Respe ek loner anba proteksyon Bondye

LER Zezi ti lo later, i ti reflekte parfetman personnalite son Papa ki dan lesyel e azir parey li dan lafason ki i ti fer keksoz. I ti dir: “Mon pa fer nanryen par mwanmenm, me mon dir zis sa ki mon Papa in dir mwan dir. . . . Mon touzour fer sa ki fer li plezir.” (Zan 8:28, 29; Kolosyen 1:15) Si nou egzamin byen lafason ki Zezi ti koz avek bann madanm ensi ki son latitid anver zot, nou ganny en pli bon apersi lo pwennvi Bondye konsernan bann madanm e sa ki i ekspekte avek zot.

Dapre sa ki’n ganny ekrir dan Levanzil lo Zezi, plizyer spesyalis Labib i dir ki latitid Zezi anver bann madanm ti konpletman diferan avek latitid bann dimoun dan son lepok. Dan ki fason? Pli enportan ankor, eski son lansennyman i ede fer bann madanm vin lib ozordi?

Fason ki Zezi ti tret bann madanm

▪ Zezi pa ti konsider zot zis konman bann lobze seksyel. Bann sef relizye Zwif i dir ki ler de dimoun ki pa menm sèks i rankontre kanmarad, zot pou fini par satisfer zot dezir seksyel. Alor, vi ki madanm ti ganny konsidere konman en tantasyon pour bann zonm, zot pa ti ganny drwa koz avek bann zonm an piblik oubyen al okenn landrwa san met en vwal. De lot kote, Zezi ti konsey bann zonm pour annan kontrol lo zot dezir seksyel e tret bann madanm avek respe. I pa ti dir ki zot pa devret annan okenn kontak avek bann madanm.​—Matye 5:28.

Zezi ti osi dir: “En zonm ki divorse avek son madanm e ki marye avek en lot i komet adilter kont son premye madanm.” (Mark 10:11, 12, nou ki’n met an italik.) Sa i montre ki Zezi pa ti dakor avek sa ki bann profeser lalwa ti ansennyen ki en zonm i kapab divorse avek son madanm “pour nenport ki rezon.” (Matye 19:3, 9) Laplipar Zwif pa ti konnen ki en zonm i kapab komet adilter kont son madanm akoz bann sef relizye ti ansennyen ki en msye pa ti pou zanmen kapab komet adilter kont son madanm. Zot ti dir ki zis sa madanm ki ti pou kapab enfidel! Me parey en spesyalis Labib i dir, lefet ki “Zezi in met bann msye anba menm lobligasyon moral ki bann madanm, sa i donn bann madanm plis loner ek respe.”

Lefe son lansennyman ozordi: Dan kongregasyon Temwen Zeova, bann madanm i lib pour asiste renyon ansanm avek bann msye. Zot pa per ki bann msye i get zot dan en fason endesan oubyen mank respe pour zot akoz bann msye Kretyen i fer sir ki zot tret ‘bann vye madanm konman zot manman, e bann zenn madanm konman zot bann ser, avek bokou respe e avek pirte.’​—1 Timote 5:2.

▪ Zezi ti pran letan pour ansenny bann madanm. Kontrerman avek bann profeser Lalwa ki ti gard bann madanm dan linyorans, Zezi ti ansenny bann madanm e ankouraz zot pour eksprim zot lekor. Lefet ki Zezi pa ti priv Mari lazwa ki nou gannyen atraver lansennyman, i ti pe montre ki plas en madanm i pa zis dan lakwizin. (Lik 10:38-42) Mart, ser Mari ti osi benefisye avek lansennyman Zezi e sa i evidan par sa larepons entelizan  ki i ti donn Zezi apre ki Lazar ti’n mor.​—Zan 11:21-27.

