Sa pti fiy ti pe kasyet en zistans kot personn pa ti pou vwar li. Son lizye pa ti sorti lo en landrwa partikilye parmi sa bann zon. Anmezir ki Larivyer Nil ti desann dousman dousman, sa pti fiy ti reste lanmenm san bouze, son lekor antye dan sispans. Letan ti pase, i ti kontinyen espere e veye e menm si bann pti zensek ti pe fatig li, i ti fer konmsi i pa ti santi. Laba kot son regar pa ti sorti, i ti annan en pannyen ki ti’n ganny kasyet e ladan, son pti frer ti pe alonze. Ler i ti mazin li dan sa pannyen, en pti baba tousel e san defans, son leker ti oule desire. Me i ti konnen ki son paran ti annan rezon, sa ti sel lespwar pour sa pti baba dan sa moman terib.

Sa pti fiy ti vreman brav e i ti pe al montre li pli brav ankor. Dan son leker, en zoli kalite ti pe deza formen. Sa se lafwa. Son lafwa pou vin evidan dan ankor en pti moman e i pou annan en gran lefe lo larestan son lavi. Wi, pli tar dan son vye zour, son lafwa pou gid li dan sa moman pli eksitan dan listwar son pep. Sa menm lafwa pou ed li ankor ler i pou fer en fot tre grav. Lekel sa dimoun ki nou pe koz lo la? E ki nou aprann avek son lafwa?

Sa resi dan Labib pa dir lekel sa zanfan, me pour nou son lidantite i kler. I ti Miryam, pli gran zanfan Amram ek Zokebed, de lesklav Ebre ki ti pe reste Lezip. (Nonm 26:59) Pli tar son pti frer pou ganny apele Moiz. Aaron son lot frer ti annan apepre 3 an sa letan. Nou pa asire ki laz Miryam ti annan me i rezonnab pour sizere ki petet i ti par anba 10 an sa letan.

Miryam ti viv dan en lepok vreman difisil. Bann Ezipsyen ti vwar son pep, bann Ebre, konman en menas pour zot, alor zot ti fer zot vin lesklav e maltret zot. Malgre sa, sa bann lesklav ti kontinyen miltipliye e vin bokou. Sa ti fer bann Ezipsyen per e zot ti servi bann taktik pli kriyel ankor kont zot. Faraon ti donn lord pour touy tou pti baba garson bann Ebre o moman ki ti zot ne. Miryam ti konnen ki Sipra ek Poua ti de madanm ki ti annan bokou lasazes e ki zot ti’n sirman demontre lafwa ler zot ti refize fer an kasyet sa ki Faraon ti’n demande.—Egzod 1:8-22.

Miryam ti vwar lafwa ki son prop paran osi ti demontre. Apre ki zot trwazyenm zanfan ti ne, Amram ek Zokebed ti kasyet li pour sa premye trwa mwan. Zot pa ti les lafreyer lerwa fer zot detri lavi zot pti baba. (Ebre 11:23) Me i pa fasil gard en pti baba sekre, alors apre en pe letan zot ti bezwen fer en desizyon ki ti fermal pour zot. Zokebed ti bezwen al kit son pti baba par la an kasyet kot en dimoun ti pou kapab anmas li, pran swen avek li e protez li. Sa manman ti’n bezwen priye avek bokou santiman ler i ti pe fer sa pannyen avek zon, met son pti kous koltar lo la pour anpes delo antre e ler i ti al kit son zanfan ki i ti sitan kontan laba dan Larivyer Nil! San dout, i ti’n bezwen dir Miryam reste la pour vwar ki pou arive.—Egzod 2:1-4.

Alor Miryam ti espere. En pti moman, i ti vwar serten mouvman. En group madanm ti pe vini. Sa pa ti bann senp Ezipsyen sa. Sa ti fiy Faraon ek son bann servant ki ti pe vin bennyen dan larivyer. I kapab ki lebra Miryam ti tonbe. Eski i ti pou posib pour fiy Faraon refize ekout lord lerwa e swazir pour protez sa pti baba Ebre? Sirman Miryam ti’n bezwen priy avek bokou santiman pandan sa moman.

