Non! I annan plizyer legzanp bann larelizyon ki Bondye pa kontan dan Labib. An gro, zot tonm dan de kategori.

Premye kategori: Bann ki ador bann fo bondye

 Labib i dir ki ladorasyon bann fo bondye “napa valer” e ki sa bann fo bondye pa “kapab fer nanryen.“ (Zeremi 10:3-5; 16:19, 20) Bondye Zeova a ti donn sa lord ansyen nasyon Izrael: “Ou pa devret annan okenn lezot bondye apard ki mwan.” (Egzod 20:3, 23; 23:24) Ler bann Izraelit ti ador lezot bondye, “[Zeova] ti ankoler kont zot.”​—Nonm 25:3; Levitik 20:2; Ziz 2:13, 14.

 Bondye i ankor santi parey konsernan sa “bann swadizan bondye.” (1 Korentyen 8:5, 6; Galat 4:8) I donn lord bann dimoun ki anvi ador li pour napa nanryen pour fer avek bann ki dan fo larelizyon. I dir: “Sorti parmi zot e separ zot.” (2 Korentyen 6:14-17) Si Bondye ti kontan tou larelizyon, alor akoz Bondye ti donn sa lord?

Dezyenm kategori: Bann ki ador Bondye dan en fason ki i pa aksepte

 Parfwa bann Izraelit ti ador Bondye avek bann krwayans ek pratik ki dimoun lezot larelizyon ti annan. Me Zeova pa ti aksepte sa kalite ladorasyon kot vre larelizyon i melanze avek sa ki fo. (Egzod 32:8; Deterononm 12:2-4) Zezi ti dir ki Bondye pa ti aksepte ladorasyon bann sef relizye dan son letan akoz lafason zot ti pe ador Bondye. Zot ti pe fer krwar zot relizye, me zot ti bann ipokrit akoz zot ti pe “inyor bann pwen pli enportan dan Lalwa, tel ki lazistis, konpasyon ek fidelite.”​—Matye 23:23.

 Pareyman ozordi, sel larelizyon ki Bondye i aksepte i sa enn ki son lansennyman i baze lo laverite. Sa laverite i dan Labib. (Zan 4:24; 17:17; 2 Timote 3:16, 17) Bann larelizyon ki pa ansenny mesaz Labib i anpes dimoun apros avek Bondye. Bokou lansennyman ki dimoun i krwar i sorti dan Labib, i anfet sorti dan bann larelizyon ki ti ador bann fo bondye . Sa bann lansennyman i enkli Trinite, lanfer e ki nanm i en keksoz dan dimoun ki pa mor. Labib i dir ki bann larelizyon ki ansenny sa bann keksoz, zot ladorasyon i “anven” ouswa initil akoz zot ranplas bann komannman Bondye avek tradisyon zonm.​—Mark 7:7, 8.

 Bondye i ay lipokrizi. (Tit 1:16) I pa zis bann rityel oubyen formalite ki pou fer en dimoun vin pros avek Bondye. En dimoun i bezwen kapab aplik sa ki i aprann dan son lavi toulezour. Par egzanp, Labib i dir: “Si en dimoun i panse ki i relizye me i pa seryezman kontrol son labous, i pe anbet son lekor e son ladorasyon i initil. Sa larelizyon ki pir e san defo dapre pwennvi nou Bondye ek Papa i: pran swen avek bann orfelen ek bann vev dan zot leprev e kontinyen reste san okenn tas dan sa lemonn.” (Zak 1:26, 27; not) Labib King James Version i refer avek sa ladorasyon prop e ki pa ipokrit konman sa “larelizyon pir.”