Abraam en zonm ki ti annan lanmour

Abraam pa pe kapab tenir. Sara, son madanm byenneme in mor. Sa zonm aze i mazin en kantite souvenir inoubliyab anmezir i dir son dernyen adye. Son larm i koule anmezir i vin pli tris. (Zenez 23:1, 2) I pa kanmi ouswa anbarase pour plere, plito, sa bann larm i montre en lot kalite remarkab e sa se son lanmour.

KI SI SA LANMOUR? Lanmour i ler ou vreman atase avek en dimoun ouswa annan en gran lafeksyon pour li. En dimoun ki annan lanmour i demontre par son aksyon ki mannyer i santi anver sa bann ki i kontan, menm si sa i kout li bokou.

DAN KI FASON ABRAAM TI DEMONTRE LANMOUR? Abraam ti montre ki i ti kontan son fanmir. San dout, Abraam ti annan en kantite keksoz pour fer. Pourtan, i pa ti zanmen negliz bezwen emosyonnel e spirityel son fanmir. Anfet, Zeova li menm ti remarke ki konman sef lafanmir, Abraam ti pran linisyativ an rapor avek ladorasyon. (Zenez 18:19) An plis ki sa, Zeova ti koz lo lanmour Abraam. Letan Zeova ti pe koz avek Abraam lo Izaak, I ti dir: “Ou sel garson Izaak ki ou vreman kontan.” ​—Zenez 22:2.

Nou osi remark lanmour Abraam atraver son reaksyon kan Sara, son madanm byenneme ti mor. Abraam ti plere akoz Sara ti mor. Menm si i ti kouraze e i ti en zonm, Abraam pa ti per pour montre ki i ti dan lapenn. Abraam i en zoli legzanp en dimoun ki kapab demontre kouraz ek ladouser an menm tan.

 Abraam ti montre ki i ti kontan son Bondye. Lafason ki i ti viv son lavi antye i montre ki sa ti le ka. Ki mannyer i ti fer sa? Petet nou pou rapel ki 1 Zan 5:3 dan Labib i dir: “La lanmour Bondye: ki nou obei son konmannman.” Abraam ti en legzanp remarkab an rapor avek sa verse. I ti kontan Bondye.

Toultan, ler Zeova ti donn Abraam en lord, deswit Abraam ti obeir. (Zenez 12:4; 17:22, 23; 21:12-14; 22:1-3) Pour Abraam, i pa ti en problenm si sa ki Zeova ti demann li pour fer ti fasil oubyen difisil, ouswa si i ti konpran pour ki rezon Zeova ti pe demann li pour fer li. Pour Abraam, sa bann pti detay pa ti enportan. Si se son Bondye ki ti anvi i fer en keksoz, i ti pare pour fer li. Abraam ti konsider sak lord Bondye konman en loportinite pour demontre son lanmour pour Zeova.

KI LESON NOU TIRE? Nou kapab imit Abraam par demontre en gran lafeksyon pour lezot, sirtou nou manm fanmir. Nou pa devret zanmen les presyon lavi anpes nou pas letan avek sa bann ki nou vreman kontan.

Nou bezwen osi devlop en lanmour senser pour Zeova. Sa kalite lanmour i kapab annan en gran lefe lo nou lavi. Par egzanp, pour ki nou fer Bondye plezir, lanmour i kapab pous nou pour sanz nou latitid, fason koze ek kondwit. ​—1 Pyer 1:14-16.

I vre ki i pa touzour fasil pour obeir lord Zeova. Me nou kapab asire ki sa Enn ki ti ed Abraam, sa Enn ki ti apel li “mon zanmi,” pou en sipor pour nou osi. (Izai 41:8) Son Parol Labib i promet ki i pou fer ‘ou ferm, i pou fortifye ou.’ (1 Pyer 5:10) Pa sa i en zoli promes sorti kot Zanmi Abraam ki diny konfyans!

[Bwat lo paz 10]

Eski i en febles pour en zonm plere?

Bokou dimoun ti pou dir wi. Petet zot pou etonnen pour aprann ki Abraam, en zonm kouraze, ti enn parmi bann plizyer zonm fidel ki Labib i dir ki zot ti plere dan bann moman difisil. Zozef, David, zapot Pyer, bann ansyen dan kongregasyon Efez e menm Zezi osi ti plere. (Zenez 50:1; 2 Samyel 18:33; Lik 22:61, 62; Zan 11:35; Akt 20:36-38) I kler ki Labib pa dir ki i en febles pour en zonm plere.