Cheʼʌchi, come Dios yom chaʼan mi lac tempan lac bʌ chaʼan mi lac chʼujutesan. Jiñi Biblia miʼ yʌl: «Laʼ laj comol ñaʼtan lac bʌ chaʼan mi lac ñijcʌben lac bʌ lac pusicʼal lac pʌs cʼuxbiya yicʼot chaʼan mi lac mel chuqui tac wen, pero mach laj cʌy lac tempan lac bʌ» (Hebreos 10:24, 25).

 Jesús tsiʼ yʌlʌ: «Cheʼ bajcheʼ iliyi tiʼ pejtelelob mi caj i ñaʼtañob chaʼan xcʌntʼañetla c chaʼan: Mi mucʼʌch laʼ cʼuxbin laʼ bʌ» (Juan 13:35). Chaʼan jiñi xcʌntʼañob i chaʼan Jesús miʼ mejlel i pʌsbeñob i bʌ cʼuxbiya yomʌch miʼ tempañob i bʌ ti congregación tac chaʼan temel miʼ chʼujutesañob Dios (1 Corintios 16:19). Come juntemelob, miʼ sujtelob ti jumpʼejl familia am bʌ tiʼ pejtelel pañimil (1 Pedro 2:17).

¿Jasʌl ba cheʼ miʼ la cʌl chaʼan añʌch lac ñopbal?

 Jiñi Biblia miʼ yʌl chaʼan yom mi lac tempan lac bʌ chaʼan mi lac chʼujutesan Dios. Pero maʼañic baqui miʼ yʌl chaʼan jasʌl yom mi la cʌl chaʼan añʌch lac ñopbal chaʼan wen miʼ qʼuelonla Dios. Jiñi lac ñopbal yomʌch miʼ qʼuextan jiñi lac melbal. Jiñi Biblia miʼ yʌl: «Tiʼ wut jiñi lac Dios yic’ot lac Tat, jiñi sʌc bʌ ñopbalʌl yicʼot mach bʌ añic i bibiʼlel jiñʌch iliyi: Cheʼ mi laj cʌntan jiñi mebaʼob yicʼot jiñi mebaʼ xʼixicob cheʼ bʌ añob ti wocol yicʼot maʼañic mi lac toyben i bibiʼlel jiñi pañimil» (Santiago 1:27, nota).