‘Garson in swazir pour revel Papa’

“Personn pa konn mon Papa eksepte son Garson ek bann ki son garson in swazir pour revel li.” ​—LIK 10:22.

KI OU POU REPONN?

Akoz zis Zezi tousel ki ti kalifye pour revel son Papa?

Dan ki fason Zezi ti revel son Papa avek lezot?

Dan ki fason ou kapab imit Zezi par revel son Papa avek lezot?

1, 2. Ki kestyon bokou dimoun i vwar difisil pour reponn e akoz?

‘LEKEL li Bondye?’ Bokou dimoun i vwar li difisil pour reponn sa kestyon. Par egzanp, laplipar dimoun ki dir zot Kretyen i krwar dan Trinite e bokou i vwar li enposib pour konpran sa krwayans. En ekriven ki ti osi en pret ti dir: “I enposib pour imen kapab konpran sa doktrin . . . an servan zot prop lozik oubyen rezonnman.” Par kont, laplipar dimoun ki krwar dan evolisyon pa krwar ki Bondye i egziste. Zot dir ki tou sa bann mervey dan kreasyon in vin par azar. Me Charles Darwin, olye dir ki Bondye pa egziste, i ti dir: “Sa pli bon konklizyon ki mon kapab tire se ki lentelizans imen pa ase pour konpran sa size.”

² Kantmenm zot annan diferan krwayans, bokou dimoun in demann zot lekor bann kestyon konsernan legzistans Bondye. Me ler zot pa kapab ganny en larepons satisfezan, zot aret fer zot resers lo Bondye. Vreman Satan in ‘avegle lentelizans bann enkredil.’ (2 Kor. 4:4) Alor i pa drol ki lamazorite imen i ankor dan linyorans ek konfizyon konsernan laverite lo nou Papa ek Kreater liniver!​—Iza. 45:18.

3. (a) Lekel ki’n revel Kreater avek nou? (b) Ki bann kestyon nou pou al egzaminen?

³ Pourtan, i vreman enportan pour konn laverite lo Bondye. Akoz? Parski zis bann ki “kriy non Zeova” ki pou ganny sove. (Rom. 10:13, NW) Pour kriy lo sa non Zeova i vedir konnen lekel li e konn son personnalite. Zezi ti fer son bann disip konn personnalite son Papa, andotmo i ti revel son Papa avek zot. (Lir Lik 10:22.) Akoz zis Zezi ki ti kalifye pour revel son Papa avek lezot? Ki mannyer i ti fer sa? Ki mannyer nou kapab imit Zezi par revel son Papa avek lezot? Annou egzamin sa bann kestyon.

ZEZI KRI TOUSEL KI KALIFYE

4, 5. Akoz zis Zezi tousel ki ti kalifye pour revel son Papa?

⁴ Zezi ti sa dimoun pli kalifye pour revel son Papa.  Akoz? Akoz avan ki tou lezot keksoz vivan ti ganny kree, i ti deza egziste konman “sel Garson Bondye” dan lesyel. Plitar i ti vin lo later konman en imen. (Zan 1:14; 3:18) Pa sa i en pozisyon spesyal ki zis li tousel ki annan! Avan ki tou lezot keksoz ti vin an egzistans, Zezi ti pas en kantite letan avek son Papa. I ti ganny bokou lafeksyon avek son Papa e i ti aprann konn Li ek Son bann kalite. Anmezir ki zot relasyon ti vin pli for, zot lanmour ek lafeksyon pour kanmarad ti ogmante. (Zan 5:20; 14:31) Zis mazin tou sa konnesans ki Zezi ti kapab aprann lo personnalite son Papa!​—Lir Kolosyen 1:15-17.

⁵ Zeova ti swazir Son Garson pour vin Son portparol. I ti ganny apele “Parol Bondye.” (Rev. 19:13) Alor zis Zezi tousel ki ti kalifye pour revel son Papa avek lezot. I pour sa rezon ki Zan, en ekriven Levanzil ti dir ki “Laparol” setadir Zezi i “pros avek leker son Papa.” (Zan 1:1, 18) Dan son langaz orizinel, sa lekspresyon ki Zan ti servi ti pe refer avek en koutim dan son letan ki ti ganny obzerve pandan repa. En envite ti pou alonze pros avek en lot dimoun kot zot ti pou fasilman kapab fer en konversasyon ansanm. Alor, lefet ki Garson Bondye ti “pros avek leker son Papa,” i ti kapab annan bann konversasyon profon avek son Papa.

