LO KOUVERTIR | ESKI SATAN I VREMAN EGZISTE?

Eski nou devret per Satan?

I byen difisil pour remark li. I menm kapab sirprann son bann viktim akoz i napa ni kouler ni loder. I kapab ki plis ki lanmwatye tou bann lanmor par lanpwazonnman dan lemonn in ganny koze par Oksid karbonn. Kantmenm sa ou pa devret panik. I annan bann fason ki ou kapab detekte sa gaz anpwazonnen e pou protez ou lekor. Bokou dimoun saz i enstal bann alarm ki averti zot e zot fer sir ki zot reakte vitman si i sonnen.

Zis parey Oksid karbonn, Satan i envizib, i byen difisil pour bann imen remark li e i vreman danzere. Me Bondye pa’n zis kit nou san okenn led. Ou pa bezwen per Satan si ou byen servi sa bann kado ki Bondye i ofer ki ganny site anba.

Sa abilite pour swazir. Zak 4:7 i dir nou: “Reziste kont Dyab e i ava sov lwen avek zot.” Menm si Satan i pwisan, i pa kapab fors ou pou fer keksoz ki ou pa anvi fer. Ou annan en swa. Premye Pyer 5:9 i dir: “Reste ferm dan lafwa e reziste li.” Pa oubliye ki Satan ti ale apre ki Zezi ti rezet sa trwa tantasyon dan en fason ferm. (Matye 4:11) Ou osi ou kapab swazir pour reziste bann zefor Satan.

Nou lanmitye avek Zeova. Zak 4:8 i ankouraz nou pou “apros avek Bondye.” Zeova i envit ou personnelman pour devlop en lanmitye pros avek li. Ki mannyer ou kapab fer sa? Sa pli meyer fason pour fer li se par aprann plis lo Li atraver Labib. (Zan 17:3) Sa ki ou aprann lo Zeova pou pous ou pour kontan li e sa lanmour pou motiv ou pour fer son lavolonte. (1 Zan 5:3) Anmezir ki ou vin pli pros avek ou Papa ki dan lesyel, ki mannyer i pou reazir? Zak i kontinyen: ‘Bondye ava apros avek zot.’

Son promes pour protez nou. Proverb 18:10 i dir: “Non Zeova i en latour for. Bann dimoun drwat i tay ladan e zot ganny proteksyon.” Byensir, sa pa vedir ki non Bondye i en portboner. Plito, i vedir ki bann ki vreman onor non Bondye i kapab demann li son proteksyon nenport ki ler.

En legzanp pratik. Akt 19:19 i dir nou en keksoz vreman enteresan konsernan bann Kretyen Efez ki ti’n fek konverti: “En kantite ki ti pratik bann aktivite mazik ti anmenn zot bann liv e brile devan tou dimoun. Valer tou sa bann liv ler ti’n  azout ansanm ti ariv 50,000 pyes an-arzan.” * Sa bann Kretyen ti bril okenn lobze ki ti ganny servi dan pratik demonyak, malgre son valer materyel. Sa i en bon legzanp pour nou ozordi. Sa lemonn i ranpli avek grigri ek bann pratik demonyak. Menm bann lobze ek bann pratik ki paret napa nanryen mal avek i kapab annan lenfliyans demon. Alor i vreman enportan pour fer sir ki sa bann keksoz i napa okenn plas dan ou lavi.​—Deterononm 18:10-12.

Rogelio, ki’n ganny mansyonnen dan premye lartik sa seri pa ti krwar dan Dyab pour 50 an son lavi. Me apre i ti sanz son pwennvi. Akoz? Rogelio ti rakonte, “Pour premye fwa dan mon lavi, mon ti ganny en Labib. Konnesans sorti dan Labib ti konvenk mwan ki Dyab i egziste. Sa menm konnesans i protez mwan ozordi kont son lenfliyans.”

Eski ou ti pou kontan vwar sa letan kan Satan pou nepli egziste? Ou pou kapab. Labib i predir ki a lavenir Dyab ki pe anbet bokou dimoun pou ganny “zete dan lak dife avek souf.” (Revelasyon 20:10) Byensir, dife ek souf fizik pa kapab fer dimal en kreatir spirityel envizib. Alor sa lak dife i bezwen pe reprezant destriksyon eternel. Satan pou disparet pour touzour. Pa sa pou anmenn bokou lazwa pour bann ki kontan Bondye!

Antretan, kontinyen aprann tou sa ki ou kapab lo Bondye ek son bann prensip. * Mazin sa letan kan ou pou vreman kapab dir, “Satan i pa egziste!”

[Not anba lo paz]

[Ekstre lo paz 7]

“Konnesans sorti dan Labib ti konvenk mwan ki Dyab i egziste. Sa menm konnesans i protez mwan ozordi kont vin en viktim son lenfliyans”

[Portre lo paz 6]

Oksid karbonn i envizib e danzere​—parey Satan

[Portre lo paz 7]

Zeova i ofer ou bann provizyon spirityel pour ou proteksyon