MAE’N debyg mai Gweddi’r Arglwydd, y weddi enghreifftiol a roddodd Iesu, yw’r weddi y mae Cristnogion yn ei hadrodd amlaf. Serch hynny, nid yw’r rhan fwyaf o bobl sy’n dweud y geiriau yn eu deall yn iawn. Mae miliynau yn dweud y geiriau ar eu cof bob dydd, efallai sawl gwaith y dydd. Ond nid bwriad Iesu oedd i bobl ailadrodd union eiriau’r weddi drosodd a throsodd. Sut rydyn ni’n gwybod?

Ychydig cyn iddo ddweud y weddi honno, dywedodd Iesu ddylwn ni ddim “mwydro ymlaen,” neu ddweud yr un pethau drosodd a throsodd yn ein gweddïau. (Mathew 6:7) A oedd Iesu yn bwriadu inni ddysgu’r weddi ar ein cof a’i hailadrodd? Nac oedd! Roedd Iesu yn ein dysgu ni beth yw’r pethau pwysicaf wrth weddïo. Dewch i ni edrych yn fanylach ar ei eiriau ym Mathew 6:9-13, BCND.

Mae Iesu yn atgoffa ei ddilynwyr y dylen nhw weddïo ar ei Dad, Jehofa. A ydych chi’n gwybod pam mae enw Duw mor bwysig, a pham mae angen ei sancteiddio neu ei anrhydeddu?

O ddechrau hanes dyn ar y ddaear, mae enw Duw wedi cael ei bardduo. Mae gelyn Duw, Satan, wedi honni bod Jehofa yn dweud celwyddau, a’i fod yn hunanol ac nad oes dim hawl ganddo i reoli. (Genesis 3:1-6) Mae llawer o bobl hefyd yn cyhuddo Duw o fod yn greulon ac yn anfaddeugar. Mae rhai yn gwadu mai Duw yw’r Creawdwr. Mae eraill wedi tynnu enw Duw allan o’u cyfieithiadau o’r Beibl a gwahardd pobl rhag ei ddefnyddio.

Mae’r Beibl yn dangos y bydd Duw yn cywiro hyn i gyd drwy glirio ei enw. (Eseciel 39:7) Bydd hyn hefyd yn datrys problemau pawb ar y Ddaear. Ym mha ffordd? Mae geiriau nesaf Iesu yn rhoi’r ateb.

Heddiw, mae llawer o ddryswch ym myd crefydd ynglŷn â beth yw Teyrnas Dduw. Ond fe wyddai’r bobl a glywodd weddi Iesu fod Duw wedi addo anfon y Meseia i sefydlu Teyrnas a fyddai’n newid y byd. (Eseia 9:6, 7; Daniel 2:44) Bydd y Deyrnas yn sancteiddio enw Duw drwy brofi bod Satan yn gelwyddog. Caiff wared ohono ac o’r holl ddrwg y mae wedi ei wneud. Bydd Teyrnas Dduw yn rhoi terfyn ar ryfel, salwch, newyn, a hyd yn oed marwolaeth. (Salm 46:9; 72:12-16; Eseia 25:8; 33:24) Bob tro rydych chi’n gweddïo am i Deyrnas Dduw ddod, rydych chi’n gweddïo am wireddu’r addewidion hyn.

Mae geiriau Iesu yn dangos y bydd ewyllys Duw yn cael ei wneud ar y ddaear fel y mae’n cael ei wneud yn y nef. Nid oes neb wedi rhwystro ewyllys Duw yn y nefoedd. Mae Mab Duw wedi bwrw Satan a’i gythreuliaid allan o’r nef. (Datguddiad 12:9-12) Mae’r tri chais cyntaf yng ngweddi Iesu yn ein helpu ni i ddeall bod ewyllys Duw yn fwy pwysig na’n hewyllys ni. Mae ewyllys Duw yn sicrhau’r lles mwyaf i’r holl greadigaeth. A dyna pam dywedodd Iesu, a oedd yn ddyn perffaith, wrth ei Dad: “Paid gwneud beth dw i eisiau, gwna beth rwyt ti eisiau.”—Luc 22:42.

Dangosodd Iesu ein bod ni hefyd yn gallu gweddïo ar Dduw am ein hanghenion pob dydd. Yn wir, mae gwneud hyn yn ein helpu ni i gofio mai Jehofa yw’r un “sy’n rhoi bywyd ac anadl a phopeth arall i bawb.” (Actau 17:25) Mae’r Beibl yn dangos ei fod yn dad cariadus sydd wrth ei fodd yn helpu ei blant. Ond fel rhiant da, ni fydd Duw yn rhoi i’w blant unrhyw beth a fyddai’n ddrwg iddyn nhw.

Ydyn ni wir angen i Dduw faddau i ni? Nid yw llawer o bobl heddiw yn gwybod beth yw pechod a pha mor ddifrifol ydyw. Ond, yn ôl y Beibl, pechod sydd y tu ôl i’r problemau gwaethaf yn y byd oherwydd dyna’r rheswm sylfaenol i bobl farw. Gan ein bod ni wedi cael ein geni yn amherffaith, rydyn ni’n pechu drwy’r amser. Yr unig ffordd i ni gael bywyd tragwyddol yw drwy dderbyn maddeuant Duw. (Rhufeiniaid 3:23; 5:12; 6:23) Cysur yw gweld beth mae’r Beibl yn ei ddweud: “Rwyt ti, ARGLWYDD, yn dda ac yn maddau.”—Salm 86:5.

Ydych chi’n deall pa mor bwysig yw cael ein hamddiffyn gan Dduw? Mae llawer o bobl yn gwrthod credu bod “yr Un drwg,” Satan, yn bodoli. Ond roedd Iesu yn dysgu bod Satan yn bodoli, a’i alw yn ‘dywysog y byd hwn.’ (Ioan 12:31; 16:11) Satan sy’n rheoli’r byd hwn. Mae wedi dylanwadu yn ddrwg arno, ac y mae eisiau dylanwadu arnoch chi hefyd, i’ch cadw rhag cael perthynas agos â’ch Tad, Jehofa. (1 Pedr 5:8) Ond mae Jehofa yn gryfach na Satan ac mae’n barod i amddiffyn pobl sydd yn Ei garu.

Nid yw’r crynodeb hwn o weddi Iesu yn trafod pob peth y gallwn ni weddïo yn ei gylch. Cofiwch, mae 1 Ioan 5:14 yn dweud am Dduw: “Mae e’n gwrando arnon ni os byddwn ni’n gofyn am unrhyw beth sy’n gyson â’i fwriad e.” Felly, peidiwch â meddwl nad yw eich problemau chi yn ddigon pwysig i weddïo amdanyn nhw.—1 Pedr 5:7.

Ond a ydy pryd a lle rydyn ni’n gweddïo yn bwysig?