“Sa bonn nouvel rwayonm pou ganny anonse”

“Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”​—MATYE 24:14.

Ki sa i vedir: Lik, en ekriven levanzil, ti dir ki Zezi ti “vwayaz dan plizyer lavil ek vilaz pour pres Bonn Nouvel Rwayonm Bondye.” (Lik 8:1) Zezi li menm ti dir: “Mon bezwen anons Bonn Nouvel konsernan Rwayonm Bondye . . . parski se pour sa, ki Bondye in anvoy mwan.” (Lik 4:43) I ti anvoy son bann disip pour pres sa bon nouvel dan bann lavil ek vilaz e pli tar i ti donn zot sa komann: “Zot a vin mon bann temwen . . . ziska tou bann landrwa pli elwannyen lo later.”​—Akt 1:8; Lik 10:1.

Fason ki bann Kretyen dan premye syek ti demontre sa karakteristik: Bann disip Zezi pa ti tarde pour fer sa ki Zezi ti dir zot fer. “Toulezour zot ti kontinyen prese dan Tanp ek dan bann lakaz e anons Zezi konman Mesi.” (Akt 5:42) Pa zis en pti group spesyal ki ti al prese, kongregasyon antye ti partisipe. En istoryen ki ti apel Neander ti dir ki “Celsus, sa premye ekriven ki ti koz kont bann Kretyen [ti] monk zot an dizan ki bann dimoun ki travay avek lalenn, bann kordonnyen, bann ki travay avek lapo zannimo, bann dimoun dernyen klas ek bann ki ti pli iletre ti sa bann ki ti pe pres levanzil avek bokou devouman.” Jean Bernardi ti fer sa komanter dan son liv The Early Centuries of the Church: “[Bann Kretyen] ti sipoze ale e koz avek nenport ki dimoun dan nenport ki landrwa . . , dan semen, dan bann lavil, bann landrwa piblik ek kot bann lakour. Ki swa dimoun ti akey zot oubyen non . . . Ziska tou bann landrwa pli elwannyen lo later.”

Lekel ki pe vreman demontre sa karakteristik? David Watson, en pret Anglikan ti ekrir: “Enn bann rezon akoz dimoun an zeneral pa enterese avek bann keksoz spirityel  ozordi i akoz legliz pa’n arive pran sa travay pour prese e ansennyen o serye.” Dan son liv Why Are the Catholics Leaving?, José Luis Pérez Guadalupe ti ekrir konsernan travay ki bann Evanzelis, Advantis ek lezot group i fer. I ti fer sa remark ki zot “pa al portanport.” Konsernan Temwen Zeova, i ti ekrir: “Zot al portanport regilyerman e dan en fason byen organize.”

Jonathan Turley ti fer sa remark enteresan e vre dan sa liv Cato Supreme Court Review 2001-2002: “Zis mansyonn Temwen Zeova e deswit laplipar dimoun pou mazin bann dimoun ki pres kot tou lakaz dan bann ler ki zot pa pe ekspekte. Ler Temwen Zeova i esey konvenk dimoun pour annan menm krwayans relizye ki zot, zot pa fer sa zis pour fer dimoun vin dan zot larelizyon me pour zot sa i en devwar esansyel.”

[Portre lo paz 9]

Eski ou kapab idantifye bann Kretyen?

Dapre sa bann karakteristik ki baze lo Labib dan sa seri lartik, lekel ou krwar ki bann vre Kretyen ozordi? Menm si i annan plizyer santenn group ek larelizyon ki dir zot Kretyen, gard antet sa ki Zezi ti dir son bann disip: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel.” (Matye 7:21) Si ou idantifye sa bann ki pe fer lavolonte nou Papa, setadir bann ki annan bann karakteristik vre Kretyen e si ou asosye avek zot, ou pou kapab ganny benediksyon atraver Rwayonm Bondye ki pou dire pour touzour. Nou envit ou pour demann Temwen Zeova plis lenformasyon lo Rwayonm Bondye ek bann benediksyon ki i pou anmennen.​—Lik 4:43.