Fiy Faraon ki ti premye dimoun pour vwar sa pannyen parmi sa bann zon. I ti fer son servant al sers sa pannyen e anmenn kot li. Labib i dir sa lo sa prenses: “Kan i ti ouver sa pannyen, i ti vwar en pti baba: En pti garson ki ti pe plere.” Deswit i ti konpran ki ti’n arive: En manman Ebre ti pe esey sov lavi son zanfan. Me leker fiy Faraon ti ranpli avek konpasyon pour sa zoli pti baba. (Egzod 2:5, 6) Miryam ki ti pe obzerv sa ki ti pe pase, ti’n sirman lir lekspresyon lo figir sa madanm. I ti konnen ki ler ti’n arive pour li azir, sa moman pour li demontre lafwa dan Zeova. I ti pran kouraz e apros fiy Faraon ek son latroup.

Nou pa konnen ki mannyer en pti fiy lesklav Ebre ti kapab ganny trete pour annan lodas apros en dimoun dan fanmir rwayal. Me sa pa ti anpes Miryam al direk lo sa kestyon ki i ti anvi demann sa prenses: “Eski ou oule mon al rod en nouris parmi bann fanm Ebre pour donn tete sa pti baba pour ou?” Sa ti en bon kestyon pour demande. Fiy Faraon ti konnen i pa ti dan en pozisyon pour donn tete en pti baba. Petet i ti santi ki i ti pou pli bon pour sa pti baba ganny nouri avek son prop dimoun menm, apre la i ti a kapab anmenn li kot li, adopte li konman son garson e donn li ledikasyon neseser. Miryam ti’n bezwen byen eksite ler sa prenses ti reponn: “Wi, ale.”—Egzod 2:7, 8.

Miryam ti taye pour al dan lakour, kot son paran ti pe trakas amor. Nou kapab mazin son leksitasyon ler i ti pe donn son manman sa nouvel. Zokebed, ki ti konvenki ki sa ti lavolonte Zeova, ti retourn avek Miryam kot fiy Faraon. Dwatet Zokebed ti seye pour pa montre son lakontantman ek soulazman ler sa prenses ti dir li: “Pran sa pti baba e donn li tete pour mwan; mon ava pey ou.”—Egzod 2:9.

Sa zour, Miryam ti aprann en kantite lo son Bondye Zeova. I ti aprann ki i enterese avek son pep e i ekout zot lapriyer. I ti osi aprann ki pa zis bann adilt oubyen bann zonm ki kapab demontre lafwa ek kouraz. Zeova i ekout tou son bann serviter fidel. (Psonm 65:2) Nou tou ozordi nou devret rapel sa dan bann moman difisil, kantmenm nou kapab en zanfan oubyen en dimoun aze, en madanm oubyen en zonm.

Zokebed ti nouri e okip son pti baba. Nou kapab mazinen ki mannyer Miryam ti vin atase avek son pti frer ki i ti’n ede sov son lavi. Petet i ti ed li aprann koze e i ti eksite kan i ti antann li dir pour premye fwa non son Bondye, Zeova. Kan sa zanfan ti’n vin pli gran, i ti’n ariv ler pour anmenn li kot fiy Faraon. (Egzod 2:10) Sa separasyon ti bezwen difisil pour lafanmir antye siporte. Dwatet Miryam ti vreman enpasyan pour vwar ki kalite zonm Moiz, non ki fiy Faraon ti donn li, ti pou vini! Eski i ti pou kontinyen kontan Zeova anmezir i grandi parmi lafanmir rwayal?

Anmezir letan ti pase, larepons ti vin kler. Miryam ti bezwen fyer pour aprann ki son pti frer ti’n grandi pour vin en zonm ki ti swazir pour servi Bondye olye profit sa bann loportinite ki i ti ganny ofer dan lakour rwayal Faraon! Moiz ti annan 40 an ler i ti pran pozisyon an faver son pep. I ti touy en Ezipsyen ki ti pe maltret en lesklav Ebre. Sa ti met son lavi an risk, alors Moiz ti sove e kit Lezip.—Egzod 2:11-15; Akt 7:23-29; Ebre 11:24-26.

Petet Miryam pa ti ganny okenn nouvel son frer pour sa prosen 40 an ki Moiz ti pe viv lwen dan pei Madyann konman en berze mouton. (Egzod 3:1; Akt 7:29, 30) Anmezir ki letan ti pase e Miryam ti pe antre dan laz, i ti vwar soufrans son pep vin pli pir ankor.

