Jiñi taqʼuin muʼ bʌ lon j cʼʌn chaʼan mic mel jiñi queʼtel lojon jiñʌch muʼ bʌ i yʌcʼob tiʼ pejtelel i pusicʼal jiñi i testigojob Jehová. a Mi an juntiquil yom bʌ i yʌcʼ i taqʼuin loqʼuem bʌ tiʼ pusicʼal, miʼ mejlel i yotsan yaʼ ti alʌ caja am bʌ yaʼ tiʼ yotlel lon c tempa bʌ tac. Cheʼ jaʼel an tac yambʌ bajcheʼ miʼ mejlel la cʌcʼ jiñi taqʼuin i yaʼ miʼ tsictesʌntel yaʼ baqui miʼ yʌl: «Com cʌcʼ taqʼuin chaʼan coltaya». Ti jujuntiquil yujil mi yom i yʌcʼ i taqʼuin chaʼan mi cʼʌjñel yaʼ ti congregación, chaʼan miʼ chojquel majlel chaʼan bʌ i yeʼtel Dios tiʼ pejtelel pañimil o miʼ mejlel i yʌjqʼuel tiʼ chaʼchajplel.

 Maʼañic miʼ cʼajtintel bajcheʼ cʼamel taqʼuin yom miʼ yʌc jujuntiquil i maʼañic miʼ cʼajtintel diezmo (2 Corintios 9:7). Ti lon c tempa bʌ tac maʼañic miʼ cʼajtintel taqʼuin yicʼot mach tojbilic la cochib. I maʼañic ñucoʼ bʌ i yeʼtel muʼ bʌ i chʼʌmob i tojol cheʼ bʌ an majqui miʼ chʼʌmjaʼ, miʼ ñujpuñel o yan tac bʌ. Maʼañic mi lon c chon waj yicʼot yan tac bʌ chaʼan mic taj lon taqʼuin. Cheʼ jaʼel, maʼañic mic mel lojon rifa, alas o qʼuiñijel tac chaʼan mic tempan lojon taqʼuin, mi muqʼuicto lon j cʼajtiben yambʌ lac piʼʌlob. Maʼañic miʼ yʌjqʼuel ti cʌñol i cʼabaʼ jiñi muʼ bʌ i yʌcʼob jiñi taqʼuin tiʼ pejtelel i pusicʼalob (Mateo 6:2-4). I maʼañic anuncio tac ti lon c página chaʼan Internet yicʼot ti lon c jun tac.

 Tiʼ jujumpʼejl uw miʼ tsictesʌntel ti pejtelel jiñi congregación tac jaypʼejl tsaʼ ochi taqʼuin yicʼot jaypʼejl tsaʼ cʼʌjñi. Miʼ qʼuejlel jaʼel chaʼan jiñi taqʼuin am bʌ ti congregación utsʼatʌch bajcheʼ woliʼ cʼʌjñel (2 Corintios 8:20, 21).

•   Alʌ caja tac: Miʼ mejlel a toj otsan jiñi taqʼuin o miʼ mejlel a wotsan ti cheque yaʼ ti alʌ caja tac am bʌ tiʼ Yotlel tempa bʌ, i Yotlel colem tempa bʌ tac yicʼot yan tac bʌ baqui mic tempan lon c bʌ.

•   Ti Internet: Ti cabʌl país tac miʼ mejlel ti cʼʌjñel jiñi página «Com cʌqʼuen c donación jiñi i testigojob Jehová» chaʼan miʼ yʌcʼob i donación yicʼot tarjeta de crédito o débito, transferencia ti banco o yan tac bʌ. b An i testigojob Jehová muʼ bʌ i tsʼita tʼoxob i taqʼuin jujumpʼejl uw i muqʼuix i bajñel ñumel jiñi taqʼuin cheʼ miʼ cʼʌñob jiñi am bʌ ti Internet (1 Corintios 16:2).

•   Taqʼuin wʌn ñaʼtʌbilix bʌ: An yambʌ donación tac yom bʌ miʼ wʌn ñaʼtʌntel yicʼot miʼ chajpʌntel yicʼot juntiquil yujil bʌ chaʼan jiñi. Jiñi mi caj i coltañet a cʼʌn ti wen chuqui tac albil chaʼan jiñi taqʼuin muʼ bʌ la cʌcʼ yaʼ ti a país. Cabʌlob wen miʼ qʼuelob cheʼ miʼ wʌn chajpañob jiñi donación muʼ bʌ i mejlel i yʌcʼob cheʼ cuxulobto yicʼot cheʼ bʌ miʼ chʌmelob. Miʼ mejlel a pejcan jiñi sucursal i chaʼan i testigojob Jehová lʌcʼʌl bʌ an yaʼ baqui chumulet i maʼ cʼajtin bajcheʼ miʼ mejlel a mel jiñi donación ti:

  •   cuenta bancaria

  •   seguro yicʼot plan de jubilación

  •   bienes raíces

  •   acciones yicʼot bono

  •   testamento yicʼot fideicomiso

 Mi a wom a ñumen cʌn bajcheʼ tac yambʌ miʼ mejlel a mel a donación yaʼ baqui chumulet, cucu yaʼ ti página «Com cʌqʼuen c donación jiñi i testigojob Jehová».