Pwennvi bann madanm ti enportan pour Zezi. Dan sa letan, laplipar madanm Zwif ti krwar ki pour zot vreman ere zot ti bezwen annan en bon garson, sirtou enn ki profet. Ler en madanm ti pe kriye: “Ere sa madanm ki’n donn ou nesans.” Zezi ti sezi sa loportinite pour koz avek li lo en keksoz pli meyer. (Lik 11:27, 28) Zezi ti fer li vwar ki spirityalite en dimoun i pli enportan ki rol ki tradisyon i enpoz lo bann madanm.​—Zan 8:32.

Lefe son lansennyman ozordi: Bann ansenyan dan kongregasyon Kretyen i byen apresye komanter ki bann madanm i fer pandan renyon. Zot respekte bann madanm ki matir akoz zot “donn bon konsey,” ki swa an prive ouswa par zot legzanp. (Tit 2:3) Zot osi ganny sipor bann madanm pour anons sa bon nouvel lo Rwayonm Bondye.​—Psonm 68:11; vwar bwat “Eski zapot Pol ti anpes bann madanm koze?”

▪ Zezi ti apresye madanm. Dan letan Labib, bann fiy pa ti ganny konsidere sitan enportan parey bann garson. Sa pwennvi i ganny reflekte dan Talmud, ki dir: “Ere sa zonm ki son zanfan i bann garson e maler sa enn ki son zanfan i bann fiy.” Serten paran ti konsider en fiy konman en pli gro fardo. Zot ti pou bezwen rod en konzwen pour li, donn sa msye en sonm larzan e zot pa ti pou kapab depan lo zot fiy dan zot vye zour.

Zezi ti montre ki en pti fiy ti osi enportan ki en pti garson akoz i ti resisit fiy Zairis parey i ti resisit garson en vev dan lavil Nain. (Mark 5:35, 41, 42; Lik 7:11-15) Apre ki Zezi ti geri en madanm ki ti’n ganny posede par “en move lespri . . . depi dizwit an,” Zezi ti apel li “en fiy Abraam,” en lekspresyon ki pa ti ganny servi preski ditou dan liv ki bann Zwif ti ekrir. (Lik 13:10-16) Par servi sa lekspresyon, Zezi ti azir dan en fason zantiy e demontre respe pour sa madanm. Zezi pa ti dir sa parol zis pour montre ki i ti konsider sa madanm enportan parey nenport ki dan lasosyete me i ti osi rekonnet ki sa madanm ti annan bokou lafwa.​—Lik 19:9; Galat 3:7.

Lefe son lansennyman ozordi: I annan en dikton Azyatik ki dir: “Elve en fiy i konmsi ou pe aroz zarden en vwazen.” Olye les li ganny enfliyanse par sa mantalite, en papa Kretyen i pran byen swen avek tou son zanfan, ki swa garson oubyen fiy. Bann paran Kretyen i fer sir ki tou zot zanfan i ganny en bon ledikasyon ek swen lasante.

▪ Zezi ti annan konfyans dan bann madanm. Dan lakour bann Zwif, temwannyaz en madanm ti ganny konsidere parey avek temwannyaz en lesklav. Josephus, en istoryen dan premye syek ti donn sa konsey: “Pa aksepte okenn levidans sorti kot en madanm akoz zot pa serye e zot odasye.”

 Zezi ti napa sa menm pwennvi lo bann madanm, o kontrer i ti servi bann madanm pour fer lezot konnen ki i ti’n resisite. (Matye 28:1, 8-10) Kantmenm sa bann madanm fidel ti vwar kan zot Senyer ti ganny met a mor e antere, i ti difisil pour bann zapot krwar zot parol. (Matye 27:55, 56, 61; Lik 24:10, 11) Par kont lefet ki Kris ti aparet avek bann madanm an premye apre son rezireksyon, sa i montre ki i ti konsider zot diny pour anons bon nouvel parey lezot son bann disip.​—Akt 1:8, 14.

