Colosenses 3:1-25
3 Pero, mi jatetla tsaʼ chʼojyesʌntiyetla* laʼ wicʼot Cristo, chʌn sʌclanla chuqui tac an ti chan, yaʼ baqui buchul Cristo tiʼ ñoj Dios.
2 Acʼʌla laʼ ñaʼtʌbal ti chuqui tac an ti chan, mach jiñic ti chuqui tac an ti pañimil.
3 Come jatetla tsaʼ chʌmiyetla, i jiñi laʼ cuxtʌlel mucul yicʼot Cristo come ili lajalʌch yicʼot jiñi yom bʌ Dios.
4 Cheʼ bʌ Cristo, jiñi laj cuxtʌlel, miʼ pʌs i pʼʌtʌlel, mi caj i tsictiyel jaʼel chaʼan jatetla an laʼ chaʼan jiñi i ñuclel.
5 Jin chaʼan, tsʌnsanla jiñi laʼ bʌcʼtal chaʼan maʼañic mi laʼ yajlel ti tsʼiʼlel,* chaʼan maʼañic mi laʼ mel chuqui bibiʼ, chaʼan jiñi i cʌlʌx mulʌntel piʼleya maʼañic miʼ mʌlbeñetla,* chaʼan maʼañic mi laʼ ñaʼtan mach bʌ weñic yicʼot chaʼan maʼañic mi laʼ cʌlʌx mulan chuqui tac an, come jiñi lajal bajcheʼ i chʼujutesʌntel melbil tac jach bʌ dios.
6 Tiʼ caj tac iliyi mi caj i tilel i michʼajel Dios.
7 Ti ñaxan jatetla ñʌmʌl laʼ mel jaʼel jiñi.
8 Pero wʌle cʌyʌla pejtelel iliyi: Michʼajel, cʌlʌx michʼajel, jontolil yicʼot cʼux tac bʌ tʼan, i mach loqʼuic tsucu tʼan ti laʼ wej.
9 Mach laʼ lotin laʼ bʌ. Cʌyʌla jiñi ñoxix bʌ laʼ melbal tac yicʼot jiñi ñʌmʌl bʌ laʼ mel,
10 i lʌpʌla tsijiʼ bʌ laʼ melbal, muʼ bʌ i yʌqʼueñonla Dios cheʼ bʌ mi lac ñumen cʌn. Cheʼ bajcheʼ jiñi miʼ tsijibʌyel jiñi lac melbal tac chaʼan ñumen lajal bajcheʼ i chaʼan Dios
11 i baqui maʼañic mi juntiquilic griego mi judío, mi tsepbil bʌ i pʌchʌlel* yicʼot mach bʌ tsepbilic i pʌchʌlel, mi chʼoyol ti yambʌ país mi escita,* mi xyaj eʼtel mi libre, Cristo jiñʌch pejtelel chuqui an yicʼot an tiʼ tojlel pejtelelob.
12 Jin chaʼan, bajcheʼ yajcʌbiletbʌla i chaʼan Dios, chʼujuletbʌla yicʼot cʼuxbibiletbʌla, pʌsʌla jiñi ñuc bʌ pʼuntaya, laʼ wutslel, laʼ pecʼlel, mach laʼ wotsan laʼ bʌ ti wocol yicʼot pʌsʌla laʼ pijt.
13 Chʌn cuchben laʼ bʌ laʼ sajtemal yicʼot ñusʌben laʼ bʌ laʼ mul tiʼ pejtelel laʼ pusicʼal cheʼto jaʼel mi an majqui miʼ taj i sajtemal ti laʼ tojlel. Jehová* tsiʼ ñusʌbeyetla laʼ mul tiʼ pejtelel i pusicʼal, jin chaʼan cheʼʌch yom mi laʼ mel jaʼel.
