“Mon’n esey lir Labib me mon santi ki mon pa pou kapab akoz i sitan en gro liv!”​—Briana, 15 an.

Eski ou santi koumsa? Sa lartik i kapab ed ou!

•  Akoz mon devret lir Labib?

•  Ki mannyer mon devret lir Labib?

•  Ki lezot zenn i dir?

Eski lir Labib i paret boring pour ou? Si wi, nou kapab konpran. Petet ou mazin Labib konman en liv ki annan sepa konbyen paz, lekritir i ptipti e napa ni menm en portre. Alor i paret pli gou pour get televizyon ek film!

Me mazin li koumsa: Meton ou vwar en vye bwat trezor, pa ou ti pou anvi konnen kwa ki ladan?

Labib i zis parey sa bwat trezor. Son lasazes i parey bann perl presye ki kapab ed ou

• Fer bann bon desizyon

• Annan en bon relasyon avek ou paran

• Fer bann pli bon zanmi

• Fer fas avek presyon

Ki mannyer en vye liv i kapab ed nou ozordi? Sa i akoz Labib “i enspire par Bondye.” (2 Timote 3:16) Sa i vedir ki konsey ki dan Labib i sorti kot sa pli bon Sours posib.

En premye fason se pour lir Labib depi konmansman ziska finisyon. Sa pou donn ou en nide zeneral lo mesaz ki trouve dan Labib. I annan plizyer fason pour lir Labib. Annou vwar de legzanp:

•  Ou kapab lir sa 66 liv dan lord ki i ete dan Labib, depi Zenez ziska Revelasyon.

•  Ou kapab lir Labib dan lord kronolozik ki vedir dan sa lord ki bann levennman ti vreman arive.

Led: Seksyon 8 dan sa pti liv En led pour etidye Parol Bondye i donn en lalis kronolozik konsernan bann levennman enportan dan lavi Zezi lo later.

En dezyenm fason pour lir Labib i swazir en resi ki relye avek en problenm ou pe fer fas avek. Par egzanp:

• Eski ou ti a kontan ganny bann zanmi ki diny konfyans? Lir zistwar Zonatan ek David. (1 Samyel, sapit 18-20) Apre servi sa worksheet “How to Find Loyal Friends” pour aprann bann leson pratik dan sa resi.

• Eski ou ti a kontan ranforsi ou abilite pour reziste tantasyon? Lir zistwar lo ki mannyer Zozef ti reziste tantasyon. (Zenez, sapit 39) Apre servi sa de worksheet “How to Resist Temptation . . . Joseph​—Part 1” ek “Falsely Accused! Joseph​—Part 2” pour aprann bann leson pratik dan sa resi.

• Eski ou ti a kontan aprann ki mannyer lapriyer i kapab ed ou? Lir leksperyans Neemya. (Neemya, sapit 2) Apre servi sa worksheet “God Answered His Prayer” pour aprann bann leson pratik dan sa resi.

Led: Ler ou lir Labib, fer sir ki ou dan en landrwa trankil pour ou kapab konsantre.

En trwazyenm fason pour lir Labib i swazir en resi ouswa en psonm, lir li e apre vwar ki mannyer i aplikab pour ou. Apre ki ou’n lir, demann ou lekor bann kestyon parey:

•  Akoz Zeova in met sa dan Labib?

•  Ki i montre mwan lo personnalite Zeova ouswa son fason fer keksoz?

•  Ki mannyer mon kapab aplik sa lenformasyon dan mon lavi?

Led: Met en lobzektif! Ekri en dat ki ou ti a kontan konmans ou progranm pour lir Labib.