I kapab ki Miryam ti dan son 80 an ler Moiz ti retournen. Bondye ti’n anvoy li vin delivre Son pep. Aaron ti ganny servi konman en portparol pour Moiz e ansanm zot ti apros Faraon pour demann li pour les pep Bondye ale. Sirman Miryam ti’n bezwen fer son mye pour siport e ankouraz zot apre ki Faraon ti’n rezet zot demann e ler zot ti pe ale vini kot li, anmezir ki Zeova ti pe anvoy sa dis fleo konman en lavertisman pour bann Ezipsyen. Finalman, avek sa dernyen fleo, kot tou bann premye ne Lezip ti mor, i ti’n ariv ler pour bann Izraelit ale! Zis mazin Miryam kot pe ede partou kote anmezir ki son pep pe kit Lezip avek Moiz devan zot.—Egzod 4:14-16, 27-31; 7:1–12:51.

Pli tar ler nasyon Izrael ti’n pri ant Lanmer Rouz ek bann larme Ezipsyen, Miryam ti vwar son frer Moiz debout devan lanmer e lev son baton. Lanmer ti separe! Anmezir ki Miryam ti vwar son frer pe fer sa pep travers lo sa fon lanmer sek, sirman i ti santi ki son lafwa ti’n ariv lo en nivo enkonparab. I ti pe servi en Bondye ki ti kapab fer nenport kwa e fer nenport promes vin vre!—Egzod 14:1-31.

Apre sa, ler sa bann dimoun ti’n fini ariv lot kote sen e sof e lanmer ti kraz lo Faraon ek son bann larme, Miryam ti vwar ki Zeova i pli for ki sa larme pli pwisan dan lemonn. Lepep ti santi zot pouse pour sant en sanson pour Zeova. Alor Miryam ti fer lezot madanm sant avek li sa bann parol swivan: “Sant pour [Zeova] akoz i’n ganny laviktwar: Seval ek kavalye in ganny zet dan lanmer.”—Egzod 15:20,21; Psonm 136:15.

Sa ti enn bann pli bon moman dan lavi Miryam, en moman ki i pa ti pou zanmen bliye. Se a sa moman ki Labib i konmans apel Miryam en profet. Miryam i premye madanm ki ti ganny apele en profet dan Labib. I form parti sa pti gin madanm ki ti servi Zeova dan sa fason spesyal.—Ziz 4:4; 2 Lerwa 22:14; Izai 8:3; Lik 2:36.

Labib i rapel nou ki Zeova pe obzerv nou e i anvi rekonpans nou bann zefor senser, nou pasyans ek nou dezir pour loue li. Ki swa nou zenn oubyen vye, en zonm oubyen en madanm, nou kapab annan lafwa dan Zeova. Sa kalite lafwa i fer li plezir, i pa zanmen bliye e i kontan pour rekonpans nou pour sa. (Ebre 6:10; 11:6) Pa sa i en bon rezon pour nou imit lafwa Miryam!

Privilez ek pozisyon spesyal i anmenn benediksyon me i osi kapab vin en danze. I posib ki Miryam ti sa madanm pli enportan dan nasyon Izrael ler zot ti ganny libere dan lesklavaz. Eski i ti pou les lorgey ek lanbisyon domin li? (Proverb 16:18) I malere pour dir ki en serten letan, Miryam ti les sa arive avek li.

Detrwa mwan apre depar bann Izraelit, Moiz ti akey en group sorti byen lwen. Sa ti son boper, Zetro, ki ti pe anmenn madanm Moiz, Zipora ek zot de garson. Moiz ti’n marye avek Zipora pandan sa 40 an ki ti pe reste Madyann. Petet pli boner, Zipora ti’n retourn kot son fanmir Madyann pour rann zot en vizit e la son papa ti pe retourn avek li dan kan Izrael. (Egzod 18:1-5) Zis mazin sa leksitasyon ki zot larive ti anmennen parmi pep Moiz! I posib ki bokou zot ti enpasyan pour vwar madanm sa zonm ki Bondye ti’n swazir pour tir zot Lezip.

Eski Miryam ti kontan li osi? Petet o konmansman. Me apre sa, i paret ki i ti les lorgey domin li. Petet i ti konsider Zipora konman en menas pour li, i ti krwar i ti pou pran son plas konman sa madanm pli enportan dan sa nasyon. An tou ka, Miryam ek Aaron ti konmans koz an mal. E souvandfwa sa bann kalite koze i vin bann kritik grav ki bles lezot. Premye kou, zot ti koz kont Zipora, zot ti kritik li e dir i pa en Izraelit me en Kousit. * Me apre zot ti konmans kritik Moiz osi. Miryam ek Aaron ti pe dir: “Eski [Zeova] i koz zis par lentermedyer Moiz? Pa i koz osi atraver nou?”—Nonm 12:1, 2.