14 Pero, mach cojic jach iliyi, pʌsʌla cʼuxbiya jaʼel, come jiñi cʼuxbiya mucʼʌch i tem lac piʼʌlob tiʼ sujm.
15 I laʼ ajñic ti laʼ pusicʼal jiñi i ñʌchʼtʌlel Cristo, come jatetla tsaʼ pʌjyiyetla ti jiñi ñʌchʼtʌlel chaʼan mi laʼ sujtel ti jumpʼejl jach bʌcʼtalʌl. I pʌsʌla chaʼan mucʼʌch laʼ wʌcʼ wocolix laʼ wʌlʌ.
16 Laʼ junyajl bujtʼic laʼ pusicʼal tiʼ cʌntesa tac Cristo. Cheʼ bajcheʼ jiñi mi caj laʼ taj laʼ ñaʼtʌbal. Chʌn cʌntesan laʼ bʌ yicʼot tijicñesʌben laʼ bʌ laʼ pusicʼal* ti salmo tac, ti cʼay tac muʼ bʌ i yʌqʼuen i ñuclel Dios yicʼot cʼay tac chaʼan bʌ chʼujutesaya yicʼot cʼay tac chaʼan mi la cʌqʼuen wocolix i yʌlʌ. Cʼʌyibenla cʼay tac Jehová* ti laʼ pusicʼal.
17 Pejtelel chuqui mi laʼ mel, mach yʌlʌyic mi ti laʼ tʼan o ti laʼ melbal, laj melela tiʼ cʼabaʼ lac Yum Jesús, i tiʼ tojlel aqʼuenla wocolix i yʌlʌ Dios jiñi Tatʌl.
18 Ijñamʌlob, chucu laʼ bʌ ti laʼ ñoxiʼal, cheʼ bajcheʼ yom miʼ mejlel ti lac Yum.
19 Ñoxiʼaletʌlbʌla, chʌn cʼuxbinla laʼ wijñam i mach cʌlʌx michʼaquetla* laʼ wicʼot.
20 Alobob,* jacʼbenla i tʼan laʼ tat laʼ ñaʼ tiʼ pejtelel, come jiñi miʼ mulan lac Yum.
21 Tatʌlob,* mach laʼ techben i michʼajel laʼ walobilob, chaʼan maʼañic miʼ yubiñob i chʼijyemlel.
22 Xyaj eʼtelob, jacʼbenla i tʼan jiñi laʼ yumob, mach jiñic jach cheʼ bʌ woli i qʼueletobla chaʼan jach utsʼat mi laʼ qʼuejlel ti wiñicob, tiʼ pejtelelʌch laʼ pusicʼal yom mi laʼ mel, yicʼot i bʌcʼñʌntel Jehová.*
23 Pejtelel chuqui mi laʼ mel, melela tiʼ pejtelel laʼ pusicʼal yicʼot laʼ pʼʌtʌlel cheʼ bajcheʼ i chaʼañʌch Jehová* i mach i chaʼañic wiñicob,
24 come laʼ wujil chaʼan Jehová* jiñʌch muʼ bʌ caj i yʌqʼueñetla laʼ majtan. Yom xyaj eʼteletla i chaʼan jiñi lac Yum, Cristo.
25 Jiñi muʼ bʌ i mel mach bʌ weñic tiʼ sujm mi caj i yʌqʼuentel i toj jiñi tsaʼ bʌ i mele, i maʼañic i yajcʌntel.
Nota tac
^ O «tejchesʌntiyetla».
^ Ti griego, pornéia. Qʼuele jiñi Glosario, tsʼiʼlel.
^ O «jotbeñetla».
^ Qʼuele jiñi Glosario, tsep pʌchʌlel.
^ Ti wajali ili tʼan miʼ cʼʌjñel chaʼan miʼ tajtʌl ti tʼan jiñi lac piʼʌlob maʼañic bʌ miʼ qʼuejlelob ti ñuc tiʼ caj bajcheʼ yilalob i melbal.
^ Qʼuele jiñi Glosario.
^ O «tiqʼui laʼ bʌ».
^ Qʼuele jiñi Glosario.
^ O «mach yomic tsʌtsetla».
^ O «Alpʼeñelob».
^ Ila jin woliʼ tajtʌl ti tʼan jiñi papájʌlob.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
