Apocalipsis 18:1-24
18 Cheʼ jiñi tsaʼ j qʼuele yambʌ ángel wen am bʌ i pʼʌtʌlel woli bʌ i jubel tilel yaʼ ti panchan, sʌc jaman tsaʼ cʌyle jiñi pañimil chaʼan i ñuclel.
2 Tsiʼ yʌlʌ ti cʼam bʌ tʼan: «¡Tsaʼix yajli! ¡Jiñi Ñuc bʌ Babilonia tsaʼix yajli! Tsaʼix sujti tiʼ yotot xibajob, yaʼ baqui miʼ mujcun i bʌ pejtelel bibiʼ bʌ espíritujob yicʼot pejtelel xmateʼmut bibiʼ bʌ yicʼot tsʼaʼlebil bʌ.
3 Come pejtelel tejclum tsiʼ yʌqʼuesayob* i bʌ ti jiñi vino chaʼan bʌ i cʌlʌx mulʌntel tsʼiʼlel, jiñi reyob ti pañimil tsiʼ chaʼleyob tsʼiʼlel* yicʼot jiñi xʼixic, jiñi xchoñoñelob ti pañimil tsaʼ sujtiyob ti rico tiʼ coltaya jiñi xʼixic mach bʌ añic miʼ quisñin i tempan chuqui lets tac bʌ i tojol».
4 I tsaʼ cubi yambʌ tʼan tilem bʌ ti panchan woli bʌ i yʌl: «C tejclum, loqʼuenla yaʼi mi mach laʼ womic mulil laʼ wicʼot i mi mach laʼ womic mi laʼ tʼox aqʼuentel jiñi i wocol tac.
5 Come jiñi i mul tac tsaʼix tempʌyi cʼʌlʌl ti panchan, i Dios tsaʼix i cʼajtesa jiñi mach bʌ weñic i melbal tac.*
6 Melela tiʼ tojlel cheʼ bajcheʼ tsiʼ mele tiʼ tojlel yambʌlob. Cheʼʌchi, chaʼyajl i ñumelal yom mi laʼ qʼuextʌben chuqui tac tsiʼ mele. Ti jiñi copa baqui tsiʼ chajpa jiñi yom bʌ miʼ jajpel, chaʼyajlto i ñumelal yom mi laʼ chajpʌben yom bʌ miʼ jap.
7 Aqʼuenla i ñusan wocol yicʼot chʼijyemlel cheʼ bajcheʼ cʼamel i ñuclel tsiʼ taja yicʼot cheʼ bajcheʼ cʼamel jiñi wen lets tac bʌ i tojol i chubʌʼan mach bʌ añic miʼ quisñin. Come maʼañic miʼ cʌy i yʌl tiʼ pusicʼal: ‹Buchulon bajcheʼ yumʌl bʌ xʼixic, mach mebaʼoñic i maʼañic baʼ ora mi caj cubin c chʼijyemlel›.
8 Jin chaʼan ti jumpʼejl jach qʼuin mi caj i tilel wocol tac tiʼ tojlel, chʌmel, chʼijyemlel yicʼot wiʼñal, i mi caj i junyajl pulel ti cʼajc. Come Jehová* Dios, jiñi tsaʼ bʌ i chaʼle meloñel tiʼ tojlel, pʼʌtʌlʌch».
9 «Cheʼ bʌ jiñi reyob ti pañimil tsaʼ bʌ i chaʼleyob tsʼiʼlel* yicʼot jiñi xʼixic i tsiʼ ñusayob i bʌ ti jiñi lets tac bʌ i tojol i chubʌʼan miʼ qʼuelob jiñi i butsʼil i cʼʌcʼal, miʼ cajelob ti uqʼuel i mi caj i jatsʼob i tajn tiʼ cʼuxel tiʼ caj jiñi xʼixic.
10 Mi caj i ñajti waʼtʌlob cʌytʌl tiʼ caj miʼ bʌcʼñañob jiñi wocol woli bʌ i ñusan. Mi caj i yʌlob: ‹¡Pʼumpʼuñet jax! ¡Pʼumpʼuñet jax, jatet, jiñi ñuc bʌ tejclum, Babilonia, jiñi pʼʌtʌl bʌ tejclum! ¡Come ti jumpʼejl jach hora tsaʼ aqʼuentiyet a toj a mul!›».
11 «Cheʼ jaʼel, jiñi xchoñoñelob ti pañimil miʼ cajelob ti uqʼuel yicʼot mi caj i yubiñob i cʼuxel i pusicʼal tiʼ caj jiñi xʼixic come maʼañix majqui mi caj i mʌmbeñob jiñi i cuch,
12 jumpʼejl cuchʌl am bʌ i chaʼan oro, plata, utsʼatax bʌ xajlel tac,* perla tac, wem bʌ lino, púrpura bʌ pisil, seda yicʼot icʼ mulan bʌ chʌchʌc pisil, pejtelel chuqui melbil bʌ ti teʼ xojocña bʌ i yujtsʼil yicʼot pejtelel chuqui melbil bʌ ti marfil yicʼot ti utsʼatax bʌ teʼ, cobre, hierro o mármol,
13 cheʼ jaʼel an canela, xojocña bʌ i yopol teʼ am bʌ ti India, pom, xojocña bʌ aceite, olíbano, vino, olivo aceite, wem bʌ harina, trigo, wacax tac, tiñʌmeʼ tac, caballo tac, carreta tac, xyaj eʼtelob yicʼot yambʌ quixtañujob.