Sa parol i endike ki en move latitid ki danzere ti pe devlope dan Miryam ek Aaron. Zot pa ti satisfe avek mannyer ki Zeova ti pe servi Moiz e zot menm zot ti anvi plis lotorite ek lenfliyans. Eski sa ti akoz Moiz ti pe abiz son lotorite e ti pe sey rod plis laglwar? Sirman Moiz ti annan son defo, me i pa ti en zonm anbisye e orgeye. Labib i dir: “Moiz ti en zonm avek bokou limilite, plis ki nenport ki zonm lo later.” Alor Miryam ek Aaron ti napa rezon pour dir sa ki zot ti dir lo Moiz. Labib i rakonte ki “[Zeova] ti antann zot.”—Nonm 12:2, 3.

En sel kou, Zeova ti demann Moiz, Aaron ek Miryam pour vin kot latant rankont. La en kolonn nyaz vreman enpresyonan, ki ti reprezant prezans Zeova ti desann e aparet devan larantre latant. Apre Zeova ti konmans koze. I ti reprimann Miryam ek Aaron, rapel zot son relasyon spesyal ki i ti annan avek Moiz e sa gran konfyans ki i ti annan dan sa zonm. Zeova ti demann zot, “Konman eski zot oze koz kont mon serviter Moiz san okenn lafreyer”? Miryam ek Aaron ti bezwen pe tranble. Pour Zeova, sa mank respe anver Moiz ti konmsi zot ti mank respe anver li menm Zeova.—Nonm 12:4-8.

I paret ki Miryam ki ti par deryer tousala, i ti fer son pti frer pran kote avek li e vir kont son belser. Sa i fer nou konpran akoz se Miryam ki ti ganny pini. Zeova ti frap li avek lalep. Sa maladi terib ti fer son lapo “vin blan konman lanez.” Deswit Aaron ti abes li devan Moiz e sipliy li pour demann Zeova pour pardonn zot. I ti dir: “Pardon, pa les nou soufer pour en pese ki nou’n fer dan en moman lafoli.” Moiz, en zonm ki ti annan bokou limilite, ti kriy ver Zeova: “Mon Bondye, mon sipliy ou, geri li!” (Nonm 12:9-13) Lafason ki tou le de frer ti reazir ler Miryam ti ganny frape avek lalep i montre ki kantite zot ti kontan zot gran ser kantmenm i ti’n fer son fot.

Zeova ti pran pitye. I ti geri Miryam ki ti’n repantir. Par kont, i ti demande ki Miryam i pas set zour dan karantenn an deor kan Izrael. Sa ti’n bezwen vreman imilye Miryam parski lezot dan kan ti pou konnen i ti pe ganny disiplinen. Me son lafwa ti sov li. I ti konnen dan fon son leker ki son Papa Zeova, ti zis e i ti pe disiplin li akoz i ti kontan li. Alors i ti fer sa ki Zeova ti’n demann li. Kan Izrael ti espere anmezir ki Miryam ti pas son set zour li tousel. Apre sa Miryam ti demontre son lafwa ankor. I ti fer sa ler i ti abes li e les li “ganny readmet dan kan.”—Nonm 12:14, 15.

Zeova i disiplin bann ki i kontan. (Ebre 12:5, 6) I ti tro kontan Miryam pour pa koriz son lorgey. Sa koreksyon ki i ti gannyen ti fermal me i ti sov son lavi. I ti reganny faver Bondye akoz i ti aksepte sa disiplin avek limilite. I ti viv ziska preski lafen sezour bann Izraelit dan dezer. Ler i ti mor Kades dan dezer Sin, i ti pros pour ganny 130 an. * (Nonm 20:1) Plizyer syek pli tar, Zeova ti onor Miryam pour son servis fidel. Atraver profet Mika, i ti rapel son pep: “Mon’n delivre ou dan lesklavaz. Mon’n donn ou konman sef Moiz, Aaron ek Miryam.”—Mika 6:4.

Nou kapab aprann en kantite avek lavi Miryam. Nou bezwen protez bann ki pa kapab defann zot lekor e annan lardyes pour defann sa ki byen, parey i ti fer ler i ti ankor en zanfan. (Zak 1:27) Parey Miryam, nou bezwen ansenny lezot mesaz Bondye avek lazwa. (Romen 10:15) Nou bezwen osi anpes zalouzi ek lakoler pran rasin dan nou parey Miryam. (Proverb 14:30) E parey li osi, nou bezwen aksepte koreksyon Zeova avek limilite. (Ebre 12:5) Si nou fer sa bann keksoz, nou pou pe vreman imit lafwa Miryam.