Kestyon 2: Ki pou arive ler mon mor?

LER Roman ti en pti garson, son bon zanmi ti mor dan en aksidan loto. I ti dir: “I ti tap mwan en kantite ler mon ti perdi mon zanmi. Pour plizyer lannen apre mon ti demann mon lekor ki arive avek nou ler nou mor.”

Akoz sa kestyon? Lanmor pa en keksoz natirel. Nenport ki laz nou annan, normalman nou pa anvi mor e bokou dimoun i per sa ki arive apre lanmor.

Ki larepons serten i donnen? Bokou dimoun i krwar ki ler en dimoun i mor, en keksoz avek li i kontinyen viv. Zot krwar ki bon dimoun pou ganny rekonpanse dan lesyel, tandis ki move dimoun pou ganny pini pour touzour. Lezot i krwar ki ler en dimoun i mor, i aret egziste e avek letan i ganny konpletman oubliye.

Ki sa bann larepons i montre? Sa premye larepons i baze lo sa konsep ki ler en dimoun i mor i pa vreman mor. Sa dezyenm larepons i pe dir ki lavi napa en bi. Bann dimoun ki pa krwar ki lavi i annan en bi, i kapab adopte sa kalite latitid: “Annou manze e bwar, parski demen nou pou mor.”​—1 Korentyen 15:32.

Ki Labib i dir? Labib pa dir ki ler en dimoun i mor en keksoz avek li i kontinyen viv. Bondye ti enspir Lerwa Salomon pour ekrir: “Bann vivan i konnen ki zot pou mor; me bann mor, zot pa konn nanryen ditou.” (Eklezyast 9:5) Sa bann ki “pa konn nanryen” pa okouran ki pe pase otour zot. Zot napa santiman e pa kapab fer okenn keksoz. Alor en dimoun mor pa kapab ed oubyen fer ditor bann dimoun vivan.

Kontrerman avek sa ki bokou i krwar, i pa ti dan plan Bondye pour imen mor. I ti kre sa premye imen, Adan, avek sa posibilite pour viv pour touzour lo later. Sa sel fwa ki Bondye ti mansyonn sa mo lanmor, i ler i ti dir Adan pinisyon pour dezobeisans. I ti defann Adan manz fri dan en serten pye dibwa e averti li ki si i manz sa fri, i pou  ‘sirman mor.’ (Zenez 2:17) Si Adan ek Ev ti reste obeisan, zot ek zot desandans ki ti pou fidel avek Bondye ti pou’n viv pour touzour lo later.

Adan ti swazir pour rezet lavertisman Bondye. Ler i ti dezobei Bondye, i ti fer pese, e alor i ti mor. (Romen 6:23) I ti napa en keksoz avek Adan ki ti kontinyen viv apre son lanmor. Bondye ti dir Adan: “Ou pou transpire pour ganny ou dipen ziska ou retourn dan later, parski ladan menm ki ou ti sorti. Parski ou lapousyer e ou pou retourn an pousyer.” (Zenez 3:19) An realite, zour Adan ti mor i ti aret egziste. Lefet ki tou dimoun i desandans Adan, nou’n erit pese ek lanmor avek li.​—Romen 5:12.

Malgre move desizyon Adan, Bondye pou akonpli Son plan pour ranpli later avek bann desandans Adan. (Zenez 1:28; Izai 55:11) Byento, Zeova pou redonn lavi laplipar dimoun ki’n mor. Zapot Pol ti dir sa konsernan sa letan: “Dimoun bon konman move, pour resisite.”​—Akt 24:15.

Roman, ki’n ganny mansyonnen o konmansman sa lartik, ti etidye Labib e aprann sa ki Labib i dir lo lanmor ek Zeova. Sa ki i ti dekouver ti annan en bon lefe lo li. Lir son leksperyans dan Latour Veyer le 1 Novanm 2012 paz 11 an Angle.

Pour aprann plis lo sa ki arive ler en dimoun i mor, vwar sapit 6 dan liv Ki Labib i vreman dir? Ou kapab download li lo www.jw.org

[Bwat lo paz 7]

Ki Zezi ti dir lo lanmor?

Zezi pa ti dakor avek serten sef relizye dan son letan ki pa ti krwar dan rezireksyon. (Lik 20:27) I pa ti ni dir ki en keksoz avek en dimoun i sirviv apre lanmor. O kontrer, Zezi ti ansenny sa bann keksoz swivan:

Lanmor i parey ler en dimoun pe dormi. Ler son zanmi Lazar ti’n mor, Zezi ti dir: “Nou zanmi Lazar pe dormi, me mon pe al lev li dan son sonmey.” Bann disip pa ti konpran ki Zezi ti oule dir. Zot ti dir li: “Senyer, si i pe dormi i ava byen.” Sa resi Labib i eksplike: “Zezi ti oule dir ki Lazar ti’n mor, me zot ti krwar ki i ti pe koz lo sonmey natirel. Alor Zezi ti dir zot klerman, ‘Lazar in mor.’”​—Zan 11:11-14.

Bann mor pou resisite. Ler Zezi ti ariv dan sa lavil kot Lazar ti reste, i ti konsol ser Lazar, Mart avek sa parol: “Ou frer pou resisite.” Apre Zezi ti fer sa promes: “Mwanmenm, larezisksyon ek lavi, sa ki krwar dan mwan, menm si i a’n mor, i pou viv.” Promes Zezi pa ti zis bann parol dan vid, parski i ti resisit Lazar devan bokou temwen menm si i ti’n mor depi kat zour.​—Zan 11:23, 25, 38-45.

Atraver sa revelasyon ki Zezi ti donn zapot Zan, ankor enn fwa Zezi ti promet ki bann mor pou resisite. Dan en sans senbolik, i ti dekrir en letan dan lavenir kot lanmor pou rann tou bann ki i’n anprizonnen.​—Revelasyon 20:13.