14 Cheʼʌchi, jiñi wen tac bʌ chubʌʼan muʼ bʌ a mulan tsaʼix i cʌyʌyet i pejtelel jiñi choñoñelʌl tac wen mulantic jax bʌ yicʼot wen utsʼatax bʌ tsaʼix jili. Maʼañix baʼ ora mi caj i tilel».
15 «Jiñi tsaʼ tac bʌ i choñoyob iliyi, tsaʼ bʌ sujtiyob ti rico tiʼ coltaya jiñi xʼixic, mi caj i ñajti waʼtʌlob cʌytʌl tiʼ caj miʼ bʌcʼñañob jiñi wocol woli bʌ i ñusan. Miʼ cajelob ti uqʼuel yicʼot mi caj i yubiñob i cʼuxel i pusicʼal,
16 mi caj i yʌlob: ‹¡Pʼumpʼuñet jax! ¡Pʼumpʼuñet jax, jiñi ñuc bʌ tejclum, lʌpʌl bʌ i chaʼan wem bʌ lino, chʌchʌc bʌ i pislel mero icʼmulan bʌ yicʼot wen chʌchʌc bʌ yicʼot an i chʼʌjlib tac melbil bʌ ti oro, ti utsʼatax bʌ xajlel tac yicʼot perla tac!
17 ¡Come ti jumpʼejl jach hora tsaʼ jisʌnti pejtelel jiñi ñuc tac bʌ chubʌʼañʌl!›».
«I pejtelel jiñi i capitán barco tac, jiñi mucʼoʼ bʌ ti xʌmbal ti barco yicʼot jiñi xʼeʼtelob ti barco, i pejtelel jiñi muʼ bʌ i chaʼleñob eʼtel ti mar chaʼan miʼ tajob taqʼuin tsaʼ ñajti waʼleyob cʌytʌl.
18 I cheʼ bʌ tsiʼ qʼuelbeyob i butsʼil i cʼʌcʼal, tsiʼ yʌlʌyob ti cʼam bʌ tʼan: ‹¡¿Baqui bʌ tejclum lajal bajcheʼ jiñi ñuc bʌ tejclum?!›.
19 Woliʼ mujlañob i jol ti tsʼubejn, i cheʼ bʌ woliyob ti uqʼuel yicʼot i yubiñob i cʼuxel i pusicʼal, woliʼ yʌlob ti cʼam bʌ tʼan: ‹¡Pʼumpʼuñet jax! ¡Pʼumpʼuñet jax, jiñi ñuc bʌ tejclum, baqui wocolix i yʌlʌ a chubʌʼan tsaʼ sujtiyob ti rico pejtelel jiñi añoʼ bʌ i barco yaʼ ti mar! ¡Come ti jumpʼejl jach hora tsaʼ jisʌnti!›».
20 «¡Panchan, ubin a tijicñʌyel chaʼan chuqui tsiʼ chaʼle! ¡Ubinla laʼ tijicñʌyel jaʼel jatetla chʼujuletbʌla, apóstoletbʌla yicʼot xʼaltʼañetbʌla! Come Dios tsaʼix i coltayetla cheʼ tsiʼ chaʼle meloñel tiʼ tojlel jiñi xʼixic».
21 Juntiquil pʼʌtʌl bʌ ángel tsiʼ chʼuyu jumpʼejl xajlel cheʼ bʌ yilal bajcheʼ colem xajlel chaʼan bʌ molino, tsiʼ choco ochel ti mar i tsiʼ yʌlʌ: «Cheʼ bajcheʼ iliyi, ti ora, mi caj i chojquel jubel Babilonia jiñi ñuc bʌ tejclum, i maʼañix baʼ ora mi caj lac chaʼ qʼuel.
22 Maʼañix baʼ ora mi caj i yubintel ti a tojlel jiñi xcʼayob muʼ bʌ i ñijcañob i yarpa, jiñi muʼ bʌ i ñijcañob música, jiñi muʼ bʌ i wusob flauta o trompeta. I maʼañix baʼ ora mi caj i qʼuejlel juntiquil muʼ bʌ i mel baqui jach bʌ eʼtel. Maʼañix baʼ ora mi caj i yubintel miʼ sub i bʌ jiñi xajlel chaʼan bʌ molino.
23 Maʼañix baʼ ora mi caj i tsʼʌjyel ti a tojlel i cʼʌcʼal mi jumpʼejlic lámpara mi muqʼuicto caj i yubintel i tʼan juntiquil novio o novia. Come jiñi xchoñoñelob a chaʼan jiñobʌch jiñi ñumen ñucoʼ bʌ ti pañimil yicʼot tsaʼ loti pejtelel jiñi tejclum tiʼ caj maʼ mel chaʼan bʌ espiritismo.*
24 Cheʼʌchi, tiʼ tojlel jiñi xʼixic tsaʼ tajle i chʼichʼel jiñi xʼaltʼañob, jiñi chʼujuloʼ bʌ yicʼot pejtelel jiñi tsaʼ bʌ tsʌnsʌntiyob ti pañimil».
Nota tac
^ O «qʼuixñesayob».
^ Ti griego, pornéia. Qʼuele jiñi Glosario, tsʼiʼlel.
^ O «i jontolil».
^ Qʼuele jiñi Glosario.
^ Ti griego, pornéia. Qʼuele jiñi Glosario, tsʼiʼlel.
^ O «tun tac».
^ O «wujt».