6, 7. Ki mannyer sa relasyon ant Zeova ek son Garson ti kontinyen devlope?

⁶ Sa relasyon ant Bondye ek son Garson ti kontinyen devlope. Zezi ti “sa enn ki [Bondye] ti sirtou atase avek de zour an zour.” (Lir Proverb 8:22, 23, 30, 31. *) I toutafe normal alor ki sa latasman ki zot ti annan avek kanmarad ti vin pli for anmezir ki zot ti travay ansanm e Zezi ti aprann pour demontre bann kalite ki son Papa ti annan. Ler Zeova ti kre lezot lanz, Zezi ti kapab vwar ki mannyer Zeova ti azir anver zot endividyelman e sa ti fer li apresye plis ankor personnalite son Papa.

⁷ Menm kan Satan ti kestyonn drwa Zeova pour dirize, sa ti donn Zezi en lot loportinite pour aprann ki mannyer Zeova ti pou demontre lanmour, lazistis, lasazes ek pwisans dan bann sityasyon difisil. San okenn dout, sa ti pou’n prepar Zezi pour fer fas avek bann difikilte ki i ti pou gannyen plitar dan son minister lo later.​—Zan 5:19.

8. Ki mannyer bann resi dan Levanzil i ed nou aprann plis lo bann kalite Zeova?

⁸ Sa relasyon pros ki Zezi ti annan avek Zeova ti fer ki i ti kapab donn plis detay lo son Papa ki okenn lezot dimoun. Eski i annan en pli bon fason ki nou kapab arive konn Zeova apard ki sa ki son sel Garson ti ansennyen oubyen fer? Pour pli byen konpran sa lide annou pran en legzanp. Mazinen konbyen i ti pou difisil pour konpran vre sinifikasyon sa mo “lanmour” si nou ti zis lir son definisyon dan en diksyonner! Pourtan, ler nou lir bann resi byen detaye e kler dan Levanzil lo minister Zezi e lo lafason ki i ti pran swen avek lezot, nou kapab pli byen konpran ki sa fraz “Bondye i lanmour” i vedir. (1 Zan 4:8, 16) Ler i ti lo later, Zezi pa ti koz zis lo lanmour Zeova avek son bann disip me i ti osi koz lo lezot kalite ki i annan.

FASON KI ZEZI TI REVEL SON PAPA

9. (a) Ki sa de fason ki Zezi ti revel son Papa? (b) Donn en legzanp pour montre ki mannyer Zezi ti revel son Papa par son lansennyman.

⁹ Ki mannyer Zezi ti revel son Papa avek son bann disip dan son letan e avek lezot ki ti pou vin son bann disip plitar? I ti fer sa dan de fason tre senp, par son lansennyman ek son kondwit. Premyerman, annou egzamin lansennyman Zezi. Sa ki Zezi ti ansenny son bann disip i montre ki i ti konpran byen fason panse, santiman ek fason fer son Papa.  Par egzanp Zezi ti konpar son Papa avek en bon berze ki al rod en mouton ki’n perdi. Zezi ti dir kan sa berze i trouv son mouton perdi, “i pou annan plis lazwa pour sa enn menm mouton ki pour sa 99 ki pa’n perdi.” Ki mannyer Zezi ti aplik sa legzanp? I ti eksplike: “Dan menm fason, zot Papa ki dan lesyel [i] pa oule ki okenn sa bann pti zanfan [i] perdi.” (Mat. 18:12-14) Ki ou kapab aprann lo Zeova par sa legzanp? Menm si parler ou santi ki ou napa gran valer e ki ou’n ganny oubliye, ou Papa ki dan lesyel i enterese avek ou e i pa pou zanmen negliz ou. Pour Zeova, ou enn son “bann pti zanfan.”

