Jehová tsiʼ yʌcʼʌ jiñi i Yalobil, Jesús, chaʼan miʼ coltañonla loqʼuel ti jiñi mulil yicʼot chʌmel. Jiñi Biblia miʼ yʌl chaʼan jiñi i chʼichʼel Jesús jiñʌch i tojol jiñi laj coltʌntel (Efesios 1:7; 1 Pedro 1:​18, 19). Jin chaʼan, Jesús tsiʼ yʌlʌ chaʼan tsaʼ tili chaʼan miʼ «yʌcʼ i cuxtʌlel bajcheʼ i tojol i coltʌntel cabʌlob» (Mateo 20:28).

¿Chucoch i cʼʌjñibalʌch «mi laj coltʌntel»?

 Jehová Dios toj tsiʼ mele Adán, mach xmulilic. Miʼ mejlel ti chumtʌl tiʼ pejtelel ora, pero mach cheʼic tsaʼ ujti come tsiʼ ñusʌbe i tʼan Dios (Génesis 3:​17-​19). Jiñi i yalobilob Adán xmulilob tsaʼ sujtiyob (Romanos 5:​12). Jin chaʼan, jiñi Biblia miʼ yʌl chaʼan Adán yicʼot jiñi i pʼolbalob xyaj eʼtelob tsaʼ sujtiyob i chaʼan jiñi mulil (Romanos 7:​14). Maʼañic majqui miʼ mejlel i chaʼ taj jiñi tsaʼ bʌ i sʌtʌ Adán come luʼ xmulilonla (Salmo 49:​7, 8).

 Dios tsiʼ pʼunta jiñi i pʼolbalob Adán come wen wocol jach bajcheʼ añob (Juan 3:​16). Come Jehová juntiquilʌch Dios toj bʌ, mach cheʼic jach tsiʼ toʼo acʼʌ ti ñumel jiñi mulil (Salmo 89:14; Romanos 3:​23-​26). Jehová tsiʼ yʌcʼʌ jiñi i tojol cheʼ bajcheʼ yom chaʼan miʼ ñusʌntel lac mul yicʼot chaʼan miʼ jisʌntel come miʼ cʼuxbiñonla (Romanos 5:​6-8).

¿Chuquiyes jiñi i tojol laj coltʌntel?

 Yaʼ ti Biblia ili tʼan an uxp’ej i sujmlel:

1.   Jiñi i tojol muʼ bʌ i yʌjqʼuel (Números 3:​44- 48).

2.   Jiñʌch muʼ bʌ i yʌjqʼuel chaʼan, miʼ cojlel juntiquil lac piʼʌl o chaʼan miʼ chaʼ tajbentel qʼuexol chuqui tsaʼ bʌ sajti (Éxodo 21:30).

3.   Jiñi i tojol yom bʌ miʼ yʌjqʼuel cheʼʌch cʼamel yom cheʼ bajcheʼ jiñi tsaʼ bʌ sajti.

 Laʼ laj qʼuel bajcheʼ miʼ taj i bʌ ili uxchajp yicʼot cheʼ bʌ Jesús tsiʼ yʌcʼʌ i cuxtʌlel.

1.   Jiñi i tojol muʼ bʌ i yʌjqʼuel. Jiñi Biblia miʼ yʌl chaʼan jiñi xñoptʼañob tsaʼ mʌjñiyob (1 Corintios 6:​20; 7:​23). Jiñi i tojol tsaʼ bʌ ajqʼui jiñʌch i chʼichʼel Jesús, cheʼ bajcheʼ jiñi, Dios tsiʼ «mʌñʌ jiñi quixtañujob tilemoʼ bʌ tiʼ pejtelel pʼolbalʌl, tʼan tac, alʌ tejclum yicʼot colem tejclum tac» (Apocalipsis 5:8, 9).

2.   Laj cojlel. Jiñi i cuxtʌlel Jesús tsiʼ locʼsayonla ti mulil (1 Corintios 1:​30; Colosenses 1:​14; Hebreos 9:​15).

3.   Jiñi i tojol lajal yom bajcheʼ jiñi tsaʼ bʌ sajti. Jiñi i cuxtʌlel tsaʼ bʌ i yʌcʼʌ Jesús lajalʌch bajcheʼ tsaʼ bʌ i sʌtʌ Adán, mach xmulilic (1 Corintios 15:21, 22, 45, 46). Jiñi Biblia miʼ yʌl: «Cheʼ bajcheʼ cabʌlob tsaʼ sujtiyob ti xmulil tiʼ caj i ñusatʼan juntiquil wiñic [Adán] cheʼ jaʼel, tiʼ caj tsiʼ jacʼʌ tʼan juntiquil wiñic [Jesucristo] cabʌlob mi caj i sujtelob ti toj» (Romanos 5:19). Ili miʼ coltañonla lac chʼʌmben i sujm chucoch jiñi i cuxtʌlel juntiquil jach wiñic miʼ locʼsan ti mulil cabʌl lac piʼʌlob. Jin chaʼan jiñi i cuxtʌlel tsaʼ bʌ i yʌcʼ Jesús tsiʼ tojo lac mul (1 Timoteo 2:5, 6).