˗yö ꞊ɲɔɔn Zoova ˗bha. ˈWɔn ˗nu ˈwo dho kë ˗dhɛkpaɔ dhiʋ̈ˈˈ ˈgü ˈyö Mira ö ˈˈɲan ˗klu ˗an ˗bha. ˈYaa gwan ˗bha, ˈˈkɛɛ ˗yö ö ˗bha ˈnën ˗nu ꞊plɛ bhë ˗an ˗to Zoova ˗dhɔkë ˗ʒian ˗ta. ꞊Dɛɛ, waa ö ˗bha ˈnën ˗nu waa ˗an ˗bha ˈkɔɔmɛn ˗nu ˗wo Zoova ˗dhɔkë ˗ni ˈgü zuʋ̈gblüdhi ˈgü.

18. ˗Mën ˈö ꞊mɔɔn˗ ˗bha ˗yö ga kwa ˈgü ꞊dhɛ kwa ˗bha Zadɔmɛn ˈkpii˗ Zoova ˗dho ˗a kë?

¹⁸ ˗A ˈwɔn dɔ ˗sü ˈö ꞊dhɛ ˗kɔ ˈö ˗Zlan dho za dɔ ˗a ˈka mɛn ˈö ˈdhö ˗a ˗bha ˗yö ˈti ˗dho ˈsü kwa ˗bha bhë, ˗yö kwa zuʋ̈ˈˈ ˈwaannu. Zoova ˈö kwa ˗bha Zadɔmɛn ˈkpii˗ ˈka, yö ˈnën dho yö ˈkpii˗ ˈö ˈˈdhʋ̈ ˗a kë. (Wlɔ. 14:10-12) ˗Yö ꞊mɔɔn˗ ˗bha ˈö ga kwa ˈgü ˈkpakpadhö ꞊dhɛ Zoova ˗dho kwa ˗bha za dɔ tɛan˗ ˗ta. (ˈWun. 18:25; 1 Rois 8:32) ˗Yö ˈti ˗dho ˈwɔn ˈö ˈyaa kpɛnŋdhö ˗a kë toŋtoŋdhö.

19. Zoova ˗bha kpɛnŋdhödhɛ ˈgü, ˗mën ˈö dho ˗a kë?

¹⁹ Kwa ˈˈɲan ˗yö ˈˈtʋ̈ŋ ˈö Zoova dho mɛnbhɩɩdhe ˗nu ˗bha ꞊sɔnŋ yaa ˈgüwɔn ˗nu ꞊gban ˈˈpɛpɛ bho ˗a ˈka kwa ˗bha, ˗a ˗gɔ. ˗A ˈˈtʋ̈ŋ bhë˗ ˈka, kwa zuʋ̈ˈˈ ˈˈklʋʋbhɔwɔn ˗nu waa ˈwɔn ˈˈpɛpɛ ˈwo kwa kwi ꞊sëëbho ˗ni ˈgü, ˗wo ˗dho ˈgo kwa ˗bha ˈpapadhö. (Ps. 72:12-14; ˗Dhɛ. 21:3, 4) Kwa ˗zo ˈti ˗dho ˗da ˗an ˈˈpiʋ̈ ˈzüdho toŋtoŋdhö. Kwa ˈˈɲan ˗yö yi ˈö bhë ˗a ˗gɔ. ˈˈKɛɛ ˈˈsanni ˗yö ˗wo, kwa Zoova ˈˈnuɛ ˗bho ꞊dedewo ꞊faan ˈö˗ nu ˗ni ˈgü kwa ˗dhɛ kö ˈkwa ˗mɔn mɛn ˗nu ˗bhawɔn ˈto ˗sü ˗bha ꞊dhɛ ˗a ˈdhö bhë, ˗a ˗bha.