10. Ki mannyer Zezi ti revel son Papa par son kondwit?

¹⁰ Sa dezyenm fason ki Zezi ti revel son Papa avek son bann disip ti par son kondwit. I pour sa rezon ki kan Filip ti dir avek Zezi: “Montre nou ou Papa,” Zezi ti kapab reponn: “Sa ki’n war mwan in osi war mon Papa.” (Zan 14:8, 9) Aprezan annou get serten legzanp kot Zezi ti revel kalite son Papa par son kondwit. Kan en lepre ti sipliy Zezi pour geri li, Zezi ti tous sa zonm ki ti “kouver avek lalep” e i ti dir li: “Mon oule, vin prop.” Apre son gerizon sa lepre ti kapab vwar lanmen Zeova dan sa ki Zezi ti’n fer. (Lik 5:12, 13) Kan Lazar ti mor “leker [Zezi] ti touse e i ti emosyonnen” e i “ti plere.” Sa ti fer son bann disip konpran ki Zeova i osi annan konpasyon. Kantmenm Zezi ti konnen ki i ti pe al resisit Lazar, i ti santi menm douler ki fanmir ek zanmi Lazar ti pe santi. (Zan 11:32-35, 40-43) Petet ou osi ou annan en resi prefere dan Labib ki fer ou santi mizerikord Zeova atraver kondwit Zezi, pa i vre?

11. (a) Ler Zezi ti sas bann dimoun dan tanp, kwa ki sa ti revele lo son Papa? (b) Akoz sa i rekonfort nou?

¹¹ Ki ou aprann atraver sa resi kot Zezi ti sas bann dimoun dan tanp? Mazin sa senn: Zezi ti fer en fwet avek lakord e i ti sas tou bann ki ti pe vann mouton ek bef. I ti savir latab bann sanzer larzan e fann zot larzan ater. (Zan 2:13-17) Sa kouraz ki i ti annan pour met lord dan tanp ti fer son bann disip rapel sa ki Lerwa David ti dir: “En gran devouman pour ou lakaz i brile dan mwan.” (Ps. 69:9) Sa aksyon ki Zezi ti pran i fer nou konpran ki i ti annan devouman pour defann vre ladorasyon. Eski ou kapab vwar personnalite Zeova atraver sa resi? Sa ki Zezi in fer, i rapel nou ki Zeova pa zis annan tou pouvwar pour retir mesanste lo later me i osi annan sa gran dezir pour fer li. Reaksyon Zezi anver mesanste i osi montre nou ki mannyer Zeova i santi ler i vwar tou sa kantite keksoz mal ki pe arive partou lo later ozordi. Pa sa i vreman rekonfort nou kan nou pe fer fas avek lenzistis!

12, 13. Ki ou aprann lo Zeova par lafason ki Zezi ti azir avek son bann disip?

¹² Zezi ti osi revel son Papa dan lafason ki i ti azir anver son bann disip. Zot ti pe toultan diskite lekel ki ti pli enportan parmi zot. (Mark 9:33-35; 10:43; Lik 9:46) Vi ki Zezi ti’n pas en kantite letan avek son Papa, i ti konnen ki mannyer Zeova i santi konsernan lorgey. (2 Sam. 22:28; Ps. 138:6) I ti’n osi vwar sa move tandans dan Satan. Satan i egois e i kontan laglwar ek pozisyon. Alor, Zezi ti’n bezwen vreman dezapwente kan i ti vwar sa move tandans dan son bann disip ki i ti’n ansennyen. I ti menm vwar sa move tre dan son bann zapot ki i ti’n swazir. Zot ti kontinyen demontre sa leta lespri anbisye menm ziska sa zour ki Zezi ti mor. (Lik 22:24-27) Pourtan Zezi ti kontinyen reprimann zot dan en fason zantiy san perdi lespwar ki zot kapab sanze e imit son limilite.​—Fili. 2:5-8.

¹³ Eski ou vwar sa zoli kalite ki Zezi ti revele lo son Papa par lafason ki i ti reprimann son bann disip avek pasyans? Dan sa ki Zezi ti dir e fer, eski ou vwar Zeova konman en papa ki pa pou abandonn son pep malgre zot kontinyen fer fot? Ler nou reflesir lo sa bann kalite ki Zeova i annan, pa sa i pous nou pour apros li e senserman demann li pardon kan nou fer fot?