Lefe son lansennyman ozordi: Dan kongregasyon Temwen Zeova, bann zonm ki annan responsabilite i demontre konsiderasyon pour bann madanm par pran an kont sa ki zot dir. Bann msye Kretyen lo zot kote i merit ‘tret zot madanm avek respe’ par ekout zot atantivman.​—1 Pyer 3:7; Zenez 21:12.

Prensip Labib i ede fer bann madanm ere

Kan bann msye i imit Kris, bann madanm i ganny respe ek liberte ki Bondye ti oule zot annan depi o konmansman. (Zenez 1:27, 28) Olye swiv sa leta lespri ki fer msye pas pour pli siperyer ki madanm, en msye Kretyen i devret les prensip Labib gid li e sa pou ede fer son madanm ere.​—Efezyen 5:28, 29.

Kan Yelena ti konmans etidye Labib, son msye pa ti tret li byen e i ti pe soufer an silans. Son msye ti grandi dan en lanvironnman kot ti annan vyolans e kot dimoun ti abitye abiz lezot fizikman e kidnap bann madanm pour marye avek. Yelena i dir: “Sa ki mon ti aprann dan Labib ti donn mwan kouraz. Mon ti konpran ki i ti annan enn ki vreman kontan mwan, enterese avek mwan, e ki mon annan valer pour li. Mon ti osi konpran ki si mon msye ti etidye Labib, i ti pou kapab sanz son latitid anver mwan.” Son rev ti vin vre ler son msye ti etidye Labib e batize konman en Temwen Zeova. Yelena i dir: “Nou ti aprann pardonn kanmarad.” Ki ti konklizyon Yelena? “Bann prensip Labib in vreman ed mwan pour santi mwan ganny apresye e proteze dan mon maryaz.”​—Kolosyen 3:13, 18, 19.

I annan bokou lezot leksperyans parey pour Yelena. Plizyer milyon madanm Kretyen i ere akoz ansanm avek zot msye, zot in fer bokou zefor pour aplik prensip Labib lo maryaz. Zot ganny respekte, rekonforte e santi zot lib parmi lezot Kretyen.​—Zan 13:34, 35.

Bann msye ek madanm Kretyen i rekonnet ki akoz zot leta enparfe e peser, zot form parti kreasyon Bondye ki’n ganny “kondannen pour vin en nanryen ditou.” Me lefet ki zot apros avek Zeova zot Bondye ek Papa, zot annan lespwar pour ganny “libere en zour avek pouvwar destrikter” e partisip “dan laliberte ek laglwar bann zanfan Bondye.” Pa sa i en zoli lespwar pour bann msye ek madanm ki reste anba proteksyon Bondye!​—Romen 8:20, 21.

[Bwat lo paz 9]

Eski zapot Pol ti anpes bann madanm koze?

Zapot Pol ti ekrir: “Mon oule ki bann madanm i gard silans dan lasanble.” (1 Korentyen 14:34) Ki i ti oule dir par sa? Eski i ti oule dir ki zot bet? Non. Anfet, i ti souvan refer avek bon lansennyman ki bann madanm ti donnen. (Akt 18:26; 2 Timote 1:5; Tit 2:3-5) Dan son let pour bann Korentyen, Pol pa ti averti zis bann madanm me osi lezot dimoun ki ti annan don pour koz dan diferan langaz e pour profetize pour “gard silans” ler en lot pe koze. * (1 Korentyen 14:26-30, 33) I paret ki serten madanm Kretyen ti sitan antouzyasm pour sa ki zot ti’n fek aprann ki zot ti enteronp bann ki ti pe koze pour demann kestyon, en pratik ki ti komen dan sa parti lemonn. Pour evite ki i annan sa kalite dezord, Pol ti ankouraz bann madanm pour “demann [kestyon] zot mari dan lakour.​—1 Korentyen 14:35.

[Not anba lo paz]

[Portre lo paz 10]

Zezi ti onor Mari Madlenn ler i ti servi li pour al dir son bann zapot ki i’n resisite