 GARSON TI SWAZIR POUR REVEL SON PAPA

14. Ki mannyer Zezi ti swazir pour revel son Papa?

¹⁴ Bann diktater i esey kontrol e gard zot pep dan linyorans par kasyet lenformasyon avek zot. Par kont Zezi ti swazir pour revel avek tou dimoun tou sa ki i ti konnen lo son Papa. (Lir Matye 11:27.) Deplis, Zezi ti donn son bann disip “lentelizans pour konn sa enn ki vre,” setadir Zeova. (1 Zan 5:20) Ki sa i vedir? Zezi ti ouver lespri son bann disip pour zot kapab konpran sa ki i ti pe ansenny zot lo son Papa. I pa ti fer li difisil pour lezot konn son Papa par ansenny zot bann krwayans konplike parey Trinite.

15. Akoz Zezi pa ti dir son bann disip tou keksoz lo son Papa?

¹⁵ Eski Zezi ti revel tou sa ki i ti konnen lo son Papa? Non, i ti montre ki i ti saz pour pa dir zot tou keksoz. (Lir Zan 16:12.) Akoz? Parski sa letan, son bann disip pa ti pou ‘kapab siport tou’ sa bann lenformasyon. Me parey Zezi ti eksplike, zot ti pou ganny bokou konnesans ki ti pou “gid zot dan laverite an antye” kan “Konsolater,” setadir lespri sen, ti pou arive. (Zan 16:7, 13, nou ki’n met an italik.) Zis parey en paran ki annan lasazes i kapab pa dir son zanfan serten keksoz ziska ki i vin pli gran e pli konpran, Zezi ti espere ziska ki son bann disip ti vin matir e pare pour konpran serten keksoz lo Zeova. Avek labonte, Zezi ti pran an konsiderasyon zot limit.

IMIT ZEZI PAR ED LEZOT APRANN KONN ZEOVA

16, 17. Akoz ou sa dimoun ki pli byen kapab revel Zeova avek lezot?

¹⁶ Letan ou fer zanmi avek en dimoun e ou aprann konn son zoli personnalite, pa ou ganny sa lanvi pour koz lo li avek lezot? Kan Zezi ti lo later, i ti koz lo son Papa. (Zan 17:25, 26) Eski i posib pour nou imit li par revel Zeova avek lezot?

¹⁷ Parey nou’n vwar, Zezi ti annan en konnesans pli o profon lo son Papa ki nenport ki dimoun. Pourtan, i ti pare pour partaz serten keksoz ki i ti konnen avek son bann disip. I ti menm swazir pour donn zot sa kapasite pour byen konpran bann keksoz ki ti pli profon lo personnalite Bondye. Eski pa atraver Zezi nou’n kapab konn nou Papa plis ki laplipar dimoun? Pa nou vreman apresye ki Zezi ti swazir pour revel son Papa avek nou volonterman atraver son lansennyman ek son kondwit! Anfet, nou kapab fyer akoz nou konn Bondye. (Zer. 9:24; 1 Kor. 1:31) Vi ki nou’n fer bokou zefor pour apros avek Zeova, Zeova in apros avek nou. (Zak 4:8) Alor, nou pli byen kapab partaz sa ki nou konnen avek lezot. Dan ki fason nou kapab fer sa?

18, 19. Dan ki fason ou kapab revel nou Papa avek lezot? Eksplike.

¹⁸ Nou devret imit Zezi par revel Zeova atraver nou parol ek aksyon. Nou bezwen osi gard antet ki bann ki nou zwenn dan predikasyon pa konnen lekel li Bondye. I posib ki sa bann fo lansennyman ki zot in gannyen lo Bondye i fer ki zot pa vreman konnen lekel li. Nou kapab partaz avek zot sa ki nou konnen lo non Bondye, son plan pour imen ek sa ki nou konnen lo son personnalite parey Labib i dir. Deplis, nou kapab diskit lo serten resi dan Labib avek nou bann frer ek ser Kretyen ki revel personnalite Bondye dan en fason ki nou pa ti konnen. Si nou fer sa, zot osi zot pou kapab benefisye.

¹⁹ Ki ou panse konsernan revel nou Papa atraver ou kondwit zis parey Zezi ti fer? Kan dimoun i vwar ki nou kontan Zezi atraver sa ki nou fer, zot pou ganny atire ver Zeova ensi ki Zezi. (Efe. 5:1, 2) Zapot Pol i ankouraz nou pour ‘imit li parey i’n imit Kris.’ (1 Kor. 11:1) Pa i en gran privilez pour ed lezot dimoun aprann konn Zeova atraver nou kondwit! Annou kontinyen imit Zezi par revel son Papa avek lezot.

[Not anba lo paz]

[Kestyon]